مشروع أرتميس .. عتبة عتبة عتبة.

في الوقت اللي إحنا محتاسين لشوشتنا مع فيروس كورونا و قاعدين في بيتنا يا بنتعلف يا الورك فروم هوم حيجيبلنا إنزلاق غضروفي فالأخوه في NASA شغالين علي مشروع شبه اللي بتشوفهم في أفلام الخيال العلمي كده .. المشروع إسمه برنامج أرتميس Artemis Program و ده بمنتهي البساطة هم عايزين يبعتوا رائدة فضاء ست للقمر علي سنة 2024 .. إشمعني ست يعني؟ متسألش دلوقتي .. عشان هم مش عايزين يبعتوها و يرجعوها كأنها رايحة مشوار و مروحه فهم عايزينها تفضل قاعده علي القمر شوية .. عشان ده يحصل فالباشمنهدسين بتوع NASA عايزين يبنوا محطة فضاء إسمها العتبة أو Gateway و العتبة دي حتبقي زيها زي محطة الفضاء الدولية ISS اللي بتدور حول الأرض بس العتبة حتبقي بتدور حول القمر .. محطة فضاء حتبقي بتلف حول القمر و رواد الفضاء قاعدين فيها و وقت ما يتطلب ينزلوا علي سطح القمر حينزلوا .. محطة الفضاء دي حيتركب فيها معامل و أماكن إعاشة و تليسكوب و ليلة كبيرة أوي سعادتك و هنا يجي دور شركة SpaceX.

للناس اللي مش عارفه إيه هي SpaceX؟ فخليني أبسطهالك .. عارف أوبر Uber؟ .. مش أوبر دي فكرتها إنك لما تحتاج حد يوصلك سواء انت لوحدك أو لو شايل شنط و حاجات عشان يوديك من حتة لحتة؟ .. أهي SpaceX بقي هي أوبر بس لNASA .. كل ما NASA تحب تبعت معدات أو أكل أو شرب أو أجهزة لمحطة الفضاء الدولية اللي بتلف حول الكرة الأرضية بتكلم SpaceX .. إذا كانت أوبر معتمدة علي أسطول عربيات فشركة SpaceX بتعتمد علي أسطول صواريخ إسمها فالكون تسعة Falcon 9 والمعدات نفسها بتتركب جوه علبة مقفولة بتوع الفضاء بيحبوا يسموها كبسولة Capsule و الكبسولة اللي SpaceX بتستخدمها مسمياها دراجون Dragon .. لأكتر من عشر سنين دلوقتي و SpaceX هي أوبر بتاع NASA اللي بتوصل أي حاجة لمحطة الفضاء الدولية .. من كام يوم NASA  مضت عقد مع (إيلون ماسك Elon Musk) مؤسس SpaceX عشان تبقي هي أوبر بتاعها برده اللي حيبدأ يوصل المعدات المطلوبة لمحطة العتبة Gateway ولإن محطة العتبة دي أبعد من محطة الفضاء الدولية فالأخوة بتوع SpaceX شغالين دلوقتي علي Upgrade بتاع الكبسولة دراجون و مسميينها Dragon XL.

الكبسولة دي فعلاً كبيرة بتقدر تشيل حمولة 5 طن و اللي عشان توصل للقمر حتروح علي صاروخ فالكون هيفي Falcon Heavy وده ما هو إلا 3 صواريخ Falcon 9 متربطين ببعض .. لحد دلوقتي الكلام حلو .. تعالي بقي نتكلم في الكلام اللي يزعل .. الفلوس .. العقد بيقول إن سعر الرحلة ثابت .. العقد بيقول إن في كل مرة تطلع الكبسولة Dragon XL لمحطة العتبة فهي حتفضل راكنه فيها من 6 شهور لسنة وخلال الفترة دي طاقم رواد الفضاء اللي حيكون في المحطة حيبدأ يحول الحمولة دي من الكبسولة للمحطة .. NASA حاطة ميزانية 7 مليار دولار علي 12 سنة ثمن الرحلات وده معناه إنك بتتكلم عن عدد رحلات مش صغير .. السؤال دلوقتي هل SpaceX حتعرف تسد لوحدها؟ .. الله أعلم بس العقد بيقول إن NASA من حقها تدخل في الصفقة شركة تانية تساعد SpaceX في حالة إنها مكنتش عارفه تقوم بالليلة لوحدها.

بس قبل ما تقول هيييييه لازم تهدي شوية .. فيه أسئلة كتير إحنا مش عارفين إجابتها .. محطة العتبة Gateway دي حتتبني إمتي؟ الله أعلم .. كيس الشيتوس اللي بيحكم أميركا راسه و ألف سيف NASA تبعت رواد فضاء للقمر تاني علي سنة 2024 .. ده معناه إن NASA قدامها 4 سنين بس عشان تبني المحطة .. طب إفرض ملحقوش؟ .. ساعتها هم حيبعتوا رحلة رواد فضاء للقمر رايح جاي من غير ما يبنوا المحطة لمجرد إنهم يخلصوا من زن (دونالد ترامب) .. مش بس كده .. أزمة كورونا أجبرت NASA إنها توقف شغلها علي مشروع صاروخ الفضاء Space Launch System أو SLS وده الصاروخ اللي إن شاء الله يعني حيبعت أول رحلة رواد فضاء للقمر ضمن برنامج أرتميس .. في الوقت اللي مهندسين NASA مريحين في البيت فالأخوة بتوع SpaceX عرفوا ياخدوا إستثناء من ولاية كاليفورنيا علي أساس إن الشركة شغاله في مشاريع تبع وزارة الدفاع وبالتالي هم مسموح ليهم إنهم ميلتزموش بالحظر .. ده معناه إن SpaceX تقدر فعلياً تسبق NASA و تكمل هي شغل في كبسولة Dragon XL .. من الأخر حتلاقي ناس كتير بتتكلم عن يااااه شايفين SpaceX بقت شركة محترمة إزاي و بتشتغل في الفضاء و حتروح القمر بس انت محتاج تفهم إن لسه بدري علي التفاؤل .. فيه أسئلة كتير محتاجين نجاوب عليها .. زي ما قلتلك أهمها هي العتبة حتتعمل أصلاً؟

المصدر: مقالة بعنوان NASA tasks SpaceX with sending cargo and supplies to future lunar space station نشرت علي موقع The Verge وده لينك المقالة الأصلية:
https://www.theverge.com/2020/3/27/21197300/spacex-nasa-dragon-xl-cargo-moon-gateway-space-station-artemis