منتخب بلجيكا ده في رأيي يعني الشخصي إنه الفرقة اللي تلعب بيها في فيفا أو بلاي ستيشن بس دي مش الفرقة اللي تكسب بطولة .. لاعيبه باوراتها جاحدة بس وقت الجد بيقلبوا علي فرقة أسمنت أسيوط .. هم إسمهم الشياطين الحمر زي ما احنا إسمنا الفراعنة أو منتخب الساجدين .. هم صحيح بيلبسوا أحمر بس مش شياطين ولا نيلة .. ده كان زمان .. النهاردة عايزين نتكلم عن الخمس أسباب اللي بتخليني أقول إن منتخب بلجيكا من الفرق المرشحة بقوة الحقيقة إنهم يكسبوا اليورو 2021.
السبب الأول هو الأرقام دي .. 3-4-2-1 .. دي طريقة اللعب اللي بيعتمد عليها (روبيرتو مارتينيز Roberto Martinez) المدير الفني لمنتخب بلجيكا .. الرجل ده من 2016 وقت ما مسك الفرقة لحد دلوقتي يعني بتتكلم عن فترة 5 سنين ما شاء الله بيلعب بنفس الطريقة مبيزهقش .. منتخب بلجيكا منتخب محفوظ في طريقة لعبه .. انت كواحد بتتفرج علي كرة قدم ولا انت محلل رياضي ولا ليك قناة علي اليوتيوب بتبقي عارف علي الأقل 5 لاعيبه من ال11 اللي حينزلوا الملعب قبل أي ماتش لبلجيكا لإن الموضوع مش سر يعني و كمان (مارتينيز) مش هو أحسن حاجة في الدنيا في سوق المديرين الفنيين .. بس رغم كل ده بلجيكا في كاس العالم 2018 طلعت من نص النهائي من فرنسا بجون جه من كورنر .. (مارتينيز) لما إتعين مدير فني لبلجيكا عمل زي أي سباك بيجي يعملك حاجة في الشقة لما بيقولك لا مؤاخذة يا باشا بس مين الحمار اللي كان شغال في الشقة دي قبلي .. بلجيكا قبل (مارتينيز) كان ماسكهم رجل إسمه (مارك فيلموتز Mark Velmutz) اللي كان بيموت في طريقة 4-2-3-1 ومكنتش جايبه نتيجه مع الفرقة .. طريقة (مارتينيز) مناسبة لإمكانيات لاعيبه بلجيكا .. صحيح هي طريقة محفوظة .. صحيح إن تشكيلتهم متوقعه .. بس متفهمش إزاي بيعرفوا يكسبوا .. علي فكرة أسوا ماتش لعبته بلجيكا مع (مارتينيز) كان ماتش دور الثمانية في كأس العالم 2018 اللي فات قصاد البرازيل .. في الماتش ده هم لعبوا بأربعة في خط الظهر مش ثلاثة و صحيح كسبوا الماتش 2-1 بس كان ماتش زي الزفت بأداء ملوش أي معني.
السبب الثاني هو نفس السبب اللي انا قلت إن بسببه منتخب بلجيكا ده أخرك تلعب بيه فيفا .. باورات اللاعيبه .. هم عندهم واحد من أحسن حراس المرمي في العالم (تيبو كورتوا Thebau Courtoi) .. قدامه في خط الدفاع فيه إتنين مدافعين مش صغيرين و الدنيا داست علي وشهم كتير اللي هم (يان فيرتونجين Jan Vertongen) قلب دفاع بنفيكا البرتغالي و جنبه (توبي ألدفيرلد Toby Alderweireld) قلب دفاع توتنهام .. قدامهم لاعيب إرتكاز محترم اللي هو (يوري تيليمانز Yuri Telemans) واللي كسب بطولة كأس إنجلترا السنة دي مع ليستر سيتي .. في الهجوم عندك بطل الدوري الإيطالي مع إنترميلان و هداف منتخب بلجيكا من أول ما البلجيك قرروا يلعبوا كرة قدم (روميلو لوكاكو Romelu Lukaku) .. الباشمهندس اللي بيحرك المولد ده كله يبقي أحسن صانع ألعاب في العالم (كيفين دي بروينه Kevin De Bryune) .. فرقة تقيلة و باوارتها جاحدة.
السبب الثالث .. عشان خاطري برده خلي بالك من عيل صغير كده بيلعب في فرقة رين الفرنسي (جيريمي دوكو Jeremy Doku) .. ده عيل أسمراني عنده 19 سنة بس حريف لإنه أكتر لاعيب عمل ترقيصات ناجحة في الدوري الفرنساوي الموسم ده أكتر حتي من (كيليان إمبابي Kylian Mbabe).
