لينك التسجيل الصوتي للمقالة علي Sound Cloud:
https://soundcloud.com/user-112011687-312727988/ulnzveibzp4j?utm_source=clipboard&utm_medium=text&utm_campaign=social_sharing
علاقة الدولة الرومانية بمصر من الحاجات اللي إحنا خدناها في منهج التاريخ بتاع إعدادي .. إتقالنا إن مصر كانت هي سلة الغذاء بتاعة الإمبراطوريه الرومانية و إنها كانت مهمة أوي بالنسبة ليهم .. طب ليه؟ .. الله أعلم .. طب هي الدولة الرومانية كانت بتجيب فلوسها إزاي؟ .. محدش قالنا الحكاية دي .. زي ما قلتلك المعلومات اللي إتقالتلنا إن إحنا كنا مهمين و خلاص .. واحدة من الأساطير اللي بتتقال عن الفتح الإسلامي هو إن الإسلام إنتشر بالسيف .. دي الحقيقة معلومة بتموتني من الضحك لإن عادة اللي بيقول الرأي ده مبيبقاش فاهم أوي يعني إيه إقتصاد .. أنا مش بتكلم عن الإسلام ولا بحاول أقولك أثبتلك إن الفتح الإسلامي ده أحسن إختراع بعد الحاجة الساقعة الشويبس جولد .. أنا بتكلم عن أساسيات إقتصاد .. الجيوش الرومانية زيها زي الجيش الإسلامي أو أي جيش لما بيخش بلد جديدة اه الميزانية بيخشلها فلوس حلوة أوي من نهب موارد البلد في الأول .. الضرائب كمان اللي بتتاخد من أهل البلد اللي بقت تحت إيدهم بتدخل فلوس حلوة برده .. بس إنت سألت نفسك هو يا تري المصاريف اللي بتتدفع كام؟ .. إنك تعمل حدود و تأمنها و يبقي ليك حامية عسكرية في كل ولاية قادرة علي إنها تحميها كل ده بفلوس .. و كل سنة الفلوس دي بتزيد .. التضخم في العملة مش إختراع لسه مكتشفينه أول إمبارح .. عشان كده التوسعات أو الفتوحات مينفعش تتحكي حكايتها من غير ما نتكلم عن أهم عامل بيتحكم فيها .. الفلوس.
تاريخ الدولة الرومانية تقدر تقسمه مرحلتين .. المرحلة الأولانية لما الدولة كانت ماشية بالنظام الجمهوري أو كانت جمهورية .. المرحلة الثانية لما بقت إمبراطورية .. الحقيقة إن علاقة مصر بالدولة الرومانية عدت بالمرحلتين زي ما حنشوف دلوقتي.
المرحلة الأولي .. الجمهورية الرومانية:
لما كانت الدولة الرومانية ماشية بالنظام الجمهوري كان سلو بلدهم إن فيه إسمها السينيت Senate أو البرلمان و ده مجلس الشعب المنتخب و كان قصاده فيه الحكومة ممثلة في إتنين رؤساء وزراء بيتقال عليهم القناصل .. كل قنصل له جيش و الإتنين مسئولين مسئولية كاملة عن أفعالهم قصاد البرلمان .. يهمني أوي أركز كلامي علي الفترة من 58-50 قبل الميلاد .. في الفترة دي روما كان ليها إتنين قناصل يعتبروا من أهم الشخصيات في تاريخ البشر .. واحد فيهم إحنا عارفينه كويس و أي حد بيربي كلاب أكيد مسمي واحد فيهم علي إسمه اللي هو (يوليوس قيصر Julius Cesar) و الثاني كان (نايوس بومباي Gnaeus Pompeius) .. مسئولية التوسعات العسكرية الرومانية بقي مسئول عنها الإتنين دول بحيث إن كل واحد فيهم خد حتة و بقي مسئول يحتلها .. (يوليوس قيصر) كان مسئول عن فتح بلاد الغال Gaul و دي دلوقتي تبقي فرنسا و ألمانيا .. (بومباي) كان مسئول عن إحتلال الدول اللي إنت دلوقتي عارفها بإنها تركيا و سوريا.
