في الإقتصاد بالذات فيه حاجات عشان تتعرف بتحتاج شغل كتير أوي فالناس بتكسل تعملها لحد ما فيه جهة كده بتتطوع من نفسها و تقول الشغلانة دي بتاعتي .. ساعتها الأتيتود بتاع الناس اللي مكبرة دماغها هو ماشي يا سيدي قال يعني حد حيراجع وراكوا .. المشكلة إن الحكومات خاصة بتاعتنا بتاخد الكلام ده و تبدأ ترفع شعار و أجيب منين لكل ده؟ .. اللي أنا عايز أتكلم عنه النهاردة هو السؤال بتاع هو يا تري يا هل تري تعداد سكان العالم بعد 100 سنة من دلوقتي حيبقي كام؟ .. واضح إنه سؤال بايخ .. واضح كمان إن الإجابة علي السؤال ده محتاجة شغل كتير و دراسات و وجع دماغ و الناس ماشية بمبدأ شرا الدماغ مش بفلوس .. لحد ما جت الأمم المتحدة سنة 2015 تطوعت من نفسها و قالت إن يا جدعان علي سنة 2100 إن شاء الله تعداد سكان البشر علي الكرة الأرضية حيوصل 11 مليار بني أدم .. في 2019 طلعوا تقرير تاني قالوا إن إحنا كنا غلطانين سيكا هم بس حيبقوا 10 مليار بني أدم .. زي ما قلتلك الأتيتود بتاع الناس لما سمعت الخبر كان يا هزوا كتفاهم عشان الخبر مش فارق معاهم أو إنهم (وده تمثل في الحكومة المصرية) مثلاً طلعت قالت أنتوا بقيتوا كتير أوفر ومحدش يحاسبني لحد ما من كام يوم معهد تقيييم و قياس الصحة Institute for Health Metrics and Evaluation و إختصاراً بيتسمي IHME طلع تقرير إتنشر في مجلة علمية محترمة جداً إسمها لانسيت Lancet ملخصه إن كلام الأمم المتحدة ده عبارة عن هبد.
عشان تفهم المشكلة فين بص للأرقام الجاية دي .. الأمم المتحدة كانت بتتوقع إن سنة 2030 تعداد سكان العالم حيوصل 8.5 مليار نسمة .. سنة 2050 البني أدمين حيبقوا 9.7 مليار نسمة .. سنة 2100 البشر حيبقوا 10.9 مليار نسمة .. الناس بتوع IHME بيقولوا كلام تاني خالص .. الناس دي بتقول إن تعداد سكان البشر حيجيب أخره سنة 2064 إن شاء الله و حنبقي 9.7 مليار نسمة و بعد كده عدد البشر حيبدأ يقل عشان لما تيجي سنة 2100 حنبقي 8.8 مليار يعني أقل من توقعات الأمم المتحدة ب2 مليار بني أدم.
طبيعي إنك تسأل نفسك طب هو إيه السر ورا الإختلافات دي .. إنك تبقي في مسألة امتحان وتلاقي إن الناتج النهائي اللي إنت مطلعه يفرق عن زميلك ب2 مليار ده مش حاجة سهلة .. إنك تطلب أوردر كبير من عند جاد داخل في عشرين ساندويتش و يجليك سندوتش ناقص أو سندويتش متبدل فده إلي حد ما مقبول .. فرق 2 مليار بني أدم أكيد فيه غلطة ما في حتة ما و هي دي المشكلة إن مفيش غلطات .. عشان تبقي معايا في الصورة تعالي نفترض إننا عايزين نتوقع تعداد سكان مصر بس كمان 5 سنين حيبقي كام؟ .. ساعتها إنت بتفرض حاجات كتير .. إنت مش عارف متوسط العمر المتوقع للأطفال كام في السيمبلاوين و لا عارف المتوسط ده كام في محافظة الوادي الجديد .. الحل إنك بتهبد .. اللي إنت مش عارفه بتهبده .. مش عارف معدلات الهجرة حتبقي كام فتبهبدها .. مش عارف معدلات الخصوبة اللي مش بس بتفرق بين بلد و تانية دي بتفرق بين قرية و الثانية فبرده بتهبد الرقم .. صحيح الهبد ده إلي حد ما هبد علي أسس علمية زي مثلاً مدي إتاحية وسائل منع الحمل في المكان اللي إنت بتدرسه بس برده فيه معلومات كتير مش بتبقي متاحة فتهبدها .. بس يمكن المعلومة اللي عايزك تفكر فيها شوية إن علي سنة 2100 إن شاء الله حيبقي فيه 2.37 مليار بني أدم سنهم من أول 65 سنة و إنت طالع.
بناء علي توقعات IHME فالهند إن شاء الله علي سنة 2100 حتبقي هي أكتر بلد في العالم عايش فيها بني أدمين ب1.09 مليار نسمة .. الصدمة الفعلية هي إن توقعات IHME بتقول إن تعداد سكان الهند و الصين حيبدأ يقل بشكل سريع من بعد سنة 2050 .. توقعات الناس دي بتقول إن علي سنة 2100 تعداد سكان الصين حيقل النص حيبقي 732 مليون نسمة بس .. يمكن الدولة الوحيدة اللي تعداد سكانها متوقع إنه يفضل يعلي و يعلي هي نيجيريا.
المصدر:
مقالة بعنوان These countries will have the largest populations-by the end of the century نشرت في موقع المنتدي الإقتصادي العالمي و ده لينك المقالة الأصلية:
https://www.weforum.org/agenda/2020/09/the-world-population-in-2100-by-country/
