الإخوة في وكالة NASA عشان دول ناس رايقة متشتغلش و هي مضايقة عملوا دراسة بيسألوا نفسهم سؤال حاول متتصدمش لما تسمعه .. هو إحنا بالصلاة علي النبي (عليه أفضل الصلاة و السلام) أحسن لينا إننا لما نيجي نعمل تليسكوب فضائي إننا نجمعه علي الأرض و نبعته زي ما هو كده علي متن صاروخ لمداره حول الكرة الأرضية؟ ولا الأحسن إننا نجمعه فوق في الفضاء؟ .. لحد ما تفكر في إجابة خليني أشرحلك هم الناس دي سألوا نفسهم السؤال اللي ملوش لازمة ده ليه؟ .. سنة 2021 و عليك خير حيتم إطلاق أكبر تليسكوب فضائي يعمله البشر لحد دلوقتي و حيسموه James Webb Space Telescope و إختصاراً بيتسمي JWST و التليسكوب ده إحنا باعتينه عشان يفضل يلف حول الأرض زيه زي أي قمر صناعي بس بدل ما القمر الصناعي بيصور الأرض فإحنا حنوجه الكاميرا بتاعة التليسكوب ده للفضاء عشان يصورلنا الكواكب البعيدة اللي ظروفها الجوية تسمح إن البشر يعيشوا فيها و اللي بتتسمي إيكزو بلانيت أو Exo-Planet و كمان يصورلنا إزاي المجرات القديمة بتتولد لإن بسبب بُعد المجرات دي عننا فلما الضوء بتاعها يوصلنا و نشوفها فإحنا فعليا مش بنشوف وضعها دلوقتي إنما بنشوف وضعها من ملايين السنين و ده اللي التليسكوب طالع عشان يصوره .. فعلياً التليسكوب ده بيتصنف علي إنه Mega-telescope لإنه حرفياً زي ما أنا لسه قايلك هو أضخم تليسكوب فضائي البشر يعملوه لحد دلوقتي.
الفكرة اللي بتتطبخ في دماغ المهندسين بتوع NASA عشان تفهمها تخيل إن التليسكوب ده زيه زي أي معدة هندسية بيتكون من أجزاء .. حاول تتخيل إن التليسكوب الفضائي ده شبه موتور عربيتك .. دلوقتي عشان موتور عربيتك أحطه في صاروخ فضائي فعندي حل من إتنين:
- الحل الأول إني أجمع الموتور كله هنا في الأرض و أحطه زي ما هو في الصاروخ و أطيره .. مشكلة الحل ده إن لو حصل مشكلة في الإطلاق إحنا حنشيل أوبح .. يا سيدي بلاش أفول علي نفسي و أقولك إن الصاروخ ينفجر بس إفرض إن و التليسكوب بيتفرد في المدار بتاعه بعد ما يطلع من الصاروخ تحصل مشكلة في زاوية المرايات بتاعته .. ساعتها حيبقي عندك تليسكوب متكلف فوق العشرة مليار دولار بس حتة خردة طايرة .. تاني مشكلة إنك حطيت نفسك تحت رحمة الوزن اللي يقدر الصاروخ يشيله فإنت حتبقي محكوم بحجم معين و وزن معين للتليسكوب بتاعك.
- الحل التاني إني أفك الموتور و أطلع كل حتة لوحدها .. أحط السلندرات و عمود الكامات في صاروخ و أطيرهم لوحدهم .. أحط كل الجلب و Oil Seals في صاروخ تاني و أطيرهم لوحدهم بحيث إن و هو في مداره يبقي عندك روبوتات و رواد فضاء يجمعوه .. ميزة الحل ده إني مش حبقي حاطط إيدي علي قلبي و أنا مطلع كل حتة لإن التجميع حيبقي فوق .. و حتي لو حصلت مشكلة بمنتهي السهولة حطلع صاروخ فيه قطع الغيار بدل اللي باظت .. ميزة تانية إني مش حبقي حاطط في دماغي سقف لأقصي وزن للتليسكوب عشان الصاروخ اللي هو طالع به مش حيشيله كله حتة واحدة .. مشكلة الحل ده في الطرابيزة اللي حتجمع عليها .. هو إنت مش لو حتجمع الموتور في ورشة حتحتاج طرابيزة عشان تشتغل .. في الفضاء برده إنت حتحتاج طرابيزة بس بيتقال عليها Platform و لازم الPlatform زيه زي طرابيزة الورشة يبقي ثابت مش بيتحرك .. صحيح الPlatform ده بيدور حول الكرة الأرضية بس مينفعش إنه يدور حول نفسه و مينفعش فجأة يميل بزاوية بشكل فجائي.
الدراسة بتاعه NASA حطت لنفسها سيناريو إن إفرض مثلاً حبينا نطلع تليسكوب فضائي طوله 20 متر .. عشان أحطك في الصورة فإنت بتتكلم عن تليسكوب يعتبر 3 أضعاف حجم تليسكوب JWST .. هم قالوا إن اول طلعة حتكون للطرابيزة اللي التليسكوب حيتجمع عليها اللي زي ما إتفقنا اسمها Platform و معاها إتنين Robotic Arm و دي الروبوتات اللي حتجمع أجزاء التليسكوب .. بعد كده حتتعمل 11 طلعة صاروخية عشان تشيل أجزاء التليسكوب المختلفة و كل حتة بتطلع الروبوتات بتجمعها في مكانها .. علي فكرة متتخيلش إن اللي أنا بهري فيه ده خيال علمي .. لا خالص .. محطة الفضاء الدولية اللي تعتبر أكبر حاجة من صنع البشر بتدور حول الكرة الأرضية إتجمعت في الفضاء عن طريق روبوتات .. تليسكوب هابل Hubble Space Telescope اللي لحد دلوقتي هو أكبر تليسكوب فضائي بيدور في مداره حول الأرض إتصلح و إتعملت له عمرة كاملة عن طريق إن روبوتات هي اللي صلحته .. السؤال دلوقتي هو مين أرخص؟ .. هل إني أجمع التليسكوب علي الأرض أرخص ولا إني أجمعه في مداره في الفضاء؟ .. المشكلة إننا لحد دلوقتي مش حنعرف نجاوب علي السؤال ده إلا إذا حبايبنا في NASA إتقالهم نفس الجملة اللي كان دايما يقولها كاتبن (ممدوح فرج) الله يرحمه .. ما تيجو نشوف.
المصادر:
- مقالة بعنوان We should just build giant telescopes in space نشرت في مجلة Wired و ده لينك المقالة الأصلية:
https://www.wired.com/story/we-should-just-build-giant-telescopes-in-space/ - بحث إتنشر عن وكالة NASA بعنوان NASA in-space assembled telescope (iSAT) study نشرت علي الموقع الرسمي لوكالة NASA و ده لينك البحث:
https://exoplanets.nasa.gov/exep/technology/in-space-assembly/iSAT_study/ - مقالة بعنوان NASA’s biggest telescope ever prepares for a 2021 launch نشرت في مجلة Wired و ده لينك المقالة الأصلية:
- https://www.wired.com/story/nasas-biggest-telescope-ever-prepares-2021-launch/
