كرواتيا أو الزمالك بتاعة أوروبا .. فرقة المركز الثاني أو الثالث علي حسب يعني .. لما بيتقال إسم كرواتيا كمرشح إنها تكسب اليورو دي فانت أول حاجة حترد عليا بيها هي إستهدي بالله في قلبك بس كده .. كرواتيا 2021 مش هي كرواتيا ثاني العالم في 2018 .. كرواتيا السنة دي فرقة مفيهاش (إيفان راكيتيتش Ivan Rakitic) لاعيب خط النص اللي دلوقتي بيلعب في إشبيلية .. كرواتيا حتلعب من غير البابا بتاع الأجلي (ماريو مانزوكيتش Mario Mandzukic) و حتي من غير حارس المرمي (دانييل سوباسيتش Daniel Subasic) .. يعني بتتكلم عن عمود فقري لمنتخب وصل لنهائي كاس عالم مش حيلعب في اليورو دي .. يبقي إزاي؟ .. بس النهارده حنتكلم عن الخمس أسباب اللي تخلينا نقول إن كرواتيا من الدول المرشحة إنها تكسب اليورو.
السبب الأول هو الحس الوطني .. كرواتيا متفرقش كتير عننا هنا في مصر و إسمحلي أفهمك .. كرواتيا بلد صغيرة تعداد سكانها يدوبك 4 مليون بني أدم .. صحيح هي في أوروبا و صحيح هي عضوة في الإتحاد الأوروبي بس الكروات لو بصيتلهم و دققت شوية حتلاقيهم نسخة من المصريين .. ملاعب تدريب علي مستوي عالي مش حتلاقي .. إستادات حديثة زي اللي موجودة في باقي أوروبا مفيش .. فساد رياضي من أول الأندية لحد إتحاد الكورة حتلاقي فساد إنما إيه أورجانيك .. سبحان الله نسخة من عندنا .. بس اللي بيخلي الكروات شبهنا فعلاً هو فكرة تحيا كرواتيا 3 مرات وهناك هم مش بيهزروا .. هم بيتكلموا جد .. دخل الكروات لبطولة مجمعة وحتلاقيهم عاملين قلق .. ثالث عالم في 1998 ودي كانت أول مشاركة ليهم في كاس العالم علي فكرة .. ثاني عالم في 2018 .. اللاعيبه الكروات بتاكل النجيلة عشان خاطر منتخبها ودي حاجة تخوف أي حد يلاعبهم.
السبب الثاني هو إن معروف إن الكروات مش بيذاكروا قبل إمتحان الفاينال .. عارف انت زميلك اللي طول السنة مقضياها صياعة و مرقعة ومش بيفتح كتاب بس تلاقيه بيجيب تقدير في إمتحان الفاينال؟ .. أهي دي كرواتيا .. في بطولة الدوري الأوروبي السنة دي إتداس علي وشهم من فرنسا و البرتغال .. في تصفيات كاس العالم 2022 اللي حيتلعب في قطر إن شاء الله خسروا من سلوفينيا .. بس ده الطبيعي من الكروات قبل أي بطولة .. تصفيات كاس العالم 2018 كانت عبارة عن فيلم رعب للكروات أحياناً كانوا مهددين إنهم ميوصلوش أصلاً .. و يمكن هنا بيجي وقت إني أتكلم عن المدير الفني الكرواتي (زلاتكو داليش Zlatco Dalic) .. (داليش) رجل هادي .. رجل قصير بس يحير .. هو اللي كان ماسك المنتخب في كاس العالم 2018 اللي فات و خد بيهم ثاني .. هو اللي كان مطلوب منه يعمل عمرة شاملة للمنتخب بعد ما الأسامي اللي قلت عليها في المقدمة إعتزلت اللعب الدولي .. هو اللي بني منتخب كرواتيا من الصفر و إتأهل لليورو أول مجموعته.
السبب الثالث هو البرنس (لوكا مودريتش Luka Modric) .. الرجل ده حيتحط في التاريخ كواحد من أوسطوات نص الملعب .. خدامك انا و العربية إنه كبر في السن .. علي راسي من فوق إنك تقول إن (مودريتش) دلوقتي وهو عنده 35 سنة مش هو (مودريتش) من 4 سنين لما خد الكرة الذهبية .. بس لو فكرت فيها شوية ريال مدريد السنة دي فرقة كانت بالضبط زي العربية اللي جايبه وش سلندر بس عرفت توصلك للساحل و ترجعك .. لولا (مودريتش) السنة دي مكنش ريال مدريد فضل ينافس علي الدوري لحد أخر ماتش و مكانش وصل نص نهائي Champions League .. (مودريتش) هو قلب منتخب كرواتيا .. هجوم تلاقي .. دفاع تلاقي .. شوط من بره ال18 موجود .. أسيستات موجود .. حط ده جنب معلومة إن دي أخر بطولة ليه يلعبها بتي شيرت منتخب كرواتيا مع السبب الأولاني اللي انا قلته عن إزاي الحس الوطني مهم عند الكروات و حتشوف بنفسك إزاي (مودريتش) حيخليك تتفرج عليه و تسقفله و تزعل إنك مش حتشوفه تاني بيلعب لمنتخب كرواتيا.
السبب الرابع هو الجيل الجديد .. (داليتش) مدرب كرواتيا بدأ يدخل للمنتخب دم جديد و الحقيقة إن اللاعيبه اللي هم ضمها للمنتخب مينفعش تقول عليها جيل جديد و تسكت .. دي لاعيبه شايله فرقها في أوروبا .. خد عندها مثلاً صانع الألعاب (نيكولا فلاسيتش Nicola Vlasic) .. هو عنده 23 سنة يعني مش صغير أوي و بيلعب في فرقة سيسكا موسكو في الدوري الروسي .. إيه المميز في كده؟ .. (فلاسيتش) بيلعب في فرقة تعتبر من فرق الرقص علي السلالم في روسيا اللي هي فرق مش بتنافس علي الدوري و رغم كده إختير السنة دي أحسن لاعب في الدوري الروسي بعد ما جاب 12 جون وده رقم حلو جداً للاعيب خط وسط .. مثال ثاني هو (جوزيب بريكلو Josip Brekalo) أهم لاعيب في فرقة وولفزبورج الألمانية و اللي هو اللاعيب اللي متعرفوش ملة .. بيعرف يلعب برجليه اليمين و الشمال .. بيعرف يلعب جناح يمين و شمال و صانع ألعاب تحت راس الحربة .. علي فكرة فيه كلام إن ليفربول عايزين يشتروه.
السبب الخامس هو الإنتقام .. قبل ما أكمل عايزك تبص علي جدول ماتشات اليورو .. مش دور المجموعات .. دور ال16 .. الأول من المجموعة بتاعة كرواتيا اللي فيها إنجلترا و سكوتلندا و التشيك حيلاعب الثاني من مجموعة الموت اللي فيها فرنسا و البرتغال و المانيا و المجر .. خدت بالك؟ .. لو كرواتيا إتاهلت عن مجموعتها ففيه فرصة كبيرة إنها تلاعب فرنسا في دور ال16 .. أنت مستوعب إزاي الكروات نفسهم ده يحصل؟
المصدر:
فيديو بعنوان The Case for Croatia-Euro Series نشر علي YouTube وده لينك الفيديو:
https://www.youtube.com/watch?v=mN-B9RFLR6Q
