(ماتياس دي ليجت) .. يا تري هو حاجة حلوة ولا حاجة وحشة؟

(ماتياس دي ليجت Matthijs De Ligt) من اللاعيبة اللي لما تفكر فيها تلاقي نفسك بتهرش في شعرك وإنت مش فاهم هو فيه إيه؟ .. من ناحية هو ثاني أغلي مدافع في العالم .. نادي يوفينتوس دفع فيه 75 مليون يورو قابلة للزيادة إنها تبقي 85.5 مليون يورو .. من ناحية تانية جت عليه فترة قعد شهر كامل مبيلعبش وكان قاعد دكة واللي بيلعب مكانه كأساسي هو (ميريه ديمرال Merih Demiral) و (دي ليجت) رجع يلعب تاني بس لما (ديمرال) إتصاب .. ناس تقولك إنه موهبة المستقبل وإنه شاب صاعد واعد متوعد وناس تانية تقولك ده مبالغ فيه .. ناس تقولك يا جدعان ده لسه أول موسم له في الدوري الإيطالي ومش أي لاعيب دماغه بتقدر تفهم دماغ واحد سباك زي (ماوريسيو ساري Mauricio Sarri) .. بس علي الناحية التانية ناس تقولك هو يوفينتوس دافع فيه دم قلبه عشان يصبر عليه؟ .. وسط الخناقة دي كلها اللي أنا متؤكد إن أي قعدة صحاب في بلاي ستيشن أو علي القهوة إتكلموا عنها إنتوا بتنسوا نقطتين مهمين أوي .. النقطة الأولانية إنك بتتكلم عن قلب دفاع وده مركز مش سهل خالص و تاني نقطة هي إنك بتتكلم عن لاعيب لسه عنده 20 سنة وخليني أفهمك إيه علاقة إنه بيلعب قلب دفاع وإن عنده 20 سنة بإنه مكنش عارف يلعب أساسي في فرقته رغم الفلوس اللي إتدفعت فيه بإني أسالك سؤال حاول تفكر فيه قبل ما تجاوب .. يا تري يا هل تري مين اللاعيبة قلوب الدفاع الجامدين زحليقة اللي انت تعرفهم دلوقتي اللي لما كان عندهم عشرين سنة كانوا أساسيين في فرقهم؟

الناس الدحيحة في الكورة ممكن تقولك عندك (ماتس هوملز Mats Hummels) أيام ما كان بيلعب في بروسيا دورتموند .. ناس تانية حتقولك فيه (جوزيه خيمينيز Jose Gimenez) الأوروجواياني اللي بيلعب قلب دفاع في فرقة اتليتيكو مدريد .. المدريستا حيزعقوا ويقولولك إيه يا عم متنساش الكابيتانو (سيرجيو راموس Sergio Ramos) .. جاهز إني أفاجئك؟ .. ولا واحد فيهم كان أساسي في فرقته لما كان عنده 20 سنة .. خد عندك (راموس) .. صحيح هو لعب شوية ماتشات كقلب دفاع لما كان عنده 19 و 20 سنة بس أتنقل يلعب باك يمين و ملعبش كقلب دفاع في ريال مدريد و منتخب إسبانيا الا لما بقي عنده 23 سنة  .. بجد والله .. مفيش ولا مدافع من الأسامي التقيلة اللي إنت تعرفها دلوقتي كان أساسي في فرقته وهو عنده عشرين سنة.

(فيرجيل فان دايك Virgil Van Dijk) لما كان عنده عشرين سنة كان بيلعب في فرقة كحيانة في الدوري الهولندي إسمها جرونينجين و مراحش ليفربول إلا لما بقي عنده 26 سنة بعد ما إتفحت شوية في أندية صغيرة زي سيلتيك الأسكتلندي و ساوثهامبتون الإنجليزي .. (كاليدو كوليبالي Kalidu Koulibaly) قلب دفاع نابولي و واحد من أحسن مدافعين الدوري الإيطالي دلوقتي لما كان عنده 20 سنة كان بيلعب في فرقة إسمها ميتز في دوري المظاليم الفرنساوي و بعد كده إتنقل جينك البلجيكي و مراحش نابولي إلا وهو عنده 23 سنة .. طب خد التقيلة .. (ليو بونوتشي Leo Bonucci) و (جيورجيو كيليني Giorgio Chiellini) زمايل (دي ليجت) في يوفينتوس .. الأولاني وهو عنده عشرين سنة كان معار لنادي إسمه بيزا في دوري المظاليم الإيطالي و مراحش يوفينتوس إلا وهو عنده 23 سنة  .. الثاني كان بيلعب باك شمال في فيورينتينا و مبقاش لاعيب قلب دفاع أساسي في يوفينتوس إلا لما بقي هو كمان عنده 23 سنة .. (إيميريك لابورتا Aymeric Laporte) اللي دلوقتي إكتشفنا انه أهم قلب دفاع في مانشستر سيتي لما كان عنده 20 سنة صحيح كان بيلعب قلب دفاع أساسي في فرقته وقتها اتليتيكو بلباو ودي فرقة علي قد حالها شوية زي ما إتكلمت عنها قبل كده بس صدق أو لا تصدق لحد دلوقتي ملعبش ولا ماتش دولي مع منتخب فرنسا .. (ماركينوس Maquinhos) اللي في حالة إنك متعرفوش يبقي قلب الدفاع الأساسي دلوقتي سواء في باريس سانجيرمان أو منتخب البرازيل و اللي لما كان عنده 20 سنة كانت الناس كلها بتتنبأله بمستقبل باهر بس عمره ما لعب أساسي في منتخب البرازيل و كانوا دايما بيفضلوا عليه (ثياجو سيلفا Thiago Silva) و (ديفيد لويز David Luiz) .. و علي فكرة باريس سانجيرمان إشتروا (لويز) مخصوص عشان يلعب جنب (سيلفا) و يقعدوا (ماركينوس) دكه عشان كانوا شايفين إنه لسه بدري عليه  .. يا مؤمن ده حتي (هاري ماجواير Harry Maguire) أغلي مدافع في العالم دلوقتي لما كان عنده 20 سنة كان بيلعب في هال سيتي في دوري المظاليم الإنجليزي و مراحش فرقة عليها القيمة زي مانشستر يونايتد إلا لما بقي عنده 26 سنة.

دي كانت مشكلة السن .. فعليا (دي ليجت) أصغر من إن حضرتك وإنت قاعد علي القهوة تتفشخر أوي برأيك و تحليلك الكروي و تقول عليه إنه قلب دفاع مبالغ فيه .. ولا قلب دفاع من اللي إنت فرحان بيهم دلوقتي لما كانوا في سن (دي ليجت) كانوا أساسيين في فرقة كبيرة زي يوفينتوس .. نيجي بقي للمشكلة الثانية وهي ليه مركز قلب الدفاع ده بالذات مركز صعب؟ .. المشكلة إنك متقدرش تتنبأ خالص هل قلب الدفاع الناشيء وهو صغير حيكبر ويبقي لاعيب كويس أو لا .. مش مصدقني أنا عارف فخليني أثبتلك.

