لينك التسجيل الصوتي للمقالة علي Sound Cloud:
https://soundcloud.com/user-112011687-312727988/lbzasrdv0djc?si=d25993dc1cd445f8bb21fc1fb54a9e1d
لو إنت بتلعب كورة قدم كناشيء و صادف إن مركزك صانع ألعاب Playmaker و إتاخدت منتخب مصر و كنت بتحلم بإن إنجازاتك مع المنتخب تبقي زي إنجازات لاعب تاني في نفس مركزك علي مستوي العالم فإنت غالباً دماغك حتوديك لشوية أسامي تتعد علي الصوابع .. (محمد أبوتريكه) لو إنت أهلاوي و (حازم إمام) لو إنت زملكاوي .. (أندريس أنييستا Andres Iniesta) أو (زين الدين زيدان) أو (كاكا Kaka) .. لو قلت لنفسك دول لاعيبه إعتزلت و قلت تختار لاعب لسه بيلعب فإنت غالباً برده حتروح لشوية أسامي قليلة أوي من ضمنها (مسعود أوزيل) .. الCareer بتاعة (أوزيل) كلاعب دولي فعلاً تشرف .. لعب 92 ماتش دولي و جاب 32 جون و لقب كأس عالم و كل ده قبل ما يبقي عنده 30 سنة .. لاعب زي ده المفروض يتشال علي الأكتاف في بلده بس مش ده اللي حصل مع (أوزيل) .. للي منكوا ميعرفش اللي حصل ف(مسعود أوزيل) بعد الأداء اللي زي الزفت اللي عمله منتخب ألمانيا في كأس العالم 2018 اللي إتلعب في روسيا و رغم إنه كان حامل اللقب إلا إن الفرقة خرجت من الدور الأول بس مش دي المشكلة .. بتحصل .. منتخب فرنسا طلع من الدور الأول من كأس العالم 2002 رغم إنه كان حامل اللقب في 1998 .. منتخب إسبانيا هو كمان خرج من الدور الأول في كأس العالم 2014 بعد ما كان حامل اللقب في 2010 .. المشكلة في اللي حصل بعد كده.
بعد البطولة (أوزيل) أعلن إعتزاله اللعب الدولي و إنه خلاص مش حيلعب مع منتخب ألمانيا تاني .. لما إتسأل عن السبب مكنتش إجابته إنه شاف إنه خلاص قدم كل اللي عنده و إن جه الوقت لجيل جديد من اللاعيبه الألمان اللي يكملوا المشوار .. لا السبب من وجهة نظره إنه إتعرض لعنصرية و قلة إحترام مش بس من الجمهور إنما كمان من الإتحاد الألماني لكرة القدم DFB .. مشكلة (أوزيل) مع ألمانيا تقدر تلخصها بإنك تسأل نفسك هو إيه اللي يخليك تلعب عشان منتخب بلدك و البلد أساساً مش معتبراك إبنها؟
قضية المهاجرين عليها خناقة كبيرة مش بس جوه ألمانيا إنما في أوروبا و أميركا كمان .. عشان ميبقاش كلامنا عشوائي خلينا نكون مركزين أوي علي ألمانيا .. ألمانيا زيها زي أي دولة أوروبية عندها أحزاب سياسية تقدر تقسمها نصين: النص الأول هو النص اللي بيتقال عليه يميني اللي هم المحاظفين اللي مقتنعين بإن أوروبا لازم تاخد بالها كويس أوي مين المهاجرين اللي بيدخلوها و يستحسن والله لو لغينا الهجرة دي خالص .. النص الثاني هو النص اللي بيشمل اليساريين و الليبراليين و ده النص اللي بيقول إن المهاجرين دول هم صوص الشيكولاتة النوتيلا اللي بيحلي البلد .. ما بين النصين دول (أوزيل) و اللي زيه عمالين يتلطشوا .. ألمانيا لوحدها عايش فيها 3 مليون بني أدم معاهم الجنسية الألمانية بس أصولهم من تركيا زي (أوزيل) و غالبيتهم بيعتنقوا الإسلام زي (أوزيل) برده .. و لإن الإسلام سمعته في العالم دلوقتي مش قد كده لأسباب كلنا عارفينها فالمواطن الألماني زي (أوزيل) بيكتشف إنه عايش في بلد بتعامله زي ما وزارة التربية و التعليم بتعامل طالب الثانوية العامة بالضبط اللي هو