تعديل إتعمل يوم 12 سبتمبر 2021 .. أمير الكويت (صباح ال صباح) توفي إلي رحمة الله يوم 29 سبتمبر 2020 و كمان السلطان (قابوس بن سعيد) سلطان سلطنة عمان توفي إلي رحمة الله يوم 10 يناير 2020.
أكتر دولتين طلع عينيهم و يمكن طلع ميتينهم كمان في أزمة الخليج اللي دخلت في أكتر من سنة دي هما الكويت و سلطنة عمان .. فكر فيها كده .. قطر عايشة زي الفل ولا كأنها إتأثرت بالحصار المفروض عليها .. السعودية و الإمارات مش فارق معاهم الحصار ده يكمل سنين قدام لإنه مش مكلفهم حاجة .. تبقي الكويت و عمان هما الإتنين اللي عمالين يدفعوا الفاتورة لإنهم أكتر ناس خسرانة .. عشان تفهم كلامي حاول تبص لأزمة الخليج دي من وجهة نظرهم هما مش من وجهة نظر الأطراف المتخانقة سواء قطر من ناحية أو السعودية و الإمارات من ناحية تانية .. لا الكويت ولا عمان في قوة السعودية و الإمارات و هنا أنا بتكلم إقتصادياً و سياسياً .. فعلياً اللي بيحمي دول زي الكويت و عمان و قطر و البحرين مش جيوشهم إنما التحالف العسكري بتاع مجلس التعاون الخليجي .. لما البحرين قامت فيها بدايات ثورة علي الأمير إتدخلت السعودية عسكرياً و قمعت الثورة بسرعة .. المشكلة إن البحرين واقفة في صف السعودية و الإمارات و عندك قطر لوحدها فكده مفاضلش غير الكويت و عمان اللي واقفين علي الحياد و اللي بيدفعوا ثمن الخناقة دي .. الدولتين نفسهم الخناقة دي تخلص النهاردة قبل بكره بس للأسف السعودية و الإمارات حاطينهم في خانة اليك و مش عارفين يخرجوا و الحقيقة إن الدولتين حالتهم تصعب علي الكافر.
تعالي ناخد الكويت لوحدها نفصص حالتها بشوية رواقة:
واحدة من الإتهامات اللي بتتوجه لقطر من السعودية و الإمارات إنها قال إيه بتمول جماعات إرهابية و هم قصدهم يقولوا جماعة الإخوان المسلمين .. ماشي .. بس لما تيجي تبص علي الكويت اللي هي المفروض بتلعب دور حمامة السلام بين المتخاصمين تلاقيها ليها سجل إسود سواد القطران في تمويل الجماعات الإرهابية التقيلة اللي علي حق ربنا .. ما علينا مش دي قضيتنا دلوقتي .. اللي عايزك تعرفه كويس إن دي مش أول خناقة تحصل بين القطريين و السعوديين و الإماراتيين .. في 2014 حصلت الخناقة الأولانية بسبب برده إن قطر بتدعم جماعة الإخوان المسلمين و وقتها أمير الكويت (صُباح أل صباح) بضم الصاد قام بدور حمامة السلام .. لا حمامة إيه قول نعامة السلام .. عشان يوفق بين الأطراف و الحقيقة إن مش غريب إن (صُباح) هو اللي يقوم بالدور ده لإنه أكبر ملوك و أمراء الخليج سناً .. هو كبير الخليج و المفروض إن كلمته إلي حد ما بتحترم بين الأطراف كلها .. (صُباح) قدر يخلي الأطراف كلها تمضي علي إتفاق الرياض و ده إتفاق ودي كده قال إن قطر حتبطل دعمها للإخوان .. طبعاً الكلام ده محصلش .. ولا طرف من الأطراف اللي مضوا علي إتفاق الرياض ده نفذوا اللي هم قالوا عليه و عشان كده الأزمة بتاعة دلوقتي اللي طفحت في وش الكل يوم 5 يونيو 2017 و كإن مكتوب علي العرب إن كل نكساتهم تبقي في اليوم الأسود ده تعتبر أزمة فعلاً ملهاش نهاية .. كل طرف بيقول للتاني إحنا جربنا الأدب و الأدب مجابش نتيجة يبقي نجرب قلة الأدب.
