لمن لا يعلم يعني فالسودان وأثيوبيا متخانقين مع بعض .. لا وكمان رفعوا سلاح علي بعض .. الأخبار اللي حتلاقيها علي الإنترنت ممكن توضح شوية وتقول إن الخناقة بين أثيوبيا والسودان هي خناقة ترسيم حدود اللي هي خناقة إتهرست في مليون حرب بين دول العالم وشفناها كتير أوي وبقت حاجة مملة أنا عارف .. بس عشان السودان أختنا وعشان إحنا وأثيوبيا علاقتنا ببعض زي الزفت بسبب سد النهضة فخلينا نبص شوية للخناقة بين أثيوبيا والسودان علي الأقل تحت شعار أنا وأخويا علي إبن عمي .. خدها مني قاعدة وإسمع مني ومتراجعش ورايا .. لو سمعت في الأخبار إن فيه دولتين ضربوا بعض بسبب ترسيم حدود فخليك عارف إن ده حصل عشان حاجتين حصلوا مع بعض .. أول حاجة إن الدولتين دول زمان كانوا تحت الاستعمار الأجنبي والمستعمر عشان بعيد عنك وعن السامعين بهيم مبيفهمش عك الدنيا في رسمة الحدود قبل ما يدي الدولتين دول استقلالهم .. دي أول حاجة .. تاني حاجة وهي إن حيكون طلع بني أدم زي الخازوق كده يقولك إن الوضع ده مش عاجبني .. تقوله يا إبن الحلال ما الناس ساكته وصابره وراضية من أيام الاستعمار تلاقيه يقولك لا أنا رجل حقاني مرضاش بالظلم .. وهو تلاقيه أساساً حرامي إبن ستين كلب بس عشان مصلحته إن الدنيا تولع فتلاقيه رافع شعار معاً لإرجاع الحق لأصحابه .. أهو الحاجتين دول لما حصلوا مع بعض كانوا هم السبب إن السودان وأثيوبيا واقفين لبعض بالسلاح دلوقتي.
خلينا نتكلم عن الحاجة الأولانية .. عك الاستعمار .. الحقيقة إن منطقة القرن الأفريقي ودي المنطقة اللي شرق قارة أفريقيا عند مضيق باب المندب كده وحتلاقي فيها دول أثيوبيا وأريتريا والصومال وجيبوتي والسودان الاستعمار شبع عك فيها .. كمية هبد إنت لا تتخيلها حصلت لما الاستعمار تعامل مع المنطقة دي كأنها كراسة رسم مش أرض عايش فيها بني أدمين وثقافات وشعوب وديانات ملهاش علاقة ببعض يعني حاجة لازم تتعامل معاها بالشوكة والسكينة مش فرق عيش وغمس وكل زي ما حصل .. يعني مثلاً .. سنة 1977 قامت حرب بين أثيوبيا والصومال بسبب حتة إسمها أوجادين Ogaden وكل بلد رأسها وألف سيف إنها بتاعتها .. سنة 1998 قامت حرب بين أثيوبيا برده وأريتريا علي قرية صغيرة إسمها بادمي Badme وكانت حرب الدم سال فيها للركب .. تخيل معايا حضرتك إن عشان قرية يموت 80,000 بني أدم بس مش دي القضية حتي .. المشكلة إن محكمة العدل الدولية حكمت إن القرية دي من حق أريتريا وإن المفروض إن أثيوبيا تتنازل عنها بس أثيوبيا رفضت .. في نوفمبر 2020 أريتريا خدت القرية تاني بس مش ده موضوعنا .. بعد حرب سنة 1998 أثيوبيا برده راحت تتخانق مع السودان بسبب منطقة متنازع عليها وهي دي محور الخناقة بتاعة دلوقتي وهي منطقة الفشقة Al-Fashaga .. تحس إن الاستعمار كان شايل أوي من أثيوبيا مخصوص متفهمش ليه.
إذا كانت بادمي دي قرية صغيرة والموضوع مكنش مستاهل يعني فحتلاقي الفشقة دي عبارة عن شريط حدودي بطول 744 كيلومتر .. الفشقة دي هي الحتة المشتركة بين محافظة القضارف السودانية وإقليم الأمهرة الأثيوبي .. زي ما قلتلك الاستعمار لما جه يرسم حدود دول القرن الأفريقي فشخ أثيوبيا .. إتفاقية سنة 1902 وكمان إتفاقية سنة 1907 بيقولوا إن المنطقة تبع السودان .. لكن .. فيه أثيوبيين كتير من عرق إسمه الأمهرة فعلياً عايشين في المنطقة ومش بس كده .. الأثيوبيين الأمهرة دول بيدفعوا ضرايبهم وبياخدوا كهربتهم وميتهم من أثيوبيا .. عشر سنين من المفاوضات خلت في الأخر البلدين سنة 2008 يوصلوا لإتفاق أنا شايفه مثال لإزاي البني أدمين ممكن ينسوا خلافاتهم ويتفقوا يمسكوا العصاية من النص .. إتفاق سنة 2008 كان رائع جداً إنه تعامل مع الحدود بين أثيوبيا والسودان علي إنها Soft Border .. صحيح الأرض سودانية بس الحكومة السودانية حتسيب الأثيوبيين اللي بقالهم سنين عايشين عليها يفضلوا عايشين ومحدش حينكد عليهم عيشتهم .. فضلت الدنيا هادية لحد ما حصلت الحاجة الثانية اللي قلت عليها في المقدمة .. جه بني أدم مصلحته إن الدنيا تولع فقالك إن الإتفاقات دي كلها مش عاجباني ومش صح ومش ده العدل وأنا ليا تصور تاني خالص لإزاي المشكلة دي تتحل .. البني أدم ده يبقي رئيس وزراء أثيوبيا (أبي أحمد).
