القوات الجوية الألمانية اللي بتتسمي هناك لوفت- فافي Luftwaffe عندها مشكلة كبيرة و المشكلة دي الأخوة بتوع الجيش بيحبوا يسموها إسم سيكسي أوي اللي هو درجة الإستعداد القتالي Readiness Level و دي بمنتهي البساطة معناها هو لو بكره الصبح ألمانيا دخلت حرب مع روسيا مثلاً فكام طيارة من الطيارات اللي تحت إيدها حتبقي جاهزة تخش الحرب؟ .. المشكلة دي أنا إتكلمت عنها قبل كده و ركزت كلامي علي أسطول طيارات إيوروفايتر تايفوون Eurofighter Typhoon بس النهاردة خلينا ناخد الموضوع من زاوية أكبر شوية .. النهاردة مش حتكلم بس عن الطيارات دي بس إنما حتكلم عن سلاح الجو الألماني ككل لإن الناس دي ناويه تعمل حاجة إنت لو بصتلها من غير ما تفهمها حتحس إنهم شوية هبيده و عشان كده أنا عايز أتكلم عن المشكلة اللي بيعيشها سلاح الجو الألماني بشوية تفصيل .. الأول خلينا نفهم هي المشكلة فين؟
سلاح الجو الألماني عنده 3 أنواع من الطيارات المقاتلة حالياً .. أول حاجة عندهم 141 طيارة مقاتلة من طراز Eurofighter Typhoon و دي طيارات معموله مخصوص للإشتباكات الجوية Dogfighting .. ثاني حاجة عندهم 93 طيارة بانافيا تورنيدو Panavia Tornado و دي طيارات إتصممت مخصوص للغارات الجوية علي أهداف أرضية .. ثالث حاجة عندهم طيارات إستطلاع و حرب أليكترونية و تشويش علي الرادارات بس النوع ده مش قضيتنا دلوقتي .. النوع الثاني هو اللي عايزين نتكلم عنه .. طيارات Panavia Tornado دخلت الخدمة في سلاح الجو الألماني سنة 1979 و المفروض يعني إنهم حاطين خطة إن الطيارات دي تطلع بره الخدمة سنة 2025 .. جميل .. الكلام اللي إتقال إن وزارة الدفاع الألمانية حاطه ميزانية مبلغ محترم عشان تشتري طيارات تحل محل طيارات Tornado .. طبعاً الناس كانت متشوقه تعرف هم حاطين عينهم علي أنهي طيارة؟ .. لما الألمان قالوا إنهم مش حيشتروا نوع واحد دول حيشتروا 3 أنواع طيارات مختلفة مرة واحدة ناس كتير قالت اوووووه مااااااي جاااااد أبو شيماء إتهور و حيبعزق فلوسه علي السلاح .. ال3 انواع كانوا كالأتي:
- الألمان حيشتروا 78-90 طيارة Tranche 3 Typhoon اللي هي النسخة الأحدث من طيارات Eurofighter Typhoon اللي فعلياً في الخدمة و مش حتطلع معاش قريب.
- حيشتروا تقريباً 30 طيارة FA-18E/F Super Hornet و دي طيارة أميريكية من تصنيع شركة بوينج Boeing و هي صحيح طيارة متعددة المهام بس هي إتصممت أولاً و أخيراً عشان تشتغل علي حاملات الطائرات.
- كمان حيشتروا 15 طيارة EA-18G Growler و دي طيارات أولاً تبقي بنت عم طيارات Super Hornet و ثانياً هي بتاعة تشويش علي الرادارات و حرب أليكترونية .. الطيارات دي برده من تصنيع Boeing و كمان إتصممت عشان تشتغل من علي حاملات الطائرات.