المشكلة اللي كانت بتواجه (يوليوس قيصر) كانت إن الإحتلال الروماني كان عامل زي الجواز كده .. في أوله حلو بس بعد كده بيبقي كله عبارة عن حاجتين اللي هم عايزين فلوس و النكد .. في الأول الفلوس بتبقي زي الرز .. النهب لكنوز و موارد البلد اللي بتحتلها كان بجيب فلوس كتير بس بمجرد ما البلد بقت ولاية رومانية مرحلة النكد و عايزين فلوس بتبدأ .. إدارة الولاية دي بفلوس .. تأمينها بفلوس .. مشاريع البنية التحتية اللي بتتعمل بفلوس .. السبب في كده إن بلاد الغال أساساً مكنتش حضارة قديمة ليها أي إنجازات فكان (يوليوس قيصر) بيبني دولة من الصفر .. علي الناحية الثانية (بومباي) كان زي اللي أمه دعياله و إتجوز أميرة خليجية بتصرف عليه .. النقلة الكبيرة حصلت ما بين 73-63 قبل الميلاد لما (بومباي) قدر يهزم مملكة بونطس Pontus و بكده تركيا كلها بقت ولاية رومانية .. وراها جت سوريا .. بعدها مملكة يهودا اللي هي فلسطين دلوقتي إستسلمت ليه من غير أي حرب و هنا بدأت المشكلة .. قبل ما (بومباي) ياخد المناطق دي كلها وقت ما (يوليوس قيصر) كان هو معشوق الجماهير و اللي لما إسمه بيتقال الستات بيغمي عليها من العظمة كانت ميزانية الدولة الرومانية بيخشلها في السنة 200 مليون سيستيرسي Sesterce و دي كانت عملة الدولة الرومانية .. لما (بومباي) إحتل تركيا و سوريا و فلسطين ميزانية البلد نطت بقت 340 مليون سيستيرسي.
مع الوقت الولايات الشرقية اللي هي تركيا و سوريا و فلسطين اللي الرومان بقوا بيسموهم علي بعض إسم أسيا Asia بقت فعلياً اللي شايلة الإقتصاد بتاع البلد .. الولايات الرومانية كلها كانت ميزانيتها بالسالب إلا أسيا اللي مش بس كانت إيراداتها بتغطي مصاريفها إنما كمان بتقدر تغطي مصاريف الدولة كلها .. بسبب ده قامت الحرب الأهلية بين (يوليوس قيصر) و (بومباي) اللي إنتهت بهزيمة (بومباي) .. بعد كده (يوليوس قيصر) إتقتل و الحرب الأهلية ولعت تاني بس الحرب إنتهت و لو مؤقتاً سنة 40 قبل الميلاد بتوقيع إتفاقية برينديزيوم بين الإتنين اللي كانوا بيتخانقوا علي تركة (يوليوس قيصر) اللي هم إبن أخته (أوكتافيان Octavian) و دراعه اليمين (مارك أنتوني Marc Anthony) .. بناء علي الإتفاقية (مارك أنتوني) خد هو تركيا و سوريا و فلسطين و (أوكتافيان) خد هو إيطاليا و الغال .. أو بمعني أخر .. (مارك أنتوني) خد الصدر و الورك و ساب ل(أوكتافيان) الرقبة و الكبد و الأوانص .. و دي كانت بداية إن مصر تلعب دور مهم في الإقتصاد الروماني.