إحنا مش فارق معانا إنت عبقري ولا لا و مش فارق معانا إذا كنت خليفة (ألبيرت أينشتاين Albert Einstein) الجديد .. كل اللي يهمنا إنك حتخش الإمتحان و فيه نموذج إجابة تحل زيه عشان تنجح و إلا حتسقط .. ده اللي بيعيشه (أوزيل) و اللي زيه .. فيه نموذج إجابة الغرب بيحب يسميه الإندماج Integration عشان تبقي زيك زي أي مواطن ألماني أشقر و عنيه زرقا .. طب أنا لو مشيت زي ما نموذج الإجابة عايز هل معني كده إن المجتمع الألماني حيقبلني؟ .. بناء علي رأي (أوزيل) لا لإن الألمان بيتعاملوا معاك علي حسب إنجازاتك زي بالضبط ما وزارة التربية و التعليم بتتعامل مع طالب الثانوية العامة برده .. تنجح تبقي صاحبي و حبيبي و كفاءة و تبقي صحيح من أصول مهاجرة بس من جواك العرق الألماني ناقح عليك .. تفشل تاخد فوق دماغك بالجزمة و ساعتها حيتقال عليك ما إنت مهاجر و مستنيين إيه من واحد مهاجر؟
منتخب ألمانيا بيحتفل بفوزه بكأس العالم 2014 اللي إتلعب في البرازيل و (أوزيل) شايل الكأس في النص.
الناس اللي قارية شوية في أزمة (أوزيل) حتقولي طب إنت مش عارف إن سبب أزمته مع الألمان هي الصورة اللي إتصورها مع (أردوغان)؟ .. برده للناس اللي متعرفش أنا بتكلم عن إيه .. قبل كأس العالم اللي فات ما يتلعب كانت فيه صورة إتاخدت في فندق الفور سيسونز Four Seasons Hotel في لندن جمعت الرئيس التركي (رجب طيب أردوغان) و معاه (مسعود أوزيل) و (إليكاي جوندوجان Ilkay Gundogan) لاعب خط وسط نادي مانشستر سيتي الإنجليزي و زميل (أوزيل) في المنتخب الألماني و معاهم كمان (سينك توسان Cenk Tosun) المهاجم التركي اللي بيلعب في نادي إيفرتون الإنجليزي .. لما الصورة دي إتنشرت علي الإنترنت ناس كتير من جوه ألمانيا منهم سياسيين و صحفيين و حتي أعضاء في إتحاد الكورة إنتقدوا (أوزيل) و (جوندوجان) لإنهم إتصوروا مع (أردوغان) .. السؤال دلوقتي ليه بقي إنتقدوهم؟
سمعة (أردوغان) في أوروبا إنه بني أدم ديكتاتور بيسجن أي حد يعارضه و رامي صحفيين أتراك كتير في السجن .. هل الإتهام أو السمعة دي حقيقية أو لا؟ و هل (أردوغان) عنده حق في اللي بيعمله أو لا؟ دي مش قضيتي دلوقتي و ممكن نتناقش فيها بعدين .. اللي أنا محتاجك تكون فاهمه إن اللي إنتقدوا الصورة وجهة نظرهم إن (أوزيل) و (جوندوجان) زيهم زي ملايين الألمان اللي من أصول تركية ولاءهم أولاً و أخيراً لتركيا مش لألمانيا .. فشل منتخب ألمانيا في إنه يعدي دور المجموعات في كأس العالم خلي أي حد مش عاجبه أداء المنتخب يشاور علي (أوزيل) بالذات و يحط صورته مع (أردوغان) و يكتب تحتها شوفتوا أصله مهاجر يعني هو أنتوا مستنيين إيه من مهاجر؟ .. اللي فعلاً يزعل إن اللي عملوا كده مش مجرد مواطنين عاديين بيفرغوا شوية الغضب و الإحباط اللي جواهم في بوستات علي النت .. اللي عملوا كده من ضمنهم صحفيين و لاعيبة كرة معتزلين و أعضاء في إتحاد كرة القدم الألماني .. تخيل إن بعد الأداء اللي زي الزفت بتاع المنتخب في كأس العالم يطلع مثلاً (أحمد شوبير) يقول إن السبب في كل ده هو واحد زي (شيكابالا) مثلاً لإنه نوبي و كأن كونه نوبي لوحده سبب كافي إنه مش بس ميتاخدش المنتخب ده يخليه ميلعبش كورة أصلاً .. أهو ده اللي حصل مع (أوزيل).