لما ال3 أنواع دول أٌعلنوا ناس كتير قالت لا معلش ثانية واحدة .. يعني إنت حتطلع طيارة إتصممت مخصوص للغارات الجوية بره الخدمة و حتحل محلها ب3 طيارات مختلفة .. الأولانية تعتبر Upgrade لطيارة فعلياً عندك و مش بتاعة غارات جوية .. الثانية بتشتغل من علي حاملات طائرات اللي هي أساساً ألمانيا معندهاش منها .. و الثالثة بتاعة حرب أليكترونية اللي إنت أساساً قايل إنك مش محتاجها .. ما هو يا إما انتوا شوية هبيده مش فاهمين شغلكوا يا في حاجة غلط .. أنهي فيهم بقي؟
حفهمك .. هي مين أكتر بلد ألمانيا خايفه منها؟ .. صح روسيا .. دلوقتي إحنا عارفين إن طيارات Tornado دي قديمة و مش حتعرف تفلت من شبكة الدفاع الجوي الروسي فإنت محتاج طيارة تقدر تستخبي من الرادارت الروسية .. الله ينور عليك أديك قلت اللي فيها .. تستخبي .. يبقي أحسن حل إن ألمانيا تروح تشتري طيارات F-35 من شركة لوكهيد مارتن Lockheed Martin .. علي فكرة ده كان طلب سلاح الجو الألماني و الطلب ده إترفض و لما قائد سلاح الجو الجنرال (كارل مويلنر Karl Muellner) إعترض و قال إن لازم طلبه يتوافق عليه عايز أقولك إنه أُجبر علي الإستقالة .. فكرة طيارات F-35 دي كانت مرفوضة في ألمانيا و الحقيقة إن رفضهم ده مش رخامة و تنشيف دماغ و خلاص .. الرفض ده وراه منطق برده.
دلوقتي إنت مشروع F-35 مليان مشاكل و المشاكل دي مش بتخلص .. زود علي كده إن المشروع مفيش ولا شركة ألمانية شاركت فيه .. فده معناه إن لو ألمانيا إشترت طيارات F-35 و لقوا فيها مشاكل ففعلياً فيه حنفية فلوس حتفضل مفتوحة و رايحه لجيب شركة Lockheed Martin .. فوق ده كله إن العلاقات بين ست الكل (أنجيلا ميركيل Angela Merkel) و بين كيس الشيتوس الحجم العائلي (دونالد ترامب Donald Trump) أسوأ من العلاقة بين الزمالك و (كهربا) .. إفرض مثلاً يعني حصلت خناقة بين (ترامب) و (ميركيل) .. ساعتها (ترامب) عشان زي ما إنت عارف عيل صغير قام قالك بااااس أنا حمنع شركة Lockheed Martin إنها تبعت قطع غيار طيارات F-35 لألمانيا .. متقوليش إن ده إحتمال صعب يحصل .. (ترامب) شخصية هوائية و دماغه دماغ طفل في حضانة فتوقع منه أي حاجة.
طب ما برده سلاح الجو الألماني عنده حق .. إحنا محتاجين طيارة Stealth يعني تقدر تستخبي من الرادارات الروسية .. قالك ما علي فكرة ألمانيا و فرنسا شغالين علي مشروع طيارة حيسموها FCAS و دي حتبقي زيها زي F-35 ليها القدرة علي التخفي من الرادار و المفروض إنها حتخش الخدمة سنة 2040 ربنا يديلك و يديلنا طوله العمر .. فلو سلاح الجو حيموت علي طيارة Stealth فيصبر شوية و بدل ما حنديله طيارة أمريكاني كلها مشاكل و الله أعلم حتتصلح إمتي حنديله طيارة ألماني و عاملاها شركات ألمانية .. مش كده أحسن ولا إيه؟ .. طب أزيدك من الشعر بيت .. إنت تعرف إن سلاح الجو الألماني كان كده كده حيطلع 38 طيارة Tranche 1 Typhoon بره الخدمة من ال141 طيارة Typhoon اللي تحت ايدهم؟ .. موديل Tranche 1 ده كان أول موديل ينزل من الطيارة و ده دلوقتي بقي قديم لإن مفيهوش رادار AESA .. حفهمك .. حاول تتخيل إن Tranche 1 ده كان عامل زي Nokia 3310 بس دلوقتي الطيارات المقاتلة كلها شغاله علي Android OS .. ده يفسرلك ليه ألمانيا حتشتري 78-90 طيارة Tranche 3 Typhoon .. بس حتفضل المشكلة هي هي .. عليا الطلاق طيارات Tornado إتعملت للغارات الجوية علي أهداف أرضية و طيارات Typhoon إتعملت للإشتباك الجوي .. فين الطيارة اللي حتحل محل Tornado؟