(مارك أنتوني) بدأ يعمل تحالف مع (كليوباترا السابعة) ملكة مصر أو يمكن (كليوباترا) إختارت تتحالف مع الجنرال الغلط لإن (مارك أنتوني) ده عامل زي (حسام البدري) كده حتي لو إديتله فرقة مانشستر سيتي عشان ياخد دوري أبطال أفريقيا برده مش حيعرف .. (مارك أنتوني) عمل حاجتين دمروا الإقتصاد المصري .. أول حاجة إنه دبس مصر في حرب ملهاش أي ستين لازمة ضد الإمبراطورية البارثية Parthian Empire اللي بعد كده بقت الإمبراطورية الفارسية .. ثاني حاجة إنه أهمل أي حاجة ليها علاقة بالبنية التحتية .. طب نعمل مشاريع ري للأراضي الزراعية يقولك لا الحرب أهم .. نهاية حكم (مارك أنتوني) و معاه (كليوباترا) لمصر كانت بعد هزيمتهم في معركة أكتيوم البحرية سنة 31 قبل الميلاد .. بعد الهزيمة دي مش بس مصر بقت ولاية رومانية إنما كمان الدولة الرومانية إنتقلت من فكرة إنها جمهورية و بقت إمبراطورية .. (أوكتافيان) أعلن نفسه إمبراطور و غير إسمه بقي علي إسم أكتر شهر إنت بتكرهه في السنة كلها .. أغسطس .. (أوكتافيان) بقي إسمه (أغسطس قيصر).
المرحلة الثانية .. الإمبراطورية الرومانية:
المرحلة الثانية مكنش فيه قناصل .. الحكومة كانت ممثلة في شخص الإمبراطور و البرلمان ده تقدر تقول هو كيان إتعمل عشان خاطر الإمبراطور لما يلاقي نفسه عايز يخاطب الشعب يبقي الكلام مع البرلمان ده .. لما مصر بقت ولاية رومانية (أغسطس) لقي نفسه قدام مشكلة كبيرة .. دلوقتي مصر بجلالة قدرها و نيلها و خيرها و سلطاتها و باباغنوجها بيطلع منها إيرادات للميزانية بتاعة الدولة حوالي 40 مليون سيستريسي في السنة .. عشان بس تستوعب المشكلة أحب أقولك إن ولاية الغال اللي أنا حكيت عنها إنها لا كانت متقدمة ولا كان ليها حضارة ولا عندها نيل ولا عندها أي حاجة خالص بتطلع لميزانية الدولة برده 40 مليون سيستيرسي في السنة .. ده يوريك قد إيه الإقتصاد المصري كان رايح في ستين داهية .. في الأول إتحط قدام (أغسطس) كذا حل .. كان ممكن روما تغزو اليمن اللي كانت دولة غنية جداً وقتها .. كان ممكن روما تتخانق مع الإمبراطورية البارثية .. في الوقت ده حصلت حاجة بالصدفة يمكن كانت هي السبب إن (أغسطس) يقول لنفسه طب ما يمكن فيه حل تالت؟
اللي حصل إن لما الرومان دخلوا مصر نهبهم لمواردهم و سرقتهم للمعابد و الكنوز اللي كانت في قصور مش بس (كليوباترا) إنما أغنياء البلد خلت فيه فلوس كتير أوي تخش للميزانية .. زي ما قلتلك إحتلال الدول عامل زي الجواز و وقتها روما كانت لسه في الحلو اللي في الأول .. اللي حصل إن (أغسطس) بدل ما ياخد الفلوس دي يوزعها علي أكابر و أغنياء البلد و ياخد هو أغلبها في جيبه فهو عمل العكس .. هو عطي فلوس كاش في إيد العساكر و المواطنين .. يقال إن كل مواطن في روما الحكومة إدتله في إيده 400 سيستيرسي و قالتله روح شبرق نفسك و هيص و هات حاجة حلوة لعيالك و للولية اللي في البيت .. لما الفلوس دي إترمت في السوق فده عمل طفرة في الإقتصاد .. الناس بقي معاها فلوس و بقت تقدر تشتري البضايع الغالية اللي كان زمان محدش بيشتريها .. ده خلي التجار يجروا علي روما عشان يعرضوا و يبيعوا و يسترزقوا هم كمان .. ده في الوقت اللي إحتلال الرومان لمصر خلي تحت إيدهم الموانيء المصرية علي البحر الأحمر و اللي كانت مربوطة بطرق تجارة للهند .. فجأة الحل بقي واضح زي الشمس ل(أغسطس) .. ليه لا مصر تبقي عامله زي دبي دلوقتي؟
