أنا متفهم كويس أوي إنبهار الناس بفيلم 1917 .. أنا شخصياً كتبت عنه ووصفته بإنه أفضل فيلم حربي من بعد Saving Private Ryan بس أنا عندي مشكلة مع الفيلم .. الحقيقة هي مش مشكلة مع الفيلم نفسه قد ما هي مشكلة مع الأفلام الحربية عموماً اللي بقت هوليوود بقت بتعملها حالياً .. أنا بقيت ملاحظ إنهم بقوا بيصدرولنا فكرة إن العسكري الغربي ده سواء كان أميريكي أو بريطاني أغلب من الغُلب ومبيحبش الدم والقتل وإن أعداءه هم اللي بيجبروه يطلع أسوأ ما فيه .. عشان تفهم قصدي أكتر قارن بين فيلمين حربيين نزلوا السنة دي .. فيلم Midway وفيلم 1917 .. اه فيه فيلم إسمه Midway وده فيلم حربي أخرجه (رولاند إيميريتش Roland Emirich) وده نفس المخرج اللي عمل فيلم Independence Day والفيلم ده فشل لدرجة إن محدش بما فيهم إنت وإنت بتقرأ دلوقتي خدت بالك إنه نزل في السينمات أصلاً .. فيلم Midway من الأفلام اللي كلها دم وإنفجارات ومشاهد معارك متصورة حلو أوي وبتدور أحداثه حول معركة ميدواي Midway واللي اتكلمت عنها قبل كده واللي تقدر تقول إنها قلبت موازين جبهة المحيط الهاديء في الحرب العالمية الثانية بعد ما أميركا إتداس علي وشها في غارة بيرل هاربور.
المهم إنك لما تتفرج علي الفيلم تحس إن العسكري الأمريكاني ده بني أدم محصلش قبل كده .. إرادته من حديد يقدر يطلع ميتين أي حد يقف قصاده .. علي الناحية الثانية فيلم 1917 عكسه 180 درجة .. الفيلم ده أخرجه (سام مينديز Sam Mendes) اللي عملنا قبل كده فيلم Skyfall وفكرته إن فيه إتنين عساكر بريطانيين مهمتهم إنهم يحذروا كتيبة تانية إنها حتتعرض لكمين ألماني .. الفيلم قصته قايمة علي إتنين عساكر مش عايزين حد يموت .. يا مؤمن ده لما واحد فيهم لقي طيار ألماني جريح بدل ما يخلص عليه عطاله شوية مياه اللي هو عايز تقوله أوووو مااااي جااااد كيوت أوي .. من ناحية فيلم Midway تقريباً إترمي في الزبالة .. علي الناحية الثانية فيلم 1917 إترشح لأوسكار أحسن فيلم بعد ما خد جايزة جولدن جلوب .. ده بيخليني أسأل هو فيه إيه؟
أرجوك متفهمنيش غلط وتطلع عليا إني بقول إن فيلم 1917 وحش أو ممل لمجرد إن مفيهوش دم كتير .. لا خالص .. لو حتقارن بين 1917 وأخر فيلم حربي أخرجه (سام مينديز) اللي هو فيلم Jarhead اللي أُنتج سنة 2005 ففيلم 1917 فعلياً بيقعدك علي أعصابك .. فيلم Jarhead للي منكوا ممكن ميكونش عارفه من بطولة (جايك جيلينهول Jake Gyllenhaal) و(جايمي فوكس Jamie Foxx) وبيحكي عن كتيبة قوات مارينز إتبعتت الكويت أيام حرب الخليج الثانية وكانوا مشحونين أوي انهم يحاربوا بس الحرب قامت وخلصت وهم مضربوش أي طلقة .. اللي بقوله إن فيلم 1917 بيكمل علي نفس النغمة بتاعة أفلام حربية طلعت في الفترة اللي فاتت زي Dunkirk من إخراج (كريستوفر نولان Christopher Nolan) اللي هو فيلم فكرته قايمة أساساً علي إزاي تنسحب وتهرب من ضرب النار عشان متموتش .. ترجع بالزمن شوية لأخر فيلم حربي هوليوود عملته تلاقي نفسك قصاد فيلم Hacksaw Ridge اللي أٌنتج سنة 2016 وأخرجه (ميل جيبسون Mel Gibson) .. هنا تلاقي إن (ميل جيبسون) نفس البني أدم اللي أخرجلنا أفلام كلها دم زي Braveheart و Apocalypto و Passion of the Christ عمل فيلم حربي عن عسكري رفض إنه يمسك بندقية ويقتل حد عشان خاطر ديانته بتجبره إنه مينفعش يقتل بس قدر يوصل لأقصي درجات المجد بس عشان أنقذ أرواح زمايله .. تاني .. فيلم حربي قصته عن إزاي العسكري الأمريكاني يا حرام مش عايز يقتل ورافض للعنف والدم.
أنا لما بحب أرجع بالذاكرة لأخر مرة أنا شفت فيلم حربي إتعمل زي الكتاب ما بيقول بلاقي نفسي قصاد فيلم Black Hawk Down اللي أُنتج سنة 2003 .. ده بيخليني أسأل هو فيه إيه؟ .. خلاص كلكوا بقيتوا طيبين ومبتحبوش الدم وإحنا اللي ولاد كلب يعني؟
المصدر:
- مقالة بعنوان Peace in our time: Why ‘pacifist war movies’ such as 1917 are on the rise نشرت في جريدة The Guardian وده لينك المقالة الأصلية:
https://www.theguardian.com/film/2020/jan/06/why-pacifist-war-movies-such-as-1917-are-on-the-march
