عشان انا رجل جامد زحليقة و بحب أتابع أخبار البيزنس عشان قبل ما أنام كل يوم بتخيل نفسي إنتربنور بقي و فاتح Startup و بجيب الكوفي لاتيه بلبن ديكاف كل يوم من ستارباكس قبل ما أروح الشغل .. معلش خيالي واسع حبتين .. فانا الحقيقة وقفت قدام قرار غريب و عجيب و مريب طلع من المملكة العربية السعودية يوم 16 فبراير 2021 .. القرار بيقول إن لو مثلا مشروع توسعات الحرم بدأنا شغل في المرحلة الجديدة بتاعته و إحتاجنا نورد طلمبات مياه و قلنا عشان إحنا معانا فلوس بنطير بيها طيارات فحنروح نشتريها من شركة جراندفوس Grundfos الدانمركية اللي هي واحدة من أحسن الشركات اللي بتصنع طلمبات مياه .. جينا نكلم الاخوة بتوع الشركة لقينا إن جراندفوس ملهاش مقر Headquarter او HQ إختصارا في السعودية إنما ليهم مكتب في دبي .. حلو .. أهو إحنا بقي ساعتها مش حنجيب الطلمبات من جراندفوس و حندور علي شركة تانية .. تاني .. السعوديين عايزين إن إن شاء الله بداية من يناير 2024 أي شركة أجنبية عايزة يبقي ليها شغل مع الحكومة السعودية لازم الشركة دي تفتح مكتب ليها في المملكة .. بمعني اخر .. لو عايز تشتغل في المملكة إبقي خلي دبي تنفعك.
لحد دلوقتي انت محتاج تفهم إن القرار ده انت لازم تبصله من وجهتين نظر .. دلوقتي حنبصله من وجهة النظر السعودي .. دلوقتي إحنا ماسكنا واحد إسمه (محمد بن سلمان) وده في حالة إنك عايش في كهف ومش داري إيه اللي بيحصل في الدنيا فده يبقي ولي العهد السعودي و اللي فعليا بيحكم البلد .. حاول تتخيل إن في مسلسل لن أعيش في جلباب أبي الحاج (عبدالغفور البرعي) قرر يبسيب إبنه (عبدالوهاب) هو اللي يمسك الوكالة عشان الحاج يفضي بقي لمراته (فاطمة) يتدلعوا شوية .. (محمد بن سلمان) من اليوم الأول وهو ماشي يقول إنه بيشتغل علي حاجة إسمها رؤية 2030 او Vision 2030 .. البتاعة دي عبارة عن خطة إقتصادية كاملة لإزاي المملكة تبطل تعتمد بشكل كلي علي عائدات النفط و يبدأ الاقتصاد السعودي يجيب فلوس من القطاع الخاص .. إزاي؟ .. إحنا حنقول للشركات العالمية تعالي إفتحي مكاتب و مصانع هنا في المملكة و حنديكي حوافز و مش حنخليكي تدفعي ضرايب .. إنت حتبدأ تبص للموضوع بشكل مختلف لما تعرف إن المملكة العربية السعودية فيها 5% بس من الHQ بتاعة الشركات العالمية اللي فاتحة مكاتب ليها في الشرق الاوسط .. بتتكلم عن دولة تعداد سكانها 34 مليون بني ادم و 70% منهم تحت سن 30 سنة .
لحد دلوقتي وجهة النظر السعودي بتلف حول فكرة مصلحتك أولا .. انا عايزة أشغل الناس عندي ولو إحتجت اني ألوي دراع الشركات العالمية إنها لو مجتش فتحت مكاتب عندي فهي مش حتشتشغل في البلد فده Fair Game .. علي رأي حد أعرفه لما قالي الشغل مفيهوش صحاب .. الحق بتقال الصراحة إن إستراتيجيهم الجديدة جايبة همها .. شركات كبيرة زي Google Cloud و Alibaba و Western Union بتفكر جديا تفتح مكاتب ليها في المملكة .. خلال فعاليات مؤتمر مستقبل مبادرة الإستثمار في السعودية اللي إتعمل في يناير 2021 إتقال إن شركات PepsiCo و شركة شلومبرجير Schlumberger البترولية الفرنسية و شركة الأكلات السريعة الكندية Tim Hoton’s قرروا فعلا يفتحوا مكاتب ليهم في المملكة .. الخطة السعودية إنهم يصرفوا 220 مليار دولار عشان يخلوا الرياض واحدة من أهم 10 مدن في البيزنس علي مستوي العالم.
وجهة النظر الثانية بقي هي بتاعة الإخوة في دبي .. الناس دي عارفة إن قرار السعودية بيستهدفهم هم .. وجهة نظرهم بتدور حول فكرة إن كان المفروض إن دول الخليج تشتغل مع بعضها علي مبدأ علي الحلوة و المرة سوا و منقطعش علي أكل عيش بعض .. وفي نفس الوقت هم بيقولوا إن السعوديين بيطبقوا حاجة إسمها Forced Attraction اللي هو حاجة كده شبه الجواز بالاكراه .. انا كشركة زي جراندفوس مثلا مش جاي أفتح مكتب في المملكة برضايا .. انا فاتحه وانا مغصوب علي ده .. و الغصب في البيزنس مش حاجة كويسة .. دي نقطة .. النقطة الثانية انك لو حتتكلم كبيزنس يعني فإن شركة زي اتلاس كوبكو Atlas Copco بتاعة الكومبيريسرات إنها تفتح فرع ليها في دبي أو تفتحه في الرياض مش حتفرق كتير .. في الحالتين الحكومات حتديها إعفاءات ضريبية .. الفكرة مش في البيزنس .. الفكرة في الحياة الشخصية بعد ما تخلص شغل .. أي حد راح دبي عارف إنك تقدر تشرب خمرة و الستات تلبس اللي هي عايزاه .. اللي هو حاجة أقرب ما تكون لحياتك لو إنت عايش في اوروبا .. عشان أجيبلك من الاخر .. دبي بتقول للناس بتوع الشركات اللي فاتحة فروع عندها تفضلوا عندي و تشربوا خمرة و مراتتكوا تلبس عريان؟ ولا تروحوا السعودية و مراتتكوا تلبس عبايات سودا و تقضوها شرب شاي كرك؟
إستراتيجية دبي في جذب الإستثمارات ليها هي نفسها الطريقة اللي لما تفتح الإنستجرام تلاقي واحدة ليها الالاف من الفولورز .. تسأل نفسك ليه فتدخل علي البروفايل بتاعها تلاقيها حاطة صورها شبه عريانه .. انت كشركة عالمية بيتقالك انا مدينة 90% من اللي عايشين عندي مغتربين مش من أهل البلد .. تمشي في شوارعي كأنك ماشي في باريس او لندن .. ده يفسرلك ان وفق Database بتاعة الامم المتحدة فدبي خدت استثمارات مباشرة اكتر من السعودية كلها ب300% .. لو دخلت علي موقع البنك الدولي World Bank حتلاقيهم مصنفين دبي علي إنها المدينة رقم 16 علي مستوي العالم من حيث سهولة إنك تعمل بيزنس فيها قصاد إن المملكة العربية السعودية محطوطة في المركز 63.
المصدر:
مقالة بعنوان ‘Dramatic and risky’ – and a shot at Dubai? Saudi Arabia issues bold business ultimatum to pull regional HQ offices into the Kingdom نشرت في موقع قناة CNBC الأميريكية وده لينك المقالة الأصلية:
https://www.cnbc.com/2021/02/16/targeting-dubai-saudi-arabias-ultimatum-to-pull-hq-offices-to-kingdom.html
