عارف لما حد يسألك مالك و تقوله إنك مضغوط شوية هل إنت فاهم يعني إيه مضغوط اللي إنت قلتها دي؟ .. طب لما حد يسألك مالك و تقوله إنك مجهد شوية فهل إنت عارف يعني إيه كلمة مجهد اللي إنت لسه قايلها؟ .. حقولك إنت بتبقي حاسس بإيه ساعتها .. كلمة إجهاد أو Stress دي كده زي ما أجي أقولك أنا عايزك تمسك كوباية مياة تفضل شايلها متتحركش .. فعلياً اللي أنا بقولك عليه ده مش صعب .. إنت فعلياً كل يوم بتملا كوباية مياة و بتشربها أكتر من مرة في اليوم .. إني أحطك تحت Stress مش معناها إني أخليك تعمل حاجة إنت مش متعود عليها .. لا خالص .. أنا بخليك تعمل حاجة إنت عارفها بس بخليك تعملها لعدد ساعات كتير أكتر من قدرتك علي الإحتمال .. لما أزود العيار عليك و تحس إن إيدك وجعتك من كتر ماسكة كوباية المياة ساعتها Stress بيتحول لحاجة تانية إسمها Distress .. في الهندسة بيتقالنا إن لو حتة حديدة فضلت أجهدها يعني أعرضها لStress أكتر من قدرتها علي الإحتمال فساعتها حتة الحديدة دي حيحصلها Failure .. كلمة Failure مش إن المادة تفشل زي ما إنت تسقط في إمتحان .. كلمة Failure إن لو مثلاً معاك حتة حديدة المفروض إنها ناشفة فمن كتر Stress اللي عرضتها ليه لو رميتها علي الأرض تتكسر .. أو من كتر ما أنا أجهدتها بقت تتني في إيدي زي ورق الكرتون .. المشكلة إن لما بني أدم أفضل أعرضه لStress أكتر من قدرته علي الإحتمال و يحصله Distress أو Failure فالبني أدمين مشكلتهم بتبقي مختلفة شوية.
في الأول إنت بتحس إن زي ما يكون إنت في أوضة عمليات بتعمل عملية جراحية من غير ما الجراح يديك بنج بس الفرق إن Distress بيخلي إحساس الألم الرهيب مش ألم في حتة في جسمك .. إنت بتحس بالألم ده في أفكارك و في دماغك و في تفكيرك و في ذهنك .. هو مش ألم جسدي زي وجع السنان كده .. لا ده ألم تاني خالص .. لو أنا فضلت أضغط عليك كمان و Stress إتحول لDistress و فضلت أضغط عليك كمان ساعتها الألم اللي في دماغك حيسمع في جسمك .. ساعتها إحساس إن مخك حينفجر بيتحول لإحساس إن جسمك كمان تعبان و التعب الجسماني الناتج عن التعرض لStress لفترات طويلة إنت بتقدر تشوفه في 6 حاجات:
- لو إنت بتتعرض لضغط نفسي كبير سواء في شغلك أو في حياتك الشخصية و وصلت لمرحلة إنك لما بتيجي تسرح أو تغسل شعرك و لقيت خصلات شعرك بتقع فإنت كده دخلت في مرحلة إن الضغط النفسي بدأ يسمع في جسمك .. تساقط الشعر الناتج عن الضغط النفسي ده بيسموه Telogen Effluvium و أنا مش دكتور فمتحاولش تخليني أنطقهالك .. بس متخافش .. الحالة دي مش خطر زي ما إنت متخيل و بمجرد ما حالتك النفسية بتتحسن بتلاقي تساقط الشعر ده إنتهي فإنت مش محتاج تجري علي دكتور جلدية تقوله إلحقني يا دكتور شعري بيقع أو تروح للعطار تقوله هاتلي تركيبة لتساقط الشعر.
- واحدة من مشاكل الضغط النفسي إنه بيزود في جسمك إفراز هرمون الكورتيزول Cortisol و الهرمون ده لو زاد بتلاقي غصب عنك إن فيه دهون بتتجمع في منطقة الوسط اللي هو الكرش يعني .. برده متقلقش .. مجرد إنك تمشي يومياً 30 دقيقة كفيل جداً إنه يرجع تاني يعدل إفراز الكورتيزول في دمك فمش عايزك تقلق.
