مشكلة الحُكم هي إنه بيعميك عن حاجات كتير أوي .. الحُكم عامل زي ما بتكون داخل إمتحان وإنت مش مذاكر أوي .. بتقول لنفسك انا حخش أهبد وإن شاء الله هبدي ده حيخليني أجيب المقبول اللي تعديني .. بتبدأ تحل الإمتحان وبتكتشف إن فيه حتت كتير في الإمتحان إنت هبدت فيها أوفر أوي .. ضميرك بيحاول يصحيك ويقولك كفاية هبد لحد كده بس إنت من جواك حاجة بتقولك دوس أكتر وإهبد أكتر مش يمكن هبدك يبقي صح وتلاقي نفسك جايب جيد مش مقبول كمان .. بتبقي حرب بين ضميرك اللي بيحاول يلحقك وبين حاجة جواك بتقولك دوس وتمادي في اللي بتعمله إنت صح .. للأسف 99% من البشر مش بيسمعوا لضميرهم .. الأغلبية العظمي بتدوس ومن ضمن الناس دي (محمد بن سلمان) ولي العهد السعودي.
الهبدة اللي هو بيهبدها اسمها مدينة نيوم Neom ودي اللي أنا حتكلم عنها النهاردة .. وأنا بشرح تطلع إيه نيوم دي من جواك حتبدأ تحس إن دي هبدة عابرة للقارات .. مستحيل فكرة زي دي تكون قابله للتحقيق علي الأقل في المملكة العربية السعودية .. مع الوقت حتلاقي نفسك بتسأل هو إزاي فيه ناس سمحت إن ده يتعمل أصلاً؟ بس في الأخر حتلاقي نفسك بتقول أها .. أنا فهمت .. رغبة البني أدم إنه يثبت إنه صح تفوقت علي ضميره اللي بيحاول يفرمله .. بإختصار نيوم دي هي حكاية النفس البشرية واللي من غير ما نتفلسف خلينا نفهمك تطلع إيه البتاعة دي؟
نيوم دي ميكس بين كلمة New أو جديد بالإنجليزي وكلمة مستقبل بالعربي .. دي بمنتهي البساطة عبارة عن مشروع حتة أرض صحراء تقريباً ليها نفس مساحة دولة بلجيكا جوه المملكة العربية السعودية علي ساحل البحر الأحمر وعايزين نبني علي حتة الأرض الصحراء دي مدينة جديدة .. مشروع إتهرس كتير قبل كده .. أي حد من اللي بيقرأ الكلام ده ولأجل الصُدف يعني شغال في مشروع العاصمة الإدارية الجديدة بيقول لنفسه دلوقتي ياختااااااااي .. بس المختلف إن مشروع نيوم ده محطوطله ميزانية 500 مليار دولار .. كتير مش كده؟ .. مش بس كده .. الموقع اللي المدينة حتتبني عليه دي مش أرض فاضية أصلاً .. الأرض دي عايش عليها قبيلة عربية قديمة اسمها الحويطات والقبيلة دي من زمان يمكن من قبل حتي إعلان قيام المملكة العربية السعودية وهي عايشة في المنطقة اللي إنت عارفها دلوقتي باسم السعودية والأردن وشبه جزيرة سيناء .. عشان نيوم دي تتبني السُلطات السعودية محتاجة تلاقي طريقة إنها تمشي 20,000 بني أدم من القبيلة دي من المكان اللي هم عايشين فيه .. الحقيقة إن ده معداش بالساهل كده .. يوم 13 إبريل 2020 السلطات السعودية قتلت (عبدالرحيم الحويطي) واحد من أهم النشطاء السياسيين المنتمين لقبيلة الحويطات.
دي كانت المعلومات اللي مؤكدة علي الأرض .. نيجي بقي نوريك ليه نيوم دي هبد .. لما حد يقولي إحنا حنبني مدينة نخلي فوقيها طاير علي طول جسم مدور حيقوم بدور قمر زي اللي ربنا خلقه بيدور حول الأرض بس إحنا عاملينه عشان يفضل بدر منور فوق سما المدينة شبه فيلم Star Wars: A New Hope بذمتك حترد عليه تقوله إيه؟ .. لما حد يقولك عايزين مدينة التاكسي اللي فيها مش بس عربيات بتمشي لوحدها أو Self-Driving اللي هي أساساً تكنولوجيا لسه بتحبي ومبقتش يعتمد عليها .. لا .. ده إحنا كمان عايزين التاكسي بتاع المدينة يطير ولا اللي في فيلم The Fifth Element .. بالله عليك ترد علي حد بيقولك كده إزاي؟ .. لما حد يجي يقولك إحنا عايزين نعمل مدينة الشط بتاعها علي البحر الرملة اللي فيه بتنور في الظلما زي فيلم Avatar .. حلفتك بأغلي حاجة عندك يا شيخ حترد عليه تقوله إيه؟ .. طب خد التقيلة بقي .. شفت فيلم Passengers؟ .. فاكر الجرسون الروبوت اللي كان شغال علي البار في سفينة الفضاء؟ .. أهو إحنا بقي عايزين كل الخدامين اللي في المدينة يبقوا زيه كده .. اللي هو يحسسك إن اللي فكر في نيوم ده واحد بيتفرج علي MBC2 كتير وقالك أنا عايز أعيش جوه الأفلام اللي أنا بحب أتفرج عليها .. علي رأي المثل .. اللي معاه قرش ومحيره يجيب حمام ويطيره.
المصدر:
- مقالة بعنوان ‘Its being built on our blood: the true cost of Saudi Arabia’s $500bn megacity نشرت في جريدة The Guardian و ده لينك المقالة الأصلية:
https://www.theguardian.com/global-development/2020/may/04/its-being-built-on-our-blood-the-true-cost-of-saudi-arabia-5bn-mega-city-neom#:~:text=Global%20development-,’It’s%20being%20built%20on%20our%20blood’%3A%20the%20true%20cost,Saudi%20Arabia’s%20%24500bn%20megacity
