الموضوع اللي حنتكلم عنه النهارده هو شركة توشيبا Toshiba اليابانية و حنحاول نفهم هو إيه اللي حصل للشركة دي؟ شركة توشيبا لو حبيت توصف حالتها دلوقتي فانت تقدر تقول إنها عامله زي ما تكون حد في العناية المركزة بين الحياة والموت .. الحقيقة إن مش توشيبا بس هي الشركة اليابانية الوحيدة اللي زي ما تكون في العناية المركزة لإن عندك شركات سوني Sony و أوليمبس Olympus و هيتاشي Hitachi .. شهر إبريل 2017 أعلنت شركة توشيبا إنها حتبيع 4 إدارات داخلية وده يوريك قد إيه شركة كانت من 10 سنين بس تعتبر من أفضل شركات الأليكترونيات في العالم و دلوقتي بقت شركة بتتباع لأعلي سعر .. في المقالة دي حنحاول نجاوب علي شوية أسئلة عشان الأمور توضح شوية:
• مين هي شركة توشيبا Toshiba أصلاً؟
• إيه اللي حصل للشركة في ال10 سنين اللي فاتوا بداية من سنة 2007؟
• هو الكلام ده قاصر علي شركة ولا شركات يابانية تانية عندها مشاكل؟
عشان تبدأ تفهم مين هي شركة خلينا نبدأ بشوية مراجعة لتاريخ الشركة .. شركة توشيبا ظهرت للعالم بالشكل اللي انت شايفه دلوقتي سنة 1939 لما حصل إن فيه شركتين يابانيتين إندمجوا مع بعض في شركة واحدة .. الشركتين دول كانوا شركة طوكيو للصناعات الكهربية Tokyo Electric Company و شركة شيباورا للأعمال الهندسية Shibaura Engineering Works .. زمان الشركتين دول كانوا من أكتر الشركات اللي بتخترع حاجات محدش كان بيسمع عنها قبل كده .. خد عندك مثلاً شركه Tokyo Electric Company اللي سنة 1921 عملت أول لمبة Double-Coiled اللي هي دلوقتي بقت أساس أي لمبة مش موفرة .. لما الشركتين إندمجوا مع بعض وبقي إسمهم توشيبا Toshiba كان الإتجاه بتاع الشركة إنهم يبدوأ يشتغلوا في حاجات جديدة زي تكنولوجيا المسجلات الصوتية Videotape Recorders و أجهزة التليفيزيون والتكييفات و بفكرك إن الكلام ده كان بداية من سنة 1939 يعني قبل الحرب العالمية الثانية.
نقلة شركة توشيبا حصلت في الثمانينات و التسعينات .. وقتها الحكومة اليابانية كانت بتدي قروض ميسرة و دعم و حتي كانت بتفرض حظر علي إستيراد البضائع الأجنبية عشان تدي للشركات اليابانية فرصة إنها تخترع و تطور و تنافس وده مع الوقت حيؤدي إن الشركات دي تعمل منتجات كويسة تتباع بره و بالتالي صادرات اليابان تزيد .. سنة 1985 إسم توشيبا بقي علي كل لسان لما الشركة عملت T1100 أول Laptop تجاري وده صورته عندك .. الحقيقة إن توشيبا مش هي هم أول ناس إخترعوا الLaptop لإن فيه شركات كتير قبلها صنعت Laptops بس الفرق إن T1100 كان أول Laptop بيتقال عليه IBM Compatible يعني فيه نفس المكونات اللي داخلة في تصنيع أي PC Desktop من تصنيع شركة IBM واللي كانت منتشرة في كل حتة في العالم بداية من سنة 1981.
