لينك التسجيل الصوتي للمقالة علي Sound Cloud:
https://soundcloud.com/user-112011687-312727988/zara?si=ed5453bd56fb485984a9c50210bc605a
خليني أفتح نفسك للمقالة دي بإني أبدأ معاك بتقرير مسلي فشخ إسمه بحث الدخل والإنفاق لسنة 2017/2018 طلع من الجهاز المركزي للتعبئة والإحصاء والتقرير ده بيقول إن متوسط إنفاق الأسرة المصرية في السنة 51,000 جنيه .. يعني في الشهر 4,250 جنيه .. ده معناه إن المجتمع بتاعنا مجتمع فيه حاجة بايظة .. ده معناه إن فيه نسبة قليلة أوي من المجتمع معاها فلوس كتير فشخ وناس كتير فشخ معهاش فلوس لدرجة إنك لما تيجي تجيب إجمالي الإنفاق لكل المصريين تقسمه علي عدد السكان يطلع إن في المتوسط إنفاق الأسرة المصرية في الشهر ميبجبش ثمن ساعة Samsung Galaxy .. لو بصيت علي الرسم البياني اللي عندك حتلاقي إن خامس حاجة من حيث الأهمية المصريين بيصرفوا عليها فلوسهم هي الهدوم .. بالضبط 4.8% من إجمالي مصاريف الأسرة المصرية في السنة رايحة علي الهدوم .. أتمني إنك تكون أخدت بالك إن إهتمام المصريين بالصرف علي الهدوم أكبر من إهتمامهم بالصرف علي التعليم .. الإحصائية دي لوحدها توريك إن إحنا محتاجين نتكلم عن إزاي المصريين بيشتروا هدومهم؟ .. هنا حيجي الكلام عن هو إنت لما تحب تشتري هدوم بتروح فين؟
لنفترض إنك محلتكش اللضا .. إنت شاب لسه متخرج من الجامعة وشغال جونيور في شركة ما بتاخد يوم ما تبقي الدنيا وردي معاك 3,000 جنيه في الشهر .. ساعتها لو إنت في القاهرة فالعتبة والموسكي هم وجهتك اللي بتعمل ليهم رحلتا الشتاء والصيف زي كفار قريش .. لو إنت إسكندراني فشارع فرنسا في المنشية فيه شوية هدوم بتتباع علي الرصفان لقطة .. لو إنت بقي من اللي ربنا فاتح عليهم واللي بيسموا مرتبهم Salary يبقي إنت من المحاظيظ اللي عشان يشتروا هدومهم بيعملوا Shopping في مول العرب أو مول مصر وبتروح تدور علي محلات Zara و H&M و LC Waikiki .. بتروح تدور علي طقم وتبقي مبسوط فشخ لو لقيت تي- شيرت وبنطلون دافع فيهم 700 جنيه .. لو إنتي بنت فال700 جنيه دول يدوبك يجبولك بلوزة مقطعة من Zara وبتبقي محتاجة تصرفي قدهم مرتين تلاتة عشان تكملي الطقم .. لو إنت/إنتي من المحاظيظ دي وفاكر نفسك إنك أوتيت من المال ما لم يؤت أحد من قبلك فإعلم إنك شحات .. أيوه زي ما سمعتني .. إنت شحات .. حضرتك المحلات والبراندات اللي إنت بتلاقيها في مول مصر ومول العرب دي كلها علي بعضها شاكب راكب بتتحط تحت فئة حاجة إسمها فاست فاشون Fast Fashion .. عشان تفهم يعني إيه Fast Fashion حاول تتخيل الفرق بين الأكل اللي بتعمله الست والدتك وبين أكل الشارع.