(أغسطس) إستغل الحامية الرومانية في مصر إنها تبدأ مشاريع بنية تحتية عشان تصلح أي حاجة بايظة .. كباري .. ترع .. أنظمه ري .. طرق .. طرق التجارة إتحط عليها نقاط حراسة و أبراج مراقبة و إستراحات للتجار .. دي نقطة .. النقطة الثانية إن زي ما دبي إهتمت بتطوير الموانيء بتاعتها فكمان (أغسطس) كان محتاج يعمل كده و ده خد منه كذا خطوة:
- خط التجارة كان كالأتي .. السفن بتيجي من الهند في ميناء إسمه ميوس هورموس Myos Hormos اللي إنت دلوقتي تعرفها بإسم مدينة القصير القديمة علي البحر الأحمر .. البضايع بتتحمل علي جمال و بتمشي في طريق لحد مديةه كوبتوس Coptos و دي دلوقتي تبقي مدينة قفط في محافظة قنا علي النيل .. سفن نيلية بتبدأ تاخد البضايع دي كلها تنقلها في النيل لحد الإسكندرية و من هناك لروما .. (أغسطس) خلي العساكر بتوعه يبنوا نقاط إستراحة علي طول الطريق من القصير لحد قنا.
- الرومان بدأوا يرجعوا تاني يهتموا بمناجم الذهب و الزمرد في الصحراء الشرقية و اللي البطالمة اللي كان أخر حكامهم هي (كليوباترا السابعة) كانوا هاملينها خالص .. نفس الكلام علي مناجم الصخر البورفيري اللي موجودة في حتة إسمها مونس بروفيريتيس Mons Prophyrites اللي دلوقتي إسمها جبل أبودخان .. برده الرومان إهتموا بإنهم يستفيدوا بمناجم الجرانيت في الحتة اللي إسمها مونس كلودانياس Mons Claudanius اللي إنت دلوقتي عارفها بإسم سفاجا.
نتيجة الشغل اللي عمله (أغسطس) إن خلال كام سنة عدد السفن التجارية اللي راحت من مصر للهند زاد من 20 بقي 120 .. السفن دي و هي راجعة مش بس بترجع ببضايع إنما و هي راجعة أكلت الحكومة الرومانية الشهد .. تعالي ناخد مع بعض مثال بسفينة إسمها هيرمابولون Hermapollon سافرت من الهند و جت لحد ميناء ميوس هورموس علي البحر الأحمر و شايلة حمولة فشيخة من البضايع اللي إجمالي ثمنها معدي 9 مليون سيستيرسي لوحدها .. و هي في الميناء الجمارك بتاخد عليها ضرائب 25% يعني 2.2 مليون سيستيرسي .. بحسبة بسيطة إنت بتتكلم علي إن ال120 سفينة دول و هم داخلين الميناء إتاخد عليهم ضرائب تقريباً 250 مليون سيستيرسي .. مش بس كده .. زي ما حكيت إن البضاعة دي بتروح لحد إسكندرية و من ميناء إسكندرية بتطلع علي روما .. عشان السفن التجارية تعدي في البحر المتوسط بيتاخد عليها ضرائب 2.5% يعني فوق ال250 مليو ن يعني فيه كمان 25 مليون سيستيرسي ضرائب سنوياً .. إنت رايح فين أنا لسه مخلصتش .. يعني هو الرومان مكانوش بيصدروا؟ ما هم كانوا بيصدروا بضاعة برده للهند .. السفن المتحملة بضايع رومانية و رايحة الهند بيتاخد عليها برده 2.5% ضريبة يعني زود عليهم كمان 25 مليون سيستيرسي سنوياً.
