تابعونا

سناكس ما بين المقالات

جاك ما .. يا تري إنت رحت فين؟

طبعاً دعبسة الصحفيين الأجانب موقفتش لحد هنا .. تاني يوم هم عرفوا إن (جاك ما Jack Ma) اُستدعي قدام لجنة تحقيق من الحزب الشيوعي الصيني الحاكم وقالوله بقي إنت تهزقنا كده قدام الناس.

12 يناير، 2021 832

هو (جاك ما Jack Ma) راح فين؟ .. أولاً ده موضوعنا النهاردة .. ثانياً فيه ناس أولاً مش عارفه هو مين (جاك ما) ده أساساً .. وثالثاً حتي الناس اللي عارفه مين هو (جاك ما) مش فاهمه أوي السؤال اللي هو قصدك إيه راح فين؟ هو إختفي مثلاً؟ .. خلينا الأول نجاوب علي السؤال الأولاني بتاع مين هو (جاك ما)؟ .. ده رجل أعمال صيني هو مؤسس شركة علي بابا Alibaba Group ودي النسخة الصيني من أمازون ومن سوق  اللي عندنا في مصر .. لسنين والحكومة الصينية بتروج لتجربة (جاك ما) علي إنها مثال صارخ لإزاي الصين بلد جامدة زحليقة بتشجع البيزنس زي ما إنت بتشجع الأهلي والزمالك كده .. حكاية إنشاء علي بابا Aibaba لوحدها ملهمة .. (جاك ما) كان مدرس بدأ الشركة مع شوية ناس صحابة من شقته في مدينة هانج-زو Hangzhou لحد ما بقي من أغني أغنياء الصين .. صحيح هو في سبتمبر 2019 استقال من منصبه كرئيس لمجلس إدارة الشركة بس هو لسه معاه 5% من أسهمها وده بيخليه أكتر حد معاه نسبة من الأسهم .. ده بإختصار شديد الإجابة عن سؤال يطلع مين (جاك ما) ونيجي بقي للسؤال بتاع هو راح فين (جاك ما)؟

الحكاية بدأت لما جرنان أمريكاني إسمه Financial Times لاحظوا حاجة غريبة شوية .. (جاك ما) كان بدأ يخش في سكة إنتاج برامج المسابقات وكان فيه برنامج هو صاحب فكرته وكان هو اللي بيقدمه إسمه Africa’s Business Heroes يعني أبطال البيزنس في أفريقيا .. ده كان برنامج مسابقات زي ما قلتلك شبه أراب جوت تالينت كده و(جاك ما) كان هو رئيس لجنة التحكيم اللي بيقيم أفكار البيزنس لرجال أعمال شباب أفارقة .. المهم إن جرنان Financial Times ده خد باله إن الحلقة الأخيرة من السيزون كان المفروض تتعرض في شهر نوفمبر 2020 وهوبا قبل عرض الحلقة الأخيرة علي طول طلع المنتجين بتوع البرنامج قالوا إن (جاك ما) مش حيبقي هو رئيس لجنة التحكيم .. مش بس كده .. الWebsite بتاع البرنامج إتشال من عليه صور (جاك ما) وكل الدعاية والإعلانات اللي بتتعمل للبرنامج إتشال منها أي صور أو فيديوهات ليه .. بدأت تهرش في شعرك صح؟

برنامج المسابقات Africa’s Business Heroes كان من المشاريع اللي (جاك ما Jack Ma) صاحب فكرتها وكان متحمسلها جداً وغيابه المفاجيء عنه هو اللي خلي ناس تسأل هو راح فين (جاك ما)؟

