الإستثمارات الصينية في أوروبا .. إنك تبعزق فلوسك بس بتفتيح مخ.

لينك التسجيل الصوتي علي ساوند كلاود:
https://on.soundcloud.com/wkF5p

مفيش حد مش عارف إن الصين فاتحاها علي البحري في إستثماراتها في كل حتة في العالم .. الصينيين عمالين يصرفوا ومشغلين أغنية بعزقة بعزقة وهم بيصرفوا مليارات في مشاريع في أفريقيا وأسيا وأميركا الجنوبية .. اللي يمكن محدش بيتكلم عنه كتير هو حجم الإسثتمارات الصينية في أوروبا .. عشان أنا شخصياً مبحبش الكلام المُرسل فخلينا نتكلم بشوية أرقام .. خلال 10 سنين اللي فاتوا الصينيين صرفوا 318 مليار دولار كإسثتمارات مباشرة في أوروبا اللي هو المفروض ننزلهم كوميكس مين (تركي أل شيخ) ناو .. خلال ال10 سنين اللي فاتوا دول حجم الفلوس اللي الصين حطتها في أوروبا أكتر ب45% من الإستثمارات الأميريكية هناك .. الصينيين حطوا فلوسهم في كل حتة .. إستثمارات في مشاريع بنية تحتية Infrastructure في شرق وجنوب أوروبا .. إستثمارات في مشاريع تكنولوجية متقدمة في غرب أوروبا .. الصين بقت في كل حتة في أوروبا لدرجة إن المستشارة الألمانية (أنجيلا ميركل Angela Merkel) والرئيس الفرنسي (إيمانويل ماكرون Emmanuel Macron) بإعتبارهم أقوي شخصيتين في أوروبا بقوا شايفين إن اللي بيحصل ده تهديد للأمن القومي الأوروبي .. في المقالة دي حنحاول نجاوب علي شوية أسئلة مهمة عشان الصورة تبانلك صح عن حقيقة اللي بيحصل.

هم الصينيين حاطين فلوسهم في إيه بالضبط؟

مبدأياً كده المشكلة مش في إن الصين حاطه فلوس كإستثمارات في أوروبا .. مش دي المشكلة .. ألمانيا وفرنسا من الدول اللي بتهتم أوي بمين حاطط فلوسهم في إقتصادهم والإتنين معندهمش مشكلة في المبدأ بتاع إن الصين تستثمر فلوس عندهم .. هي المشكلة في الكم والنوعية .. خليني أديلك مثال .. بداية من 2008 لحد دلوقتي يعني بتتكلم عن 8 سنين فيه 678 صفقة تجارية يا إتعملت فعلاً يا إتوافق عليها وإتنشرت تفاصيلها المالية علي النت والصفقات دي إتعملت في 30 دولة أوروبية .. لو بصيت حتكتشف إن الشركات الصينية سواء كانت قطاع عام أو خاص كانت حصتها ضمن ال678 صفقة دول شغل إتقدرت ب225 مليار دولار .. ده بالنسبة للكم .. بالنسبة للنوعية بتاعة الصفقات دي فإنت لو بصتلهم فعلياً وأنا مش بهزر حتتخض .. فيه 360 شركة أوروبية خلاص إتباعوا لشركات صينية ومن ضمن الشركات دي مثلاً شركة عملاقة زي شركةبيريلي Pirelli & C. SpA الإيطالية اللي بتصنع كاوتش العربيات ومن ضمنهم شركة تأجير طيارات زي أفالون القابضة  Avolon Holdings Ltd ودي شركة أيرلندية .. فيه 4 مطارات و 6 موانيء بحرية في أوروبا يا مملوكين بشكل جزئي أو كلي لشركات صينية .. فيه 6 محطات كهرباء بطاقة الرياح برده مملوكين لشركات صينية ده غير إن فيه 13 نادي كرة قدم في أوروبا جزء من أسهمهم في البورصة مملوك لشركات صينية.