السبب الرابع هو إن مفيش حاجة بتعلم البني أدم زي الزمن ..خد عندك مثلاً (عدنان يانوزاي) و (يانيك كاراسكو Yannick Carrasco) بطل الدوري الإسباني مع أتليتكو مدريد كان عندهم 16 سنة بس لما سابوا بيتهم في بلجيكا و إحترفوا في أوروبا .. قلبي دفاع المنتخب (فيروتونخين) و (الدفيرلد) و الباك اليمين (ناصر الشاذلي) كان عندهم 15 سنة لما سابوا بلدهم و إحترفوا في دوريات أوروبا الكبيرة .. حتي (إيدين هازارد Eden Hazard) كان عنده 14 سنة لما ساب بلده .. انت بتتكلم عن جيل كامل بدأ يحترف في أوروبا و يعمل الCareer وهم لسه موصلوش عشرين سنة .. الجيل ده كان بيلعب في أندية محترمة جداً في أوروبا .. (هازارد) مثلاً في تشيلسي كان معاه (فرانك لامبارد Frank Lampard) و (جون تيري John Terry) يعلموه و يفهموه الصح فين و الغلط فين .. لما هو بيروح المنتخب بيلاقي نفسه قاعد مع شباب في نفس سنه لسه بيتعلموا هم كمان .. دلوقتي الجيل ده خلاص وصل لمرحلة إن كل واحد فيهم شايل فرقة لوحده .. كتير من لاعيبة بلجيكا خطت عتبة الثلاثينات .. دلوقتي الجيل ده وصل لمرحلة من النضج إنهم بقوا عارفين إيه المطلوب يتعمل عشان يكسبوا بطولة .. منتخب بلجيكا اللي حتشوفه في يورو بيلعب فيه 13 لاعيب في الدوري الإنجليزي .. فيه 10 لاعيبه بيلعبوا في الدوري الألماني .. فيه 7 بيلعبوا في الدوري الإيطالي .. و فيه 3 بيلعبوا في الدوري الإسباني .. الخبرات دي كلها لما تجمعها علي بعض حتلاقي نفسك قصاد حقيقة واضحة وهي إن منتخب بلجيكا 2021 مش هو منتخب بلجيكا اللي لعب في يورو 2016 و خرج من ويلز في دور الثمانية .. منتخب بلجيكا في أخر 15 ماتش لعبوه مخسروش إلا ماتش يتيم وكان قصاد إنجلترا.
السبب الخامس هو العنصرية .. يمكن هو كلمة صادمة شوية و عشان كده خليني أستخدم الكلمة الدايت بتاعتها اللي هي التنوع Diversity بس خليني أفهمك قصدي .. زمان كان فيه راجل إسمه (شارلمان) هو اللي أسس إمبراطورية كبيرة أسمها الإمبراطورية الرومانية المقدسة .. الرجل ده لما مات مملكتة إتقسمت بين أحفاده ل3 حتت .. الحتة اليمين كانت ألمانيا .. الحتة الشمال كانت فرنسا .. الحتة اللي في النص كانت بلجيكا .. ده السبب إن البلجيك تحسهم مش شعب واحد .. هم شعب مخلط .. شعب إتولد من غلطة في رسم خريطة .. منتخب بلجيكا هو كمان نسخة من المجتمع اللي بتتشكل منه البلد .. البلجيك يا إما ناس بيسموهم الفليميش بيتكلموا هولندي يا إما ناس بيسموهم بالونز بيتكلموا فرنساوي .. زود عليهم إن 20% من سكان بلجيكا هم أساسا مهاجرين أو أحفاد مهاجرين فانت حتبقي قصاد بلد مش حاجة واحدة .. بلد عبارة عن طبقات كتير غير بعض .. كل طبقة بثقافتها و لغتها و عاداتها و تقاليدها .. دي فرقة لاعيبتها بتتكلم هولندي و فرنساوي و ألماني .. ماسكهم مدرب إسباني .. وعشان كده هم كلهم بيتكلموا مع بعض إنجليزي .. هم محتاجين يثبتوا قصاد نفسهم إنهم يقدروا يشتغلوا مع بعض .. محتاجين يثبتوا قصاد شعبهم إن لون بشرتك و المكان اللي إتولدت فيه ملوش علاقة بانت تقدر تحقق إيه .. نقاط دي انت ممكن هنا في مصر متبقاش حاسسها أوي لإن كلنا حاجة واحدة بس بالنسبة للبلجيك الموضوع فعلاً مهم و حساس.
المصدر:
فيديو بعنوان The Case for Belguim-Euro Series نشر علي YouTube وده لينك الفيديو:
