الجيش السنغافوري .. الحجم مش كل حاجة.

أنا عايز الناس اللي بتفهم في الأسلحة تجيلي علي جنب كده عشان عايز أسألكم سؤال .. لو أنا جيت سألتك قولي مين هم أقوي الجيوش وسط دول أسيا تفتكر حتقولي مين؟ .. أكيد الصين حتبقي أول إجابة بس غير الصين عندك مين؟ .. لو قلت اليابان تبقي غلطان لإن اليابان عايشة علي قفا القواعد العسكرية الأميريكية اللي فيها .. لو قلت كوريا الجنوبية حقولك عندك حق شوية بس مش أوي لإن صحيح قواتها البرية إلي حد ما قوية بس هي كمان عايشة علي قفا الوجود العسكري الأميريكي في أراضيها زيها زي أختها اليابان .. فيه منكوا اللي حيقولي خلاص يا عم كده الصين وراها الهند و وراها باكستان .. حقولك ماشي بس لو أنا جيت قلتلك إن يمكن ثالث أو رابع أقوي قوات مسلحة في أسيا هي سنغافورة اللي عايش فيها 5 مليون بني أدم بس فإنت غالباً حتقولي إني مش بس بفتي ده أنا بهبد كمان.

من أول يوم استقلت فيه سنغافورة عن ماليزيا سنة 1965 و هم في راسهم هسهس إنهم عايزين يبنوا قوات مسلحة قوية خصوصاً إن بمجرد ما إستقلت سنغافورة عانت الأمرين من جيرانها ماليزيا و أندونيسيا اللي كانوا شايفينها دولة لسه عيلة صغيرة كل واحد فيهم عايز يتمنظر عليها و يفرض نفسه .. من هنا إتولدت في سنغافورة فكرة إن لازم يبقي عندنا القدرة إننا ندافع عن نفسنا عشان ميجيش حد شايف نفسه يتمنظر علينا .. فكر فيها زي قطر و السعودية و الإمارات .. السعودية و الإمارات بيفردوا عضلاتهم علي قطر و بالتالي القطريين عايزين يبانوا أقوياء و إنهم جامدين أوي و يقدروا يحافظوا علي إستقلالهم .. بس السنغافوريين زيهم زي القطريين عندهم مشكلة كبيرة و هي إن بلدهم مساحتها صغيرة فده معناه إن قواتهم المسلحة معندهاش حتة مش بس تحارب فيها دول أصلاً معندهمش حتة يتمرنوا عليها .. ده خلي القوات المسلحة السنغافورية تبقي مختلفة و متفوقة بشكل فاضح و يمكن قليل الأدب عن جيرانها و هي إنها قوات مسلحة حديثة عندها تكنولوجيا مش عند أي حد تاني .. الناس دي صارفة كتير أوي علي التكنولوجيا لدرجة إنك لما تبص علي ترسانتهم تحس إنك بتراجع تسليح جيش زي الجيش الأميريكي أو الروسي.

القوات الجوية:

• سنغافورة عندها 60 طيارة F-16 Fighting Falcon متقسمين 40 طيارة F-16D و 20 طيارة F-16C اللي هم النسخ المتقدمة أوي من طيارات F-16 .Fighting Falcon
• السنغافوريين عندهم 40 طيارة F-15SG و دي نسخة مخصوص أو Custom Made من طيارة F-15 Strike Eagleعملتها شركة بوينج Boeing الأميريكية مخصوص لسنغافورة بالمواصفات اللي طلبتها القوات الجوية السنغافورية اللي هي في الحقيقة حاجتين: أولاً إنهم ركبولهم منظومة رادارات متقدمة حبتين إسمها APG-63(V)3 AESA فكرتها إن الرادارت دي بتدي للطيارة F-15SG القدرة إنها تستخدم في مهام الحرب الأليكترونية إنها تشوش علي أنظمة الرادارات بتاعة العدو و يقال إن القوات الجوية السنغافورية شغالة دلوقتي علي مشروع إنها تركب الرادارات دي علي أسطول مقاتلات F-16 اللي عندها .. تاني حاجة إنه إتحط عليها صواريخ جو-جو من طراز AIM-9X Block II و دي صواريخ عشان إنت كطيار تضربها مش محتاج تكون منشن علي الطيارة المعادية إنت محتاج بس تبصلها و الشاشة اللي علي الخوذة بتاعتك حتتولي الباقي اللي هي حاجة كده زي الفتيس الأوتوماتيك إنت دايس بنزين بس و العربية بتسوق نفسها و إنت مانتخ علي الدريسكيون .. برده F-15 دي مش موجودة في حتة بره أميركا إلا عند السعودية و إسرائيل و سنغافورة.

• دي الطيارات اللي بيتقال عليها وش القفص .. القوات الجوية السنغافورية عندها كمان 30 طيارة F-5S Tiger II و طيارات A-4 Skyhawk و دي طيارات قديمة شوية بتطلع وقت اللوزم.
• سنغافورة عندها 20 طيارة هليكوبتر AH-64D Apache Longbow اللي هي أحدث حاجة نزلت من طيارات الأباتشي.
• علي فكرة سنغافوره عندها طيارات إستطلاع شغاله بتكنولوجيا AWACS و دي حاجة ممكن نبقي نتكلم عنها وقت تاني بس هم معتمدين علي 5 طيارت إستطلاع إسرائيلي الصنع من طراز Gulfstream 550 .

القوات البحرية:

• قواتهم البحرية متطورة بشكل مذهل .. عندهم 6 فرقاطات من طراز Formidable-Class و دي فرقاطات بيتقال عليها Stealth يعني مش بتتلقط بالرادار .. الفرقاطات دي حضرتك تبقي الF-35 بتاعة السفن.