مهم تكون فاهم إني قلت عن المعلومات دي إنهم عن ال678  صفقة اللي إحنا عارفين تفاصيلهم لإن فيه صفقات تانية سرية إحنا منعرفش عنهم حاجة زي مثلاً 355 عملية إدماج Merger لشركات أوروبية مع شركات صينية .. بالميت خالص الصفقات من النوع ده لو حبيت تحسب تكلفتها شاكب راكب فإنت بتتكلم عن 13.3 مليار دولار .. اه نسيت إنت كمان لازم تضيف عمليات المضاربة في البورصات الأوروبية يعني إنت كده محتاج تضيف كمان 40 مليار دولار .. يوه يقطعني نسيت كمان أقولك إن فيه 9 مليار دولار إنت محتاج تضيفهم لإن دول ثمن الحصة اللي شركة Zhejiang Geely Holding Group Co الصينية اللي بتصنع عربيات جيلي Geely إشترتها من أسهم شركة Daimler AG ودي تبقي الشركة اللي بتملك شركة ميرسيديس بينز Mercedes-Benz.

هل فيه حاجات معينة الصينيين بيحبوا يشتروها في أوروبا؟

الصينيين بيملكوا عقارات بالهبل في أوروبا بس هم بيموتوا في شراء العقار في العاصمة البريطانية لندن .. هم ليهم أكتر من 12 برج إداري خصوصاً في منطقة البنوك في لندن اللي بتتسمي كاناري وارف Canary Wharf .. بعد شراء العقار يجي شراء الشركات .. الصينيين ماشيين بمبدأ شرا العبد ولا تربيته .. هم بيروحوا علي شركة أوروبية متخصصة في حاجة معينة يقوموا شاريينها وواخدين حصتها أو Market Share بتاعها في السوق .. سنة 2016 شركة الكيماويات الوطنية الصينية ودي شركة قطاع عام معروفة بإسم ChemChina إشترت شركة تصنيع المبيدات الحشرية السويسرية Syngenta AG مقابل 46.3 مليار دولار .. في المتوسط خالص أي صفقة بتتعمل بين الشركات الصينية والشركات الأوروبية بتتكلم في Range فلوس 127 مليون دولار.

الحاجات اللي بتشتريها الصين في أوروبا سواء كانت شركات أو عقارات بتختارها بعناية وبفكر إستراتيجي بيهتم بالتفاصيل .. من بره يبان إن الصين مركزة أوي علي إنها تشتري حاجات جوه أقوي 5 إقتصاديات في أوروبا اللي هم إنجلترا وفرنسا وألمانيا وإيطاليا وإسبانيا .. مجرد إنك تعرف إن حجم الإستثمارات الصينية في إنجلترا معدي ال70 مليار .. بس في نفس الوقت أكبر مشروع بنية تحتية عملته الصين في أوروبا كان شراءهم لأكبر موانيء أوروبا اللي هو ميناء بيرايوس Piraeus اليوناني .. ليه هم عملوا كده؟ .. عشان لما تيجي ألمانيا وفرنسا يتفقوا مع بعض زي ما قلت في البداية إن جه الوقت يعملوا حاجة عشان يقللوا شوية من نفوذ الصين في أوروبا تطلع دول زي اليونان والبرتغال وقبرص تقولهم لا بقي طب إنتوا دول إقتصادها قوي ومعاها فلوس إنما إحنا محتاجين الفلوس اللي بتجيبها الإستثمارات الصينية .. كل ده عشان في الأخر باب الإستثمارات الصينية في أوروبا ميتقفلش.

إستثمارات الصين في أوروبا متوزعة علي حسب البلد اللي هم بيحطوا فلوسهم فيها شاطرة في إيه .. لما بيروحوا لندن بيشتروا عقار لإن سعر العقار في لندن أعلي من دبي وبيجيب فلوس أعلي من أي إستثمارات عقارية في أي حتة تانية في العالم .. لما بيروحوا ألمانيا بيشتروا شركات صناعية متقدمة زي لما إشتروا حصة محترمة من Mercedes-Benz أو لما إشتروا شركة كوكا Kuka AG أحسن شركة في العالم بتصنع Robots .. لما فكروا يحطوا فلوس في الدول الإسكندافية إشتروا شركة العربيات السويدية Volvo Personvagnar AB  .. لما راحوا يحطوا فلوسهم في سويسرا إشتروا شركة Addax Petroleum Corp واحدة من أكبر شركات البترول في العالم.

