تعديل اتعمل يوم 9 ديمسبر 2020 .. الباك الشمال لفرقة ليستر سيتي (بين تشيلويل Ben Chilwell) اتباع في الميركاتو الصيفي لموسم 2020-2021 لفرقة تشيلسي.
انا من الناس المقتنعة جدا بان مينفعش تقول علي فرقة كورة انها فرقة حلوة من غير ما يبقي عندها عمود فقري مبيتغيرش .. لو انت المدير الفني للفرقة دي العب في التشكيله براحتك .. هاجم .. اركن الاوتوبيس .. العب 3-5-2 او 4-4-2 علي كيفك .. بس العمود الفقري للفرقة متجيش جنبه .. الفرقة اللي انا عايز اتكلم عنها النهاردة هي ليستر سيتي و قبل ما اكلمك عن العمود الفقري بتاعها خليني اوريك قد ايه الفرقة دي الموسم ده تحت ايد المدير الفني (بريندون رودجرز Brendon Rodgers) فعلا فرقة فشيخة .. خليني اوريك ده في جملة واحدة .. فاكر موسم 2015-2016 اللي ليستر سيتي خدوا فيه الدوري الانجليزي؟ اهو ليستر الموسم ده وادينا في الاسبوع ال16 اهو معاهم نقاط اكتر من النقاط اللي كانت معاهم في الاسبوع ال16 من الموسم اللي خدوا فيه الدوري .. ليستر سيتي حاليا هم تاني الدوري بعد ليفربول .. فرقة لعبت 16 ماتش جابت فيهم 39 جون و مدخلش فيهم الا 10 جوان .. صحيح ان الموسم ده هو مش بينافس علي الدوري بس خليني ابقي منطقي جدا واقولك ان ليستر سيتي ان شاء الله يعني حتشوفه في بطولة Champions League الموسم الجاي .. كده انت وصلك اني بتكلم عن فرقة الموسم ده عامله اداء حلو اوي .. تعالي بقي اكلمك عن العمود الفقري بتاعها.
حراسة المرمي فيها واحد من احسن حراس المرمي اللي انت ممكن تتفرج عليهم في العالم دلوقتي (كاسبر شمايكل Kapser Schmeichel) .. صحيح الاعلام مش بيتكلم عنه كتير بس لو انت سالتني مين احسن خمس حراس مرمي في العالم دلوقتي فغالبا الواد ده حيكون واحد فيهم .. قدامه قلبين دفاع فاهمين بعض زي ما انت فاهم الانتيم بتاعك كده اللي هم (جوني ايفانز Jonny Evans) و (شالار سوينجو Caglar Soyuncu) وده لاعيب تركي علي فكرة .. دفاع ليستر الموسم ده ماسك نفسه لدرجة ان في 16 ماتش مدخلش فيهم الا 10 جوان بس وبكده هم بسم الله ما شاء الله اقوي دفاع في الدوري الانجليزي .. انت فعليا مش حاسس ان ليستر سيتي باع (هاري ماجواير Harry Maguire) لمانشستر يونايتد .. قلب الفرقة هو لاعيب الارتكاز بتاعهم النيجيري (ويلفريد انديدي Wilfred Ndidi) .. اللاعيب ده ليسترسيتي اشتروه من فرقة اسمها جينك بتلعب في الدوري البلجيكي ب15 مليون جنيه استرليني في يناير 2017 عشان يبقي بديل الهانتي كانتي (نجولو كانتي N’Golo Kante) .. الموسم ده اغلب ماتشات ليستر سيتي بيلعبوها بطريقة 4-1-4-1 بحيث يبقي عندك رباعي خط الظهر قصادهم (انديدي Ndidi) في واحد من اعلي المواسم اللي لعبها في حياته لحد دلوقتي .. دور (انديدي Ndidi) فعلا مهم لان شغلته انه يقطع الكورة و يباظيها تاني لفرقته عشان يبنوا هجمة .. لحد دلوقتي هو اكتر لاعيب ارتكاز في الدوريات الاوروبية الخمسة الكبيرة اتكعبل علي الكوره (61 مرة) و اكتر لاعيب في الدوريات الاوروبية الخمسة الكبيرة قطع الكورة (37 مرة) .. يبقي عيبه الوحيد انه لاعيب متطلبش منه انه يخلق فرص .. (انديدي Ndidi) مشكلته انه معندوش اي قدرة علي التخيل .. هو اللاعيب الموظف .. لحد دلوقتي هو معملش اي Assist وحتي نسبه تمريراته الناجحة مش قد كده اوي يدوبك هي 84.2% .. بس اذا كان هو مبيعرفش يخلق فرص فهو اكتر حد ممكن تلعب قدامه بيعرف يكعبل اللاعيبه من غير ما ياخد انذار .. (انديدي Ndidi) الموسم ده عامل 19 فاول وده رقم عالي فشخ بس في 14 ماتش لعبهم لحد دلوقتي مخدتش غير انذار واحد ودي ميزة حلوة اوي في لاعيب لسه صغير يدوبك عنده 22 سنة.
رباعي خط الهجوم ده فعلا جوهرة و الحق يتقال ان (رودجرز Rodgers) عرف يوظفهم صح فشخ .. علي ايدك اليمين حتلاقي الجناح (ايوزي بيريز Ayoze Perez) واللي قاري دماغ الباك اليمين (ريكاردو بيريرا Ricardo Pereira) وعاملين جبهة يمين حلوه جدا .. علي ايدك الشمال حتلاقي الجناح (هارفي بارنز Harvey Barnes) و اللي برده عامل مع الباك الشمال (بين تشيلويل Ben Chilwell) جبهه شمال محترمه اوي .. خط الهجوم قايم علي الثنائي الفشيخ (جايمي فاردي Jamie Vardy) و (جيمس ماديسون James Madison) .. (فاردي Vardy) الموسم ده ما شاء الله عليه جايب 16 جون وهداف الدوري الانجليزي .. فيه كمان معاهم لاعيب خط نص مهاجم عالي اوي اسمه (يوري تيليمانز Youri Tielemans) ابقي حط عينك عليه لان مستقبله حلو اوي .. كورة القدم الحديثة بتتعامل مع الفريق كانه حاجه واحدة .. (فاردي Vardy) عمره ما كان حيبقي مكنة الجوان دي الا اذا الباكين اليمين و الشمال بيتقدموا كتير .. الباكين سواء (بيريرا Pereira) او (تشيلويل Chilwell) عمرهم ما كانوا حيتقدموا بقلب جامد كده الا اذا كانوا متطمنين ان (انديدي Ndidi) حيغطي وراهم .. فرقة ليستر سيتي السنة دي ما شاء الله عالية اوي و يارب يكملوا علي كده لحد اخر الموسم .. يمكن لولا ان ليفربول مبيخسرش و ماشية معاهم زي السكينة في الجاتوه كنت زمانك بتتفرج علي سباق بين ليستر سيتي و ليفربول علي صدارة الدوري بدل ما هو ليفربول شارخ كده و محدش عارف يحصله.
المصدر:
مقالة بعنوان Wilfred Ndidi is the driving force behind Leicester’s surge up the table نشرت في جريدة The Guardian وده لينك المقالة الاصلية:
https://www.theguardian.com/football/who-scored-blog/2019/nov/26/wilfred-ndidi-leicester-premier-league
