بعد ما من كام يوم اتكلمت عن (رجب طيب اردوغان) و وصفته بانه عيوطه عشان لما ماتله 33 عسكري في محافظه ادلب راح جري لدول حلف شمال الاطلسي NATO عشان يساعدوه فالنهارده جه الوقت اننا نبص للموضوع من الناحيه الثانيه .. خلينا مع بعض نحاول نجاوب علي سؤال وجودي شويه .. هو ايه اللي ودي الاتراك اصلا محافظه ادلب اللي هي اساسا بعيده عن الحدود التركيه السوريه؟ .. الاول خليني افهمك الوضع علي الارض .. ادلب دي اخر حته في سوريا مش تحت ايد (بشار الاسد) .. ادلب دي عايش فيها تقريبا 3 مليون بني ادم .. ادلب حاليا بتتعرض لهجوم مشترك من القوات السوريه المواليه ل(بشار الاسد) ومعاه القوات الايرانيه و الروسيه و حزب الله .. المشكله ان ادلب دي بالذات اتمضي اتفاق اتسمي اتفاقيه سوتشي ودي مدينه في روسيا و الاتفاق ده قال ان فيه منطقه امنه حتتعمل في ادلب لحمايه المدنيين اللي فيها .. حلو .. بدايه من ديسمبر 2018 و السوريين رموا الاتفاقيه دي في الزباله و بدأوا يصعدوا من هجماتهم بشكل عمال يزيد يوم عن يوم علي ادلب لحد ما الدنيا خربت خالص بمقتل ال33 عسكري تركي و اللي الاعلام ركز عليهم اوي لدرجه اننا نسينا ان الروس قتلوا 21 مدني سوري لما قصفوا مدرسه .. ادلب مات فيها خلال سنه واحده 1700 مدني كتير منهم اطفال و بسبب ده بدأ سكان المدينه يسيبوها و يمشوا .. وهنا المشكله.
المرصد السوري لحقوق الانسان عمل استطلاع راي لقوا فيه ان 10% بس من سكان ادلب معندهمش مشكله يعيشوا تحت حكم (بشار الاسد) .. ده معناه ان الباقي حيسيب البلد و يمشي .. طبعا اللاجئين دول مش حيلاقوا حته يروحوها غير تركيا اللي هي اساسا قافله حدودها مع سوريا و فوق ده كله عايش فيها فعليا 4 مليون لاجيء سوري فعلا .. لو مليون بني ادم بس من 3 مليون اللي عايشين في ادلب قرروا يروحوا تركيا فساعتها الاتراك حقا و صدقا حيتفشخوا في افكارهم .. الاقتصاد التركي مش حيستحمل.
اظن السؤال دلوقتي هو ليه الدنيا ساكته؟ .. ليه الدنيا هس هس كده؟ .. السر حضرتك في الزهق .. العالم زهق من اللي بيحصل في سوريا و عايز الدنيا تخلص حتي لو ده معناه ان (بشار الاسد) يكسب الحرب .. حسابات الغرب ان ما تولع ادلب .. ايه يعني يموت كام الف في مقابل ان الحرب تخلص و نبدا نركز في اعاده اعمار سوريا و نشوف حنرجع اللاجئين السوريين اللي اتوزعوا في كل حته حيرجعوا بلدهم تاني ازاي .. و بعدين ازاي الغرب يحاول يساعد ادلب و اكتر ناس معاها سلاح بتحاول تدافع عن المدينه ضد القوات المواليه ل(بشار الاسد) هم جماعه مسلحه اسمها حياه تحرير الشام ودي تبقي جماعه مسلحه تحت مظله تنظيم القاعده .. انت عايز الغرب يتقال عليه انه بيساعد القاعده؟ .. لا خلي المدنيين يموتوا احسن .. احنا معندناش مشكله اننا نشوف في التليفيزون القوات السوريه المواليه ل(الاسد) وهي بترتكب جرايم حرب ضد اهل ادلب طالما ده معناه ان اولا الحرب حتخلص اخيرا وان اللي رافعين سلاح ضد (بشار) ناس من القاعده .. الاتراك من ناحيتهم بيسالوا سؤال منطقي فشخ .. انا دلوقتي لو مكان (بشار الاسد) و اخدت ادلب و كسبت الحرب فايه اللي يخليني اوافق اني ارجع اللاجئين بتوعي اللي هربوا بره البلد؟ .. الاتراك شايفين ان لو (بشار) كسب الحرب فعليا هم حيبقوا زي الست اللي جوزها طلقها و رماها بره البيت هي و العيال و راح اتجوز واحده تانيه.
المصدر:
مقاله بعنوان If Idlib falls to Assad, it will not just be Syrians who pay the price نشرت في جريده The Guardian وده لينك المقاله الاصليه:
https://www.theguardian.com/commentisfree/2020/feb/28/idlib-falls-assad-syria-refugee-crisis
