فيه إختراع اسمه قاعدة اللعب النظيف أو Financial Fair Play وإختصاراً بتتسمي FFP .. فكرتها بمنتهي البساطة إن لو أنا ماسك نادي زي أرسنال مثلاً فأنا كل 3 سنين مقدرش أخسر فلوس أكتر من 30 مليون جنيه إسترليني يعني بتتكلم إن أي نادي في أوروبا ميقدرش أخر كل سنة حساباته تقول إن خسايره عدت ال10 مليون جنيه إسترليني .. القاعدة دي من أول ما إتعملت وفيه ناس شايفينها بوجهتين نظر مختلفين خالص .. فيه ناس شايفاها إتعملت عشان تمنع بلطجة الأندية الغنية إنها تفضل تشتري لاعبين زي ما هي عايزه من غير حساب .. وفيه ناس شايفاها إتصممت عشان تخلي أندية أوروبا الكبيرة القديمة مسيطرة علي كرة القدم يعني الFFP إتعملت عشان أندية زي مانشستر سيتي وباريس سانجرمان اللي هم زي ما بنقول محدثين نعمة ميقدروش ينافسوا أندية زي مانشستر يونايتد وريال مدريد وبرشلونة وبايرن ميونيخ خصوصاً في البطولات الأوروبية اللي هي Champions League .. يمكن عشان كده من ساعة ما نادي مانشستر سيتي إتباع لأبوظبي سنة 2008 والإدارة الجديدة للنادي في حالة خناق مستمرة مع الإتحاد الأوروبي لكرة القدم UEFA.
اللي أنا عايزك تكون فاهمه كويس إن مانشستر سيتي كسب لقب الدوري الإنجليزي Premier League لحد دلوقتي 3 مرات خلال الكام سنة اللي فاتوا اللي هم في 2012 و 2014 و 2018 وفي كل مرة فيهم كانت تشكيلة الفرقة بتكون مختلفة خالص .. يعني خلال 6 سنين فرقة مانشستر سيتي إتفورت كلها حوالي 3 مرات وده لوحده بيحتاج صرف فلوس .. أظن السؤال دلوقتي هو إزاي السيتي قدر يكسب الUEFA في حرب الFFP؟ .. الحقيقة إن الإجابة كلها ليها علاقة بالحساب .. فاكر الحساب اللي كنا بناخده في إبتدائي زمان ده .. شهر نوفمبر 2018 أرباح السيتي كانت 473 مليون جنيه إسترليني السنة اللي قبلها أرباح النادي كانت 392 مليون جنيه إسترليني .. ده لوحده خلي مؤسسة زي The Deloitte Money League ودي مؤسسة بتقيم الأداء المالي لأندية أوروبا إنها تصنف السيتي إنه خامس أغني أندية أوروبا بعد مانشستر يونايتد وريال مدريد وبرشلونة وبايرن ميونيخ اللي كانت أرباحهم مثلاً 528 مليون جنيه إسترليني .. بس فيه نقطة مهمة .. لما الإنجليز صوتوا في الإستفتاء اللي إتعمل علي بقاء بريطانيا في الاتحاد الأوروبي وكانت أصوات أغلب الإنجليز إنهم يستقلوا عن الإتحاد الأوروبي واللي معروفه أوي باسم بريكزيت Brexit تاني يوم من إعلان نتيجة الإستفتاء قيمة الجنيه الإسترليني إنهارت 15% .. لو عوضت ال15% دول وزودتهم علي الرقم بتاع أرباح السيتي حتلاقي إرباحهم نطت من 473 مليون ل610 مليون اللي هم أعلي من ال528 مليون جنيه إسترليني بتوع أرباح نادي بايرن ميونيخ وده حيخلي الفرق بين أرباحهم وأرباح ريال مدريد وبرشلونة فروقات تقريباً لا تذكر خالص.
طبيعي السؤال اللي بعد يكون هي الفلوس دي كلها بتيجي منين؟ الحقيقة إن الإجابة علي السؤال ده ليها شقين:
جزء كبير من الفلوس جاي من صفقة الرعاية اللي النادي عملها مع شركة طيران الإتحاد عشان اسم الشركة يتحط علي الإستاد والتي-شيرتات بتاعة النادي والصفقة دي كانت بقيمة 400 مليون جنيه إسترليني علي مدي 10 سنين وإتوقعت في 2011 .. علي الناحية الثانية مثلاً عندك ريال مدريد لحد دلوقتي مش عارف يوصل لإتفاق نهائي مع شركة IPIC للطاقة ودي شركة إماراتية برده مقرها أبوظبي عشان اسم الشركة يتحط علي استاد السانتياجو برنابيو الجديد .. السيتي برده ليهم صفقات رعاية بتجبلهم فلوس حلوة أوي مع شركات زي Nexen ودي شركة كورية جنوبية شغالة في تصنيع إطارات العربيات وشركة SAP الألمانية ودي شركة شغالة في Software وشركة Wix ودي شركة إسرائيلية شغالة في مجال Website Development ده غير طبعاً صفقة الرعاية مع شركة Amazon الأميريكية.
جزء تاني هو إن فلسفة السيتي في شراء اللاعيبه إنهم مستعدين يدفعوا مبلغ كبير عشان يشتروك بس عمرهم ما حيدولك مرتب يبلع ميزانية النادي .. بمعني .. قلتلك إنهم دفعوا 57 مليون جنيه إسترليني عشان يشتروا (إيمريرك لابورتا Aymeric Laporte) بس مرتبه طول السنة واقف علي السيتي ب9 مليون جنيه إسترليني .. السيتي مبيدفعش أكثر من 57% من ميزانيته علي المرتبات وده بيخليهم معاهم فلوس إن لو أي لاعب أساسي إتصاب يقدروا يشتروا بديل بتاعه وده اللي قاله (جوارديولا Guardiola) نفسه إن فيه أندية بتصرف ما بين 300 ل400 مليون جنيه إسترليني عشان تشتري إتنين لاعيبه بس السيتي صرف 300 مليون علي 6 لاعيبه ويمكن عشان كده بفكرك إن في إنتقالات يناير اللي فات لما النادي حب يشتري جناح أرسنال (أليكسيس سانشيز Alexis Sanchez) وحسوا إنه طالب مرتب مبالغ فيه رفضوا يشتروه مع إن ثمنه كان أقل بكتير من ال60 مليون اللي كانوا حيدفعوها في (رياض محرز).
المصدر:
- مقالة بعنوان How Manchester Citywon the battle with UEFA to keep spending big نشرت في جريدة The Telegraph البريطانية وده لينك المقالة الأصلية:
https://www.telegraph.co.uk/football/2018/01/31/manchester-city-won-battle-uefa-keep-spending-big/