خد المهاجمين .. (سيرجيو أوجويرو Sergio Aguero) من أيام وهو لسه صغير في أتليتيكو مدريد وإحنا عارفين إنه لما يكبر حيكسر الدنيا .. المدريستا عرفوا إسم (كريم بنزيمه) لما راحلهم بس قبل كده كان بيلعب في فرقة إسمها ليون في الدوري الفرنسي وكانت وقتها فرقة محدش عارف ياخد منها لا حق ولا باطل .. (ليونيل ميسي Lionel Messi) من ولسه عنده 18 سنة في برشلونة وإحنا عارفين إنه حيبقي أحسن لاعيب في التاريخ مش بس في العالم .. (كريستيانو رونالدو Cristiano Ronaldo) بدأت الناس تعرفه لما راح مانشستر يونايتد و السير (أليكس فيرجسون Alex Ferguson) بدأ يصنفره و يخليه بني ادم .. (نايمار Neymar) إحنا كنا بنتكلم عنه من أيام ما كان لسه ناشيء في نادي سانتوس البرازيلي .. (لويس سواريز Luis Suarez) كان أساسي في أياكس امستردام وهو لسه عنده عشرين سنة .. كونك مهاجم وصل سنك عشرين سنو فإحنا سهل علينا إننا نحدد إن يا حيكون ليك مستقبل يا نهايتك حتكون مزبلة التاريخ .. صحيح فيه لاعيبه بتفلت .. وهم صغيرين بتقول عليهم بهايم بس بيكبروا و يغفلونا كلنا .. (بيير ايميريك اوباميانج Pierre-Emerick Aubameyang) مثلا وهو عنده عشرين سنة كان علي ذمة نادي ميلان الإيطالي بس مودينه إعارة لنادي ليل الفرنسي ومكنش بيلعب .. (هاري كاين Harry Kane) كان قاعد دكة في توتنهام .. (زلاتان ابراهيموفيتش Zlatan Ibrahimovich) كان لسه بيتأقلم علي العيشة في أياكس أمستردام .. بس المبدأ إنك لو إنت مهاجم فانت لو جامد حتقدر تبقي أساسي في فرقتك وإنت لسه عندك 20 سنة.

طب ما تيجي نشوف الوينجات .. (رحيم ستيرلينج Raheem Sterling) كان أساسي في ليفربول وهو لسه عنده عشرين سنة .. (إيدين هازارد Eden Hazard) وهو عنده عشرين سنة كان صانع الألعاب الأساسي في فرقته ليل الفرنسي و خد معاهم الدوري و إختاروه أحسن لاعيب في الدوري .. (جادون سانشو Jadon Sancho) أديه لسه عنده عشرين سنة و بيلعب أساسي في بروسيا دورتموند .. الموسم اللي فات (ليروي ساني Leroy Sane) كان بيدوس علي وش أي مدافع وبرده كان لسه مجابش العشرين سنة .. مش بس الوينجات .. إنت ممكن تبقي لاعيب خط وسط لسه عندك 20 سنة و تبقي أساسي في فرقة كبيرة .. (بيرناردو سيلفا Bernardo Silva) كان أساسي في موناكو .. (ماركو فيراتي Marco Verratti) أديه لسه قاعد في باريس سانجيرمان و مش فاهم مزهقش منهم لحد دلوقتي ازاي؟ .. (كريستيان أريكسين Christian Eriksen) كان أساسي في أياكس أمستردام و نفس الكلام مع (فرانكي دي يونج Frankie de Jong) قبل ما يروح برشلونة .. أمثلة كتير اوي .. (بول بوجبا Paul Pogba) في يوفينتوس .. (انخل دي ماريا Angel Di Maria) في بنفيكا البرتغالي .. (ماركو رويس Marco Reus) في بروسيا مونشنجلادباخ قبل ما يروح بروسيا دورتموند .. هل في إستثناءات؟ اه طبعا فيه و يمكن أشهرهم (انجولو كانتي N’Golo Kante) اللي لما كان عنده عشرين سنة كان بيلعب في فرقه إسمها بولونيا في دوري المظاليم الفرنساوي .. كل ده بيخليني أسال تاني ليه مركز قلب الدفاع ده بالذات مركز صعب؟