في الثمانينات برده شركة توشيبا دخلت بتقلها في هوجو إنتشرت أوي وقتها وهي هوجة أشباه الموصلات Semiconductors .. اللي حصل إن سنة 1984 كان فيه مهندس تصميم أليكترونيات شغال في شركة توشيبا إسمه (فوجيو ماسوكا Fujio Masuoka) الرجل ده راح بفلوسه وعلي نفقته الخاصة سافر يحضر مؤتمر المطورين الأليكترونيين الدولي International Electronic Developers Meeting و اللي إتعمل في ولاية كاليفورنيا الأميريكية عشان يعرض علي العالم إختراع كان شغال عليه في وقت فراغه و الإختراع ده كان عبارة عن كارتة ميموري Memory Chip بتقدر إنها تخزن و تسترجع البيانات Data من غير ما تستهلك أي Power .. أيوه انا عارف إنك بتشبه علي الإختراع ده .. اللي عمله (فوجيو ماسوكا) إنه إخترع الفلاشة واللي Toshiba سمتها NAND Flash Memory واللي بقي مستخدم في الكاميرات الرقمية Digital Cameras و الMP3 Players و ال Smartphones و طبعاً الUSB Flash Drives .. فيه عندك من ضمن الصور رسم بياني بيوريك الMarket Share أو حصة الشركات الكبيرة من سوق الفلاشات و زي ما انت شايف شركة Samsung مستحوذة علي 36.1% من السوق و وراها علي طول شركة توشيبا ب17.4%.
في فترة التسعينات و الألفينات كانت شركة توشيبا من أكبر الشركات في العالم اللي بتصنع أجهزة Laptops في العالم لدرجة إن سنة 2007 حوالي 17.8% من إجمالي أجهزة Laptop اللي بتتباع في الولايات المتحدة هي بتاعة شركة Toshiba .. بس الدنيا بدأت تخرب جامد من بعد سنة 2007 لحد ما دلوقتي و بعد 10 سنين شركة توشيبا بقت في الإنعاش .. السؤال دلوقتي هو إيه اللي حصل في ال10 سنين دول؟
فيه 3 حاجات إجتمعوا مع بعض عشان يبقوا السكينة اللي إتغرزت في قلب شركة Toshiba و ال3 حاجات دول هم: الإنترنت و فضيحة سنة 2015 و قرار شراء شركة ويستنيجهاوس Westinghouse الأميريكية وخلينا نتكلم عن كل حاجة من الحاجات الثلاثة دول بشيء من التفصيل:
إيه كان دور الإنترنت في إنهيار شركة توشيبا Toshiba؟
دلوقتي بداية من سنة 2000 الإنترنت بقي متاح لناس كتير أوي علي مستوي العالم وده خلي الطلب علي Laptops يبقي كبير .. المشكلة إن انت لو طالب في سنة رابعة هندسة مثلاً ومحتاج تشتري Laptop عشان شغل مشروع التخرج فانت غالباً حتدور علي Laptop أولاً يكون سعره حنين و ثانياً إمكانياته كويسة .. يعني السعر عندك رقم واحد .. ده فتح مجال لشركات تصنيع laptops إمكانياتها الي حد ما ضعيفة بس سعرها رخيص زي Acer و Asus التايوانية و كمان شركات صينية أشهرها Lenovo .. فجأة شركتي Toshiba و Sony لقوا نفسهم في مشكلة و هي إن الطلب علي الLaptops بتاعتهم مبقاش كبير لإن المستهلك بقي أهم حاجة عنده لما يجي يشتري Laptop هو إن سعره يبقي رخيص ومش مهم أوي الQuality.
الناس بقت بتتعامل مع Laptop بنفس طريقة تعاملها مع الأجهزة المنزلية زي الغسالات و المايكروييف اللي هو عايز حاجة بتشتغل و خلاص و ميدفعش فيها فلوس كتير .. زود علي كده الأزمة المالية العالمية اللي حصلت سنة 2008 و اللي أدت مع مشكلة التنافس مع الشركات الصينية و التاويانية إن شركة Toshiba تلاقي نفسها في موقف إن خلال الفترة من 2007 لحد سنة 2015 أرباح إدارة PC أو Personal Computers قلت بنسبة 80% و فيه رسم بياني من ضمن الصور بيوريك أرباح إدارة الPC بتاعة Toshiba خلال الفترة دي.