طبعاً الصحفيين الأجانب بدأوا يدعبسوا ورا الموضوع ولقوا ان قبل إعلان إن (جاك ما) مش حيبقي له علاقة ببرنامج Africa’s Business Heroes بأيام كان بيقول كلمة في إفتتاحية مؤتمر إسمه قمة بوند Bund Summit إتعمل في مدينة شنغهاي الصينية .. المؤتمر ده حضره لفيف من مسئولي الدولة ووفود رفيعة المستوي من ممثلي أكبر بنوك العالم سواء بقي بنوك مركزية أو تجارية .. في كلمته قصاد الناس دي كلها (جاك ما) خد الحكومة الصينية غسيل ومكواة .. هزقهم تهزيق متهزقوش صبي ميكانيكي من المعلم بتاعه .. ملخص مشكلة (جاك ما) مع الحكومة الصينية بناء علي كلامه هو أنكوا حاطين صوابعكوا في كل حتة في البيزنس وده مخلي رجال الأعمال مش عارفه تاكل عيش .. أصل معلش يعني المطلوب من رجل أعمال لسه بيسترزق وفاتح شركة مقاولات صغيرة يكبر إزاي وسط ديناصور كبير بيبلع أي حاجة قدامه زي الحكومة الصينية؟ .. سبحان الله يا أخي تعالي عندنا وشوف الوضع.

طبعاً دعبسة الصحفيين الأجانب موقفتش لحد هنا .. تاني يوم هم عرفوا إن (جاك ما) اُستدعي قدام لجنة تحقيق من الحزب الشيوعي الصيني الحاكم وقالوله بقي إنت تهزقنا كده قدام الناس .. طب إيه رأيك بقي إن شركتك Ant Group ودي شركة إتصالات زي فودافون كده واللي إنت كنت شغال بقالك سنين علي طرح أسهمها في بورصات هونج كونج وشنغهاي للإكتتاب العام واللي بيتسمي Initial Public Offering أو IPO وكنت مستني إن أسهم الشركة يوصل ثمنها 37 مليار دولار وده كان حيخليه أكبر IPO في التاريخ طلع قرار ممضي من الرئيس الصيني (جي جينبينج Xi Jinping) شخصياً بإلغاء كل حاجة .. من ساعتها و(جاك ما) إختفي .. هو مش مقبوض عليه ودي معلومة شبه مؤكده بس هو إختار إنه يختفي خالص عن الأنظار لحد ما الناس اللي شغاله معاه تحل المشكلة مع الحكومة الصينية.

(جاك ما Jack Ma) مؤسس شركة علي بابا Alibaba لابس زي (مايكل جاكسون Michael Jackson) في حفلة إتعملت للإحتفال بالذكري ال18 لإنشاء الشركة سنة 2017 والحفلة إتعملت في مدينة هانج-زو Hangzhou الصينية اللي هو إتولد فيها.

مشكلة (جي جينبينج) وأنا قلتها قبل كده إنه بني أدم غبي في خصومته .. هو من نوعية الناس اللي لو حصل بينكوا تاتش أو مشكلة لازم يجيبك تحت رجله .. دي طبيعته وده أسلوبه في الحكم .. إنت لو بيزنس مان معاك فلوس فإنت صاحبي وحبيبي وكفاءة طول ما إنت مؤدب وساكت وملكش دعوة بالحكم .. تنتقدني حخليك تشحت في الشارع .. علي فكرة (جاك ما) مش أول واحد .. ده فيه غيره كتير .. بيزنس مان زي (رين زيكيانج Ren Zhiqiang) كان عند بيزنس تطوير عقارات مخليه واحد من أغني أغنياء العالم مش بس الصين وأنا قلت كان عنده لإنه إتحكم عليه ب18 سنة سجن لمجرد إنه إنتقد رد فعل الحكومة الصينية في إحتواء جائحة فيروس كورونا .. بيزنس مان تاني زي (وو زياو-هوي Wu Xiaohui) مؤسس شركة التأمين العملاقة Anbang Insurance Group إتقبض عليه في فبراير 2018 وإتحكم عليه برده ب18 سنة سجن وإتقال إن الحكم ده بسبب قضية تهرب ضريبي اللي هو عايز تقولهم لا يا راجل ..  بيزنس مان تالت زي (جيو جوانج-تشانج Guo Guangchang) رئيس مجلس إدارة مجموعة فوسان Fusan International اللي في ديسمبر 2015 إتخطف من أوضته في فندق في هونج كونج وطلع بعدها بكام يوم ببيان رسمي بيقول فيه إنه كان بيساعد المباحث في حملة مكافحة الفساد اللي طويل العمر (جي جينبينج) بيقودها في الصين.

المصدر:

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!