السعوديه و روسيا .. حتعورني حعورك.

كنت اتكلمت من فتره عن الخناقه اللي بين الروس و السعوديين و الامريكان بخصوص سعر برميل البترول وخليني دلوقتي اديلك ملخص سريع للاحداث .. اللي حصل حضرتك ان سعر برميل البترول قل بنسبه 31% وده سببه ان كان في اجتماع لحاجه اسمها OPEC+ ودي المفروض انها منظمه الدول المصدره للنفط OPEC ومعاهم روسيا والاجتماع كان المفروض يخلص بان السعوديين و الروس يتفقوا انهم هم الاتنين مع بعض حيقللوا انتاجهم بحوالي مليون و نص برميل يوميا بحيث يقسموا الحمل بينهم .. الروس رفضوا وده خلي السعوديين زي ما بنقول يطربقوا الدنيا فوق دماغهم و غرقوا السوق بترول و خسفوا بسعره الارض .. فعليا دلوقتي روسيا و السعوديه و شركات البترول الاميريكيه عاملين زي 3 كل واحد ماسك مسدسين و رافعين سلاحهم علي بعض مستنيين مين اللي فيهم الاول اعصابه تفلت .. ناس كتير بتقارن اللي بيحصل دلوقتي باللي حصل سنه 1985 .. في السنه دي ناس كتير مكنتش لسه اتولدت بس اللي حصل فيها ان بعد سنين من سياسه اننا مش عايزين نزود من انتاجنا من البترول بس فجأه السعوديه فتحت المحبس علي الاخر .. السعوديه غرقت السوق بترول و خسفت بسعره الارض .. ده خلي السعوديه من يوم و ليله اكبر و اهم منتج بترول في العالم وفعليا هي اللي متحكمه في السوق بس في نفس الوقت كان القشه اللي قسمت ظهر الاقتصاد السوفيتي بس اللي انا عايز اوريهولك دلوقتي ان الوضع اختلف كتير ..الخناقه دي فعلا معقده بس اللي انا ححاول اعمله اني اقيم الخناقه دي من وجهه نظر السعوديين .. ايه نقاط قوتهم؟ و ايه اللي ممكن يخليهم يخسروا الخناقه؟ .. من خلال ده انت تقدر تستوعب هي الخناقه دي لو كملت ايه اللي ممكن يحصل؟

خلينا نبدا بالاسلحه اللي في ايد السعوديين .. اهم ميزه ان شركه ارامكو Aramco السعوديه سابقه زمنها في تكنولوجيا التنقيب عن البترول لدرجه ان فعليا تكلفه انتاج برميل البترول الواحد واقف عليها بحوالي 2.8 دولار وده رقم يعتبر ولا حاجه قصاد مثلا تكلفه انتاج برميل البترول عند شركه روزنيفت Rosneft الروسيه اللي بتوصل 20 دولار او شركه ايكسون موبيل Exxon Mobil الاميريكيه اللي بيوصل 16 دولار .. اذن علي المدي القصير اكتر حد حيتضر هم الروس و الامريكان و اكتر حد مش حيبقي فارق معاه اوي هو السعوديين .. لكن .. لو العركه دي طولت حتلاقي الحسبه اختلفت شويه .. بما اننا بنبص علي الموضوع من وجهه نظر السعوديين فهم عندهم مشكله وهي ان ارامكو هي الاقتصاد السعودي و الاقتصاد السعودي هو ارامكو .. اعتماد الاقتصاد السعودي علي ارباح ارامكو بيخليك علي المدي الطويل لازم تعتبر ارامكو هي السعوديه و تبدا تحسب حاجه اسمها Breakeven اللي هو سعر بيع برميل البترول اللي يخلي الموازانه بتاعه السعوديه تصفر يعني متبقاش بالخساره .. بالنسبه للسعوديه سعر برميل البترول اللي يخلي الموازنه بتاعتها تصفر هو 83.6 دولار وده رقم احنا مشفناهوش من 5 سنين .. بالنسبه للروس فسعر برميل البترول اللي يحققلهم حاله Breakeven هو 42 دولار و ده تقريبا نفس السعر بالنسبه لشركات البترول الاميريكيه .. طب ده معناه ايه؟ .. لو سعر برميل البترول فضل ينزل لمده كذا شهر فاللي حيحسم الخناقه بين الروس والسعوديين و شركات البترول الاميريكاني هو حسبه تانيه خالص .. مين الاطراف اللي تقدر تستلف فلوس عشان تعرف تسند نفسها؟

الرسم البياني ده بيوريك حاجه اسمها Breakeven وده سعر بيع برميل البترول اللي يخلي ميزانيه الدول اللي عندك في الرسم البياني ده تصفر يعني متبقاش بالخساره .. بالنسبه للسعوديه السعر ده هو 83.6 دولار .. الامارات حوالي 70 دولار .. العراق بتوصل 60.3 دولار .. الكويت بتتكلم عن 54.7 دولار .. شركات البترول الاميريكيه 44 دولار .. اخيرا روسيا 42.4 دولار.

مهم تكون فاهم ان مش كارثه ان دوله تبقي مديونه .. الدول عشان تخلص من المشكله دي بتحول ديونها لسندات بفوايد بحيث ان الناس بتروح تشتري السندات دي وهوبا ديون البلد بتختفي بحيث ان كل ما كانت الفايده قليله كل ما كانت قدره اقتصاد البلد انه يسد الديون اللي عليه اقوي .. سند الدين السعودي اللي حيبدأ يجيب ارباحه في ابريل 2030 نسبه الفايده بتاعته 2.38% .. الاقتصاد الروسي رغم انه مفروض عليه عقوبات اقتصاديه اميريكيه بقالها اكتر من 10 سنين الا ان سند الدين الحكومي الروسي اللي بيفضل يديلك ارباح علي 10 سنين الفايده بتاعته 2.56% .. حزر فزر شركات البترول الامريكاني لو جربت تاخد قرض من البنك حتاخده بفايده كام؟ .. 10.6% .. ده معناه ان شركات البترول الاميريكيه حتي الكبيره منها زي Exxon Mobil و تشيفرون Chevron بتنزف فلوس دلوقتي و حيتخرب بيتها علي المدي الطويل و حتطلع من الخناقه دي بدري بدري .. اللي حيكملوا في عركه تكسير العظام دي هم الروس و السعوديين .. لو السعوديين فاكرين انهم يقدروا يخربوا بيت الروس زي ما خربوا بيت السوفييت سنه 1985 فهم يبقوا غلطانين .. عكس الموازنه السعودي دلوقتي اكبر بكتير من عجز الموازنه بتاعهم سنه 1985 .. مصاريف السعوديه دلوقتي اكبر بكتير من مصاريفها سنه 1985 .. سنه 1985 مكنش عندهم (محمد بن سلمان) بيبعزق فلوسه ع الهيافات .. مكنش عندهم حرب في اليمن بتخليهم ينزفوا فلوس .. ده يوريك ليه الروس دلوقتي بيجروا عشان ينسحبوا من سوريا حتي لو حيسبوها للاتراك .. الروس عايزين يقللوا مصاريفهم قدر الامكان .. يا تري السعوديين حيعملوا كده؟ .. لازم تبقي فاهم ان اللي بيحصل دلوقتي هو فعليا حرب استنزاف .. في حروب الاستنزاف اللي بيكسب مش بالضروره الاقوي .. اللي بيكسب هو اللي يقدر يستحمل الضرب لاطول فتره ممكنه .