بإختصار شديد الكوايتة محتاسين حوسة ما يعلم بيها إلا ربنا .. الناس دي بتحاول تربط المسامير اللي إتفكت من بعضها في منظمة التعاون الخليجي و بيحاولوا يبانوا قدام الناس كلها إنهم مش جايين علي طرف علي حساب طرف بس فعلياً الدور ده صعب و الكوايتة مش عارفين يقوموا بيه .. ربنا يباركلهم و يكون في عونهم بس هم لازم يستوعبوا إن مفيش فايدة خصوصاً إن أي حد بيتابع أزمة الخليج حيقولك إن الوقت خلص من الكوايتة .. هم وصلوا لمرحلة إنهم مبقاش ينفع يفضلوا علي الحياد لإنهم لو إستمروا علي موقفهم فالسعوديين و الإماراتيين أغبيا شوية في خصوماتهم و حيقولوهم لو إنت مش معايا تبقي ضدي و ذنبكوا علي جنبكوا بقي .. نقطة تانية برده مهم تكون فاهمها و هي إن السعوديين بيحبوا يضربوا تحت الحزام .. فيه مخاوف كتير جوه الكويت إن السعودية بدأت تتدخل في عملية إنتقال السلطة بعد ما الأمير (صُباح ال صباح) ربنا يفتكره بعد عمر طويل إن شاء الله بس الكويت هي الدولة الخليجية الوحيدة اللي فيها برلمان مُنتخب و برلمان علاقته بالأسرة الحاكمة مش زي علاقة النوتيلا بالكنافة فكل ما الوقت بيمر كل ما الفار بيلعب أكتر في عب الكوايتة و هم عندهم حق في إنهم يخافوا.
أما بقي بالنسبة لسلطنة عمان فحالها ميفرقش كتير عن الكويت:
عمان علي الورق واقفة علي الحياد .. هي لا واقفة مع السعودية و الإمارات ولا واقفة مع قطر .. بس من تحت الطرابيزة هم شايفين إن اللي حصل ده فرصة إنهم يزودوا من تجارتهم مع قطر و الحقيقة إن التجار القطريين و العمانيين كلوا الشهد من ورا الخناقة دي و بسبب ده فالسعودييين و الإماراتيين منفوخين من العمانيين .. العمانيين ناس عندهم مشكلة أكبر من السعودية و الإمارات و قطر و هي إن بداية من 2014 و مع إنهيار أسعار بيع البترول لقوا إن إحتياطي النقد الأجنبي بتاعهم بقي أعلي من عجز الموازنة ب10% بس .. دلوقتي إنت بتقول لنفسك إحمدوا ربنا فيه ناس عندهم الفرق بالسالب .. هي المشكلة حضرتك إن سنه 2014 كان إحتياطي النقد الأجنبي أعلي من عجز الموازنة ب55% يعني لو سعر بيع البترول كمل بالشكل ده قريب أوي الفرق حيبقي بالسالب فعلاً و إقتصاد عمان مش حيفرق كتير عن إقتصادنا المنيل بستين نيلة .. مؤسسات إقتراض أجنبية كتير خفضت تقييمها لمستوي إقتصاد عمان خلال السنة اللي فاتت .. عندك مثلاً مؤسسة Standard & Poor’s خفضت تصنيفها لقدرة عمان علي سد أي قرض تقدر تاخده بإنه Junk Status يعني مستوي زبالة في حين إن مؤسسة تانية زي Moody’s و Fitch خفضت تصنيف عمان للمستوي اللي فوق الزبالة بشوية بسيطة .. عشان كده التجار العمانيين كلوا الشهد من ورا أزمة الخليج دي و لو عليهم عايزين يفضلوا يستفيدوا منها.
خلال السنة اللي إتفرض فيها الحصار السعودي-الإماراتي-البحريني-المصري علي قطر صادرات عمان (اللي ملهاش علاقة بالبترول) اللي راحت لقطر نطت 144% .. خلال شهر ديسمبر 2017 لو جيت تشوف أي حاجة إستوردتها قطر ملهاش علاقة بالبترول حتلاقي إن الدولة رقم واحد اللي قطر إستوردت منها بضاعة هي عمان .. نقطة كمان .. عندك شركة طيران عمان هي أكتر شركة إسترزقت من الحصار الجوي المفروض علي قطر لإن من ساعة ما شركة Qatar Airways إتمنعت من دخول المجال الجوي السعودي و الإماراتي و البحريني بقي أي حد عايز يخش أو يطلع من قطر بيروح مطار مسقط و يركب طيارة تابعة لشركة الطيران العمانية Oman Air .. مش عايز أقول إن العمانيين نفسهم الخناقة دي تفضل مكملة بس علي الأقل هم نفسهم إن حتي لما الأزمة تخلص العلاقات التجارية بين قطر و عمان تفضل زي ما هي بس ده له أعراض جانبية أهمها زي ما قلتلك إن السعوديين و الإماراتيين مبقوش طايقين حاجة إسمها سلطنة عمان ولا السلطان (قابوس).