• السنغافوريين واخدين تصريح من فرنسا إنهم يبنوا بنفسهم فرقاطات من طراز La Fayette-Class .

• عندهم عدد محترم من الغواصات هم اللي بيبنوها بنفسهم يعني مبيروحوش يشتروا غواصات من ألمانيا أو روسيا أو حتي من أميركا.

• عندهم 5 موانيء متحركة من طراز Endurance-Class الواحد فيهم بيقدر يشيل 18 دبابة و كتيبتين مشاة.

القوات البرية:

• قواتهم البرية إلي حد ما صغيرة خصوصاً لو قارنتها بقوات برية لدول تانية يعني مثلاً السنغافوريين عندهم 72,000 جندي نظامي بس تسليحهم حديث بشكل مستفز و اللي يستفزك أكتر إن أغلب تسليحهم تصنيع محلي.
• الناس دي بتصنع دبابات Leopard 2SG بنفسهم و واخدين تصريح بناءها من ألمانيا و بيعملوا نسخة منها معمولة مخصوص للقوات البرية بتاعتهم.

• الناس دي بتصنع مدرعات Bionix و Terrex .. اللي أهم من كده إن سنغافورة فيها نظام الخدمة الإجبارية في الجيش يعني في ظرف ساعة جيش سنغافورة كله بتسليحه حيكون جاهز.

طبيعي إن يبقي عندك جيش متطور بالشكل ده فده بيكلف فلوس بالهبل .. إحنا جيشنا تسليحه شاكب راكب ميجيش حاجة جنب تسليح جيش سنغافورة رغم إن ميزانية الجيش بالعة تلت أربع الميزانية بتاعه البلد .. أغلب التقديرات الإقتصادية بتقول علي سنغافورة إنها رابع أغني بلد في العالم و رغم كده تلاقي إن الميزانية العسكرية بتاعتهم بتتراوح ما بين 3% و 4% من إجمالي الناتج الوطني الإجمالي Gross Domestic Product أو GDP .. خليني أوضحالك أكتر .. السنة دي الميزانية العسكرية السنغافورية وصلت 14.76 مليار دولار و ده واكل 18% من الميزانية العامة للبلد .. يعني ميزانية سنغافورة العسكرية أكتر من 10 أضعاف ميزانية الجيش المصري اللي إحنا بنتباهي قدام العالم إنه بيصنف علي إنه عاشر أقوي جيش علي مستوي العالم .. اللي بيميز سنغافورة مش إن عندها فلوس كتير تصرفها علي جيشها ولا إن عندها سلاح كتير ولا إن حتي هي اللي بتصنع سلاحها .. عندك السعودية ما هي عندها رابع أكبر ميزانية عسكرية في العالم و جيشهم تبله و تشرب ميته .. اللي بيميز القوات المسلحة السنغافورية إنهم متكمنين أوي من سلاحهم .. الناس دي بتعرف تشتغل بالسلاح اللي تحت إيدها كويس .. حاول تتخيل إنهم صنايعي بس بيعرف يشتغل بالمعدات اللي تحت إيده كويس أوي .. فيه فرق إن يبقي جيشك ضخم بس عامل زي الديناصور بطيء في حركته .. جيش سنغافورة صغير بس حركته سريعة و بيتحرك كمنظومة واحدة .. الناس دي إستثمرت وقت و فلوس و مجهود إنت ممكن متستوعبوش عشان يعملوا شبكة إتصالات بتربط الأفرع الرئيسية للقوات المسلحة متخرش المياه.

بس يمكن أكبر مشكلة بتواجه القوات المسلحة السنغافورية هي إن مساحة سنغافورة صغيرة .. دي جزيرة في المحيط .. يعني إنت لو طيار مثلاً طاير بطيارة F-15SG بسرعة تعدي ال600 كيلومتر في الساعة فإنت يدوبك خمس دقايق و تكون خرجت بره المجال الجوي السنغافوري .. عشان كده سنغافورة بتبعت جزء كبير من جيشها بره البلد لأميركا و أستراليا و بروناي و نيوزيلاندا و تايوان ضمن دول كتير علي مستوي العالم .. الكلام الرسمي ان الناس دي بتروح تتدرب هناك بس يمكن في نفس الوقت ده بيدي سنغافورة أفضلية إن لو لا قدر الله حد هاجمها فهو مش حيقدر يعرف الهجمة المرتدة حتجيله منين .. يعني لو دولة زي أندونيسيا مثلاً قلت أدبها علي سنغافورة فسنغافورة تقدر تبعت قوات من حتت مختلفة عشان تهاجم أندونيسيا فده إلي حد كبير ميزة .. بس سنغافورة علاقتها بجيرانها تقدر تقول إنها دلوقتي عاملة زي الكنافة بالنوتيلا .. يمكن لإن سنغافورة ليها قوات في حتت كتير في العالم فده بيخليهم يقدروا يساهموا في مهمات إنسانية كتير و ده مخلي سنغافورة عموماً ليها صحاب كتير في حتت كتير من العالم .. يعني تقدر تقول علي سنغافورة إنها كندا بتاعة أسيا .. بس في نفس الوقت سنغافورة إيدها طويلة لو حد مد إيده عليها حتقطعهاله.

المصدر:

مقالة بعنوان How a tiny city-state became a military powerhouse with the best air force and navy in Southern Asia يعني إزاي دولة صغيرة بقت عملاق عسكري و عندها أقوي سلاح جو و بحرية ضمن دول جنوب شرق أسيا نشرت في مجلة Business Insider و ده لينك المقالة الأصلية:
https://www.businessinsider.in/how-a-tiny-city-state-became-a-military-powerhouse-with-the-best-air-force-and-navy-in-southeast-asia/articleshow/63670441.cms