خليني أبدأ معاك بإني أسألك سؤال عارف إنه غريب وحاول تفكر في إجابته رغم غرابته .. لنفترض إنك ساكن في سموحة في إسكندرية أو في روض الفرج في القاهرة أو أي حي يعجبك في أي حتة في مصر .. إيه رأيك لو جينا علي سطوح عمارة من عماير الحي عملنا فيها مزرعة جوه صوبة زجاجية و بقينا نزرع الخضار و الفاكهة لأهل الحي ده بحيث كل يوم ياخدوها منك طازة .. مش دي تبقي فكرة حلوة؟ .. انا مش بقولك الفكرة علي أساس إنها جديدة محدش عملها قبل كده .. لا خالص .. هي إتعملت و شغالة زي الفل كمان .. سنة 2009 فيه إتنين كندييين واحد إسمه (لورين راثميل Lauren Rathmell) و الثاني إسمه (محمد حجي) أسسوا شركة إسمها لوفا Lufa مقرها في مدينة مونتريال الكندية عشان يطبقوا الفكرة دي.
أول صوبة زراعية تعملها الشركة كانت سنة 2011 وكان بيتزرع فيها فلفل و أعشاب .. بعد كده ربنا كرمهم و فتحوا صوبتين كمان سنة 2013 و 2017 حالياً الشركة ليها 4 صوبات زجاجية مبنيين فوق سطوح بيوت بس انا عايز أركز شوية علي الصوبة الرابعة اللي أفتتحت سنة 2020.. إشمعني؟ .. لإن دي أكبر صوبة عملته الشركة لحد دلوقتي .. هي إتبنت فوق سطوح مستودع قديم كان فرع لسلسلة سوبرماركت مشهورة أوي في كندا إسمها سيرز Sears .. دي صوبة مساحتها أكبر من ال3 صوبات التانيين علي بعض .. صوبة إتبنت علي مساحة 15,000 متر مربع .. صوبة بتنتج في الإسبوع 11,000 كيلوجرام طماطم و بتنجان لإن هم ده المحصولين اللي بيتزرعوا فيها بس لكن هل إنت مستوعب الإنتاجية قد إيه؟ .. 11,000 كيلوجرام طماطم و بتنجان أورجانيك في الإسبوع .. من غير مبيدات .. وبأقل كمية مياه ممكنة في الزراعة .. الحلم بتاع الإتنين اللي أسسوا الشركة إنهم في يوم من الأيام يقدروا يوفروا إحتياجات مدينة كاملة زي مونتريال من الخضار و الفاكهة .. اللي قدروا يوصلوا ليه لحد دلوقتي إنهم يوفروا إحتياجات 2% بس من سكان المدينة .. لسه الطريق طويل بس انا عاجبني الطموح الصراحة.
اللي بتعمله شركة لوفا دي إسمه Urban Agriculture أو الزراعة الحضرية اللي هي بإختصار أنت مش محتاج عشان تزرع محاصيل و تنتج كميات كبيرة إن يبقي عندك فدان أرض و يبقي عندك عزبة المدام تروح تريح فيها أعصابها لما تبقي تعبانة .. وعلي فكرة دي مش مجرد إفتكاسة عاملها ناس معاها فلوس عشان يبيعوا خضار أورجانيك للناس اللي عايزة تاكل أكل صحي و قارفينا علي جروب هيلث كيبيرز .. منظمة الأمم المتحدة للزراعة و الأغذية FAO شايفه إن الزراعة الحضرية دي هي المفتاح اللي حينقذ البشرية لإنها حتوفر إحتياجات البشر من الأكل في الوقت اللي رقعة الأرض الزراعية عماله تقل في العالم كله.
الغريب إن صحيح المنطق بيقول إن فكرة زي دي كان لازم تطلع من دولة نامية بتحاول توفر أكل لشعبها إلا إن الفكرة بدأت في الغرب و عمالة تنتشر بشكل كبير هناك .. مدينة نيويورك سيتي الأميريكية بقي فيها مشروع كبير جدا لتحويل حاويات الشحن المهجورة لصوبات زراعية .. في العاصمة الفرنسية باريس فيها شركة زي لوفا بالضبط إسمها ناتشر أورباين Nature Urbaine عندها صوبة زراعية برده فوق سطوح علي مساحة 14,000 متر مربع بس هي شغالة بنظام مختلف شوية عن لوفا .. إذا كانت لوفا هي اللي بتزرع وهي اللي بتختار تزرع إيه فانت في Nature Urbaine بتدفع 450 دولار في السنة عشان تأجر منهم متر مربع تزرع فيه اللي انت عايزه و بيبقي فريق متخصص في الهندسة الزراعية بيساعدك في كل كبيرة و صغيرة.
المصدر:
مقالة بعنوان Feeding a City From the World’s Largest Rooftop Greenhouse نشرت في موقع المنتدي الإقتصادي العالمي وده لينك المقالة الأصلية:
https://www.weforum.org/agenda/2021/04/world-largest-rooftop-greenhouse/
