إيه اللي يخليك تقول علي بلد إنها قوة عظمي أو Superpower؟ .. هل قوة إقتصادها؟ .. جيوشها اللي مش بتتهزم في معركة؟ .. إسهامها في العلوم والحضارة؟ .. فيه أمثلة كتير علي إمبراطوريات تستحق إن التاريخ يفضل يتعلم منها زي الدولة العثمانية والإمبراطورية الفارسية أو الإمبراطورية الإسبانية .. لسه فيه عندك الخلافة الأموية والعباسية وكمان أسرة تانج الصينية .. بس النهاردة حنتكلم بسرعة أوي عن 3 إمبراطوريات تستحق فعلاً إنها تتوصف بإنها كانت قوي عظمي أو Superpower في وقتها.
الإمبراطورية الرومانية:
إنت بتتكلم عن دولة حكمت الشرق الأوسط وأوروبا .. نفوذها وصل للصين والهند .. عاش تحت إيدها سكان أهم الحضارات القديمة اللي هم اليونان ومصر والشام و قرطاجة والأناضول وإيطاليا .. بلد عاش تحت حكمها في أقصي إتساعها في القرن الثاني الميلادي حوالي 60 مليون بني أدم وده كان رقم خزعبلي وقتها .. بلد كانت كبيرة لدرجة إنها لقت نفسها مش لاقية حد تعمل معاها علاقات تجارية وبقت بتستورد بس السلع النادرة زي البهارات والحرير .. بلد قواتها المسلحة مكنش فيه حد يقدر يقف قدامها حتي الإمبراطورية الفارسية .. ورغم كل ده الإمبراطورية الرومانية وقعت مش بسبب إن جت دولة تانية هزمتها .. لا خالص .. الرومان هم اللي هزموا نفسهم .. حروبهم الأهلية اللي مكنتش بتخلص وبتقوم لأتفه الأسباب .. سياساتهم الإقتصادية اللي خربت موارد الدولة .. الإعتماد المبالغ فيه علي المرتزقة اللي كانوا بياخدوا فلوس كتير كمرتبات والأهم إنك مش ضامن ولاءهم بنسبة 100% .. سقوط الإمبراطورية الرومانية يستحق إننا نتكلم عنه بالتفصيل في سلسلة مقالات عشان نتعلم من الأخطاء أو خلينا نقول الكوارث اللي هم عملوها.
الإمبراطورية المغولية:
سبب إن أغلب المؤرخين بيحطوا إسم الإمبراطورية المغولية وسط القوي العظمي في التاريخ رغم إنها مكنش ليها أي إسهامات علمية ولا حضارية ولا بتسمع عن سياح راحوا زاروا منغوليا عشان يزوروا المعابد والقصور اللي بناها المغول هو إن بحسبة الأرقام الناس دي مكنش ينفع يعملوا اللي هم عملوه ده .. إزاي مجموعة قبائل لا بتعرف تقرأ ولا تكتب وتعداد سكانهم بسلطاتهم وبابا غنوجهم تقريباً مليون بني أدم يقدروا يعملوا أكبر دولة في تاريخ البني أدمين من حيث مساحة الأرض اللي تحت إيدهم؟ .. الإجابة بمنتهي البساطة إن المغول ناس صحيح مبيعرفوش يقرأوا ويكتبوا بس بيستفيدوا كويس أوي من تجارب اللي حوليهم .. أي إختراع أو فكرة يشوفوها بتتنفذ في دولة حوليهم ياخدوها يطبقوها .. هم قلدوا غيرهم وتفوقوا عليهم بسبب إنهم كانوا متوحدين تحت راية بني أدم يعتبر في رأيي الشخصي من أهم البشر اللي خلقهم ربنا .. (تيموجين Temujin).
قصة إزاي (تيموجين) قدر يوحد القبائل المغولية تحت قيادته سنة 1206 وكان يدوبك عنده 50 سنة وقتها تستحق إنها برده تتحكي لوحدها في سلسلة مقالات بس بسبب ده المغول سموه الإسم اللي (تيموجين) إتشهر بيه اللي هو (جينكيز خان) ودي كلمة معناها الحاكم المُطلق .. الحقيقة إن التاريخ بيعامل (جنكيز خان) علي إنه سفاح بس الحقيقة إحنا مش متؤكدين أوي هو الرجل ده مسئول عن موت كام بني أدم؟ .. خلال الفترة من 1219 لحد 1221 ودي اللي فيها الإمبراطورية المغولية إتوسعت أوي في وسط أسيا لحد إيران مات ما بين 15-50 مليون بني أدم .. عشان كده أنا بقولك إني مش معترض علي إننا نقول عليه سفاح هي الفكرة بس إننا مش عارفين بالضبط كام بني أدم ماتوا بسببه؟ .. الإمبراطورية المغولية شبه الرومانية في حاجات كتير .. الإتنين إمتدوا لمساحة واسعة يعني المغول سيطروا علي أغلب الشرق الأوسط وحتت من شرق أوروبا والصين وروسيا .. إتهزموا من دولة الساموراي في اليابان ومن دولة المماليك في مصر لكن برده زيهم زي الرومان نهايتهم مكنتش إن حد هزمهم .. هم إتقسموا لأربع حتت أو خانات والحروب الأهلية بينهم وبين بعض خلصت عليهم .. بس زي ما الحضارة الفرعونية سابتلنا أثار وزي ما الحضارة الإسلامية سابتلنا علم فالمغول سابولنا إن حوالي 8% من رجال العالم نسلهم بينحدر من (جنكيز خان) ولا تخرج قبل أن تقول سبحان الله.
الإمبراطورية البريطانية:
هي أكبر إمبراطورية في تاريخ البشر .. إمبراطورية من إتساعها إتقال عليها إنها الإمبراطورية التي لا تغيب عنها الشمس .. حاول تتخيل بلد عايش فيها 20% من إجمالي سكان العالم .. إذا كانت قوة الرومان والمغول كانت في قواتهم البرية فالإنجليز نقطة تفوقهم كانت القوات البحرية بتاعتهم .. فكرة إن البحرية بتاعتك مسيطرة علي قناة السويس وجزيرة مايوركا الإسبانية ومضيق عدن في اليمن ومضيق هرمز بين إيران وشبه الجزيرة العربية وكمان مضيق جبل طارق اللي هو الوصلة بين المحيط الأطلنطي والبحر المتوسط خلي البريطانيين زيهم زي شركة الوطنية بتاعة الجيش كده في مصر .. طول ما إنت ماشي تلاقي كارتة تدفع فيها فلوس .. الضرايب اللي فرضتها بريطانيا علي التجارة خلتها بلد غنية أوي .. بس يمكن اللي حنحتاج نتكلم عنه بعدين برده هو إزاي دولة تحكم كل الثقافات والعرقيات والديانات دي كلها؟ .. إزاي تحكم الهند ومصر وكندا؟ .. عملتوها إزاي دي يا كفرة؟
المصدر:
- مقالة بعنوان America Wasn’t the First World Power-Here Are History’s Five Most Powerful Superpowers نشرت في مجلة The National Interest وده لينك المقالة الأصلية:
https://nationalinterest.org/blog/reboot/america-wasnt-first-world-power%E2%80%94here-are-historys-five-most-powerful-superpowers-165297
