موضوعنا النهاردة اللي حنتكلم عنه هو موضوع معقد و صعب و حساس في نفس الوقت اللي هو الأزمة المالية اللي بتعيشها تركيا دلوقتي .. فيه ناس مقتنعة إن تركيا بتتعرض لحملة صليبية و فيه ناس شايفة إن الرئيس التركي (رجب طيب أردوغان) هو السبب في كل المصايب .. وسط كل ده النهاردة حنحاول نعرضلك الأزمة بشكل مبسط لإن أنا عارف إن الكلام في الإقتصاد عموماً بيجيب صداع فخلينا نبدأ بإننا نفهمك بإن المقالة دي حتحاول تجاوب علي 4 أسئلة:
- هل الأزمة دي خطيرة أوي يعني .. حاجة كده في خطورة أدوار الفنان (غسان مطر) الله يرحمه ولا مجرد أزمة بسيطة و حتعدي؟
- طب هي الأزمة دي بدأت إزاي أصلاً؟
- هل ده ممكن يأثر إزاي علي الإقتصاد العالمي؟ و هل لو تركيا مثلاً إقتصادها وقع حتوقع ناس معاها؟
- إيه اللي ممكن الحكومة التركية تعمله عشان تحل الأزمة؟
خلينا نبدأ بالسؤال الأول و البسيط خالص .. هل دي أزمة خطيرة ولا حاجة بسيطة يومين و حتتنسي؟
الحقيقة إن الوضع سيء و عمال يسوء يوم عن يوم .. إنت محتاج تفهم إن الأزمة دي متولدتش أول إمبارح .. دي أزمة في الفرن بقالها أكتر من 10 سنين بس خرجت سخنة ملهلبة فإنت متخيل إنها بسبب حاجة حصلت قريب .. عشان تفهم الموضوع أكتر حاول تتخيل إن إقتصاد تركيا كان عامل زي عربية إنت سايقها علي الرابع و مش بتهدي و مسافر بيها من إسكندرية للأسوان .. إقتصاد تركيا في الخمس سنين اللي فاتوا كانت أرقامه متفرقش كتير عن أرقام إقتصاد دول تقيلة زي الصين و الهند .. خلال الربع الأول من السنة المالية 2018 معدل النمو التركي كان 7.22% و ده رقم خزعبلي أصلاً .. بس إقتصاد تركيا زيه زي موتور عربيتك سخن منك أوي لدرجة إنه جاب وش سلندر .. لما إقتصاد دولة يجيب وش سلندر فده إنت بتقدر تشوفه في كذا حاجة .. بتشوفه في عجز رهيب في الميزان التجاري أو Trade Deficit إن الدولة بتستورد كتير أوي و مش بتصدر بنفس المعدل .. بتشوفه إن البلد فيها مشاريع بناء عملاقة و كتير فشخ و طول ما إنت ماشي في الشارع ناس بتبني بس في نفس الوقت الإقتصاد شايل علي كتافه حمل تقيل أوي من الديون المتلتلة .. بس يمكن أهم علامة إن الإقتصاد جاب وش سلندر هو معدل التضخم أو Inflation Rate و اللي في حالة تركيا دلوقتي وصل 15% و عمال يزيد .. لما معدل التضخم في بلد بيزيد بتلاقي الناس بتلجأ لحل لطيف أوي و هو إنهم يشتروا دولارات و لإن الأتراك جروا عشان يشتروا دولارات فده أدي إن المشكلة تسوء أكتر و الليرة فقدت 45% من قيمتها قدام الدولار في أول 8 شهور في السنة.
الليرة التركية الفرق بينها و بين الدولار الأميريكي وصل لأعلي مستوياته (سبع أضعاف) أول سنة 2018 لدرجة إن (أردوغان) سمي اللي بيحصل حرب إقتصادية ضد بلده.
