الحكاية بدأت سنة 1997 .. في السنة دي الدوري الأميريكي لكرة القدم أو MLS ودي إختصار Major League Soccer كان لسه بيحبي زي الطفل الصغير .. الأمريكان عشان بتوع بيزنس بيسموا النادي اللي بيلعب في الدوري فرانشايز Franchise .. تحس إن أكلهم من ماكدونالدز كتير عمل حاجة في طريقه تفكيرهم .. المهم إن من ضمن محاولات MLS إنه يكبر ويتوسع فإفتتحوا ناديين أو فرانشايز في ولاية اسمها فلوريدا اللي تعتبر أهم مدينة فيها هي ميامي Miami ولو إسم Miami عدي عليك بس مش فاكر فين فدي المدينة اللي بتدور فيها أحداث سلسلة أفلام Bad Boys .. الناديين كان إسمهم ميامي فيوجن Miami Fusion وتامبا باي مويتيني Tampa Bay Mutiny .. لما جت سنة 2001 الناس بتوع MLS إكتشفوا إنهم لبسوا نفسهم في الحيط .. ماشتات الفرقتين تذاكرهم مش بتتباع .. مفيش أي رعاة أو Sponsors عايزين يحطوا فلوسهم في الناديين دول بالذات وده اللي أجبر MLS إنهم يلغوا المشروع ويقفلوا الناديين.
زي ما قلتلك هم بيتعاملوا مع MLS زي ما يكون ماكدونالدز وله فروع في حتت كتير ولما يلاقوا إن فيه فرع معين مش بيجيب فلوس بيتقفل .. بس إنت مهم تفهم هي المشكلة فين؟ .. ليه نادي Miami Fusion إتقفل؟ لإنك لو مفهتمش ده كويس مش حتقدر تستوعب الهدف من المقالة دي .. (كين هورويتز Ken Horowitz) مالك نادي Miami Fusion خسر في المشروع ده 11.5 مليون دولار وده سنة 2001 كان رقم خزعبلي .. فتاني مهم تفهم إن الفلوس مش كل حاجة وإن بيزنس الأندية الرياضية بالذات الدنيا فيه مش زبادي خلاط اللي هو أنا معايا فلوس يبقي ضمنت النجاح.
الأندية عاملة زي بناء العماير السكنية كده .. مينفعش تقول أنا عملت عمارة شكلها حلو أوي وصارف ومكلف علي الواجهة بس ومش مهتم بالأساسات وصرف الحمامات بايظ والحيطان منشعه مياة .. الأساس بتاع أي نادي في الدنيا هو قطاع الناشئين ودي حاجة لا نادي Miami Fusion ولا نادي Tampa Bay Mutiny إهتموا بيها .. لو أنا إبني مبيلعبش في النادي في قطاع الناشئين فأنا مش حشجع النادي .. ولو مش حشجع النادي فأنا مش حروح أتفرج علي ماتشاتهم في الاستاد ولو مرحتش أتفرج علي الماتشات في الاستاد فمفيش فلوس حتخش للنادي .. الشركات بتشوف الاستاد فاضي فمش بتحط فلوس في الإعلانات .. جمعية ودايره يابا.
نقطة تانية مرتبطة بطبيعة ولاية فلوريدا نفسها .. دي ولاية أغلب اللي عايشين فيها ناس علي المعاش .. لسبب ما يمكن بسبب الحوافز اللي بتديها الولاية لدور رعاية المسنين بس نسبة كبيرة من سكان الولاية ناس من مدن وولايات مختلفة طلعوا علي المعاش وبيقضوا اللي فاضل من عمرهم في فلوريدا ودي ناس أخر حاجة بتفكر فيها هي الكورة خصوصاً إن كرة القدم رياضة مش معروفة أوي في أميركا وقتها بالذات .. زود علي كده إن حتي المهاجرين المكسيكيين اللي عايشين في فلوريدا واللي بيتنفسوا كورة للأسف كل واحد فيهم بيشجع نادي تاني في بلده المكسيك فمش معني إن الولاية في أميركا اللي هاجرت ليها إتعمل فيها نادي فأنا من يوم وليلة حسيب النادي اللي أنا بشجعه من سنين وأشجع النادي إبن امبارح ده .. سامعني يا (تركي أل شيخ) .. إنت مستوعب اللي أنا بقوله؟
