إنت مش متخيل إزاي الناس كانت معلقة أمل علي فيلم Tenet .. كلمة ناس هنا أنا مش أقصد بيها اللي زيي و اللي زيك اللي بيروحوا يتفرجوا علي الأفلام في السينمات أو يستنوا تفرجوا عليها علي EgyBest .. لا أنا اقصد الناس بتوع شركات الإنتاج .. حط نفسك مكانهم للحظة كده .. دلوقتي فيروس Covid-19 داس علي وش البيزنس في العالم كله خصوصاً الأفلام .. هوبا إتقال حينزل في السينمات فيلم من إخراج العبقري (كريستوفر نولان Christopher Nolan) .. فيلم الإعلان بتاعه كان فشيخ .. شركة وورنر براذزر Warner Bros اللي أنتجت الفيلم كانت فعلياً عندها أمل إن فيلم Tenet يبقي هو القشاية اللي يتعلقوا بيها و مش هم بس الحقيقة .. كل شركات إنتاج الأفلام كانت مستنيه تشوف Tenet حيعمل كام فلوس أرباح لإن بناء علي الرقم ده فيه حاجات كتير حتتحدد و النتيجة كانت سودا فوق دماغهم.
خلال 3 أسابيع فيلم Tenet من يوم عرضه في 31 أغسطس جاب 300 مليون دولار أرباح في شباك التذاكر العالمي .. ده رقم حلو أوي بالنظر للظروف المهببة اللي إحنا عايشين فيها بس المشكلة إنك لو جيت تشوف كام مليون من ال300 دول جم من سينيمات أميركا حتكتشف إن الفيلم جوه أميركا يدوبك جاب 31 مليون دولار بس و ده رقم قليل أوي و عشان كده فيه شركات كتير رقعت بالصوت و قررت إن مفيش ولا فيلم تقريباً حيتعرض في 2020 .. أقرب فيلم كان حيتعرض بعد Tenet كان Wonder Woman 1984 اللي أنتجته Warner Bros برده و اللي قررت بعد ما كان معاد عرض الفيلم يوم 2 أكتوبر خلوه في الكريسماس اللي هو إحتمال يتأخر كمان شوية يبقي في يناير 2021 و عليك خير .. شركة يونيفيرسال Universal هي كمان قررت تأجيل عرض فيلم الرعب Candyman لمعاد لسه متحددش في 2021 .. شركة Marvel بتفكر جدياً تأجل عرض فيلم Black Widow بدل ما يبقي يوم 6 نوفمبر تخليه برده السنه الجاية .. نفس الكلام علي فيلم No Time to Die اللي بعد ما كان محطوطله معاد عرض يوم 20 نوفمبر فيه كلام برده إنه حيتأجل للسنة الجاية.
مهم تبقي فاهم هي ليه شركة Warner Bros أصلاً نشفت دماغها و عرضت فيلم Tenet دلوقتي .. الفكرة إن الشركة راهنت علي إن الفيلم حيجيب فلوس حلوة أوي بره أميركا بس مش جوه أميركا .. الشركة كانت عارفه إن لسه جوه أميركا فيه سينمات كتير مقفولة مفتحتش .. الفيلم إتعرض في حوالي 3,000 سينما في أميركا و زي ما قلتلك الرهان كان إن إحنا عارفين إن الفيلم مش حيجيب فلوس جوه أميركا .. هوبا بعد إسبوعين من عرضه الفيلم يدوبك جاب 20 مليون دولار بس .. صحيح الفيلم تكلفته عدت 200 مليون دولار و صحيح إحنا قايلين إن إحنا مش حاطين في دماغنا أوي الفلوس اللي حتيجي من شباك التذاكر الأميريكي بس مش لدرجة 20 مليون دولار في إسبوعين .. فيه جرنان إسمه Indiwire قعد يحسبها عشان بما إن السينمات دلوقتي مفيهاش إلا فيلم Tenet بس فلقوا إن بحسبة بسيطة أوي الفلوس اللي جت من الفيلم لو قسمتها علي عدد السينمات اللي عرضته فانت كل شهر بيدخل للسينما الواحدة 5,000 دولار اللي هم أساساً مش كفاية عشان يغطوا مصاريف الكهرباء و التكييف و المياه .. صدقني لو قلتلك إن صناعة السينما بتواجه أسوأ أزمة ليها في تاريخها و محدش عارف حتخلص علي إيه.
المصدر:
مقالة بعنوان Hollywood’s Tenet experiment failed نشرت في مجلة The Atlantic و ده لينك المقالة الأصلية:
https://www.theatlantic.com/culture/archive/2020/09/hollywoods-tenet-experiment-didnt-work/616345/