إن معدل التضخم في تركيا وصل 15.39% في شهر يوليو 2018 فدي أعلي نسبة يوصلها من سنة 2004
و لإن زي ما بنقول المصايب مبتجيش لوحدها لازم يتجمعوا مع بعض تقولش رايحين رحلة ففيه و ده اللي قاله فعلاً ناس من إدارة تقييم المخاطر Risk Assessment شغالين في بنك JP Morgan الأميريكي إن الأتراك دلوقتي في حاجة إسمها Perfect Storm يعني المصايب بسم الله ما شاء الله متجمعة تجميعه رباني .. بس يمكن أكتر حاجتين مخليين الأزمة دي عماله توسع من الأتراك و محدش عارف يلمها هم:
- أول حاجة إن زي ما إنت لما عربيتك بتسخن منك جامد و عشان تتفادي إن موتورك يجيب وش سلندر فإنت بتبطل العربية و بتزود مياه عشان تبرد .. في الإقتصاد الحركة دي هي إنك تعلي من نسبة فوايد البنوك .. الفكرة إنك لما بتعلي فوايد البنوك النشاط الإقتصادي في البلد بيهدأ و دي أول خطوة عشان تبدأ تعدل إقتصاد البلد .. المشكلة إن (أردوغان) كسب الإنتخابات الرئاسية اللي فاتت علي وعد رئاسي إن فوايد البنوك عمرها ما حتقل .. الرجل منشف دماغه بشكل يجيب إحباط لأي حد شغال مستشار إقتصادي له .. حتي لو البنك المركزي التركي فيه ناس بتفهم فكرت ترفع نسبة فوايد البنوك ف(أردوغان) لإنه مسيطر علي البنك المركزي مخليهم ميعملوش الحركة دي .. جزء تاني من تفكير (أردوغان) إن في اللحظة اللي البنك المركزي التركي يرفع سعر الفايدة قول يا رحمن يا رحيم علي معدلات النمو بتاع إقتصاد تركيا و دي الحاجة اللي دايماً (أردوغان) بيتفاخر بيها.
- تاني حاجة و هي الأزمة المبالغ فيها بين تركيا و أميركا .. الموضوع بمنتهي البساطة إن الأتراك مسكوا قسيس أميريكي إسمه (أندرو برنسون Andrew Brunson) و إتهموه بجرايم إرهاب و حتي مش حابسينه في سجن دول حاطينه تحت الإقامة الجبرية في الفندق .. المهم إن (ترامب) راسه و ألف سيف القسيس ده يرجع أميركا و (أردوغان) حالف مية يمين ما هو مفرج عنه .. قال يعني عشان (ترامب) يلوي دراع (أردوغان) فرض علي تركيا تعريفات جمركية إضافية علي أي ألمونيوم أو صلب تصدره تركيا لأميركا .. مش كده و بس .. (ترامب) وقع قرار بيمنع إستلام تركيا لطيارات F-35 Lightening II كان المفروض تركيا تستلمهم بصفتها عضو في حلف شمال الأطلسي NATO
السؤال الثاني و يمكن أهم سؤال .. هي الأزمة دي بدأت إزاي أصلاً؟
الأزمة دي حضرتك زي ما قلت بقالها أكتر من 10 سنين في الفرن بس إحنا مكناش حاسين بيها .. الموضوع بدأ من سنة 2010 لما بنوك العالم كلها كانت بدأت تحترم نفسها بعد القفا المحترم اللي خدوه في الأزمة المالية العالمية و تقريباً البنوك بقت مش بتسلف حد إلا بعد ما تاخد كل إحتياطاتها .. في الوقت اللي البنوك المركزية حول العالم كانت بتضخ فلوس من الإحتياطي النقدي الأجنبي بتاعها عشان تسند شوية قطاع البنوك كانت بنوك تركيا برعاية البنك المركزي التركي بتعمل حاجة غريبة أوي .. بنوك تركيا في الفترة دي بدأت تستلف فلوس بالدولار من بنوك أجنبية خصوصاً من إسبانيا مستغلين إن في الفترة دي بنوك أوروبا و أميريكا كانت نسبة الفايدة علي القروض اللي بتديها قريبة من الZero% .. وقتها الفكر التركي ده كان بره الصندوق و وقتها هم كانوا عارفين إنهم بيخلقوا إقتصاد بينمو بس نموه ده مبني علي الديون .. يمكن محدش كان متوقع إن بعد السنين دي كلها الإحتياطي النقدي الأميريكي حيعلي تاني و نسبة الفايدة حترجع تزيد و الدولار حيشد حيله.
مع الوقت الديون اللي بس بفكرك إنها كانت بالدولار بدأت تتراكم علي كل مؤسسات الإقتصاد التركي .. مفيش شركة ولا بنك ولا أي بني أدم إلا و كان واخد قرض من بنك أجنبي عشان يفتح Business في تركيا .. تحس إن الأتراك بقوا كلهم Businessmen كل واحد فيهم معاه شركته الخاصة و مشغل تحت منه ناس .. صحيح إن الوضع ده نط بالإقتصاد التركي نطة جامدة أوي إنت شفتها بإن معدل النمو بتاع إقتصادهم بقي طالع زي الصاروخ بس في نفس الوقت إن كل من هب و دب في تركيا عمال يستلف فلوس من بره خلقت مشكلتين: أول مشكلة بيسموها Fiscal Deficit يعني العجز المالي إن تركيا بقت بتصرف فلوس أكتر من الفلوس اللي بتخشلها .. ثاني مشكلة بيسموها Current Deficit و هي إن تركيا بقت بتستورد بضايع أكتر ما بتصدر .. عشان مطولش عليك .. في الأخر بسبب السياسات المالية دي تركيا حسب كلام صندوق النقد الدولي الديون اللي عليها شاكب راكب بقت 30% من إجمالي الناتج الوطني بتاعها.
ده معناه إن حتي لما الإقتصاد التركي بيؤدي زي الفل و بيجيب فلوس فالفوايد بتاعة الديون بتبلع كل حاجة و حتي لما الدنيا بتبوظ زي ما حصل حالياً و فوايد الديون قسمت ظهر الإقتصاد و قيمة العملة بدأت تقل الأتراك إكتشفوا إن الإحتياطي النقدي الأجنبي بتاعهم ميكفيش إن البنك المركزي يتدخل عشان يسند العملة .. بحسبة بسيطة أوي الإحتياطي النقدي الأجنبي اللي تحت إيد الأتراك ميجيش 131 مليار دولار زي ما حتشوف في الرسومات البيانية اللي عندك بس في نفس الوقت الديون المستحقة خلال الكام سنة الجايين اللي تركيا مطلوب تدفعها حوالي 181 مليار دولار .. سيبك من كل ده .. الإحتياطي النقدي الأجنبي اللي تحت إيد الأتراك هو فعلياً تحت إيد المواطنين الأتراك اللي حاطين فلوسهم في البنوك فلو الناس دي سحبت فلوسها فكده تركيا حتبيع هدومها عشان تسد الديون اللي عليها.
تركيا مديونة للبنوك الإسبانية لوحدها ب81 مليار دولار.
السؤال الثالث هو يعني لو تركيا لا قدر الله إقتصادها انهار خالص هل ده مخوف حد؟
المشكلة إن العالم باصص للي بيحصل في تركيا علي إنه مشكلة داخلية بدأت في تركيا و حتخلص في تركيا .. الفكر ده جاي من إن صحيح تركيا بلد كبيرة عايش فيها 80 مليون بني أدم بس برده لو جيت حسبت الناتج الوطني الإجمالي Gross Domestic Product أو GDP بتاع دول العالم كلها و جيت حسبت الGDP بتاع تركيا و قسمتهم علي بعض حتلاقي إن نصيب تركيا من GDP العالمي ميجيش 1% .. فعلياً الإتحاد الأوروبي موقفه من اللي بيحصل في تركيا هو خليها تولع بجاز .. من وجهة نظرهم برده إحنا اه صحيح لينا إتفاقيات تجارة مع تركيا بس أنا لو مكان دولة زي ألمانيا لو الأتراك مشتروش العربيات الBMW بتاعتي فيه غيرهم كتير حيشتروها .. اللي فيه تركيا دلوقتي حصل قبل كده مرتين و في المرتين الإتحاد الأوروبي ولا إتحرك و ساب تركيا تعاني لوحدها .. الحاجة الوحيدة اللي مخليه البنك المركزي الأوروبي قلقان هو إنهيار القطاع البنكي التركي .. الناس دي خايفة إن لو بنوك تركيا وقعت فده حيبقي عامل زي الفيروس اللي حيبدأ يوقع بنوك أوروبا واحد ورا التاني و زي أي فيروس حيبدأ بأضعف قطاع بنكي في أوروبا اللي هو موجود في إسبانيا و إيطاليا .. الخوف ده جاي من حقيقة إن ديون تركيا المستحقة عليها حوالي 300 مليار دولار و لو الرقم ده حولته لليرة و لإن قيمة الليرة عماله تنهار قدام الدولار فالرقم ده فعلياً كل يوم عمال يزيد يزيد يزيد لحد ما حنوصل لمرحلة إن الأتراك مش عارفين يسددوا اللي عليهم.
بس ده مش معناه إن ممكن في أي لحظة (أردوغان) يتهور و يقلب الطرابيزة علي الكل و يخليها كرسي في الكلوب .. أرجوك متنساش إن تركيا عضو في NATO من سنة 1952 يعني من أيام ثورة يوليو .. أرجوك متنساش كمان إن سنة 1987 الأتراك قدموا طلب للإنضمام للإتحاد الأوروبي و الطلب ده إترفض خصوصاً أيام (أردوغان) و اللي مؤخراً قال للأوروبيين مش عاوز منكوا حاجة أنتوا ولاد تييييت أساساً وعلاقته حالياً بجيرانه في أوروبا بقت زي الزفت بالمعني الحرفي للكلمة .. متنساش كمان إن الأتراك مضوا مع الروس عقد بإنهم حيشتروا منهم منظومة الدفاع الجوي S-400 و الأمريكان زعلانين أوي من القرار ده و معتبرينه بيعرض أمن NATO للخطر .. اللي عايز أوصله ليك هو إنت متخيل إيه اللي ممكن يحصل لو (أردوغان) إنسحب من عضوية NATO و إترمي في حضن روسيا؟ .. إيه اللي ممكن يحصل لو (أردوغان) شاف إن الإتحاد الأوروبي خانه و سابه يغرق و حب يردلهم القلم قام لاغي الإتفاق اللي بينهم بإن تركيا تأوي 3 مليون لاجيء سوري و قام مسرب اللاجئين دول علي أوروبا؟ .. مش معني كلامي إن بكره الصبح ده حيحصل .. أنا بس بقول إن في لحظات اليأس الناس بتعمل حاجات عمرها ما كانت متخيلة إنها ممكن تعملها.