الحقيقة إن الإجابه علي السؤال ده إنك تسأل نفسك هو يعني إيه مدافع كويس؟ .. إمتي تقول علي مدافع إنه جامد تنين؟ .. إنه يكون سريع؟ .. إنه يكون قوي؟ .. إنه يعرف يقرأ الماتش كويس؟ ..  إن مدافع يبقي سريع و قوي جسمانيا فدول صفتين من الثلاثة بتخليك تقول يبقي أكيد بتتكلم عن شاب صغير .. الصفة الثالثة إنه يقرأ الماتش كويس بتخليك تقول إنه لازم يبقي عنده الخبرة الكافية يعني لازم يبقي سنه كبير .. عارف إنت لما تقدم علي شغلانة و يكونوا طالبين ناس Fresh Graduate عشان يدولهم مرتب قليل بس في نفس ذات الوقت يكون السي في بتاعهم مليان خبرة .. هنا ببيطلعلك خازوق جديد وهي كشافين المواهب ..  كشافين المواهب في كل الأندية بيتعاملوا مع مركز قلب الدفاع بالذات بشكل بيخلي صعب أوي تلاقي نادي كبير قرر إنه يحط ثقته في قلب دفاع سنه صغير .. الأنديه بتتعامل مع مركز قلب الدفاع بشكل مختلف و خليني أفهمك .. إنت كمشجع كورة مش بقول إن تخيل نفسك في مجلس إدارة نادي أنا بكلمك كمشجع بتتفرج ع الماتش علي القهوة مع صحابك .. لو النادي بتاعك لعب بمهاجم لسه صغير قول مثلا عنده عشرين سنة و ضيع إنفراد فانت علي قلبك زي العسل .. حتصقفله و تقوله معلش يا حبيبي حاول تاني و إن شاء الله المرة الجاية جون .. مجرد إن المهاجم الشاب الناشيء في الفرقة اللي إنت بتشجعها يجيب جون في ماتش و يضيع قصاده تلاتة فانت معندكش أي مشكلة انك تصقفله .. علي الناحية الثانية لو النادي بتاعك لعب بقلب دفاع صغير في السن و غلط غلطة جه بسببها جون فانت بتسبله هو و أهله و اللي دخله النادي و رئيس النادي كمان بالمرة .. إنت كمشجع لسبب ما في دماغك معندكش مشكلة المهاجمين يغلطوا بس المدافعين لازم يبقوا ملايكة من السما فتخيل بقي مجالس إدارة الأندية بتفكر إزاي.

أيوه أنا بقول إن إنت يا مشجع السبب .. إداره ريال مدريد من 2007 وهي عارفه إن (راموس) هو مستقبل قلب دفاع النادي بس ولا واحد فيهم كان رجل بما يكفي إنه يقول لعبوه أساسي كقلب دفاع وهو لسه صغير و خلوه يغلط و يتعلم وإحنا وراه .. تدري ليش؟ .. عشان الجمهور و الإعلام والحمد لله إن مكنش فيه Social Media وقتها كانوا حيقرقشوا عظم مجلس الإدارة بسنانهم .. عشان كده قرروا يلعبوه باك يمين (مع إن ده مش مركزه) و صرفوا فلوس عشان يجيبوا قلوب دفاع مؤقتين اللي هم (كريستوف ميتزيلدر Christoph Metzelder) الألماني و (بيبي Pepe) البرتغالي .. نفس الكلام حصل مع (كيليني) اللي جماهير يوفينتوس بتموت فيه دلوقتي .. إدارة النادي وهو لسه صغير مكنش فيه حد فيهم يقدر يقف قصاد الألتراس لو كان (كيليني) لعب قلب دفاع و غلط أي غلطة في أي ماتش .. عشان كده إضطروا يرموه باك يمين يعك شوية قبل ما يلعب قلب دفاع أساسي لما بقي عنده 23 سنة.

خليني أختم بس بإن قبل ما حضرتك تتجعص أوي في قعدتك و تقول انا مش عارف والله (ساري) ده بيلعب ب(دي ليجت) ليه مع إنه حمار انك تفهم إنك بتتكلم عن كابتن اياكس امستردام واحد من أهم اندية العالم زي ما إتكلمت عنه قبل كده وهو لسه ناشيء .. وصل بيهم نص نهائي بطولة Champions League .. أساسي مع منتخب بلده .. بيلعب في أكبر نادي فيكي يا إيطاليا و كل ده وهو لسه عنده عشرين سنة .. فعليا (دي ليجت) سابق 99.99% من لاعيبة جيله .. لازم حيغلط و لازم يتعلم ولازم إنت تحط جزمة في بقك .. قال يعني (راموس) مكنش بيغلط وهو صغير.

المصدر:
مقالة بعنوان Matthijs De Ligt’s ‘benching’ at Juve reveals why football is so poor at identifying top center-back talent نشرت علي موقع قناة ESPN وده لينك المقالة الأصلية:
https://www.espn.com/soccer/blog-marcottis-musings/story/4030044/matthijs-de-ligts-benching-at-juve-reveals-why-football-is-so-poor-at-identifying-top-centre-back-talent