إمشي في الشارع و إسال أي حد تعرف إيه عن منتخب تركيا لكرة القدم وحتلاقيه خصوصاً لو هو من جيل التسعينات و الثمانينات يقولك المعجزة اللي عملوها في كاس العالم 2002 في كوريا الجنوبية و اليابان لما خدوا مركز ثالث .. إحنا جيل عرف الكرة التركية من (هاكان شوكور) و (حسن شاش) .. صحيح تركيا مخدتش ولا بطولة لا قارية ولا دولية ولا كسبت أي حاجة خالص .. بس لما بتطلب معاهم بيعملوا قلق .. النهاردة حنتكلم عن الخمس أسباب اللي بتخلي منتخب تركيا اللي حيلعب يورو 2021 مرشح بقوة إنه يقلب الطرابيزة علي الكل و يعمل قلق في المنطقة زي جيل 2002.
السبب الأول هو المدير الفني (شينول جونيش) .. ده نفس الرجل اللي كان ماسك تركيا في كاس العالم 2002 و وصل بيهم لثالث عالم .. بدأت تتخض؟ .. منتخب تركيا تحت إيد الرجل ده فعلاً منتخب يخوف .. هم مطلعش عينهم عشان يتأهلوا للبطولة .. في التصفيات هم كسبوا و إتعادلوا مع فرنسا و اللي بس حابب أفكرك يعني إنها بطلة العالم .. (شينول جونيش) حيبقي أكبر مدير فني في السن يمسك فرقة في اليورو دي .. السن ده خبرات كتير متراكمة ورا بعضها بتخلي أي حد يلعب قصاد تركيا لازم يعملها ألف حساب .. فعلياً (شينول جونيش) هو النسخة التركي من المعلم (حسن شحاتة) .. رجل الإعلام بيحبه .. الجماهير بتحبه رغم إنه زملكاوي بس الأهلاوية معندهمش مشكلة معاه .. بيختار اللاعيبه علي حسب مستواهم .. التعصب الكروي عند الجماهير التركية انت صعب تستوعبه أو تفهمه .. لو انت فاكر إنك زملكاوي متعصب عشان بتقول علي (أبوتريكة) الغطاس أو لو انت فاكر إنك أهلاوي أباً عن جد عشان بتقول علي (شيكابالا) المرحوم فانا بس عايزك تخش علي YouTube تتفرج علي اللي بتعمله جماهير فانار بخشة و بيشكتاش و جالاطة سراي في بعض في شوارع أسطنبول قبل أي ماتش ديربي .. إنك وسط الجو المشحون ده تخلق حالة الدعم الجماهيري دي للمنتخب فدي حاجة تحسب ل(شينول جونيش).
السبب الثاني هوإن كتير من اللاعيبه الأتراك خدوا حبوب الشجاعة و إحترفوا بره بلدهم .. اللاعيب التركي كدماغ ميفرقش كتير عن اللاعيب المصري .. ليه أحترف ما دام انا قاعد في بلدي مع أهلي باخد فلوس زي الفل .. ليه أتسحل و أتغرب و يطلع عين أهلي بره .. (رمضان صبحي) مثال صارخ علي ده .. من التشكيلة الأساسية اللي حتشوفها بتلعب في منتخب تركيا في اليورو دي حتلاقي فيهم 8 لاعيبه محترفين في دوريات أوروبا الخمسة الكبيرة وهم مش بس لاعيبه قاعدة علي الدكة في أنديتها .. بالعكس .. اللاعيبه دي أساسية في فرقها في أوروبا .. واحد من أهم لاعيبة المنتخب يبقي (يوسف يازيجي) وده يبقي جناح و صانع ألعاب فرقة ليل في الدوري الفرنسي و اللي بالمناسبة خدت الدوري الموسم ده من بين سنان باريس سانجيرمان وجابلهم الموسم ده 14 جون .. (جينغيز أوندير) لاعيب تاني حريف و صانع ألعاب محترم في فرقة ليستر سيتي في الدوري الإنجليزي .. هو صحيح حظة كان وحش في الإصابات الموسم ده بس حتشوفه وتحكم عليه بنفسك.
السبب الثالث هو العمود الفقري للمنتخب و اللي بيحلم بيه أي مدير فني .. أي فرقة كورة لازم يبقي ليها عمود فقري مستواه جامد زحليقة .. حارس مرمي مبيغلطش كتير .. لاعيب خط نص راسي في نص الملعب و هادي الكورة مش بتتقطع منه بسهولة .. لاعيب إرتكاز بيعرف يقطع الكورة كويس .. مهاجم مبيضيعش .. خلينا نبدأ من الأخر للأول .. المهاجم اللي مبيضيعش يبقي (بوراك يلمز) كابتن الفرقة و أكبر واحد فيها سناً و حيبقي عنده 36 سنة في يوليو الجاي .. بالمناسبة ده يبقي مهاجم فرقة ليل الفرنسية اللي برجع تاني أفكرك إنها بطلة الدوري الفرنسي الموسم ده و جابلهم 16 جون .. لاعيب خط النص اللي علي رأي (فاروق جعفر) أوسطي نص الملعب يبقي (هاكان تشالهان أوغلو) اللي بيلعب في نادي إيه سي ميلان .. ميلان اللي خد مركز ثاني في الدوري الإيطالي السنة دي .. ميلان اللي حيرجع يلعب تاني في Champions League .. و الله بعودة يا ميلان .. لاعيب الإرتكاز بتاعهم (أوكاي يوكوشلو) بيلعب في فرقة ويست بروميتش ألبيون في إنجلترا .. هي صحيح الفرقة نزلت دوري المظاليم و صحيح (أوكاي) مش (إنجولو كانتي N’Golo Kante) بس أهو إسمه محترف في الدوري الإنجليزي و بيلعب أساسي في فرقته.
السبب الرابع هو دفاع ميخرش المياه .. دفاع أجلي كلح مبيغلطش .. دفاع خلي تركيا في العشر ماتشات بتوع التصفيات تطلع ب8 كلين شيت وده في حد ذاته ريكورد يتحط في برواز و يتعلق علي الحيطة .. قلبين الدفاع واحد فيهم (كاجلار سويونكو) بتاع ليستر سيتي و الثاني يبقي (ميريش ديميرال) بتاع يوفينتوس .. الباك اليمين يبقي (زكي تشيليك) بتاع فرقة ليل و اللي بفكرك لثالث مرة إنه الباك اليمين الأساسي للفرقة اللي كسبت الدوري الفرنساوي الموسم ده .. وراهم في الجون بيقف (أوغركان شاكير) حارس مرمي فرقة طرابزون سبور واللي فعلياً يعتبر أحسن حارس مرمي في الدوري التركي السنة دي .. لعب 38 ماتش دخل فيه 36 جون.
السبب الخامس هو يمكن دي تبقي المرة اللي تركيا تعملها و تصحي من النوم في العسل اللي هي فيه بالنسبة للكرة الأوروبية .. تركيا دولة مش صغيرة .. بلد عايش فيها 80 مليون بني أدم .. بلد فيها دوري محلي جاحد .. هم وصلوا ثالث عالم في كاس عالم 2002 .. وصلوا نص النهائي لبطولة يورو 2008 .. دي بلد تقدر تبقي زيها زي إنجلترا و فرنسا و إيطاليا في الكرة الأوروبية .. يمكن السنة دي تبقي المرة اللي الأتراك يبصوا لنفسهم في المراية و يقولوا إن إحنا نكسب اليورو مش حاجة صعبة.
المصدر:
فيديو بعنوان The Case for Turkey-Euro Series نشر علي YouTube وده لينك الفيديو:
