سنة 2005 كانت سنة هادية في ولاية اوريجون الاميريكية .. هي اساسا ولاية الامريكان نفسهم ميعرفوش عنها حاجة فمابالك بينا احنا هنا في مصر .. في السنة دي انتخب مجلس ادارة جديد لجامعة ولاية اوريجون اللي هو حاجة كده شبه ان ادارة جامعة الاسكندرية مثلا مش بتيجي بالتعيين انما بتيجي بالانتخابات بس الفكرة ان مجلس الادارة ده تقدر تقول كده كان سلفي شوية .. هم مش سلفيين زي بتوعنا .. لا .. هم كانوا مسيحيين بس اي ديانة في الدنيا حتلاقي فيها سلفيين اللي هم الناس اللي عايزين نرجع لOld School او التعاليم الاساسية خالص اللي نشأ فيها الدين اللي انت بتتكلم عنه .. المهم ان ادارة الجامعة قالت ان والله عشان نبقي Fair و محايدين فزي ما بندرس كورس نظرية النشوء و التطور بتاعة (تشارلز داروين Charles Darwin) اللي الناس قصتها و اختذلتها في جملة ان البني ادم اصله قرد فاحنا كمان حنسمح بتدريس كورسات عن نظرية الخلق اللي هي Creationism واللي برده الناس قصتها و اختذلتها في جملة ان البني ادم ربنا كرمه و بالتالي اكيد يعني اصله مش قرد .. بعد القرار ما طلع كان فيه طالب بتاع فيزياء كان بيحضر دراسات عليا في الجامعة اسمه (بوبي هينديرسون Bobby Henderson) حب زي ما تقول كده يستظرف و يقلش علي ادارة الجامعة و كتب خطاب رسمي حطه علي Website بتاع الجامعة قال فيه ان معلش يعني زي ما انتوا حتسمحوا بتدريس نظرية الخلق وفق الديانة المسيحية فانا كمان عندي نظرية خلق خاصة بيا ولو سمحتوا يعني انا عايزها تتدرس في الجامعة .. زي ما قلتلك هو كان عايز يقلش بس في الجواب هو شرح ان نظرية الخلق بتاعته ان اللي خلق الكون كان وحش بيطير من المكرونة الاسباجيتي.
بتضحك صح؟ .. جري الشريط سنة 2016 بس روح هولندا .. زيها زي سنة 2005 فسنة 2016 كانت سنة هادية في هولندا .. لا كان فيها امم اوروبا ولا كاس عالم .. في السنة دي الغرفة التجارية الهولندية اعترفت رسميا بان ديانة وحش الاسباغيتي الطائر Flying Spaghetti Monster اللي اخترعها الاخ (بوبي هينديرسون) كنوع من انواع القلش هي ديانة رسمية معترف بها من الحكومة الهولندية .. مش بس كده .. معتنقي الديانة دي بقي اسمهم عبدة المكرونة Pastafarians .. الناس دي تسكت علي كده؟ .. القلش فكرة و الافكار لا تموت .. بعدها بكام يوم يروح مواطن هولندي يجدد رخصته فاذ بتوع المرور في مدينة ايندهوفن يتخضوا لما يلاقوه عايز يتصور صورة الرخصة وهو لابس مصفاة مكرونة فوق راسه .. ايه اللي بتعمله في نفسك ده يابني؟ .. قالك انا من عبدة المكرونة ودي ديانة معترف بيها في البلد وده الزي الديني بتاعنا .. زي ما الستات المسلمات بيلبسوا حجاب وزي ما المسيحيين بيعلقوا سلسلة فيها صليب فاحنا بنمشي في الشارع بمصفاة مكرونة فوق راسنا .. ادارة المرور بتاعة ايندهوفن رفضت تصوره وهو لابس المصفاة فوق راسه علي اساس ان عبادة المكرونة دي مش ديانة اصلا وبلاش قلش رخيص بقي .. المواطن الهولندي راح رفع قضية في المحاكم ضد ادارة مرور ايندهوفن بداعي انه بني ادم بيتضطهد في دينه .. انت متخيل؟ .. طب انت متخيل ان القضية قعدت 3 سنين في المحاكم؟
في جلسات المحكمة القاضي سأل معلش هو انتوا بتصلوا يعني في الديانة دي؟ .. المحامين بتوع الرجل الهولندي اللي رفع القضية قالوا اومااال و ده كان نص الصلاة اللي هم قالوها عشان بس ابقي محايد وانا بنقل الكلام .. جاهز؟ بس اوعي تجوع .. مكرونتنا المقدسة .. انتي فن في مصفاة .. بصفيكي من المياه .. المكرونة جاهزة .. الصلصة طعمها يجنن .. فوقيها شوية جبنة بارميزان مبشورة .. ادينا مباركة اليوم .. ادينا العيش اللي بالتوم .. اغفري ذنوبنا زي ما احنا بنغفر للي زعلونا .. امسكي ايدينا و خلينا نبقي نباتيين بس لازم ناكل بيتزا .. مصيرنا اننا للابد نعيش علي اللحمة المفرومة و المكرونة و الصلصة .. امين.
القلش لسه مخلصش .. جلسات المحكمة ورت للناس ان الاخوة عبدة الباستا او وحش الاسباجيتي الطائر ده مؤمنين بافكار من ضمنها ان سبب الاحتباس الحراري هو ان اعداد القراصنة في العالم بتقل .. وان الحل الوحيد لانقاذ المناخ هو ان الناس ترجع تاني لحياة القراصنة و نعيش كلنا زي كابتن (جاك سبارو Jack Sparrow) في سلسلة Pirates of the Caribbean .. لما القاضي سأله طب لما بتموتوا انتوا مؤمنين بان الدار الاخرة دي عبارة عن ايه؟ قالك اللي بيموت يا بيخش الجنة يا بيخش النار .. الجنة ان يبقي عندك بير بيطلع بيرة و بيبقي فيه مصنع بيطلع رقاصات .. النار بقي بيبقي فيها بير بيطلع بيرة برده بس بيرة دلعة مش بتسكر و فيها مصنع رقاصات برده بس الرقاصات عندهم امراض جنسية.
لحد دلوقتي انت ممكن يكون رأيك ان الناس دي يا فيه فيوز ضارب في دماغها او انهم مش فاهمين الفرق بين القلش و بين قلة الادب .. انت ممكن يكون رأيك ان الدين ده حاجة سامية لا يجوز الهزار فيها بس انت محتاج تفهم نقطة وهي ان صحيح القلشة دي لانها في رأيي مجرد قلشة ولا تستحق ان يتقال عليها ديانة هي نتيجة طبيعية لزمن السوشيال ميديا اللي احنا عايشين فيه .. عشان تفهم النقطة دي فانا محتاج اشرحلك القواعد اللي اصحاب القلشة دي ماشيين عليه .. زي ما اي ديانة في الدنيا ليها كتاب مقدس فبردة الاخوة دول عندهم ما يعادل الوصايا العشر في اليهودية بس هم 8 وصايا بس .. حتي هم مش بيسموها قواعد انما The 8 I’d Really Rather You Didn’t Do يعني ال8 حاجات اللي يا ريت لو بلاش تعملهم .. النقطة السادسة مثلا من ال8 حاجات دي هي اللي عاجباني اوي .. النقطة دي بتقول يا ريت متصرفش ملايين الدولارات عشان تبني دار عبادة متكلف سواء كان كنيسة او معبد او مسجد في حين ان الفلوس دي كان ممكن تصرفها علي انهاء الفقر او علاج الامراض او حتي انك تخفض سعر اشتراك الانترنت .. الفكر ده انت حتلاقيه عمال يزيد يوم عن يوم علي سوشيال ميديا .. مش شرط كافكار قلش دي زي بس ممكن في جروبات الالحاد واللي انا عارف انك شخصيا حاسس انها كترت علي سوشيال ميديا اليومين دول ..مشكلة السوشيال ميديا زي ما واحد مرة قال ان قبلها المجتمع كان مقسوم اوض وكل اوضة مقفولة بالباب بتاعها علي الناس اللي عايشين في الاوضة .. جت السوشيال ميديا فتحت الاوض علي بعض وده خلي كتير من الناس تجيلها صدمة نفسية ان فيه ناس عايشين في نفس البلد اللي هم عايشين فيها بس في مستوي اجتماعي و ثقافي عامل زي الفرق بين (بيب جوارديولا) و كابتن (رضا عبدالعال).
المصدر:
مقالة بعنوان These Wonderfully Weird People Worship a Flying Spaghetti Monster نشرت في موقع The Daily Beast وده لينك المقالة الاصلية:
https://www.thedailybeast.com/these-wonderfully-weird-people-worship-a-flying-spaghetti-monster?ref=scroll