سنة 2010 قررت شركة Toshiba إنها تبيع كل مصانعها بتاعة تصنيع أجهزة التليفيزونات اللي موجودة خارج اليابان و سنة 2015 قررت الشركة إنها متبعش أي أجهزة تليفيزيون خارج السوق الياباني .. يعني دلوقتي بقي صعب أوي إنك تلاقي تليفيزيون ماركة Toshiba .. سنة 2016 قررت الشركة كمان إنها مش حتبيع أي أجهزة PC بره اليابان .. فجأة حصة شركة Toshiba من مبيعات أجهزة الPC علي مستوي العالم قلت من 20% من إجمالي المبيعات العالمية سنة 1996 ل5% سنة 2016.
إيه هي فضيحة سنة 2015؟
سنة 2015 فيه حد جوه شركة Toshiba سرب معلومات إن إدارة الشركة كذبت بخصوص الأرباح الحقيقية لإدارة PC لإن بناء علي كلام الشخص ده الشركة إدعت إن أرباح الإدارة أعلي ب1.2 مليار دولار عن الرقم الحقيقي .. طبعاً ده أدي إن يتعمل تحقيق كبير كانت نتيجته تقرير ضخم من 334 صفحة قال إن فعلاً رئيس مجلس إدارة الشركة وقتها (أتسوتوشي نيشادا Atsutoshi Nishada) عشان يرضي الناس اللي شارية أسهم في الشركة كذب عليهم و قالهم إن قسم PC بيجيب أرباح أعلي بكتير من الأرباح الحقيقية اللي هو بيجيبها للشركة.
صحيح إن فضيحة سنة 2015 مكنتش هي السبب في اللي شركة Toshiba بتعيشه دلوقتي بس الفضيحة دي بتوريك مشكلة كبيرة متأصلة في الشركات اليابانية و هي إن بسبب إن الحكومة اليابانية مانعه خالص إنها تستورد أي حاجة بتصنعها الشركات اليابانية فده مخلي رؤساء الشركات أو خلينا نقول رؤساء الإدارات مرعوبين إنهم يقولوا الحقيقة لمجلس الإدارة اللي هو أساساً مكون من ناس مش عايزه تسمع أي خبر مش حلو .. مشكلة الكذب أو خلينا نقول إخفاء الحقيقة دي أدت الي إن الشركات اليابانية بقت خايفة تخاطر في إنها تخترع أو تكتشف أو تنزل منتجات كتيرة .. تقدر تقول إن مشكلة إخفاء الحقيقة دي خلت اللي بيدير الشركات اليابانية ناس بيتقال عليهم Yes Men ودي ناس بتقول حاضر و نعم لمجلس الإدارة ومش بتقول حاضر و نعم للصح و للأفكار الجديدة.
طب إيه مشكلة صفقة شراء شركة ويستينجهاوس Westinghouse؟
دي من الصفقات الغريبة اللي بتخليك تضرب كف علي كف وتسأل نفسك هو ليه كده؟ .. دلوقتي انتي يا شركة Toshiba بتصنعي أجهزة أليكترونية و Laptops فإيه اللي يخليكي سنة 2006 تقرري إنك تروحي تشتري شركة Westinghouse الأميريكية مقابل 5.4 مليار دولار و دي شركة متخصصة في بناء و تصميم المحطات النووية؟ .. فعلاً شركة Toshiba متعرفش حاجة عن المفاعلات النووية بس يمكن السبب في قرار الشراء ده هو إن الناس المسئولة عن شركة Toshiba كانوا متخيلين إن سوق المفاعلات النووية حيكبر و يجيب أرباح و فلوس زي الفل و الحقيقة انا شخصياً أقدر أفهم إيه اللي خلاهم يفكروا في كده:
سنة 2005 قررت حكومة الولايات المتحدة إنها حتدي للشركات اللي شغالة في مجال الطاقه النووية تخفيضات ضريبية و حتديهم قروض ميسرة عشان يبدأوا يطوروا و يعملوا عمرات في المفاعلات النووية الأميريكية .. دول زي فييتنام و الهند و حتي اليابان كانوا دايسين أوي في خطط إنشاء مفاعلات نووية .. فكان طبيعي إن شركة Toshiba تقول لنفسها إن الطاقة النووية Business حلو أوي يحطوا فيه فلوسهم .. بس زي ما بنقول في مصر قليل البخت يلاقي العظم في الكرشة.
