فيروس كورونا ده عامل بالضبط زي ليله الدخلة .. إنت كرجل قبل ليلة الدخلة حماده و بعدها حماده تاني خالص .. نفس الكلام عن الستات بس بما إني رجل فخليني أتكلم عن الرجاله .. أول تجربة ليك للجنس بتفتح عنيك لحاجات كتير أوي في حياتك يمكن إنت متكونش بتاخد بالك منها .. الجنس بيغير من طريقة تفكيرك ومن أولوياتك و من نظرتك للحياة عموماً .. فيروس كورونا عمل في دول كتير نفس اللي ممارسة الجنس لأول مرة بتعمل في الرجاله .. بتخليهم يشوفوا الدنيا بشكل جديد و بالتالي قراراتهم بتختلف .. خد عندك بلد زي اليابان مثلاً .. اليابان قررت إنها تجيب 993 مليار دولار من الإحتياطي النقدي بتاعها تضخهم في السوق عشان الدنيا تشتغل بعد ما الناس أكل عيشها راح في داهية .. هل إنت كنت تتوقع إن اليابان تقرر تعمل حاجة زي دي لو مكنش فيه فيروس كورونا؟ .. بالتأكيد لا .. من ال993 مليار دولار دول فيه منهم 2.2 مليار دولار حيروحوا في إقناع الشركات اليابانية إنها تقفل مصانعها في الصين خصوصاً شركات الكاميرات اللي كانت بتجيب العدسات بتاعتها من مصانع في الصين عشان أرخص .. عارف إن فيه لسه مش مستوعبه فخلينا نقول تاني.
دلوقتي الصين هي أكبر شريك تجاري لليابان بس بسبب فيروس كورونا فالبضاعة اللي اليابان بتستوردها من الصين قلت بنسبة 50% .. طب المشكلة فين برده؟ .. المشكلة إن فيه حاجة في البيزنس اسمها Supply Chain وعشان تفهم البتاعة دي معناها إيه تخيل نفسك فاتح مطعم سندويتشات فول و فلافل .. دلوقتي سندوتش الفلافل ده هو المنتج النهائي End Product اللي إنت بتبيعه بس هو داخل جواه مكونات كتير إنت بتجيبها من بره .. الرغيف اللي بتجيبه من فرن .. الطماطم و الخس و الخيار بتجيبهم من الخضري .. الطحينة بتجيبها من العطار وهكذا .. ده اسمه Supply Chain .. لو الخضري اللي إنت بتشتري منه الطماطم و الخس مفتحش في يوم فإنت كده عندك مشكلة كبيرة لإن في اليوم ده إنت حتضطر تبيع كل سندويتشات الفلافل يا سادة يا طحينة بس وده حيكلفك فلوس .. نفس الكلام لو بصيت علي شركة ياباني زي Nikon أو Canon .. دي شركات بتجيب حاجات كتير من الصين زي العدسات فبسبب فيروس كورونا العدسات دي مبقتش بتيجي و بالتالي عشان إنت مينفعش تبيع كاميرا من غير عدسات فالشركات دي إتفشخت بسبب فيروس كورونا .. تيجي حكومة اليابان بقي تعمل إيه؟ .. قالك إحنا حنحط من جيبنا 2 مليار دولار كاش في إيد الشركات اليابانية اللي بتجيب حاجتها من الصين عشان تبدأ تجيبها من مصانع تانية جوه اليابان .. طب إفرض فيه حاجة معينة مش بتتصنع جوه اليابان؟ بسيطة .. إحنا حاطين 200 مليون دولار فوق ال2 مليار عشان الحالات الخاصة بتاعة إن فيه حاجة معينة مش بتتصنع جوه اليابان ومحتاجين نجيبها من بلد تانية .. بس بشرط .. البلد التانية دي متبقاش الصين برده.
علي فكرة بلاش دماغك تروح في سكة إن دي حلقة جديدة من مسلسل الصدام بين الصين و اليابان علي مين يفرض نفوذه أكتر في أسيا .. الموضوع ملوش علاقة بالسياسة تقريباً و عارف إن ده رأي حيبان غريب بس صدقني دي الحقيقة .. قبل فيروس كورونا ما يضرب العالم كانت فيه زيارة ناس كتير في اليابان و الصين كانوا مستنيينها للرئيس الصيني (جي جينبينج Xi Jinping) لليابان .. سياسياً هم مش صحاب بس في نفس الوقت مش رافعين المطاوي علي بعض .. الموضوع بيزنس صرف .. فيه معهد دراسات ياباني اسمه Tokyo Shoko Research عمل استطلاع رأي شمل 2,600 شركة يابانية لقوا إن 37% منهم ناويين فعلاً يبطلوا إعتمادهم علي الصين.
المصادر:
- مقالة بعنوان Japan allocates $2.2 billion to help companies move production out of China نشرت في موقع PetaPixel وده لينك المقالة الأصلية:
https://petapixel.com/2020/04/10/japan-allocates-2-2-billion-to-help-companies-move-production-out-of-china/ - مقالة بعنوان Japan to pay firms to leave China, relocate production elsewhere as part of coronavirus stimulus نشرت في موقع SCMP وده لينك المقالة الأصلية:
https://www.scmp.com/news/asia/east-asia/article/3079126/japan-pay-firms-leave-china-relocate-production-elsewhere-part
