واحدة من اكتر الحاجات اللي بتعجبني في اليهود و الشيعة هي انهم بيتعلموا كويس اوي من اخطاءهم ويمكن اكبر دليل علي كده هو الديربي المسلي أوي بين حزب الله و اسرائيل و خليني عشان مقعدش اتكلم كتير في حاجات ملهاش لازمة اخش في الموضوع علي طول .. سنة 2006 لو تفتكر قامت حرب صغيرة كده اتسمت حرب لبنان الثانية بين حزب الله و اسرائيل .. الحرب دي استمرت 34 يوم وكانت اهم حاجة فيها هي ان كل يوم حزب الله يضرب اسرائيل بصواريخ جراد و كاتيوشا ودي صواريخ ارض – ارض بس علي قد حالها شوية و اسرائيل ترد بغارات جوية علي المدن اللبنانية .. في 34 يوم حزب الله ضرب علي اسرائيل 4,000 صاروخ يعني بمعدل 125 صاروخ بيتضرب علي اسرائيل في اليوم في الاخر خلص سببوا وفاة 50 اسرائيلي.
يوم 21 يونيو 2020 حزب الله نشروا علي الانترنت فيديو ترويجي او سميه اعلان زي اعلان بيبسي مع (عمرو دياب) كده و في الفيديو ده هم قالوا انهم زمان كانوا بيفرحوا اوي لو صواريخهم قدرت توصل للعاصمة الاسرائيلية تل ابيب .. دلوقتي الوضع اختلف يا (لينا) .. دلوقتي يقدروا يضربوا اهداف محددة بالاحداثيات بتاعتها جوه تل ابيب .. كل ده و صوت الامين العام للحزب (حسن نصر الله) بيتكلم في الخلفية وكان ناقص والفيديو يخلص بيخلص يضحك ضحكة الجوكر بس اللي فيلم The Dark Knight مش في فيلم Joker .. بس اللي انا عايز اركز عليه هو ان فيه كلمة معينة اتكررت كتير في الفيديو و الكلمة دي هي Precision-Guided Missiles ودي تبقي الصواريخ الموجهة.
زمان صواريخ جراد و صواريخ كاتيوشا اللي كانت تحت ايد حزب الله كانت زي تحديف الطوب كده اللي هو اضرب بس و سمي الله كده و ان شاء الله حنفرقع حاجة .. من كام سنة ايران و حزب الله بدأوا مع بعض مشروع جديد اسمه مشروع الدقة Project Precision فكرته ان ايران تبني في سوريا و لبنان مصانع تحت بير السلم لانتاج قنابل و صواريخ موجهة .. ده السبب انك كل شوية تسمع في الاخبار ان الاسرائيليين نفذوا غارة ضد منشأة صناعية في سوريا .. المشكلة .. او دي مشكلة من وجهة نظر الاسرائيليين .. ان حزب الله دلوقتي بيعمل مصانع زي دي في لبنان .. المصانع اللي في سوريا سهل تتضرب بالطيران .. اساسا محدش حيهتم ولا حيسأل فيه كام مدني مات في اي غارة تعملها اسرائيل علي سوريا .. لكن لو اسرائيل فكرت تضرب مصنع من دول في لبنان حتبقي مصيبة خصوصا لو مات مدنيين .. المشكلة الاكبر ان حتي لو حزب الله اكتفي بالمصانع اللي في سوريا ففي الاخر برده الصواريخ دي حتتنقل تروح جنوب لبنان و بتتوزع علي القري اللي بطول الحدود بين اسرائيل و لبنان .. الصواريخ دي بيخبوها في بيوت مواطنين لبنانيين و طبيعي ان حيبقي صعب اوي ان اسرائيل تضرب البيوت دي.
حتي لو اسرائيل قالت بسيطة احنا حنخلي سلاح الجو بتاعنا يضرب البيوت اللي حزب الله مخبي فيها صواريخه .. ده علي فرض ان الاسرائيليين كانت عندهم معلومات استخباراتية متخرش المياة بس خلينا نفترض ده يعني .. المهم ان ده معناه ان عشان اسرائيل يبقي شكلها حلو قصاد العالم فهم حيستهدفوا البيوت دي بقنابل ذكية موجهة بالليزر مثلا بحيث يقللوا الاعداد المتوقعة للضحايا المدنيين .. جميل .. قالك ان فيه مشكلة ان احتياطي القنابل دي اللي تحت ايد سلاح الجو الاسرائيلي مش كبير .. مش بس كده .. من بعد حرب اكتوبر 1973 و الامريكان شايلين علي جنب كده لوقت زنقة شوية قنابل ذكية تحت مسمي War Reserve Stockpile Ammunition – Israel واختصارا بيسموه (WRSA-I) .. الامريكان سنة 2006 سلفوا الاسرائيليين شوية قنابل من اللي محطوطين عي جنب دول و فيه كلام علي ان حتي القنابل اللي فاضله اللي الامريكان شايلينهم لو جمعتهم علي القنابل اللي تحت ايد الاسرائيليين مش حيكفوا .. تدري ليش؟ .. اقل التقديرات بتقول ان حزب الله تحت ايده 100,000 صاروخ ارض- ارض موجه متنشنين علي اسرائيل.
المصادر:
مقالة بعنوان In a third Lebanon war, Israel will have to contend with increasingly lethal Hezbollah missiles نشرت في مجلة Forbes وده لينك المقالة الاصلية:
https://www.forbes.com/sites/pauliddon/2020/06/27/in-a-third-lebanon-war-israel-will-have-to-contend-with-increasingly-lethal-hezbollah-missiles/?sh=8b1a6024b5e4