أكل الست والدتك واخد وقته في العمايل .. المحشي ملفوف وواخد وقته .. المحشايية مليانة رز .. الفراخ واخدة وقتها في السوا .. الأكل لو فضل منه حاجة بتقدر تحطه في الثلاجة عشان تسخنه وتاكله بكره .. أكل الشارع معمول عشان تدفع فيه فلوس مش كتير وطعمه ميبقاش حلو أوي لإن الأهم فيه هو الكمية مش الجودة .. Quantity مش Quality .. المهم إنك تشبع مش إنك تتمزج .. والأهم إنك بتجيبه عشان تاكله في وقتها وتبقي بتعمل في معدتك جريمة لو فضل منك باقي وحطيته في الثلاجة عشان تسخنه لبكره .. أهو Fast Fashion دي هي أكل الشارع .. لسه مفهتمش أنا عارف.
محلات زي Zara و LC Waikiki شغلها مبني علي إنهم بيبصوا لدور الأزياء العالمية زي جوتشي Gucci ودولشي أند جابانا Dolce & Gabbana ويسرقوا التصميمات بتاعتهم ويعملوا زيها بحيث إن الهدوم اللي تتباع عندهم تتعمل بسرعة وتتباع برخص التراب ومتقعدش في دولابك كتير لإنها مش معمولة عشان تدوم .. اللي هو بمعني أخر أكل الشارع .. أكل الست والدتك هو شركات الهدوم الكبيرة اللي بتتسمي هاي فاشون High-Fashion ودول أكبر أمثلة ليها شركات زي جاب GAP وليفايز Levi’s وتومي هيلفيجر Tommy Hellfiger وكالفن كلاين Calvin Klein اللي علي فكرة الإتنين دول اللي هم Tommy Hellfiger و Calvin Klein بتملكهم شركة واحدة إسمها PVH .. شركات High-Fashion دي كلها بيتها بيتخرب من اللي بتعمله شركات Fast Fashion … حالياً لو سألت أي حد بيشتغل في البورصة مين أكبر شركة هدوم في العالم دلوقتي؟ فالإجابة حتكون بلا منازع شركة إنديتيكس Inditex ودي تبقي الشركة الأم اللي بتملك سلسلة محلات Zara .. مهم تكون فاهم إن الثقافة بتاعة الناس اللي عملت Zara هي إنهم محدثي نعمة.
عارف انت التشبيه ده؟ .. التشبيه ده لما ناس تبقي بحكم إن معهمش فلوس كتير تكفي إن يبقي ليهم إهتماماث ثقافية بس فجأة ربنا يفتح عليهم ويبقوا أغنياء فشخ فتلاقيهم بيدّعوا الثقافة مع إنهم شوية بهايم .. عارف إنت (محمد رمضان) كده .. مؤسس Zara إسمه (أمانسيو أورتيجا Amancio Ortega) برده من الناس دي .. الرجل ده رصيده في البنك 70 مليار دولار وده لوحده بيخلي (أورتيجا) اللي بيغني مهرجانات يزعق ويتنطط أنا صح أنا صح أنا إخترت الإسم الصح .. الحقيقة إن سبب إنك مسمعتش عن (أمانسيو أورتيجا) قبل كده اللي يعتبر سابع أغني رجل في العالم هو إن الرجل ده مش عايز حد يعرف هو مين .. مجرد إنك تبص علي Career بتاعته حتكتشف ليه هو مش عايز حد يعرف عنه حاجة؟ .. الرجل ده محدث نعمة ولإنه عارف ده كويس فهو مش عايز يتفضح .. صدقني أنا مش بظلمه أو بتنمر عليه أنا بس بشرحلك إزاي دماغ الرجل ده هي اللي شكلت البيزنس بتاع شركته وده اللي خلاها تبقي هي النامبر وان في الموضة دلوقتي وخليني أفهمك براحة.