لما جت سنة 2012 متفهمش مين صحي فكرة إن يتفتح فرانشايز تاني لMLS في ميامي؟ .. الكلام كان إن نادي برشلونة الإسباني بيفكر يعمل نادي إسمه ميامي برشلونة .. من 2009 وفيه رجل أعمال بوليفي أميريكي اسمه (مارسيلو كلاوري Marcelo Claure) بيحاول يبقي سمسار الصفقة بين برشلونة و MLS بس اللي نسف الصفقة من أساسها إن الناس بتوع MLS كانوا لسه لحد وقتها مكانوش شايفين إن الظروف اللي بسببها نادي ميامي فيوجن أو نادي تامبا باي ميوتيني قفل متغيرتش .. بس في نفس الوقت كان فيه حاجة تانية بتحصل .. حاجة الناس بتوع MLS فعلياً مكانوش متخيلين إنها حتحصل وحتي لما حصلت قدامهم مكانوش مصدقين .. الناس بدأت تتكلم عن MLS والسبب كان صفقة العمر اللي عملها نادي إل إيه جالاكسي LA Galaxy سنة 2007 لما إشتروا (ديفيد بيكهام David Beckham) .. مهم تكون فاهم إن سنة 2007 قبل ما يبقي فيه الخناقة بين (ليونيل ميسي Lionel Messi) و(كريستيانو رونالدو Cristiano Ronaldo) ف(بيكهام) كان المعلم بتاع الإعلانات .. ده أول لاعيب كورة يبدأ يفتح عينين الناس إن ممكن لاعيب الكورة نفسه يبقي براند Brand أو ماركة .. ناس كتير كانت بتشجع (بيكهام) .. فيه ناس بقت بتشجع مانشستر يونايتد عشان خاطر (بيكهام) .. شعبية ريال مدريد نطت في العالم بسبب إنهم إشتروا (بيكهام) .. لما LA Galaxy إشتروه فجأة شركة أديداس Adidas بجلالة قدرها جريت وراهم عشان تبقي هي Sponsor بتاع تي- شيرتات النادي ودفعت 20 مليون دولار علي الطرابيزة وكاش.
هنا MLS إقتنعوا إن ربنا بعتلهم هدية من السما ولازم يمسكوا فيها بإيديهم وسنانهم عشان كده هم شخصياً إتدخلوا في عقد (بيكهام) عشان يضيفوا نقطة في عقده مع LA Galaxy بتقول إنه لما يبطل كورة فمن حقه إنه يفتح فرانشايز لMLS في أي مدينة تعجبه في أميركا إلا نيويورك و(بيكهام) مش حيدفع أكتر من 25 مليون دولار بس .. إنت متخيل يقولوله إحنا مستعدين نخليك تفتح نادي ب25 مليون دولار؟ .. بس يمكن لإن وقتها في 2007 محدش كان متخيل إن البراند بتاعة MLS حتكبر أوي كده.
في فبراير 2014 بقي واضح إن (بيكهام) قدامه فرصة العمر .. خلاص MLS بقي براند ماسك نفسه وإتعرف في العالم كله .. مبلغ 25 مليون دولار ده ولا حاجة وشوية فكة قصاد الملايين اللي حتجيله لو فتح الفرانشايز الجديدة .. (بيكهام) أسس مجموعة استثمارية سماها Miami Beckham United وكان فيها كذا شريك .. هو شخصياً ومعاه زي ما تقول كده دريم تيم من ناس معاها فلوس وكمان بتفهم في البيزنس والأهم من كل ده إن فيهم ناس بتفهم في كرة القدم:
- (مارسيلو كلاوري) وده زي ما جبت سيرته في المقالة دي هو اللي سعي إنه يقنع إدارة برشلونة إنها تفتح فرع ليها في ميامي بس الصفقة متمتش .. الرجل ده عنده شركة اسمها برايتستار Brightstar شغالة في نظم المعلومات وتقريباً ثروته بتتقدر ب700 مليون دولار بس فلوسه مش أهم حاجة في CV بتاعه .. سنة 2008 الرجل ده مسك نادي بوليفار Bolivar يمكن أكبر نادي في بوليفيا .. خبرته دي حتخليه هو اللي حيمسك منصب رئيس النادي.
- إتنين رجال أعمال كوبيين أميريكيين إخوات اساميهم (جوزي ماس Jose Mas) و(خورخي ماس Jorge Mas) والإتنين دول مهاجرين من كوبا وعايشين في ميامي وحافظينها حتة حتة ونفر نفر .. الإتنين الإخوات دول حيبقوا ضمن مجلس الإدارة.
- يمكن أهم واحد في الليلة بعد (بيكهام) هو رجل الأعمال (ماسايوشي سون Masayoshi Son) وده أنا جبت سيرته قبل كده لما إتكلمت عن صناديق الثروة السيادية وجبت سيرة البنك اللي هو بيرأسه سوفت بانك Softbank .. الرجل ده ثروته بتتقدر ب700 مليار دولار علي حسب تقييم مجلة فوربس الأميريكية وده بيخليه ثاني أغني رجل في اليابان وكمان رقم 45 كأقوي شخصية علي مستوي العالم.
