أنا من الناس اللي بيعجبني الرأي اللي يجيب صدمة أول ما تسمعه .. يعني مثلاً .. جرنان ماركا Marca الإسباني وصف المدير الفني لريال مدريد (زين الدين زيدان) بإنه ثالث أهم شخصية في تاريخ النادي بعد (ألفريدو دي ستيفانو Alfredo Di Stefano) و بعد رئيس النادي الحالي (فلورينتينو بيريز Florintino Perez) .. ده كده زي ما تقول إن (محمد أبوتريكة) هو ثالث أحسن لاعيب كورة في تاريخ مصر .. حتطلع ناس تعترض و تقول عليه الغطاس و ناس تانية تشتم في الناس الأولانية و تقولهم إياكوا تقولوا كده علي عم الناس .. عشان كده أنا بحب الأراء الصادمة اللي بتخلينا نفكر و نتناقش .. هل فعلاً (زيدان) يستحق المكانة دي؟
فكر فيها كده .. الرجل ده مسك فرقة ريال مدريد لمدة 1,685 يوم متوزعين علي 4 مواسم كاملة و حتت من موسمين .. خلال الفترة دي هو جاب 4 بطولات Champions League و بطولتين دوري .. معاك و خدامك أنا و العربية إن إحنا بنتكلم عن ريال مدريد يعني الطبيعي و العادي إن النادي يجيب بطولات كأنك بتتكلم عن الأهلي كده بس إنت محتاج تفهم نقطة .. من سنة 2003 و دي السنة اللي (فيسينتي ديل بوسكي Vicente del Bosque) اللي أنا بسميه عم (حسن حسني) الله يرحمه مشي فيها من النادي لحد دلوقتي فالأخ زيدان كان هو السبب في 75% من بطولات Champions League اللي دخلت النادي و هو برده المسئول عن 40% من بطولات الدوري اللي كسبها ريال مدريد .. لسه برده شايف إن جرنان ماركا كان بيبالغ؟
(زيدان) ده هو الموظف المثالي .. هو العبد الأسود اللي أي صاحب شغل يتمني يبقي عنده .. إسهر النهاردة عشان تخلص التسليمة يقولك حاضر .. معندناش Resources عشان نسلم فمحتاجينك تضغط علي نفسك يقولك حاضر .. ولما بيمشي و صاحب المكان اللي هو في حالتنا رئيس النادي (بيريز) بيختار ناس جديدة تمسك الشغل بسم الله ما شاء الله بيخبروا الدنيا .. سواء بتتكلم عن (رافا بينيتيز Rafa Benitiez) أو ( سانتياجو سولاري Santiago Solari) أو (جوليان لوبيتيجي Julen Lopetegui) .. أنا شخصياً كان رأيي في عودة (زيدان) للمرة الثانية عشان يمسك الفرقة بعد ما مشي إنه بني أدم مهزق بس ده لإني كنت فاهمه غلط .. (زيدان) بني أدم بيحب شغله و بيبتسط وهو شغال و بيحب يساعد و يشتغل من سكات .. و الحق يتقال برده هو ملوش طلبات كتير الصراحة.
خلال فترته الأولي أكبر صفقة جاتله كانت حارس المرمي (ثيبو كورتوا Thibaut Courtois) من تشيلسي .. في فترته الثانية أهم الصفقات اللي جابها كانوا (إيدين هازارد Eden Hazard) و (فيرلان ميندي Ferlan Mendy) و (لوكا جوفيتش Luka Jovic) و (إيدير ميليتاو Eder Militao) ومن الأسامي الأربعة دول مفيش غير (هازارد) اللي الناس كلها كانت عارفه هو مين .. الأسامي دي كلها مع إحترامي ليها يعني متجيش حاجة جنب الصفقات اللي (بيريز) شخصياً وفرها ل(كارلو أنشيلوتي Carlo Ancelotii) أو (جوزيه مورينيو Jose Mouriho) .. و رغم كده مشفناش و مسمعناش عن أي مشاكل جوه أوضة اللبس زي مثلاً أيام طيب الذكر (مورينيو) .. إذن يبقي السؤال .. هو ماشي ليه؟
