إنجلترا أو زي ما أنا بسميها (دينا الشربيني) بتاعة المنتخبات .. بقالنا سنتين و متفهمش بأي منطق و إيه السبب إن البني أدمة دي تبقي من نجوم رمضان اللي ليها مسلسل بإسمها .. (دينا الشربيني) بقت بتتحط في نفس الCategory بتاعة (عادل إمام) و (يحيي الفخراني) و حتي (يسرا) .. السنة دي برده قبل اليورو فيه ناس بتحط إنجلترا كمرشحة أولي إنها تكسب البطولة أكتر من منتخبات ليها تقلها زي فرنسا و بلجيكا و البرتغال .. إنجلترا اللي مكسبتش بطولة من سنة 1966 يعني من قبل النكسة بسنة بقت مرشح أول .. ليه؟ .. إزاي؟ .. النهاردة حنتكلم عن الخمس أسباب اللي بتخلي إنجلترا تقدرا تكسب البطولة.
السبب الأول هو المدير الفني بتاعهم (جاريث ساوثجيت Gareth Southgate) اللي لما تجرب تسمعه أو تتفرج علي إنترفيوهات ليه نادراً ما حتلاقيه بيتكلم عن التكتيكات أو عن هو حيلعب ب3 في خط الدفاع ولا 4 .. هو دايماً يحسسك إنك قاعد مع (أسامة منير) .. دايماً بيتكلم عن المشاعر .. دايماً بيتكلم عن هي اللاعيبة حاسه بإيه؟ .. أسلوبه في الإدارة أنا عارف إنه مادة دسمة للقلش بس إنت محتاج تفهم إن حتي السير (أليكس فيرجسون Alex Ferguson) ربنا يديله الصحة كان بيعمل زيه كده .. واحدة من أهم الحاجات اللي كان بيقولها السير إن اللي انتوا بتقولوا عليه علم نفس أنا بسميه إدارة لاعيبه .. إنك كمدير تركز علي الحوار بينك وبين الموظفين اللي تحتك خصوصاً بقي لو بتتكلم عن بطولة كبيرة و ضغط إعلامي و جماهيري ميتوصفش علي اللاعيبه و إن اللاعيب يبقي مستريح وهو بيتكلم معاك بتخلي اللاعيبه تاكل النجيلة عشان خاطر المدير الفني بتاعها .. إنت شفت ده بعنيك في كأس العالم اللي فات في روسيا لما إنجلترا وصلت مربع ذهبي.
السبب الثاني هو زي ما الأغنية القديمة كانت بتقول خط النص يا خط النص كل عيون الناس بتبص فخط النص بتاع إنجلترا دلوقتي فعلاً حاجة محترمة جداً .. مش معني كده إن لاعيبه خط النص بتاعة إنجلترا دلوقتي جاحدين و أحسن من الأجيال اللي فاتت .. بالعكس .. صعب أوي إن إنجلترا يبقي عندها حد زي (ستيفن جيرارد Steven Gerrard) و (فرانك لامبارد Frank Lampard) .. هي المشكلة في المديرين الفنيين اللي كانوا بيمسكوا المنتخب زمان .. لسبب ما المديرين الفنيين كانوا بيكونوا يا إما ناس عايزة لاعيبة خط نص بتجري وخلاص .. أو تحسهم بيلعبوا بلاي ستيشن اللي هم يشوفوا مين اللاعيبه اللي باوراتها عالية و يلعبوا بيها من غير ما يبقي عندهم خطة واضحة هم ناويين يهببوا إيه في الماتش .. أقرب مثال علي كده كان المدير الفني السويدي (سفين جوران أريكسون Sven Goran Erikson) اللي لسبب ما لا يعلمه إلا الله كان بينزل ب(جيرارد) و (لامبارد) و (ديفيد بيكهام David Beckham) و (بول سكولز Paul Scholes) اللي مش بيلاقي مكان له غير إنه يلعب جناح شمال .. بقي (سكولز) يلعب جناح شمال؟ .. قعده دكة بس متعملش الجريمة دي .. عشان بس أشوقك للي حتشوفه تخيل خط نص فيه اللاعيبه دي .. (فيل فودين Phil Foden) من مانشستر سيتي .. (جاك جريليش Jack Grealish) من أستون فيلا .. (كالفين فيليبس Calvin Phelips) من ليدز يونايتد .. (ديكلان رايس Declan Rice) من ويستهام .. إنت واخد بالك من الأندية اللي بيلعبوا فيها؟ .. مش معني إنك بتلعب في نادي صغير ف(ساوثجيت) مش حيختارك .. بالعكس .. اللي بيعرف يلعب و مهم للفرقة حينضم أيا كان هو بيلعب في نادي إيه.
السبب الثالث هو إن خلاص لعنة البلنتيات إتفكت .. الإنجليز قلبهم إتكسر كتير بسبب ضربات الجزاء الترجيحية بس بعد ما كسبوا كولومبيا بضربات الجزاء في كاس العالم اللي فاتت في روسيا فهم خلاص بقوا حاسين إن النحس إتفك .. إنك تخش بطولة زي يورو و إنت من جواك مش مرعوب من حظك الأسود في البلنتيات فدي نقطة قوة نفسية كبيرة للمنتخب الإنجليزي.
السبب الرابع هو (هاري كاين Harry Kane) .. مش إن (هاري) جامد زحليقة .. هو فعلاً جامد زحليقة بس مش دي القضية .. القضية إن عشان أي منتخب يكسب بطولة مجمعة زي اليورو أو كأس العالم لازم يبقي تحت إيده مهاجم مبيضيعش فرص .. سنة 2016 البرتغال كان عندها (كريستيانو رونالدو Cristiano Ronaldo) .. إسبانيا كان عندها (فيرناندو توريس Fernando Torres) سنة 2012 و (ديفيد فيا David Villa) سنة 2008 .. رغم إن (هاري) بيلعب في فرقة مش قد كده أوي يعني إلا إنه لعب معاهم فوق 300 ماتش جاب فيهم 200 جون .. مع المنتخب هو لعب 53 ماتش دولي جاب فيهم 34 جون .. بس زي ما هو مهاجم جامد زحليقة فهو شخصية محترمة .. مش بتاع مشاكل .. اللي هو تقدر تقول عليه حد جاي ياكل عيش .. الميكس بين البني أدم اللي شاطر في شغله و محترم و مبيعملش مشاكل ده يتحط علي الراس في أي مكان شغل .. فمابالك بفرقة كورة.
السبب الخامس وهي إن البطولة حتتلعب علي أرضهم وخليني أفهمك .. كل ماتشاتهم في دور المجموعات حيتلعبوا في العاصمة لندن .. لو الإنجليز إتأهلوا أول مجموعتهم حيلعبوا ماتش دور ال16 في لندن .. ماتشات نص النهائي و النهائي حيتلعبوا في إستاد ويمبلي في لندن .. ده معناه إن المنتخب لو إسترجل حيلعب كل ماتشاته في نفس المدينة .. قاعدين في نفس الفندق .. بيتمرنوا في نفس المكان .. ولو الدنيا مشيت في موضوع حقن الأمصال بتاعة فيروس Covid-19 فإحتمال الجمهور يحضر ماتشات نص النهائي و النهائي .. ده حيدي دفعة محترمة جداً للإنجليز في البطولة دي.
المصدر:
فيديو بعنوان The Case for England-Euro Series نشر علي YouTube وده لينك الفيديو:
https://www.youtube.com/watch?v=qmOVybEgrFk
