أنا شبه متؤكد إنك لو مشيت في الشارع بكره الصبح أو لما تروح شغلك أو حتي و إنت قاعد مع عيلتك يوم الجمعة إسألهم هو أنتوا شايفين إن الملحدين زادوا في البلد؟ فبنسبة كبيرة حتسمع إجابة إن أيوه إحنا شايفين إن الملحدين كتروا .. دول ملوا البلد أكتر من الأهلاوية .. هل فيه دليل علي الكلام ده؟ .. هل اللي بيقول كده عنده إحصائيات أو معلومات مؤكدة؟ .. أنا أسهل حاجة في الدنيا أقول إن الأهلاوية بيمثلوا 90% من تعداد سكان مصر بس هل فيه حد عمل إستطلاع رأي أو إشتغل علي دراسة لإثبات الهبداية العابرة للقارات دي؟ .. كلامي النهاردة حيتقسم مرحلتين .. المرحلة الأولانية هي محاولة إننا يبقي عندنا تصور مش حقول مؤكد بنسبة 100% بس علي الأقل يبقي عندنا إحصائيات تخلينا و إحنا بنتكلم منحسش إننا بنفتي .. المرحلة الثانية هي محاولة تفسير الأرقام اللي إحنا شفناها دي.
خد بلد زي لبنان مثلاً .. فيه مؤسسة بحثية إسمها Arab Barometer شغلها أغلبه في الإحصائيات و إستطلاعات الرأي و هي شغالة لحساب جامعتي برينستون و ميتشيجان في أميركا و الناس دي عملت دراسة شملت دول شرق أوسطية كتير خصوصاً في لبنان .. الدراسة شملت 25,000 مواطن و كانت نتيجتها إن التدين في لبنان إنهار بنسبة 43% خلال العشر سنين اللي فاتوا .. حاول تتخيل إن لبنان بقت بلد تقريباً ربع سكانها دلوقتي ملحدين .. أنا واقف جداً عند أرقام لبنان لسبب و هو إن لبنان بلد فيها 18 ديانة رسمية .. لبنان مفيهاش حاجة إسمها إلحاد أو انك تقول إنك مش مؤمن بوجود الله عز وجل .. معلش إنت عندك 18 ديانة إختارلك منهم واحدة اللي هو زي القهوة كده يوم الماتش لازم تشرب حاجة .. متحاولش تفهم كلامي علي إنه هجوم بأي شكل من الأشكال علي الإسلام .. الموضوع أعقد من كده .. أنا بتكلم عن فكرة التدين بشكل عام.
طب إيه رأيك نتكلم عن إيران .. فيه مؤسسة بحثية برده إسمها Group for Analyzing and Measuring Attitudes in Iran يعني مجموعة تحليل و قياس الرأي العام في إيران و إختصاراً بتتسمي GAMAAN عملت دراسة شملت 40,000 مواطن إكتشفت إن 47% من اللي شاركوا في الدراسة دي إنتقلوا من مرحلة إنه كان شخص متدين و بقي شخص مش متدين .. حاول تبقي فاهم إن إيران بلد حكومتها بتقول إن 99.5% من سكان شعبها بينتمي للمذهب الشيعي بس الدراسة إكتشفت ان 78% من اللي شاركوا فيها بس هم اللي مؤمنين بوجود الله عز وجل .. بس مش دي الصدمة .. الصدمة إن 32% فقط لا غير من اللي شاركوا في الدراسة بيعتبروا نفسهم مسلمين شيعة.
خلينا نبقي متفقين إننا عايشين في مجتمع بيشكله الدين .. و مش بس مصر خلي بالك .. حاول تبص للشرق الأوسط كله من فوق .. إذا كانت بلد زي لبنان 60% من تعداد سكانها مسلمين فبلد تانية زي الأردن أو المملكة العربية السعودية تقريباً 100% من سكانها مسلمين .. في نفس الوقت المؤسسات الدينية في الدول العربية مش مستقلة .. هي مؤسسات حكومية و بالتالي هي (سوري في الكلمة بس حتفهم قصدي كمان شوية) إتوسخت بكل عيوب الحكومات .. بمعني أخر .. وزارة الأوقاف مثلاً شغال فيها موظفين حكومة .. موظف الحكومة المرتشي اللي شغال في وزارة الإسكان مثلاً مش شيطان و الموظف الحكومي اللي شغال في وزارة الأوقاف مش ملاك نازل من السما .. إنت موظف حكومي إذن مش حقول إنك بالضرورة مرتشي بس إنت فيك نفس عيوب المتأصلة في الحكومة اللي حضرتك شغال فيها .. مش منطقي إطلاقاً إنك طول ما إنت قاعد وسط صحابك أو زمايلك أو أهلك تسب و تلعن في سلسفين الحكومة و مجاش في بالك إنك تقول لنفسك إيه ده طب ما ده معناه إن المؤسسات الدينية هي كمان إحتمال يبقي فيها مشكلة.
في رأيي الشخصي إنك لو بصيت علي منطقة الشرق الأوسط كل ما إحباط الناس خصوصاً الشباب بيزيد تجاه حكوماتهم كل ما حتلاقي أرقام الإلحاد عمالة تنط .. بمعني أخر مشكلة الإلحاد مش دينية .. لا خالص .. هي إقتصادية و سياسية .. تفتكر لو لبنان بلد إقتصادياً و سياسياً مستقرة و شعبها بيثق في القيادة السياسية بتاعته بدل المأساة اللي هم عايشينها دلوقتي كنت حتلاقي الزيادة دي في معدلات الإلحاد؟ .. نفس الكلام في إيران .. إيران بلد سياسياً فيها كمية عك و قمع و إحباط ما يعلم بيه إلا ربنا و نظام الإنتخابات بتاعهم لوحده غريب .. هنا في مصر كلنا محبطين بعد فشل تجربة ثورة يناير .. أرقام الإحصائيات بتاعة Arab Barometer لوحدها توريك إن نسبة الإلحاد في مصر نطت بشكل كبير من بعد سنة 2013 .. إنت من حقك تختلف معايا في الرأي و تقولي إني يا إما باصص للموضوع غلط أو بتفًه منه بس صدقني لو قلتلك إن المشكلة كلها نفسية .. المشكلة في الإحباط سيدي الفاضل .. الإحباط اللي خلي دول فيها حالة إكتئاب عام أدي في الأخر إن الناس فقدت ثقتها في إمكانية إن الدين ممكن يساعدهم.
المصادر:
- مقالة بعنوان Middle East: Are people losing their religion? نشرت في موقع Deutsche Welle ده لينك المقالة الأصلية:
https://www.dw.com/en/middle-east-are-people-losing-their-religion/a-56442163 - مقالة بعنوان Arabs are losing faith in religious parties and leaders نشرت في مجلة The Economist و ده لينك المقالة الأصلية:
https://www.economist.com/graphic-detail/2019/12/05/arabs-are-losing-faith-in-religious-parties-and-leaders