نيجي بقي لأهم سؤال .. إيه الحل؟
مبدأياً كده طريقة تعامل الحكومة التركية و بالأخص (أردوغان) مع الأزمة لازم يتغير سواء كقرارات علي الأرض أو حتي كطريقة تعامل مع الإعلام .. مش وقته خالص إن (أردوغان) يطلع في الإعلام يقول إن الغرب باعه و إن إذا كان أميركا معاها فلوس فتركيا معاها ربنا و إنه يطلع يوصف اللي بيحصل ده علي إنه زي ما سماه Operation Against Turkey يعني عملية عسكرية ضد تركيا .. و كمان مش وقته إن الأمن التركي يبقي شغله الشاغل إنه يعتقل الناس اللي بتحط بوستات علي Facebook بتهمة نشر إشاعات عن الأزمة .. كل ده هري ملوش أي ستين لازمة .. اللي المفروض الحكومة التركية تكون بتفكر فيه هو إزاي يعملوا كذا خطوة:
- أول حاجة إنهم لازم يرفعوا نسبة فايدة البنوك .. حالياً نسبة الفايدة في تركيا 17% بس عشان الوضع يبدأ يهدأ لازم الرقم ده يعلي جامد .. الروس سنة 2014 إتعرضوا لأزمة شبه اللي بتعيشها تركيا دلوقتي و الروبل برده فقد حوالي 40% من قيمته قدام الدولار بس ساعتها الحكومة الروسية لحقت نفسها و رفعت نسبة الفايدة 5%.
- ثاني حاجة لازم يلاقوا طريقة يزودوا بيها الإحتياطي النقدي الأجنبي و إحتياطي تركيا من الذهب .. الفكرة إن الإتنين دول بالذات هم اللي الدول بتستخدمهم عشان تسند عملتها .. صحيح (أردوغان) عمال يقول إن تركيا حتفضل طول عمرها حتي في وسط أزمتها ماشية مع مباديء الرأسمالية و إقتصاد السوق بس في نفس الوقت لازم يسمحوا لنفسهم يفكروا بره الصندوق .. حل تاني هو إنك تتجه إنك تاخد قرض من صندوق النقد الدولي عشان تزود شوية من مبلغ الإحتياطي النقدي الأجنبي اللي تحت إيدك .. واحد من الحلول إن الحكومة تأمم كل إيداعات البنوك في تركيا و تحولها للدولار عشان تزود الإحتياطي النقدي .. ده حل مؤقت علي فكرة بس هي الفكرة إن فيه حلول و لازم الكلام يبدأ يتجه للحلول مش توجيه الإتهامات و تعليق الفشل علي شماعات الغير.
- ثالث حاجة إن لازم العلاقة اللي زي الزفت بين الأتراك و الأمريكان تتحل لإن يمكن بداية حل الأزمة إن الأتراك يفرجوا عن (أندرو برنسون).
الإحتياطي النقدي الأجنبي اللي في إيد البنك المركزي التركي ميجيش إلا 131 مليار دولار.
المصادر:
- مقالة بعنوان How serious is Turkey’s lira crises and what are the implications? يعني إيه مدي خطورة أزمة الليرة التركية و ايه اللي ممكن يحصل؟ نشرت في جريدة The Guardian البريطانية و ده لينك المقالة الأصلية:
https://www.theguardian.com/world/2018/aug/13/how-serious-is-turkeys-lira-crisis-and-what-are-the-implications - مقالة بعنوان What went wrong for Turkey? Its economy is ‘in the midst of a perfect storm’ يعني إيه اللي حصل غلط في تركيا؟ إقتصادها في مصيبة سودا نشرت علي موقع وكالة أنباء CNBC الأميريكية و ده لينك المقالة الأصلية:
https://www.cnbc.com/2018/08/13/turkey-crisis-economy-faces-weak-lira-inflation-debt-and-tariffs.html