البيزنس بتاع Fast Fashion عموما واللي عشان تفهمه أوي خليني أركز علي Zara قايم علي طريقة تفكير محدثي النعمة اللي هو تقدر تلخصه في نقطتين:
إحنا مش فاضيين نخترع .. قلد وبيع وإكسب:
سنة 1975 الأخ (أمانسيو أورتيجا) فتح أول فرع لZara وكان إسمه زوربا Zorba مش Zara .. ده خلق مشكلة .. عارف هي إيه؟ .. (أمانسيو أورتيجا) مكنش فاضي يفكر في إسم لدرجة إنه سمي محل الهدوم بتاعه علي نفس إسم البار اللي فاتح جنبه .. طبعاً صاحب البار إشتكي فالبلدية أجبرت (أمانسيو أورتيجا) إنه يغير الإسم ولإنه مفيهوش دماغ يفكر في إسم سيكسي فقالك خلاص سميه Zara .. مش بس الإسم اللي كان تقليد .. الهدوم كمان كانت تقليد .. عشان شركة زي جوتشي Gucci مثلاً تنزل موديلات جديدة فاللي بيحصل كالأتي .. هم بيقولوا إن والله إحنا عندنا علي مدار السنة سيزون الصيف وسيزون الشتاء مثلاً .. قبل سيزون الصيف بكام شهر مصممي الأزياء اللي في الشركة بيقفلوا علي نفسهم أوضة عشان يخلصوا رسومات وإستكيتشات التصميمات الجديدة ودي مرحلة التصميم Design .. بعدها بتيجي مرحلة شراء المواد الخام اللي حتتصنع منها التصميمات والمرحلة دي بتتسمي Sourcing .. المرحلة الثالثة هي مرحلة التصنيع نفسها أو Manufacturing .. المرحلة الأخيرة هي التوزيع Distribution .. عشان حضرتك تفتح التليفزيون علي MBC2 تنقيلك فيلم تتفرج عليه وإنت بتاكل فبالغلط تجيب قناة عليها عرض أزياء فخليك عارف إنك قبل ما تقلب القناة لإنك مقتنع بإن عرض الأزياء لا يستحق إنه يعطلك عن أكلك إن الفساتين والهدوم اللي بتتعرض في عرض الأزياء ده عشان إنت تشوفها قعدت 21 شهر بتتعمل .. لو إنت مهندس فإنت بتخلص مشروع كامل من أول الDesign لحد Shop-Drawing وكمان Coordination وبتخش في التنفيذ كمان في فترة متجيش 21 شهر .. إنت متخيل .. تخيلت؟
اللي عملته Zara إنها قالت لنفسها إيه الهري ده كله؟ .. هم عملوا مدرسة جديدة إسمها Quick Response Manufacturing .. إحنا مش حنشغل بالنا إننا نجيب مصممين أزياء يعملولنا Designs جديدة إحنا حنسرق التصميمات اللي بتنزلها شركات High-Fashion .. ومش حندفع دم قلبنا عشان نجيب مواد خام غالية وحنخلي في المصانع بتاعتنا Stock محترم من مواد خام جودتها مش عالية أوي ورخيصة .. ومش حنفضل نصنع موديلات وخلاص إحنا حنصنع بس التصميمات اللي عجبت الناس بحيث إننا نسرع من عجلة التوزيع .. إذا كانت شركة High-Fashion عشان تنزل موديلات جديدة بتحتاج 21 شهر فشركة زي Zara بتحتاج 4 شهور بس .. طب ده بيترجم لإيه في الواقع؟ .. واحدة من أغرب المواقف اللي حصلت لما (كيم كارداشيان Kim Kardashian) اللي أنا شخصياً مش فاهم هي مشهورة ليه؟ .. دي ولا بتغني ولا بتعرف تمثل .. كل اللي هي بتعمله بتطلع تتصور وهي مش لابسة وده اللي حصل فعلاً .. هي لبست فستان من تصميم واحد إسمه (ثيري موجلير Thierry Mugler) خلي الإنترنت مفيهوش سيرة غير إزاي هي لبست الفستان ده؟ .. تاني يوم كانت سلسلة محلات فاشون نوفا Fashionnova منزله فستان شبهه عشان يتباع ب50 دولار بس.