حاول تتخيل نفسك حد عنده ضمير بيحب يطلع شغل فلة شمعة منورة بس عشان انت شغال في مكان معهوش فلوس يعين ناس كويسه فانت اللي بقيت شايل الطين .. بس مع ضغط التسليمات انت بقيت مضطر تطلع شغل انت مش راضي علي الQuality بتاعته .. صحيح الشغل بيتسلم بس مش عاجبك عشان انت بتحب الحنتفة .. بتيجي تكلم مديرك هو الوضع ده حيتحل إزاي تلاقيه يقولك ما انت قدها و قدود بقي يا عبد .. هنا بتقرر تمشي .. ده اللي وصله (زيدان) .. ده رجل ربنا إبتلاه بشوية إصابات إنما إيه أورجانيك .. يكفي إني أقولك إن إحنا داخلين علي نص سنة 2021 أهو و (سيرجيو راموس Sergio Ramos) كابتن فرقته و قلب دفاعه ملعبش غير 4 ماتشات بس .. (هازارد) تقريباً مكنش بيطلع من المستشفي .. و رغم كل ده قدر يوصل لنص نهائي Champions League و فضل ينافس علي الدوري لحد أحر ماتش .. إزاي؟ .. بإنه جاب أخر اللاعيبة اللي تحت إيده خصوصاً ثلاثي خط النص (توني كروس Toni Kroos) و (لوكا مودريتش Luka Modric) و (كازيميرو Casemiro) و معاهم (كريم بنزيمة) .. (زيدان) لعب كورة قدم هو بيكرها .. لعب كرة قدم مش بيحب يشوفها .. بس هو مكنش قدامه حل تاني .. صحيح بينافس بس الشغل طالع بQuality زي الزفت .. فزي أي موظف عنده دم راح لمديره يقوله طب وبعدين؟
الحل مش إنك تجيب صفقة سوبر تنقذ الفرقة .. الحل مش إنك تجيب (كيليان إمبابي Kylian Mbappe) .. حاول دايماً تفتكر اللي حصل مع (هازارد) .. انت جبته عشان يبقي لاعيب سوبرستار ينقذ الفرقة بس لما إتصاب إحتست .. إفرض لو (إمبابي) حصله نفس اللي حصل ل(هازارد) .. الحل إنك تبدأ مشروع جديد من الأول .. مشروع حياخد سنين .. مشروع حيحتاج إنك تبدأ تمشي لاعيبه زي (كروس) و (مودريتش) و (مارسيلو) و (راموس) و (بنزيمة) و تبدلهم بلاعيبة صغيرة .. ده لوحده حيعمل مشكلتين .. أول مشكلة هي إن (زيدان) مش حيقدر يعمل ده .. دول رجالته .. عساكره اللي وقفوا في ظهرة و جابولة 4 بطولات Champions League .. إزاي يجيله قلب يمشيهم؟ .. بلاش تقولي لازم يبقي بروفيشنال لإنك بتتكلم عن مشاعر بني أدمين مش مكن .. ثاني مشكلة إن ده حيحتاج فلوس و فلوس كتير .. أوي .. ريال مدريد بعد مصاريف الإستاد الجديد و بعد جائحة فيروس كورونا مبقاش معاه فلوس كاش يدفعها في عمرة شاملة زي دي .. وده السبب اللي خلي (زيدان) قرر يمشي .. إنه مش حيبقي تحت إيده Resources اللي تخليه يطلع شغل بدماغه و إنه ميبقاش هو اللي يقعد مع رجالته يقولهم انا أسف بس انا مش محتاجكوا.
انا بس حابب أختم بإني أقول إني مش شايف إن (زيدان) جبان .. بالعكس .. اللي قدمه لريال مدريد و لكرة القدم عموماً في السنين اللي قضاها كمدير فني أو كلاعيب تخلي ليه رصيد كبير أوي في قلبي علي الأقل .. انا كان عندي تي شيرت بتاعه من أيام ما كان لسه بيلعب في يوفينتوس .. انا شايف إنه محتاج يرتاح لإنه فعلياً أستنذف في الموسم ده .. وعلي رأي (عمرو دياب) انا رايح فين انا راجع تاني .. متنساش إنه ابن الشركة اللي بمكالمة تليفون حتلاقيه راجع تاني.
المصدر:
مقالة بعنوان Zinedine Zidane Leaves Real Madrid: He’ll Explain Why He Walked Out, Again, But it Feels Like Déjà vu From 2018 نشرت في موقع قناة ESPN وده لينك المقالة الأصلية:
https://www.espn.com/soccer/blog-marcottis-musings/story/4396423/zidane-leaves-real-madrid-hell-explain-why-he-walked-outagainbut-it-feels-like-deja-vu-from-2018-exit