من اليمين للشمال: (سينك دوسان) و (أردوغان) و (أوزيل) و (جوندوجان) .. الصورة اللي قلبت الدنيا في ألمانيا.
قلة الأدب دي طلعت من ناس تقيلة و المفروض إنها تكون بتعقل الكلام قبل ما تقوله .. حد زي (أولي هوينس Uli Hoeness) رئيس نادي بايرن ميونيخ و اللي هو شخصياً كسب بطولة كأس العالم مع منتخب ألمانيا طلع بعد البطولة قال إنه بيحمل (أوزيل) المسئولية و إنه شايفه لاعب بقاله كذا سنة مستواه زي الزفت و الناس بتبالغ في قدراته و إنه لاعب عادي و يمكن أقل من العادي .. مدير المنتخب الألماني (أوليفر بيرهوف Oliver Bierhoff) قال إن كان المفروض إن المدير الفني للمنتخب (يواكيم لوف Joachim Low) مياخدش (أوزيل) المنتخب .. (راينهارد جرينديل Reinhard Grindel) رئيس الإتحاد الألماني لكرة القدم طلع قال إن (أوزيل) زعل منه ناس كتير في ألمانيا بسبب مقابلته ل(أردوغان) .. اللي أنا مش قادر أفهمه هو إزاي إتحاد الكورة يعمل كده؟ .. أنتوا كان المفروض تحموا اللاعيب بتاعكوا مش تعتبروه كبش فداء .. طب إنت يا (أولي هوينس) بتقول كده علي لاعب إتحط في القائمة النهائية المرشحة إنها تاخد جايزة الكرة الذهبية Ballon d’Or أربع مرات؟ .. لاعب كسب بطولة الدوري الإسباني مع ريال مدريد و كسب كأس إنجلترا مع أرسنال و كأس عالم مع ألمانيا؟ .. لاعب كسر الرقم القياسي لأقل عدد ماتشات تتلعب عشان يعمل 50 تمريرة حاسمة في الدوري الإنجليزي؟ .. لاعب عمل كل ده تقول عليه لاعيب عادي و مبالغ فيه؟ .. بلاش كل ده .. مسمعتكش بتقول كلمة وحشة علي حد زي (توماس مولر Thomas Muller) اللي بيلعب في فرقتك مع إنه كان زي الخرا مش زي الزفت مع ألمانيا في كأس العالم اللي فات؟
و لإن (أوزيل) فيه عرق تركي حامي شوية فهو مسكتش و مستخباش لحد ما العاصفة دي تهدأ .. لا ده طلع دافع عن قراره إنه يتصور مع (أردوغان) و قال إن الفكرة مش إنه إتصور مع (أردوغان) .. الفكرة إن (أوزيل) من أصل تركي و أيا كان اللي ماسك منصب رئيس تركيا لو الرجل ده حب يتصور معاك فإنت لازم تلبي رغبته .. (أوزيل) قالها صراحة أنا عندي قلبين واحد تركي و واحد ألماني و مش حختار أقتل واحد عشان التاني يعيش .. مش كده و بس .. تاني يوم علي طول و بالصدفة و كأن ربك بيبعت رسالة للألمان إتنشرت دراسة إتعملت في جامعة دويسبيرج-ايسين Duisburg-Essen قالت إن أغلب الألمان اللي من أصول تركية اللي عايشين جوه ألمانيا بيحسوا إنهم مرتبطين بتركيا أكتر ما هم مرتبطين بألمانيا .. الدراسة دي طلعت بشوية نتايج تخليك مذهول من اللي إنت بتقراه بس بعد شوية بتبدا تقول لنفسك مممممم عشان كده (أوزيل) و (جوندوجان) إتصوروا مع (أردوغان):
- حوالي 89% من الألمان اللي من أصل تركي اللي عايشين في ألمانيا قالوا إنهم بيحسوا بإنتماء قوي لتركيا.
- حوالي 83% من الألمان الأتراك بيقولوا إنهم بيحسوا إن ألمانيا و تركيا بلدهم و مش بيحسوا إنهم لما بيزوروا تركيا إنهم رايحين زيارة لدولة تانية.
- بتتكلم عن إن 38% من الألمان اللي من أصل تركي قالوا إنهم مش ناويين يروحوا تركيا تاني .. 15% قالوا إنهم ناويين يرجعوا تاني تركيا و يعيشوا فيها علي طول .. و الأهم إن 37% قالوا إنهم بيتنقلوا ما بين تركيا و ألمانيا.
