فيه أسئلة كتير بتتسأل بسبب اللي عمله فيروس كورونا في الموسم الكروي الأوروبي أنا معرفش إجابتها .. أنا معرفش هل الدوري الإنجليزي حيكمل ولا لا؟ .. معرفش هل بطولة Champions League حتخلص علي كده و يعيدوها من الأول ولا لا؟ .. أنا معرفش هل ليفربول حيتوج بلقب الدوري النحس ده ولا لا؟ .. بس اللي أنا أقدر أقوله ليك و أنا شبه مطمن إنه حيحصل إن (بول بوجبا Paul Pogba) مش حيبقي ضمن السكواد بتاعة مانشستر يونايتد الموسم الجاي إن شاء الله .. لا هو ولا النادي ولا حتي مدير أعماله (مينو رايولا Mino Raiola) عايزينه يكمل .. عقد (بوجبا) مع مانشستر يونايتد حيخلص في 2021 و مفيش حد الصراحة من مجلس الإدارة بيفكر يقعد معاه عشان يجدد عقده .. السؤال هو مش (بوجبا) حيمشي ولا لا .. سبب إني بقول إنه حيمشي يعني حيمشي إن عنده 27 سنة و عقده حيخلص السنة الجاية يعني لو متباعش السنة دي بفلوس فهو السنة الجاية حيمشي ببلاش فالسؤال هو حيمشي إزاي؟ .. الحقيقة إن فيه إحتمالين.
خلينا نبص علي الإحتمال الأولاني إنه يرجع تاني يوفينتوس .. مشكلة الإحتمال ده في نقطة و هي إن مانشستر يونايتد دفع في (بوجبا) فلوس .. هم دفعوا فيه 89 مليون جنيه إسترليني سنة 2016 لو تفتكر و النادي عايز يرجع علي الأقل يعني جزء منها .. مانشستر يونايتد بيتكلم إنهم عايزين فيه حوالي 80 مليون جنيه إسترليني .. يوفينتوس هو كمان معهوش المبلغ ده .. ده معناه إن مفيش غير حل واحد للمشكلة دي و هي إن يوفينتوس يعرض علي مانشستر يونايتد مبلغ إلي حد ما صغير و فوقه لاعيب .. يوفينتوس عرض علي مانشستر يونايتد 3 أسامي يختاروا منهم واحد .. (بابلو ديبالا Pablo Dybala) و (ميراليم بيجانتيتش Miarlem Pjanic) و (أرون رامزي Aaron Ramsey) .. شايفك يا اللي حتريأكت لاف لما قريت اسم (ديبالا) بس أستني.
يقال إن المدير الفني لمانشستر يونايتد (أولي جونار سولشاير Ole Gunnar Solskjaer) بيفكر جدياً ياخد (رامزي) .. الفكرة إن (سولشاير) بيقول إن (بوجبا) مبيجريش وهو عايز لاعيب خط وسط بيجري كتير او Box-to-Box عشان يشتغل جنب صانع الالعاب البرتغالي (برونو فيرنانديز Bruno Fernandes) .. الوحيد من ال3 اسامي اللي يوفينتوس عرضهم اللي بتنطبق عليه المواصفات دي هو (رامزي) .. زود علي كده انه لسه عنده 29 سنه .. فوق ده كله ان (رامزي) حافظ الدوري الانجليزي من العشر سنين اللي هو قضاهم مع ارسنال .. لحد دلوقتي الدنيا سالكه اهي .. بس فيه خازوقين .. الخازوق الاول هو الاصابات .. (رامزي) طول الموسم تقريبا مصاب و ملعبش غير 24 ماتش جاب فيهم 4 جوان و عمل اسيست يتيم .. الخازوق الثاني هو المرتب .. عشان (رامزي) راح يوفينتوس ببلاش بعد ما عقده خلص مع ارسنال فهو طلب انه ياخد مرتب عالي .. هو بياخد في يوفينتوس 400,000 جنيه استرليني في الاسبوع وحط في اعتبارك انه ماضي عقد 4 سنين يعني المفروض يخش جيب (رامزي) من يوفينتوس 83 مليون جنيه استرليني .. قولي انهي نادي في الدنيا دماغه فيها حاجه حيوافق انه يدفع المبلغ ده في لاعيب خط نص بيتصاب اكتر ما بيروح الحمام؟
نيجي للاحتمال الثاني .. ان مانشستر يونايتد يجيبوا (ساؤول نيجيز Saul Niguez) من اتليتيكو مدريد .. بحق الله يعني هو ده اللاعيب اللي (سولشاير) عايزه عشان يحل محل (بوجبا) .. عي ايدك اليمين هو لسه صغير يدوبك 25 سنه .. هو مهاري و بيجري كتير و يعتبر مثالي اكتر انه يلعب جنب (برونو فيرنانديز) من (رامزي) .. هو صحيح مش مكنه جوان يعني لانه لعب 37 ماتش مع اتليتيكو الموسم ده جاب فيهم 4 جوان بس لكن خلينا صرحاء ان اتليتيكو السنه دي مش هو الفرقه الهجوميه اللي تخلي لاعيب خط وسط زي (ساؤول) يقلب علي النسخه الاسباني من (فرانك لامبارد Frank Lampard) .. علي ايدك الشمال المشكله في سعره .. الشرط الجزائي في عقده مع اتليتكو مدريد 135 مليون جنيه استرليني .. ده معناه ان عشان مانشستر يونايتد يجيب فلوسه فهم لازم يبيعوا (بوجبا) ولان يوفينتوس زي ما قلنا معهمش فلوسه فكده عشان (ساؤول) يجي مانشستر يونايتد لازم ريال مدريد مثلا يدفع ال80 مليون جنيه استرليني اللي النادي عايزهم في (بوجبا).
المصادر:
مقاله بعنوان Aaron Ramsey ‘offered to Manchester United’ as part of bid to lure Paul Pogba back to Juventus نشرت في جريده The Daily Mail وده لينك المقاله الاصليه:
https://www.dailymail.co.uk/sport/football/article-8166813/Aaron-Ramsey-offered-Manchester-United-bid-lure-Paul-Pogba-Juventus.html
مقاله بعنوان Manchester United ‘Increasingly confident of club-record £135m Saul Niguez signing’ to replace Paul Pogba نشرت في جريده The Daily Mail وده لينك المقاله الاصليه:
https://www.dailymail.co.uk/sport/football/article-8166611/Manchester-United-increasingly-confident-club-record-135m-Saul-Niguez-signing.html