ده معناه إيه؟ .. معناه إن التجارة لوحدها خلت مصر تدخل للدولة الرومانية حوالي نص الميزانية بتاعة البلد .. سنة 50 بعد الميلاد مصر لوحدها كانت بتدخل للميزانية الرومانية 600 مليون سيستيرسي سنوياً .. عارف دول قد إيه؟ .. دول تلت إربع الميزانية السنوية للإمبراطورية الرومانية كلها .. يحكي أن بعد الإمبراطور (تايبيرياس Tiberius) ما مات الميزانية بتاعة الإمبراطورية كان فيها فائض 2.7 مليار سيستيرسي .. الفلوس الأوفر اللي كانت السبب فيها مصر خلت الأباطرة الرومان ياخدوا قرارات كانوا في العادي مستحيل ياخدوها .. لولا مصر مكنش الإمبراطور (كلوديوس Claudius) أمر بغزو إنجلترا سنة 43 ميلادي و ده كان القرار اللي أولاً كان كارثي عسكرياً و فشخ الميزانية بتاعة البلد لإن الرومان إكتشفوا إن التجارة مع القبائل البريطانية كانت بتجيبلهم فلوس أكتر من إحتلالهم ليها .. لولا مصر مكنش الإمبراطور (ديميشيان Domitian) مكنش فكر إنه يزود مرتبات ضباط و عساكر الجيش بنسبة 30% عشان يضمن ولاءهم ليه و ده القرار اللي كلف الميزانية 200 مليون سيستيرسي سنوياً.
فيه نقطة كانت دايماً بتتقال علي أهمية مصر بالنسبة للرومان و هي إن مصر كانت هي سلة الغذاء بتاعة الرومان .. الحقيقة إنت محتاج تفهم هي الجملة دي معناها إيه و خلينا نبدأ بأهم معلومة .. مصر لوحدها كانت بتطلع تلت إنتاج الإمبراطورية الرومانية من القمح .. طب ده معناه إيه؟ .. من أيام ما كانت الدولة الرومانية في مرحلة الجمهورية و هم شافوا حاجة غريبة أوي .. عدد سكان روما عمال يزيد و ده معناه إن الفقراء كمان عددهم بيزيد بس في نفس الوقت البرلمان أو Senate بينتخب من الناس .. بدأت تفهم أنا رايح فين أنا عارف .. ده كان معناه إن أعضاء البرلمان مبقوش بيفكروا غير إزاي يبانوا قدام الناس علي إنهم بيعملوا اللي يقدروا عليه عشانهم و ده خلاهم يعملوا ما يسمي Grain Dole اللي هي بالنسبة لينا دلوقتي هي رغيف العيش المدعوم و اللي عشان هي كانت مهمة أوي للرومان فإتسمت بإسم أنونا Annona و دي واحدة من الألهة بتاعتهم .. يقال إن الشارع الروماني مكنش بيفكر إلا في حاجتين .. العيش المدعوم و الفرجة علي ماتشات المجالدة Gladiators اللي إنت ممكن تكون شفتها في فيلم Gladiator .. اللي هو برده بالنسبة لينا إحنا العيش و الكورة .. تفتكر من غير العيش و الكورة كنا شغلنا وقتنا إزاي؟ .. المهم .. معني إنك كمواطن عايش في روما الحكومة مسئولة إنها توفرلك رغيف العيش ليك و لإسرتك فإنت مش بتبقي شايل هم إنك تحط جزء من فلوسك كل يوم للعيش .. ده معناه إن فلوسك تقدر تصرفها علي أي حاجة تانية و ده في حد ذاته شجع التجارة أكتر.