- حوالي 6% من الألمان اللي من أصل تركي مهتمين باللي بيحصل في السياسة الألمانية علي عكس ال47% الباقيين اللي مش فارق معاهم .. في حين إن 33.9% مهتمين أوي باللي بيحصل في السياسة التركية علي عكس ال30.7% اللي هم حزب الكنبة اللي مطفيين دماغهم.
نتايج الدراسة اللي إتعملت عن إحساس الألمان من أصل تركي تجاه تركيا.
أنا بس عايز أختم بإني أرجع تاني لنقطة نموذج الإجابة اللي الغرب عايز المهاجرين يمشوا عليه .. سنة 2016 إتنشر كتاب حلو أوي إسمه The Good Immigrant أو المهاجر الكويس بيحكي قصة 21 مهاجر من أصول أفريقية و أسيوية عايشين حالياً في بريطانيا .. الكتاب بيقول إن نموذج الإجابة اللي أنا بتكلم عنه هو إنك تقبل ثقافة الدولة اللي إنت حتهاجر ليها زي ما هي و تقبل كمان الظروف الإجتماعية و الإقتصادية اللي إنت حتتحط فيها و إنت ساكت .. مش كده و بس .. ده إنت تعيش و إنت مبسوط و تبوس إيدك وش و ظهر إننا قبلنا نستقبلك يا مهاجر يا كحيان إنت يا اللي لميناك من الشوارع و عطينالك فرصة تبقي بني أدم .. القصة اللي فعلاً بتحكي اللي بيمر به (أوزيل) دلوقتي حكاها واحد إسمه (موسي أوكوونجا Musa Okwonga) و هي ان مش حتفرق حتي لو إنت مشيت علي نموذج الإجابة و بقيت مهاجر كويس و سمعت الكلام و معملتش مشاكل .. بمجرد ما تحصل حاجة غلط أول حد حيشيل الليلة هو المهاجر .. و ده في حد ذاته حيخليني أشد في شعري خصوصاً في موضوع (أوزيل) .. يا جدعان (أوزيل) مش مهاجر .. هو من مواليد منطقة جيلسينكيرشين في ألمانيا يعني ده بني أدم إتولد جوه ألمانيا .. بس لمجرد إن إسمه (مسعود) و إن أصوله تركية و إن ديانته مسلم فهو في نظر الألمان اللي فيه منهم أعضاء في إتحاد الكورة مش ألماني أوي.
قرار (أوزيل) إنه يعتزل اللعب الدولي في رأيي لازم تخلي أوروبا تفهم 3 حاجات: دول أوروبا إنجازاتها بتزيد لما بتبدأ تعتمد علي المهاجرين و مجرد بصة سريعة علي منتخب فرنسا اللي كسب بطولة كأس العالم 2018 و إن إزاي 14 لاعب من أصل 23 في تشكيلة المنتخب من أصول أفريقية فلو إنت مواطن أوروبي شايف إن المهاجرين دول خطر عليك فإنت محتاج تفوق من الوهم اللي إنت فيه .. مش معني إني مهاجر رحت دولة أوروبية إني لازم ألغي هويتي و ثقافتي اللي إتربيت عليها عشان حضراتكوا تتكرموا و تتعطفوا و تقبلوني أعيش معاكوا .. ثالث حاجة و هي إن ألمانيا نفسها كمجتمع مبينجحش إلا لما يشتغل كله مع بعضه و يستفيد بقدرات المهاجرين اللي عنده و إلا رجعوا النازيين تاني للحكم و ليحيا الرايخ الرابع.
المصادر:
- مقالة بعنوان How Mesut Ozil became a symbol for Western Europe’s problem with immigrants .. إزاي (مسعود أوزيل) بقي رمز لمشكلة أوروبا الغربية مع المهاجرين .. نشرت علي موقع The New Statesman و ده لينك المقالة الأصلية:
https://www.newstatesman.com/politics/sport/2018/07/how-mesut-zil-became-symbol-western-europe-s-problem-immigration - مقالة بعنوان German Turks still rooted in the east: Study .. دراسة بتقول إن الألمان الأتراك لسه حاسين إنهم مرتبطين بالشرق .. نشرت في مجلة Deutsche Welle الألمانية و ده لينك المقالة الأصلية:
https://www.dw.com/en/german-turks-still-rooted-in-the-east-study/a-44799929