نقلد اه .. لكن نسرق .. ليه شايفنا حرامية؟
لو حضرتك رحت لمحل حاجات رياضية ولقيت تي- شيرت ريال مدريد الجديد وعليه اللوجو بتاع أديداس Adidas بس التيكيت مكتوب عليه إن التي- شيرت بيتباع ب200 جنيه مش بألف وشوية زي ما حتلاقيه في محل بيع أديداس في مول العرب أو مول مصر فساعتها التي- شيرت ده إنت بتقول عليه هاي- كوبي .. الحقيقة إن ده إسمه كاونتر- فيتس Counterfeits مش هاي- كوبي .. كلمة Counterfeits هي إن مصنع تحت بير السلم يعمل تي- شيرت نسخة طبق الأصل من تي- شيرت ريال مدريد وكمان يحط عليه اللوجو بتاع ريال مدريد وأديداس .. قانوناً Counterfeits دي جريمة يعاقب عليها القانون .. اللي بتعمله محلات Fast Fashion هي إنهم بيقلدوا .. أنا بعملك تي- شيرت شبه تي- شيرت ريال مدريد بس بدل ما أحط عليه اللوجو بتاع أديداس بحط اللوجو بتاع زارا مثلاً .. ده إسمه نوك-أوف Knockoff .. فكرة إنك بتقلد مش إنك بتبتكر بتخليك تقدر تمشي علي سياسة إسمها Dynamic Assortment اللي هي بمنتهي البساطة إحنا لينا ناس مبتعملش حاجة في حياتها غير إنها قاعدة علي Social Media عشان تشوف إيه الفستان أو إيه الطقم اللي لبسته الممثلة أو الممثل الفلاني وعجب الناس جداً فنشوف التصميم بتاعه ونعمل زيه ونبيعه .. ده معناه إن كل يوم إنتي بتروحي Zara حتلاقي عندهم موديلات جديدة .. إذا كانت شركات High Fashion عندهم سيزونين بس في السنة فشركات Fast Fashion عندهم 52 سيزون في السنة.
طب كل ده معناه إيه؟ .. معناه إن شركات Fast Fashion بتصنع كم فشيخ من الهدوم كل سنة عشان تفضل تجيب فلوس .. شركة Inditex لوحدها اللي بفكرك إنها الشركة الأم اللي بتملك سلسلة محلات Zara سنة 2018 صنعت 1.5 مليار قطعة ملابس عشان يتباعوا في 7,490 فرع ليهم علي مستوي العالم .. سباق التصنيع ده خلي شركات High Fashion هي كمان تفكر في إنها تصنع هدوم بشكل أسرع عشان تعرف تنافس محلات Fast Fashion .. ده معناه إن السوق حيتملي هدوم والهدوم دي عشان تتعمل بتحرق طاقة .. لك أن تتخيل إن خلال سنة 2018 شركات تصنيع الهدوم بسم الله ماشاء الله طلعت كمية غاز ثاني أكسيد كربون في الجو أكتر من الكمية اللي بتطلعها كل الطيارات وكل السفن اللي بتتحرك علي مستوي العالم مجموعين علي بعض .. بلاش دي .. إنت عارف إن جاكت قطن واحد من اللي حضرتك بتتنيل تلبسه عشان يتعمل بيستهلك 10,330 لتر مياة؟ .. حتي لو قلت لنفسك إن ضميري بينقح عليا ومش حلبس حاجة معمولة من القطن فأحب أقولك إن حتي الألياف الصناعية زي البولي- إيستر والنايلون وغيرها عشان تتصنع فإنت في السنة الواحدة بتحرق 342 مليون برميل بترول .. طلعلك إختراع جديد إسمه فيسكوس Vescos ودي مادة صناعية برده بيتعمل منها الهدوم فإكتشفنا إن مش بس 33% من الفيسكوس اللي موجود في السوق جاي من حرق الأشجار إنما كمان أكتر من 70% من الشجر اللي إحنا بنحرقه بيترمي في الزبالة.