- شغل كرة القدم حيشيله مدير قطاع الكورة وده اللي حيمسكه واحد اسمه (بول ماكدوناه Paul McDonough) وده كان ماسك نفس المنصب في نادي أميريكي تاني اسمه أتلانتا يونايتد وده شغله حيكون حول إزاي يبني فرقة الكورة بتاعه نادي إنتر ميامي.
- رجل أعمال بريطاني اسمه (سايمون فولر Simon Fuller) بس الرجل ده (بيكهام) إشتري حصته في الشركة في يناير 2019 ومبقاش ضمن المشروع خلاص.
كانت المشكلة اللي بتواجه Miami Beckham United تقدر تلخصها في كلمة واحدة .. الاستاد .. ماتشات الفرقة دي حتتلعب فين؟ .. من 2014 لحد 2018 و (بيكهام) في مفاوضات مش بتخلص مع بلدية ولاية فلوريدا .. أخيراً في يناير 2019 الأطراف كلها وصلت لإتفاق .. الإتفاق كان ببساطة شخلل عشان تعدي .. شركة Miami Beckham United تعهدت إنها حتدفع 15.5 مليون جنيه إسترليني علي مدي 30 سنة في عمليات تطوير شاملة لكل الحدايق العامة في مدينة ميامي .. الفكرة كلها في إنك إزاي تقرب من الناس وتقنعهم إنك مش جاي تسرق المجتمع بتاعهم .. نقطة إتحسبت لصالح (بيكهام) لما الناس شافت شعار النادي الجديد .. جنوب فلوريدا بيعيش فيها طائر نادر اسمه Herons أو بلشونيات وده طائر مش بيعيش إلا في الحتة دي بس .. الشعار الجديد للنادي إتحط فيه إتنين من الطائر ده رابطين رجليهم في بعض وعلي فكرة الناس كلها لما شافت الشعار الجديد إفتكرت إن الطائر ده هو طائر الفلامينجو بس أهل فلوريدا كانوا عارفينه كويس .. الشعار فيه شمس طالع منها 7 أشعة وده عشان رقم (بيكهام) في تي- شيرت مانشستر يونايتد ومنتخب إنجلترا كان 7 .. الألوان نفسها بتاعة الشعار البينك والأبيض والإسود بتعبر فشخ عن دماغ أهل فلوريدا .. أهل البلد شافوا الشعار وقالوا لنفسهم خلاص (بيكهام) ده إبننا.
نادي إنتر ميامي Inter Miami وده بقي الإسم الرسمي للفرانشايز الجديدة مؤقتاً حيلعب في استاد لوكهارت Lockhart Stadium وده نفس الاستاد اللي فرقة Miami Fusion لعبت فيه في الأربع مواسم اللي قضوها في الدوري .. ده استاد صغيور كده يدوبك يساع 18,000 متفرج بس أهو يقضي الغرض مؤقتاً .. مجموعة Miami Beckham United حتصرف أكتر من 50 مليون دولار بس علي عمرة كاملة للاستاد عشان يفتتح رسمياً يوم 14 مارس 2020 في أول ماتش لنادي إنتر ميامي في الدوري الأميريكي وحيبقي قصاد نادي LA Galaxy .. إنت أخدت بالك إني قلت إن استاد لوكهارت حيبقي استاد مؤقت؟ .. لمدة سنتين إنتر ميامي حيلعبوا علي الإستاد ده لحد ما الاستاد الرئيسي بتاعهم Miami Freedom Park يفتتح واللي بيساع 25,000 متفرج وبعدها استاد لوكهارت حيبقي معمول للتدريبات .. تصميمات الاستاد الجديد فعلاً تجنن .. استاد معمول علي مساحة 31 فدان بتكلفة 752 مليون جنيه إسترليني .. سقف الاستاد حيبقي بار مفتوح مزروع فيه نخيل .. الاستاد حيتعمل فيه فندق فيه 750 أوضة .. قدام الاستاد حتتعمل حديقة عامة عشان الناس اللي معهاش تذاكر تتفرج علي الماتش في شاشات عملاقة.