هنا يجي دور الكلام عن طيارات FA-18E/F Super Hornet .. بمجرد ما إتقال إسم الطيارة دي ناس كتير جوه سلاح الجو قالت لوزارة الدفاع ما تعقلوا الكلام اللي أنتوا بتقولوه يا جدعان متخلوناش نتنرفز عليكوا .. يعني إنت جايبلي طيارة إتصممت عشان تشتغل من علي حاملات طائرات و أساساً ألمانيا معندهاش حاملة طائرات .. جايبلي طيارة أبطأ من Typhoon و مش بتطير علي إرتفاعات عالية زي Typhoon و مش بتشيل بنزين يكفيها تطير مسافات طويلة زي Typhoon .. ممكن تفهمني إنت جايبها ليه؟
هل تعلم إن ألمانيا عندها سلاح نووي؟ .. ده حقيقي علي فكرة .. بناء علي لايحة حلف شمال الأطلسي NATO فأميركا عاطيه لدول الحلف قنابل B61 و دي قنابل نووية بتتوجه بالجاذبية الأرضية .. القنابل دي أميركا عطتها لبلجيكا و تركيا و هولندا و إيطاليا و كمان ألمانيا .. لسنين و الألمان كانوا مريحين دماغهم لإن طيارات Tornado اللي كانت تحت إيدهم إتعملها التعديل في كابلات الكهرباء اللي يخليها تقدر تشيل قنابل B61 .. لسنين كانوا مش شايلين هم إن طيارات Typhoon مفيهاش و مش حيتعملها التعديل ده لإن ليه تقلق و تشيل هم و طيارات Tornado موجودة .. لما الألمان راحوا للأمريكان يقولوهم طب ما تعملوا التعديل ده علي طيارات Typhoon إتقالهم إن أولاً التعديل ده عشان يتعمل حياخد من 3-5 سنين و كمان حتدولنا طيارات Typhoon بتاعتكوا و مش حيبقي ليكوا ناس تحضر عملية التعديل .. ده معناه إن ممكن الأمريكان يفكوا الطيارات Typhoon عشان يعرفوا سر الصنعة بتاعها .. الألمان إعتبروا ده إبتزاز و لوي دراع .. طب و الحل؟
الأمريكان قالوا للألمان أنتوا يا تشتروا مننا طيارات F-35 اللي فعلياً حيتعملها التعديل ضمن عملية تطوير Block 4 Upgrade بس الحل ده إترفض من الألمان زي ما حكيت من شوية .. أو تشتروا مننا طيارات FA-18E/F Super Hornet .. وقتها الألمان قالوا طب معلش ما الطيارات دي هي كمان مفيهاش التعديل اللي يخليها تشيل قنابل B61 فأنا كده إستفدت إيه؟ .. اللي إتقال للألمان إن عشان الطيارات دي أمريكاني مش أوروبي فعملية تعديلها عشان تشيل قنابل نووية مش حتاخد وقت و حيتوافق عليه بسهولة.
طب دلوقتي إحنا فهمنا ليه الألمان حيشتروا طيارات Tranche 3 Typhoon؟ و فهمنا ليه حيشتروا طيارات FA-18E/F Super Hornet؟ .. نيجي بقي نفهم هو ليه الألمان عايزين يشتروا طيارات EA-18G Growler اللي تعتبر بنت عم FA-18E/F Super Hornet بس متخصصة في الحرب الأليكترونية و التشويش علي الرادار؟
فاكر لما قلتلك إن وزارة الدفاع رفضت إنها تشتري طيارات F-35 مع إن سلاح الجو كان شبطان فيها؟ .. و كانت الحجة إن لو تصبروا شوية لحد 2040 حنديكوا طيارة ليها برده قدرة التخفي من الرادار و حتبقي تصنيع ألماني فرنساوي مشترك إسمها FCAS .. طب من دلوقتي لحد سنة 2040 المفروض يعني غن سلاح الجو الالماني لو إتطلب منه إنه يخش مواجهة مع روسيا حيسحر عشان يتفادي الدفاع الجوي الروسي؟ .. للإجابة علي السؤال ده انت محتاج تسأل نفسك سؤال يبان غريب شوية .. هو ياتري الطيارين كانوا بيعملوا إيه قبل ما يبقي فيه Stealth؟.. فكر فيها كده .. مصر حاربت إسرائيل و بهدلنا بعض وكان عندنا منظومة دفاع جوي وهم كان عندهم طيارات وعلي رأي (أحمد حلمي) في الإعلان بتاع إتصالات عادي أهو .. الأمريكان حاربوا العراق اللي كان عندها واحدة من أقوي منظومات الدفاع الجوي في العالم ومكنش معاهم طيارات Stealth عادي أهو .. فتاني .. هو قبل تريند Stealth ده الطيارين كانوا بيحلوا مشكلة الدفاع الجوي إزاي؟
الحل إن بيبقي عندك طيارة متخصصة في التشويش علي الرادار بتطلع مع سرب الطيارات المقاتلة .. الطيارة دي بيبقي عليها Passive Radar بيقدر يلقط إشارة ال Active Radar اللي أنظمة الدفاع الجوي بتعتمد عليها عشان تلقط الطيارات المعادية .. الطيارات دي بتخلي الرادارات تكشف نفسها و بمجرد ما مكانها إتكشف بتضربها .. يدوبك شبكة الرادارات تقع فكده السكة بقت سالكه قدام الطيارات المهاجمة .. دي اللي طيارات EA-18G Growler حتديه بإنها تحدد أماكن منصات الرادارات الروسية و تضربها بصواريخ مخصوص إسمها AGM-88 HARM .. لو الصواريخ دي مش متاحة فالطيارة EA-18G Growler فيها نظام تشويش علي الرادار قوي أوي إسمه ALQ-99 بيقدر فعلياً يخلي الرادارات بتاعة منظومة دفاع جوي زي S-400 مش شايفه قدامها.
هل اللي حتعمله ألمانيا ده نصاحة ولا هم خزوقوا نفسهم؟ .. هم اه تفادوا إنهم يشتروا طيارات F-35 بكل مشاكلها و مصاريفها .. بس في نفس الوقت هم فكوها ب3 طيارات .. هل المصاريف اللي انت كنت حتكعها لو كنت إشتريت F-35 أقل من مصاريف شراء و صيانه و تسليح و تدريب الطيارين بتوعك علي 3 أنواع مختلفة من الطيارات؟ .. وعلي فكرة اللي حيحسم المسألة أولاً و أخيراً هي الفلوس .. و مينفعش إنك تبص علي سعر الطيارة لوحده كمقياس إنك تحدد .. بمعني .. لو انا جيت قلتلك إن الطيارة F-35A اللي ألمانيا كانت حتشتريها ثمنها 95 مليون دلار .. ولو جيت قلتلك إن ثمن الطيارة Super Hornet الواحدة 65 مليون دولار بس .. شايفك بدأت تهرش .. طب إيه رأيك إن ثمن الطيارة Typhoon بيعدي 100 مليون دولار .. مش بس كده .. عقد شراء طيارات Super Hornet مع شركة Boeing بيقول إن السعر ده اللي هو 65 مليون دولار شامل أحدث Upgrade حيتركب في الطياره سواء هي أو بنت عمها Growler قصاد إن لو ألمانيا راحت إشترت طيارات Typhoon فال100 مليون دولار ثمنها مش شامل أي Upgrades تتعملها .. ده لوحده حيخليك تقول ما هي إتحسمت أهي نروح نشتري Super Hornet و بنت عمها Growler و ربنا يباركلنا فيها .. لكن .. إيه رأيك إن الصفقة دي لو تمت حتخسر الشركات الألمانية 4 مليار دولار لإن متنساش إن طيارة Typhoon تصنيع ألماني فرنساوي إيطالي إنجليزي مشترك .. ها حتعمل إيه بقي يا حلو؟
محدش قال إن القرار سهل .. ومحدش قال إن القرار حيعجب الناس كلها .. ويمكن أهم حاجه تطلع بيها من المقالة دي إن شراء السلاح بالذات حوار معقد وكله تفاصيل و مشاكله كتير .. مفيش حل مثالي .. ودي زي ما قلت أهم قاعدة في شرا السلاح.
المصادر:
مقالة بعنوان Nukes, Trump, Russian Missiles: The Weird Reasons Germany May Buy Three Jet Fighter Types from Eurofighter and Boeing نشرت في مجلة Forbes وده لينك المقالة الأصلية:
