عايزين ناس .. الجملة دي انت بتسمعها أحيانا في شغلك لما بتلاقي نفسك مضغوط ووراك تسليمات مش ملاحق عليها ومفيش حد يساعدك .. بتلاقي نفسك معندكش أي بديل غير إنك تروح لمديرك تقوله عايزين ناس تساعد عشان الشغل يخلص .. المشكلة دي زي ما انت بتواجهها في شغلك ومعيشاك في ضغط عصبي بسبب إن مديرك بيقولك نجيب منين ولازم تسهر شوية وانت ابن الشركة والكلام اللي مش بيأكل عيش ده فأنا عايزك تعرف إن القوات المسلحة اليابانية عندها نفس المشكلة بالضبط .. أختها والله وخليني اشرحلك المشكلة دي.
دلوقتي اليابان عايش فيها 127 مليون بني أدم ومن الناس دي كلها القوات المسلحة اليابانية فيها 273,000 مقاتل بس رجاله وستات .. مش بس كده .. في سنة 2020 اليابان عايش فيها 11 مليون بني أدم أعمارهم بتتراوح ما بين 18-26 سنة اللي هوالسن المثالي للالتحاق بالقوات المسلحة .. طب فين المشكلة؟ .. ما الشباب كتير أهو بسم الله ما شاء الله .. الفكرة إن القوات المسلحة اليابانية لازم كل سنة تجند 14,000 شاب عشان تحافظ علي عدد أفرادها الحالي .. ده معناه إن بقدرة قادر لازم وزارة الدفاع اليابانية تقنع شاب واحد من كل 785 عايشين هناك إنه يخش الجيش .. المشكلة بقي إنهم مش لاقيين الشاب ده .. السنة دي مثلاً الدفعة الجديدة اللي حتخش الجيش عندهم فيها عجز 26% .. مش بس كده .. فاكر لما قلتلك إن السنة دي اليابان فيها 11 مليون بني أدم أعمارهم ما بين 18-26 سنة؟ .. بسبب إن محدش بيتجوز واللي بيتجوز مش بيخلف عشان الشغل فسنة 2024 وعليك خير حيبقي فيه 10 مليون بني أدم بس أعمارهم ما بين 18-26 سنة .. سنه 2048 متوقع إنهم يقلوا تاني يبقوا 8 مليون بني أدم .. ده معناه إن إذا كان دلوقتي القوات المسلحة هناك مطلوب منها تقنع شاب من وسط كل 785 إنه يخش الجيش ففي سنة 2048 حيبقي مطلوب منهم إنهم يقنعوا شاب من كل 600 .. بمعني أخر .. القوات المسلحة اليابانية عايزه ناس.
عشان تستوعب المشكلة فعلاً فهي لازم تتحطلك في سياق الدول اللي حول اليابان .. خد عندك أميركا مثلاً .. سنة 2020 أميركا عايش فيها 328 مليون بني أدم منهم 2.2 مليون بيخدموا في القوات المسلحة .. خد بالك بقي .. السنة دي فيه 30 مليون بني أدم أعمارهم ما بين 18-24 ومتوقع إن الرقم ده يفضل ثابت في المستقبل .. عشان القوات المسلحة الأمريكيه تحافظ علي عدد أفرادها زي ما هو فهم محتاجين يجندوا سنوياً 200,000 بني أدم .. ده معناه إنهم محتاجين يقنعوا شاب واحد من كل 150 إنه يخش الجيش لإن معندهمش نظام التجنيد الإجباري زيهم زي اليابان .. خد عندك الصين كمثال تاني .. الصين عدد سكانها 1.39 مليار بني أدم .. جيشها فيه 2.5 مليون عسكري نظامي وده معناه إن شاب من كل 550 بيخدم في الجيش .. سنة 1990 عدد البني أدمين اللي أعمارهم ما بين 18-23 سنة في الصين وصلوا 158 مليون .. الرقم ده سنة 2019 قل بقي 104 مليون ومتوقع إنه يفضل يقل خلال السنين الجاية بسبب سياسة الطفل الواحد.
طب والحل؟ .. الحل إتقال في PDF نزل علي موقع وزارة الدفاع اليابانية اسمه الإستراتيجية العسكرية لليابان لسنة 2020 والناس دي في التقرير مقتنعين وفاهمين كويس أوي إن عندهم مشكلة وهي إن مفيش شباب ياباني كتير عايز يخش الجيش وده خلاهم يعملوا كذا حاجة .. هم زودوا سقف معدل الأعمار اللي ينفع إنه يخش الجيش وخلوه من 18 لحد 32 سنة .. كمان أجبروا ضباط الجيش إنهم يقعدوا سنة زيادة قبل التقاعد .. سمحوا بإن الستات تخدم في الجيش عشان تقوم بوظايف مكتبية لإن كل رجل هي بتاخد مكانه ده معناه إن الرجل ده بيمسك سلاح وبيخدم في موقع قتالي هم محتاجينه فيه أكتر .. بس يمكن أهم حل هو إن اليابان بدأت تتجه أكتر و أكتر ناحية تطوير التكنولوجيا العسكرية .. غير إن اليابان إشترت طيارات F-35 من أميركا إلا إنها كمان بدأت شغلها علي تطوير طيارة مقاتلة جيل خامس تبقي بتاعتها .. ده السبب اللي مخلي اليابان تدوس جامد في تطوير أسطول الغواصات بتاعها .. معجزة حقيقية في رأيي إن الطفرة العسكرية اللي بتعيشها القوات المسلحة اليابانية دلوقتي تحصل بالشكل ده وهم أساساً عايزين ناس.
المصادر:
- مقالة بعنوان Japan is running out of people for waging war نشرت في مجلة Forbes وده لينك المقالة الأصلية:
https://www.forbes.com/sites/davidaxe/2020/07/15/japan-is-running-out-of-people-for-waging-war/#413c1bed274a
