كلنا سمعنا واحنا صغيرين إن الجزر بيقوي النظر .. وسمعنا إن الكالسيوم اللي في اللبن حلو للأسنان والعظم .. بس عمر حد سأل نفسه إيه هو الأكل المناسب لنمو مخ الأطفال؟ .. عشان بس تستوعب السؤال فعايزك تعرف إن مخ الطفل اللي لسه حتي رضيع الخلايا العصبية اللي فيه كعدد هي أكتر من عدد النجوم اللي ربنا خلقها في مجرة الطريق اللبني فواضح إن أي أم في الدنيا محتاجة تهتم أوي بالأكل اللي هي بتقدمه لأطفالها عشان تساعدهم إن مخهم ينمو بشكل طبيعي وسليم .. السؤال دلوقتي هو أأكل عيالي إيه؟ .. الإجابة اللي بما يرضي الله إن فيه 45 مادة غذائية لازم تخش جسم الطفل عشان خاطر نمو قدراته العقلية ومن ضمن المواد الغذائية دي مثلاً البروتين وده أمره سهل .. الزنك وده حتلاقيه بكميات محترمة في المحار اللي هو Oyster وده من أكلات السي فود الغالية حبتين تلاتة وطبعاً مش حتأكل عيل صغير محار .. الحديد كمان من المواد الغذائية دي وطبعاً إنك تلاقي طفل بيحب ياكل سبانخ دي حاجة بنفس ندرة إنك تلاقي حد إسكندراني بيشجع الإتحاد السكندري .. الأوميجا ثري Omega-3 من المواد الغذائية المفيدة جداً لنمو المخ بس أرجع وأقولك صعب تلاقي عيل صغير مستعد ياكل شوربة سي فود لإن أبوه حيبصله فيها .. عشان كده النهاردة حنتكلم عن 4 مواد غذائية أولاً متوفرة لأي حد وثانياً غالباً فيه شبه إجماع وسط الأطفال علي إنهم مستعدين ياكلوها والأربعة دول مهمين أوي إن أي أم توفرهم لأطفالها.
التوت .. التوت فيه ماسورة فيتامين سي وإتكسرت ومغرقة الدنيا .. أغلب الناس عندها إعتقاد إن فيتامين سي ده مبيعملش غير حاجة واحدة وهي إنه يسند الجهاز المناعي وعشان كده الناس بتسف البرتقال والليمون زي الهروين لما بيجيلهم دور برد .. فيتامين سي ده حاجة مضادة للأكسدة .. بمعني إنه بيمنع خلاياك الحية إنها تصدي .. بس له وظيفة تانية مهمة أوي وهي إنه بيساعد في تكوين النواقل العصبية أو Neurotransmitters ودي بمنتهي البساطة حاول تتخيل إن جسم الطفل ده شقة علي المحارة وأنا بأسسها كهربا .. هو إنت مش بتشد كابلات كهرباء في الحيطان؟ .. هي كابلات الكهرباء دي في جسم البني أدم هي النواقل العصبية اللي من غيرها مخك وجهازك العصبي كله مش حيوصله كهرباء كفاية .. مش بس كده .. التوت فيه ميكس حلو جداً بين السكر والألياف وده بيخليه مثالي للجهاز الهضمي .. ممكن تجرب إنك تقدم للطفل التوت عليه زبادي أو التوت ومعاه شيكولاتة دارك.
البرقوق .. لو الطفل مبيعرفش ينام بليل أو إنت شايف إن موده مُتقلب فده معناه إنه محتاج ناقل عصبي أو Neurotransmitter إسمه تريبتوفان Tryptophan .. التريبتوفان ده حامض أميني يبقي إبن عم ناقل عصبي تاني إسمه سيروتونين Serotonin .. والتريبتوفان ده هو الحل إنه يخليك تنام في مواعيد بني أدمين وتصحي في مواعيد بني أدمين والبتاع ده موجود اللهم صلي علي سيدنا النبي بوفرة في البرقوق .. لو مش بتحب البرقوق ممكن تروح للعطار تقوله عايز بذور الشيا ودي بتتغلي وتتشرب زي الينسون كده وبرده مليان بمادة التريبتوفان.
البطاطا .. لو أي أم راحت لأي خبير تغذية حتلاقيه حافظ الجملة دي .. فيتامين A مهم لنمو القدرات العقلية للطفل والبروكلي مليان بفيتامين A .. تيجي الأم بكل حسن نية تأكل إبنها بروكلي تلاقيه بيتفه في وشها .. طب ليه متأكليهوش بطاطا؟ .. أهي مليانة فيتامين A زيها زي البروكلي وتقدري تخبزيها أو تشويها أو تقليها أو تاكليها نية أو حتي تعمليها شوربة براحتك يعني.
السمك .. حوالي 50% من مخ أي بني أدم حتلاقيه دهون .. يبقي سهلة أهي إحنا محتاجين ناكل أكل فيه دهون بس ده مش معناه إنك تروح للجزار تقوله عايز كيلو لحمة ملبسة .. الدهن اللي بتكلم عنه حاجة زي DHA ودي إختصار Docosahexaenoic Acid وده نوع من أنوع الأوميجا ثري Omega-3 وده مهم جداً جداً من هنا لحد بعد بكره في نمو الخلايا العصبية .. تيجي تسألني طب ألاقي DHA ده فين؟ .. أقولك في 5 أنوع سمك اللي هم السلمون والماكريل والانشوجة والسردين والرنجة .. الأخوة بتوع التغذية بيسموهم SMASH ودول إختصار Salmon اللي هو السلمون و Mackerel يعني الماكريل و Anchovies اللي هي الأنشوجة و Sardines اللي هي السردين و أخيراً Herring يعني الرنجة.
المصدر:
- مقالة بعنوان ‘Brain food’ is real. Here’s what to feed your kids to help their gray matter grow نشرت في مجلة National Geographic وده لينك المقالة الأصلية:
https://www.nationalgeographic.com/family/2020/07/what-to-feed-kids-to-help-their-gray-matter-grow/