من وجهة نظر السعوديين و الإماراتيين فالعمانيين دول شوية ناس جشعة مستعدة تعمل أي حاجة عشان الفلوس .. مش بس موقفهم من قطر و إنهم بيسترزقوا من الأزمة .. هم بيقولوا إن عمان خدت فلوس من إيران عشان تشحن أسلحة إيرانية للمتمردين الحوثيين في اليمن .. هل ده حقيقي؟ الله أعلم .. أزمة تانية سببها تقارير إتسربت إن إدارة الرئيس الأميريكي (باراك أوباما) كلمت بنك مسقط إنهم يتوسطوا لإيران إنها تحول 5.7 مليار دولار لعملة عمان بعد كده الفلوس دي تخش إيران عشان تخفف شوية من تأثير العقوبات الإقتصادية الأميريكية علي إيران و الكلام ده كان أيام التفاوض علي الإتفاق النووي الإيراني بالمناسبة .. علي الناحية التانية ناس كتير جوه عمان قاعدة علي أعصابها .. دلوقتي السلطان (قابوس) زيه زي أمير الكويت كبير في السن .. الرجل عنده 78 سنة و فيه كلام إنه مصاب بمرض السرطان من سنة 2014 .. ربنا يشفيه و يعافيه بس العقل بيقول إن الوقت جه إن الرجل يبدأ يختار حد يخلفه خصوصاً إنه ربنا مرزقوش بولاد بس هو لسه مبدأش الخطوة دي و عشان كده ناس كتير جوه عمان مرعوبة من فكرة إن بمجرد ما السلطان ربنا يفتكره السعودية حتتدخل في مين اللي يحكم وراه و مش بعيد يستخدموا القوة العسكرية.
خلاصة الكلام إن الدول الخليجية اللي فارضة الحصار علي قطر اللي هم السعودية و الإمارات و البحرين مش فارق معاهم الحصار ده يكمل سنة سنتين تلاتة عشرة .. اه سوق العقارات في دبي إتأثر شوية بس لو بتتكلم إجمالاً الحصار ده ملوش أي تأثير سلبي علي إقتصاد الدول الثلاثة و عشان كده هم بيقولوا إن لو هم اللي بدأوا بالصلح فهم اللي شكلهم حيبقي وحش قدام الناس .. علي الناحية التانية قطر في الأول إتهزت شوية بس دلوقتي الوضع إستقر و هي كمان مبقاش فارق معاها الحصار ده يكمل إياكش حتي عشرين سنة و ده مخلي رأسهم و ألف سيف إنهم عمرهم ما حيقدموا أي تنازلات .. لدرجة إن فيه كلام علي إن الحصار ده فاد قطر أكتر ما ضرها .. قطاع البنوك في قطر في بداية الأزمة إتهز زي ما قلنا بس الحكومة ضخت في السوق 26 مليار دولار و دلوقتي القطاع شغال زي الفل.
قطر إكتشفت إن ليها مش حنقول صحاب بس حنقول ناس مستعدة تساعدها في المنطقة حولها زي تركيا و إيران و عمان .. حتي الحصار ده خلي الحكومة القطرية تبدأ إجراءات إصلاحية كانت متأخرة فهم خافوا الوقت يسرقهم .. حتي المجتمع القطري يبان متماسك أوي و لو مشيت في شوارع الدوحة حتلاقي في كل حتة رسومات لوش أمير قطر (تميم) و تحت صورته مكتوب جملة (تميم المجد) .. إنت دلوقتي قدام وضع إن الأطراف كلها أسهلها إنهم يسيبوا الوضع علي ما هو عليه لإن أي محاولة لإنهاء الحصار حتيجي بخسارة علي دماغ اللي بيحاول .. بس الوضع معكوس بالنسبة لعمان و الكويت .. بالنسبة ليهم مش من مصلحتهم إن الخناقة دي تفضل مكملة كده لإن الخناقة دي جايه علي دماغهم هم.
المصدر:
مقالة بعنوان Kuwait and Oman are stuck in Arab no man’s land يعني الكويت و عمان مزنوقين في سكة اللي يروح ميرجعش نشرت في مجلة Foreign Policy الأميريكية و ده لينك المقالة الأصلية:
https://foreignpolicy.com/2018/06/14/kuwait-and-oman-are-stuck-in-the-arab-no-mans-land/