حاول عشان خاطري تبص للموضوع من وجهة نظر (أبي أحمد) عشان تفهم هو الرجل ده بيفكر إزاي .. دلوقتي أثيوبيا بلد مش حاجة واحدة .. أثيوبيا بلد عايش فيها عرقيات مختلفة كتير أهم 3 عرقيات هم التيجراي Tigray والأمهرة Amhara والأورومو Oromo .. عشان أبسطهالك خالص حاول تتخيل إن أثيوبيا عايش فيها الأهلاوية والزملكاوية والأسماعلاوية .. لسنين وسنين والعرقية اللي بتحكم أثيوبيا كانوا التيجراي .. تخيل إنهم الأهلاوية بتوع أثيوبيا .. الكيان السياسي اللي كان بيحكم أثيوبيا هي جبهة تحرير شعب التيجراي وإختصاراً بتتسمي TPLF ..الناس بتوع جبهة تحرير شعب التيجراي دول هم اللي مضوا مع السودان إتفاقية سنة 2008 .. سنة 2018 الأهلاوية مشيوا من الحكم .. حصل إنقلاب سياسي في أثيوبيا والتيجراي خسروا الحكم واللي جه مسك البلد كان تحالف الأورومو مع الأمهرة .. الزملكاوية مع الأسماعلاوية .. (أبي أحمد) رئيس الوزراء بتاع أثيوبيا دلوقتي بينتمي للأورمو ولإن الأمهرة حبايبه وواقفين في ظهره وحاسين إن كلمتهم بقت مسموعة فالناس دي قالت إن إتفاق سنة 2008 ده مش شرعي .. ليه يا جدعان؟ .. قالك إحنا اللي عايشين في منطقة الشفقة والتيجراي هم اللي مضوا الإتفاق مع السودان من غير ما ياخدوا رأينا .. جميل .. الأورومو هم أكبر عرقية عايشة في أثيوبيا .. الأمهرة هم تاني أكبر عرقية .. (أبي أحمد) بني الCV السياسي بتاعه كله علي وعد بأن التحالف بين الأمهرة والأورومو حيفضل يحكم أثيوبيا لسنين وسنين قدام .. ومش بس كده .. التحالف ده حيدي التيجراي فوق دماغهم وده اللي حصل فعلاً.
جت السودان قالت طب إيه رأيكوا إن أنا استاهل ضرب الجزمة إني عملتلكوا إعتبار وراعيتكوا في الإتفاق .. الجيش السوداني دخل القري اللي عايش فيها الأثيوبيين في الفشقة وطردهم منها .. في ديسمبر 2020 رئيس الوزراء الأثيوبي (أبي أحمد) قعد مع رئيس الوزراء السوداني (عبدالله حمدوك) والإتنين إتفقوا علي إنهم إن شاء الله يعني حيتفاوضوا بس هي المشكلة إن كل طرف بيقول إنه قبل ما يقعد يتكلم لازم تتحقق شروط معينة .. الأثيوبيين بيقولوا إن معلش يعني الناس اللي إتهجرت من أرضها دي لازم تتراضي .. السودانيين بيقولوا أنتوا تحمدوا ربنا أصلاً إني رضيت أقعدهم علي أرضي والناس دي حترجع عادي ولا كأن حصل حاجة وأكتر من كده متطلبوش .. (أبي أحمد) من مصلحته إن الدنيا تولع لسبب .. هو محتاج يبان قدام الامهرة إنه واقف في ظهرهم وإنه هو السند اللي يقدروا يعتمدوا عليه .. للأسف إنت بتتعامل مع بني أدم زي ما تقول سياسياً إيديه متكتفة وده أخطر أنواع السياسيين .. اللي زي (أبي أحمد) ده عامل زي الرجل اللي سوري في التشبيه يعني لو حيزعل حد اللي نصه التحتاني هو اللي ممشيه .. صحيح هي غريزة طبيعية وعل عيني وعلي راسي بس إنت برده ربنا خلقلك مخ وعملك ضمير وإلا حتبقي زيك زي الكلب البلدي اللي في الشارع .. عمرك شفت رجل عاقل ملو هدومة راح إتفاوض مع كلب بلدي في الشارع؟
المصدر:
- مقالة بعنوان Viewpoint: Why Ethiopia and Sudan have fallen out over al-Fashaga نشرت علي موقع هيئة الإذاعة البريطانية BBC وده لينك المقالة الأصلية:
https://www.bbc.com/news/world-africa-55476831