إنك تفهم مين هي الشركات الصينية بالضبط اللي بتقرر تروح تحط فلوسها في أوروبا حتبدأ عن طريقه تفهم هي الصين بتفكر إزاي .. بداية من 2008 لحد دلوقتي فيه أكتر من 670  شركة صينية عملت Business في أوروبا .. الشركات الصينية دي فيه منها صيني 100% وفيه منها اللي مقره هونج كونج .. من ال670 شركة دول فيه منهم 100 إتصنفوا علي إنهم شركات قطاع عام أو صناديق إستثمارات والباقي شركات قطاع خاص .. خلال الفترة اللي أنا بتكلم عنها من 2008 لحد دلوقتي ال670 شركة دول عملوا صفقات ثمنها معدي 162 مليار دولار يعني بتتكلم عن 63% من إجمالي الصفقات التجارية اللي إتعملت في أوروبا .. بس في الصين الفرق بين شركات القطاع العام والخاص مش واضح زي عندنا في مصر .

خد عندك مثال بسيط أوي هو شركة Cosco Group ودي شركة شحن وحاويات صينية عملاقة .. هي تبان من بره شركة قطاع خاص بس لما تبص علي ورقهم تكتشف إن الشركة دي عبارة عن فروع شركات بتاعة شركة قطاع عام تانية إسمها China Ocean Shipping Group Co والشركة دي يا إما شارية أسهم أو بتشتغل من موانيء كتير أوي جوه أوروبا .. لو جيت تبص علي الصفقات اللي عملتها ال670 شركة صينية دول وجيت تعمل الTop 10 اللي هم أكبر 10 صفقات إتعملوا في ال8 سنين اللي فاتوا حتكتشف إن أضخم 8 صفقات من العشرة عملتها شركات قطاع عام أهمهم 3 شركات تقال أوي .. China Investment Corp وده صندوق إستثمارات عاملاه الحكومة الصينية عشان يستثمر فلوسه بره الصين .. شركة Aluminum Corp. of China Ltd ودي أكبر شركة ألمونيوم في العالم تقريباً .. وحاجة إسمها Silk Road Fund Co وده برده صندوق إستثمارات عاملاه الحكومة الصينية عشان يصرف علي المشاريع اللي ليها علاقة بمبادرة حزام واحد طريق واحد أو OBOR وإتكلمنا عن المبادرة دي كتير أوي قبل كده.

الصورة الكاملة لحجم الإستثمارات الصينية في أوروبا مش حتكمل في دماغك إلا لما تحط حاجتين قصاد بعض:

• إن ممكن شركة صيني شغالة في مجال تقوم شارية حصة محترمة من أسهم شركة أوروبية شغالة في مجال تاني خالص .. ده حصل لما شركة Ping An Insurance Group Co ودي شركة تأمين إشترت حصة من أسهم بنك HSBC Holdings Plc مقابل 10 مليار دولار.
• مشاريع المقاولات اللي بتعملها الشركات الصينية إنهم يشتروا أرض مهجورة في أوروبا يعملوها أي حاجة وأكتر حتة بتتعمل فيها المشاريع دي هي لندن .. من أمثلة المشاريع اللي زي دي مثلاً مشروع بناء محطة الطاقة النووية Hinkley Point C بتكلفة 24 مليار دولار واللي الصين شايلة 30% من تكاليفه .. مشروع تاني هو بناء مول تجاري في العاصمة الفرنسية باريس بتكلفة 4 مليار دولار واللي حتعمله شركة مقاولات صينية إسمها Dalian Wanda Group Co.

المستقبل جميل للإستثمارات الصينية في أوروبا .. هم شغالين علي مشروع بناء سلسلة محطات كهرباء بالطاقة النووية في رومانيا وبلغاريا .. عايزين يشتروا ميناء شحن في كرواتيا .. عايزين يبنوا ميناء بحري كامل في السويد .. ماشيين في سكة إنهم يشتروا شركة العربيات التشيكية سكودا Skoda Transportation AS .. عايزين يشتروا شركة البترول والغاز الطبيعي بتاعة أيرلندا .. عايزين ياخدوا حصة من شركة Compagnie des Alpes ودي شركة فرنساوي بتصنع الSki Lift اللي هو العربيات اللي بتركبها عشان تطلع علي المنتجعات اللي فوق قمم الجبال .. عايزين يشتروا حصة من أسهم شركة الكهرباء الألمانية .. ماشيين في الموافقة إنهم يمولوا مشروع بناء كوبري في كرواتيا ومشروع خط سكه حديد يربط بين العاصمة المجرية بودابست وعاصمة صربيا بلجراد.

المصدر:

• مقالة بعنوان How China is Buying its Way into Europe يعني إزاي الصين بتشتري سكتها لجوه أوروبا .. نشرت في مجلة Bloomberg وده لينك المقالة الأصلية:
  https://www.bloomberg.com/graphics/2018-china-business-in-europe/