أنا عارف إن أنا أخر حد ممكن يتكلم في الموضة .. الحقيقة إن 99.9% من الرجاله مبيفهموش في الموضة .. لو إنتي بنت بكره الصبح روحي شغلك إسألي كل الرجاله اللي معاكي في الشغل عن لونهم المفضل في الهدوم إيه حتلاقيهم كلهم بلا إستنثاء رايحين في سكة الغوامق من أول الأزرق والرمادي لحد الإسود .. إحنا كرجاله أهم حاجة عندنا إن هدومنا تبقي مريحة وتدفينا في الشتاء ومتحررناش في الصيف .. غير كده كلها شكليات .. هو بنطلون جينز وتي شيرت ولو الدنيا بردت فوقها جاكت تقيل شوية وتحس نفسك (ظافر العابدين) زمانك .. الدور والباقي عليكوا أنتوا يا بنات .. اللي أهم من الطقم إكسسوارات الطقم .. أول خطوة هي البلوزة ولازم ننقي البادي والبنطلون اللي يا تري قماشته حتبقي إيه ويبقي نهار أزرق لو صاحبتك إقترحت عليكي تلبسي البلوزة علي جيبة ومشوار التدوير علي الطرحة ده بيبقي يوم أسود من أوله .. مشوار التدوير علي الهدوم ده بيبقي صداع في دماغ أي حد .. لو إنت رجل فبيبقي أسود ولو إنتي بنت متجوزة فبيبقي يوم أزرق علي دماغ جوزك .. الموضة جزء من شخصية البني أدم .. أنا فاهم ده كويس وعمري ما حقول لحد إنه ميهتمش بأدق التفاصيل وهو بيشتري هدومه .. هدومك هي Facebook Profile بتاعك أو What’s App Status هي اللي بتوري الناس إنت مين.
قد يكون رأيي ده سطحي فشخ من وجهة نظر ناس بس فكر فيها وإنت حتلاقي إن عندي حق خصوصاً في المجتمع والزمن اللي إحنا عايشين فيه دلوقتي .. لو إنتي بنت Under-Age فإنتي عايزه تباني بنت كبيرة فوق مستوي سنك .. لو إنت ولد Under-Age فإنت متخيل إن اللوك بتاع مغنيين المهرجانات هو اللي حيخليك تجيب رقم البنت Under-Age اللي إنت بتكراش عليها .. لو إنتي بنت كبيرة بتبصي علي لبس بنت Under-Age فإنتي غالباً بيجيلك صدمة نفسية ولو إنت ولد كبير فإنت حاسس إنك عجزت بدري لما بتلاقي بنت Under-Age بتبص علي لبسك وتقولك يا أونكل.
أديك فهمت لما بتروح Zara أو H&M فالهدوم اللي إنت بتشوفها دي جاية منين؟ .. اللي فعلاً بيطلع عينه وسط كل ده هي البنت المحجبة .. فكر فيها كده .. دلوقتي Zara بتسرق تصميماتها من شركات كبيرة أخر حاجة بتفكر فيها هي إنها تصمم هدوم لأي بنت محجبة .. إنت كرجل بتروح LC Waikiki تتكسي وتمشي .. لكن هي بتفضل تلف علي خمسين محل عشان تكمل طقم .. كنت دايماً بسأل نفسي هو ليه Zara متعملش قسم للمحجبات اللي هو إنتي بنت محجبة تدخلي المحل تطلعي بطقم كامل من أول جزمتك لحد طرحتك بس إكتشفت إن السر إن المحلات دي مش متصممة إنها تعمل كده .. هم بيقلدوا ومش بيفكروا .. مش بيحددوا مين اللي معاه فلوس أو إيه الفئة اللي ممكن يوفرولها اللي هي عايزاه .. ده مش البيزنس بتاع Zara .. لو إنتي بنت محجبة فقلبي معاكي والله يا بنتي .. ولو إنت ولد فشد حيلك بقي عشان البلاك فرايداي و LC Waikiki أكيد عامل عروض.
المصدر:
- حلقة من برنامج Patriot Act with Hassan Minhaj بتتذاع علي قناة Netflix وده لينك الحلقة علي YouTube لو حبيت تتفرج عليها:
http://www.youtube.com/watch?v=xGF3ObOBbac
