لو إنتي بنت بتشتغلي و حاسه إنك عايشه في مجتمع ذكوري متعفن فإستني لما تعرفي البنت اليابانية بيطلع عينها إزاي .. الموضوع بدأ يبان و الناس تتكلم عنه من فترة لما إتعمل تحقيق صحفي في محطة إخبارية يابانية إسمها نيبون تي في Nippon TV و زي ما تقول كده المجتمع الياباني إتصدم لما عرف إن أغلب شركات اليابان في مختلف القطاعات بتقول للستات ياريت يعني لو متسلبسيش نظارة نظر و كمان ياريت لما تيجي الشغل تلبسي جزمة بكعب عالي .. لما حتتفرج علي التقرير حتلاقي إن كل الشركات أيا كانت هم شغالين في إيه عندهم مبرر للحكاية دي .. من وجهة نظرهم الموضوع ملوش علاقة بالعنصرية أو إهانةالمرأة أو أي حاجة من الحاجات اللي الفيمينيست بيقولوا عليه ده .. لا خالص أنتوا ظالمينا يا جماعة .. شركات الطيران مثلاً قالتلك دي عشان سلامة مضيفة الطيران .. إفرض الطيارة دخلت في مطبات هوائية Turbulence و بقت بتترج في الهواء زي الخلاط مش ممكن النظارة تتكسر و تعور المضيفة الجوية؟ .. يا حراااام .. شركات الموضة و المكياج قالت إن لما الموظفة تلبس نظارة نظر فهي بكده بتخلي اللي قدامها مش شايف أوي تفاصيل Makeup اللي هي حاطاه .. لا و النبي .. محلات الهدوم و شركات خدمة العملاء Customer Service قالوا إن لو إنت زبون و بتتعامل مع موظفة لابسه نظارة نظر فإنت بتحس زي ما تكون كده إنها باردة و قاصده ترخم عليك و ده بيدي إنطباع وحش عن الشركة .. قول والله .. بس يمكن أغرب مبرر كان إن محلات الأكل اليابانية قالت إن الزي التقليدي للست اليابانية مفيهوش نظارة نظر و بالتالي مش مسموح للستات اللي شغاله في مطاعم إنها تلبسها .. علي فكرة فاصل النكد مخلصش .. هو أنا لحقت؟
في كوكب اليابان الشقيق لازم البنت تبان بمنظر معين المجتمع يوافق عليه و المجتمع هنا أنا قصدي به الرجل .. البنت اليابانية في المدرسة لازم شعرها يبقي أسود سواد الفحم ده معناه إنك مينفعش تصبغي شعرك و إنتي في المدرسة بأي لون مختلف و كمان لو ربنا خلقك لون شعرك مش أسود فإنتي بتبقي مُجبرة تصبغيه أسود .. الDress Code بتاع البنات في المدارس بيتسمي Black School Rules و كلمة Black هنا أو أسود ملهاش علاقة بالتفرقة العنصرية ضد السمر في أميركا أو أي حتة تانية .. كلمة أسود في الثقافة اليابانية إرتبطت بمفهوم تنشيف الدماغ إنك تبقي ماشي بشوية قواعد و مفاهيم قديمة و لسه محتفظ بيها و مش ناوي تغيرها فكلمة أسود في الثقافة اليابانية معناه الملتزم أو الصارم .. في المدارس اليابانية الDress Code بيشمل الطول المناسب للشعر .. بيشمل اللون المناسب لUnderwear بتاع البنت .. بيشمل الطول المسموح به للجيبة بتاعتها .. إياكش الدنيا تبقي درجة الحرارة فيها -40 مئوية فمش مسموح لأي بنت إنها تلبس شراب ستوكينج تحت الجيبة .. مجتمع غريب و إنت ممكن تشوف ده و تقول ما تحمدوا ربنا إنكوا عايشين في مجتمع شرقي .. مجتمع شرقي مش حيقولك تلبسي إيه أو متلبسيش إيه بس لو لقاكي لابسه حاجة هو مش موافق عليها حيتحرش بيكي .. بذمتك مش التحرش مش أحسن ما أقولك اللون المناسب لUnderwear بتاعك إيه؟ .. ناس تانية حتقول زي ما (لي) قالت في فيلم سور الصين العظيم ملناش دعوة يا (محيي) لما نبقي متطورين و إقتصادنا فشيخ زي اليابانيين نبقي ننتقدهم و نتريق عليهم .. أيا كان رأيك و أيا كانت دماغك مودياك فين في الموضوع ده فإنت مهم تفهم إن البنات في اليابان مش ساكتين.
أيا كان رأيك في تقاليد المجتمع الياباني خصوصاً فيما يتعلق بلبس البنات فعايزك تعرف إن البنت اليابانية أعلنت الحرب علي مجتمعها .. البنات في اليابان إتعدوا من فترة #MeToomovement و اللي إنتشرت في أميركا بعد ما الناس كلها عرفت فضايح المنتج (هارفي واينستين Harvey Weinstein) و اللي إتكلمت عنه في مقالة قبل كده و في اليابان عملوا حاجة شبهها إسمها #KuToomovement و دي عبارة عن إن البنات اليابانيات جابوا كلمة كوتسو Kutsu و اللي معناها جزمة و جابوا كلمة كوتسوو Kutsuu و دي معناها الألم و ركبوها علي Movement أو حركة .. اللي هي إسمها تقدر تقول عليه حركة ألم الجزمة .. #KuToomovement طلعت برا اليابان و وصلت لكوريا الجنوبية اللي صحيت الصبح علي منظر مذيعة في التليفيزيون بتقدم برنامجها الصباحي اللي شبه صباح الخير يا مصر عندنا و هي لابسة نظارة نظر .. يمكن الكومينت اللي بيعبر جداً عن اللي بيحصل في اليابان إن بنت يابانية بعد ما شافت التقرير الصحفي بتاع قناة Nippon TV راحت إشترت نظارة نظر جديدة و لبستها و راحت بيها الشغل و صورتها و حطت الصورة علي Twitter و كتبت كومينت هو بذمتكوا مش حاجة تخض لما تلبسي نظارتك و تشوفي كم الرجالة المريضة في دماغها في المجتمع اللي إحنا عايشين فيه ده؟
المصادر:
- مقالة بعنوان “It gives a cold impression”: Why Japanese companies ban female staff from wearing glasses نشرت في موقع Quartz وده لينك المقالة الأصلية:
https://qz.com/1743901/why-japanese-companies-ban-women-from-wearing-glasses/
- مقالة بعنوان #MeToo was sputtering in Japan until today, when two government officials resigned نشرت في موقع Quartz و ده لينك المقالة الأصلية:
http://1255240/metoo-was-sputtering-in-japan-until-today-when-two-government-officials-resigned/ - مقالة بعنوان Japan’s #KuToo movement is fighting back against regressive dress code for women نشرت في موقع Quartz و ده لينك المقالة الأصلية:
http://kutoo-movement-rejects-mandatory-high-heels-for-women/