من الأخر مصر كانت مهمة بشكل إنت لا تتخيله للرومان .. التجارة بتاعتها كانت هي الأساس اللي إقتصاد البلد إتبني عليه .. القمح بتاعها كان هو الأساس اللي الإمبراطور و البرلمان بنوا نفوذهم في الشارع عليه .. ده كان معناه إن من أول (أغسطس قيصر) و اللي حكم من بعده و بقت أهم قاعدة عندهم هي إن مينفعش مصر يحصل فيها ثورة و ده يخليك تسأل نفسك طب هو إيه اللي ممكن يخلي المصريين يثوروا؟ .. والله فيه إحتمال من إتنين إن يا إما حد من الأسرة المالكة اللي كانت بتحكم مصر أيام البطالمة تخرب معاه و يبدأ ثورة عشان مصر تستقل عن روما .. أو إن جنرال روماني تخرب معاه برده و يحط إيده علي مصر و يسيطر عليها و يبدأ تمرد مفتوح .. طب و الحل؟
الحل اللي قاله (أغسطس) إنه بمجرد ما أعلن نفسه إمبراطور قسم الولايات بتاعة الدولة نصين .. النص الأولاني سماه Senatorial Provinces أو ولايات برلمانية .. النص الثاني سماه Imperial Provinces يعني ولايات إمبراطورية .. يعني إيه الكلام ده يا سي دوني؟ .. الولايات البرلمانية هي الولايات اللي مفيهاش مشاكل و اللي مش محتاجة يبقي فيها حامية كبيرة و بالتالي إتسابت للبرلمان أو Senate إنه هو اللي يختار مين اللي يحكمها .. الولايات الإمبراطورية هي الولايات الحساسة اللي بتحتاج حامية كبيرة عشان تحفظ الأمن بتاعها و الأهم إن اللي بيعين الولاة بتوعها هو الإمبراطور شخصياً .. كل ده كوم و مصر بقي كوم تاني .. مصر كانت ولاية إمبراطورية .. جميل .. اللي يحكم مصر لازم يبقي جنرال من الحرس الإمبراطوري يعني الإمبراطور يكون عارفه كويس أوي .. حلو .. مفيش عضو في البرلمان يقدر يهوب ناحية مصر ولا يزورها حتي إلا بموافقة رسمية من الإمبراطور و بالتالي مش مسموح لأي عضو في البرلمان إنه يمتلك أي عقار ولا أرض في مصر .. ماشي .. مينفعش إن مواطن مصري أيا كان هو إبن مين في البلد يترشح للبرلمان في روما .. أحيه .. ممنوع منعاً باتاً إن مصر يبقي ليها برلمان خاص بيها.
مش حبقي ببالغ لو قلت إن مصر كانت هي أهم ولاية رومانية .. كانت هي دبي بتاعتهم .. صحيح إنهم صرفوا كتير و إهتموا بيها عشان توصل للمستوي ده بس أنا عايزك تستوعب مدي أهميتها ليهم .. و مش بس ليهم .. التجارة بالذات كانت هي السبب إن كل القوي العظمي في العالم بدأت تحط عينها علي مصر عشان تحتلها و ده حيبدأ يمهدلنا الطريق للفتح الإسلامي لمصر .. أنا عايزك تطلع من المقالة دي بإنك تبقي فاهم إن إحتلال الدول مش ببلاش .. عايزك تطلع بإن التجارة بتجيب فلوس حلوة أوي بس إنت تفتح مخك .. عايزك تطلع بإن مصر فيها خير و تقدر تبقي من أغني دول العالم بس اللي يحكمها ميبقاش حرامي و يبقي بيفهم.
المصادر:
فيديو بعنوان Why was Egypt crucial for the Roman Empire? نشرت علي YouTube و ده لينك الفيديو:
https://www.youtube.com/watch?v=BaCaFpAtm48&t=519s