تبقي مشكلة النادي من دلوقتي ولسنين قدام هي فرقة الكورة .. النادي المفروض إنه حيلعب أول ماتش ليه في الدوري في مارس 2020 ولسه الفرقة مكملتش .. المفروض إن لوائح MLS بتقول إن فيه مسطرة مرتبات كل الأندية ماشيه عليه باستثناء 3 لاعيبة لكل نادي .. ده معناه إن إنتر ميامي له الحق إنه يشتري 3 لاعيبة من بره و يديهم المرتبات اللي هم عايزينها .. واحد من 3 لاعيبة دول هم إتعاقدوا معاه فعلاً اللي هو (ماتياس بيليجريني Matias Pellegrini) وده Playmaker أرجنتيني عنده 19 سنة إنتر ميامي إشتروه من نادي إيستودينيانتيس الأرجنتيني ب7 مليون جنيه إسترليني .. ده معناه إن فاضل إتنين لاعيبة إنتر ميامي حيشتريهم من أوروبا عشان يبقوا العمود الفقري للفرقة لسنين قدام.
السر كله في كلمة عمود فقري .. إنت عايز لاعيبة جعانة كورة عشان تنقل إنتر ميامي للمستوي الأعلي مش مجرد لاعيبة عايزه تنهي الCareer بتاعها في أميركا .. أسامي كتير إتقال إنهم حيجوا النادي .. إتقال إن (بيكهام) إتكلم مع (واين روني Wayne Rooney) بس طبعاً بعد ما هو مضي عقد مع نادي ديربي كاونتي عشان يبقي لاعيب ومساعد مدرب فهو خلاص مش رايح .. إتقال إن (بيكهام) بيتكلم مع (أنتوان جريزمان Antoine Griezmann) خصوصاً بعد ما مستواه في برشلونة حالياً مش قد كده والجماهير غضبانه عليه .. بس يمكن عشان أكبر جنسية للمهاجرين اللي عايشين في ميامي هم الناس اللي جايه من كولومبيا فلو حتبصلها من وجهة نظر البيزنس تبقي صفقة سوبر لو (بيكهام) عرف يقنع (راداميل فالكاو Radamel Falcao) أو (جيمس رودريجيز James Rodriguez) إن واحد فيهم يجي أميركا .. لوتسألني أقولك يا ريت يجيب (رودريجيز) لإن لسه عنده 28 سنة وجعان كورة علي عكس (فالكاو) اللي عنده 33 سنة ومش لاقي نفسه في جالاطا سراي التركي .. اللي أهم من اللاعيبة كمان هو المدير الفني .. مين حيمسك إنتر ميامي بداية من الموسم الجاي؟ .. إتقال إن (بيكهام) إتكلم مع (تييري هنري Thierry Henry) وإتكلم مع (جينارو جاتوزو Gennaro Gattuso) بس يمكن أهم اسمين هو مقتنع بيهم هم (ديفيد مويس David Moyes) اللي هو شايف إنه إتظلم لما مشي من مانشستر يونايتد خصوصاً إنه مسك بعد الأسطورة السير (أليكس فيرجسون Alex Ferguson) .. الثاني هو (كارلو أنشيلوتي Carlo Ancelotti) اللي (بيكهام) بيحبه جداً خصوصاً بعد الفترة اللي هم قضوها سوا في باريس سانجيرمان.
من 2014 و(بيكهام) بيسف التراب عشان حلمه يتحقق وأخيراً في مارس 2020 النادي بتاعه حيلعب أول ماتش ليهم في الدوري الأميريكي الممتاز .. حلم إتولد من رماد نادي ميامي فيوجن بس (بيكهام) مش بس عايز يعمل نادي جديد .. لا ده عايز يبقي عنده استاد متكلف 750 مليون جنيه إسترليني .. عايز يشتري أحسن لاعيبة أوروبا عشان تروح تلعب في أميركا .. حلم عشان يتحقق إتكعبل كتير ولسه حيتكعبل أكتر قدام بس خليني أكون صريح معاكوا إني فرحان جداً باللي بيعمله (بيكهام) ويمكن يبقي عندنا في يوم من الأيام لاعيبة كورة زيه .. لاعيب كورة لما يعتزل ميبقاش كل هدفه إنه يطلع يحلل ماتشات وياخدله قرشين إنما يكون عنده حلم إن ليه لا ميعملش الحاجة بتاعته؟ .. مش يمكن لما يعمل يلاقي نفسه بيعرف؟
المصدر:
- مقالة بعنوان A $750m stadium in the works, brand Beckham behind them and a billionaire boardroom looking to sign star players. Here’s everything you need to know about MLS new boys Inter Miami نشرت في جريدة The Daily Mail وده لينك المقالة الأصلية:
https://www.dailymail.co.uk/sport/football/article-7682305/All-need-know-MLS-new-boys-Inter-Miami.html
عاش