سنة 2011 إتعرضت اليابان لكارثة تسونامي اللي أدت لإنهيار المفاعل النووي دياتشي Daiichi الموجود في جزيرة فوكوشيما .. بسبب كده قررت اليابان إنها تقفل أغلب مفاعلاتها النووية و حتي الدول اللي كانت ناوية تبني مفاعلات نووية خافت و قلقت ولغت الخطط بتاعتها .. الموضوع موقفش لحد كده .. المفروض إن شركة Westinghouse كانت متعاقدة مع شركة مقاولات إسمها Bridge & Iron عشان تبنيلها 4 مفاعلات نووية جديدة في أميركا بس الشركة قالت إنها مش عايزه العقد ده ودفعت الشرط الجزائي في العقد و بكده شركة ويستنجهاوس Westinghouse لقت نفسها قدام كارثة إنها أساساً مش شركة مقاولات بس هي بقت مطالبة إنها هي اللي تبني المفاعلات الأربعة .. لما جم ينفذوا التصميم الشركة لقت نفسها بتعك و التكاليف بتكتر بشكل محدش عرف يسيطر عليه لحد ما في شهر مارس 2017 أعلنت شركة ويستنجهاوس Westinghouse إفلاسها.
لما جت شركة Toshiba تشوف خسائرها لقت إنها عشان تسدد الديون اللي تراكمت علي شركة Westinghouse حتضطر تدفع 6 مليار دولار اللي هو مبلغ أكثر من اللي الشركة اليابانية دفعته من الأساس عشان تشتري الشركة الأميريكية .. معني كده إن خسائر شركة Toshiba للسنة المالية اللي المفروض إنها إنتهت في 31 مارس 2017 كانت حوالي 9.9 مليار دولار .. الوضع بقي زي الزفت لدرجة إن شركة Toshiba بتفكر جدياً إنها تبيع إدارة الNAND Flash Drive اللي هي الإدارة الوحيدة اللي بتجيب فلوس للشركة بس طبعاً قرار زي ده مش حيبقي بالساهل.
الحقيقة إن مش Toshiba لوحدها اللي عايشه في العناية المركزة بين الحياة و الموت .. عندك شركة زي Sharp اللي كانت زمان شركة عملاقة إتباعت كلها سنة 2016 لشركة Foxconn ودي شركة مقاولات تايوانية مقابل 4.4 مليار دولار .. شركة زي Sony اللي سنة 2014 قررت إنها تبطل تصنع PC و تقريباً بطلت تصنع Smartphones خالص ودلوقتي بتفكر إنها تبيع Sony Entertainment اللي إدارة إنتاج الأفلام لدرجة إن حالياً أكتر إدارة بتجيب فلوس لشركة Sony هي إدارة التأمين علي الحياة .. حتي شركة Nintendo كانت خلاص حتعلن إفلاسها لحد ما إخترعوا لعبة Pokemon Go و اللي تقدر تقول كانت قبلة الحياة للشركة.
المصدر:
مقالة بعنوان Ittook Toshiba 70 years to reach its peak and just a decade to fall into an abyss نشرت في Website إسمه Quartz وده لينك المقالة الأصلية:
https://qz.com/968747/it-took-toshiba-70-years-to-reach-its-peak-and-just-a-decade-to-fall-into-an-abyss/