- واحدة برده من مشاكل الإجهاد إنه بيبوظلك مواعيد نومك و حتي لو نمت فإنت مش بتعرف تاخد راحتك في النوم و دي نقطة محدش حيساعدك فيها إلا نفسك .. إنت ممكن تبدأ بإنك تضبط درجة حرارة الأوضة اللي إنت بتنام فيها بس الأهم من كل ده إن قبل ما تنام إياك تشرب أي كوباية شاي أو فنجان قهوة .. إبعد عن الكافيين خالص طالما إنت بصمت و إنت خارج من الشغل خصوصاً لو شغلك بيعملك Stress كبير.
- لو إنت شغلتك بتخليك تقعد علي مكتب قدام شاشة كومبيوتر بالساعات فإنت غالباً عندك مشكلة في ظهرك .. لو رحت كشفت عند أي دكتور حيقولك إنت لازم تقعد عدل علي المكتب و لازم متقعدتش كتير و كل نص ساعة قوم إتمشي .. غالباً كمان إنت بتسمع كلام الدكتور و غالباً برده إنت مش بتحس بأي تحسن في ظهرك و لو حالتك ساءت بتروح تاخد جلسات علاج طبيعي و برده غالباً مش حتجيب معاك نتيجة .. ده سببه إن وجع ظهرك ملوش علاقة بإنك بتقعد غلط علي المكتب أو إنك مش بتروح الجيم بليل .. المشكلة إنك مضغوط في شغلك .. حفهمك دي بتيجي ازاي .. حضرتك بيجيلك مديرك في الشغل يقولك كلمتين ملهومش لازمة يزعلوك .. لما بتزعل أو تتعصب أو تتنرفز و تاكل في نفسك و تحرق دمك فاللي بيحصل إن معدل تنفسك الطبيعي بيبوظ و لما ده بيحصل فده بيعمل Tension أو توتر في العضلات حول عمودك الفقري .. السر كله غير إنك حاول متتعصبش في شغلك إنك تتنفس بشكل طبيعي .. لما تقوم من علي مكتب متفضلش تتمشي .. حاول تعمل ستريتشات مع تمرينات تنفس تقدر تخش علي YouTube تتفرج عليها و صدقني حتحس بقرق كبير.
- فيه ناس كتير لما بتتضغط في شغلها مش بتاكل و لما مبتاكلش فإنت كده عندك مشكلة كبيرة .. محدش قال إنك متركزش في شغلك بس لو سمحت إعمل Alarm علي موبايلك عشان يفكرك إنك تاكل في مواعيد البني أدمين الطبيعين و إعمل Alarm يفكرك كل شوية إنك تشرب كوباية مياة.
- لو حضرتك كل شوية يجيلك دور برد فيمكن المشكلة مش إن الجو عندنا مش عارف هو عايز مننا إيه .. يمكن المشكلة إن الStress اللي إنت فيه مبوظ جهازك المناعي و السبب في كده هو هرمون الكورتيزول .. فلو إنت بيجيلك دور برد مزمن و إنت مش عارف فيه إيه فغالباً المشكلة إن حضرتك مضغوط في شغلك و في حياتك الشخصية.
المصادر:
- مقالة بعنوان 6 quiet signs stress is starting to affect your health نشرت في موقع Ladders و ده لينك المقالة الأصلية:
http://theladders.com/career-advice/6-quiet-signs-stress-is-starting-to-affect-your-health - دراسة علمية بعنوان Central adiposity and cortisol responses to waking In middle-aged men and women نشرت في مجلة علمية إسمها International Journal of Obesity و ده لينك الدراسة:
http://nature.com/articles/0802715 - دراسة علمية بعنوان Influence of psychological stress on upper respiratory infection – a meta-analysis of prospective studies نشرت في مجلة علمية إسمها US National library of medicine وده لينك الدراسة:
https://www.ncbi.nlm.nih.gov/pubmed/20716708
