لما المواطنين العرب الغلابة صحيوا علي خبر إن البحرين والإمارات وبعد كده انضمت ليهم السودان والمغرب مضوا اتفاقية سلام مع إسرائيل سموها اتفاقيات إبراهيم Abraham Accords يا عيني جالهم حالة من الصدمة وهم بيحاولوا يفهموا المنطق ورا الأمور .. ولا دولة من الدول العربية اللي مضيت علي الاتفاقية دي ضربت علي إسرائيل طلقة واحدة توحد ربنا في أي حرب مباشرة يبقي اتفاقية سلام إيه يا ولاد التيييت .. لما اتكلمت عن الموضوع ده في مقالة قديمة قلت إن الحاجة اللي خلت الاتفاقية دي تتمضي هي إن الإماراتيين كانوا شبطانين في تكنولوجيا السلاح اللي عند الإسرائيليين ومستعدين يعملوا أي حاجة عشان يحطوا ايدهم علي التكنولوجيا دي ويمكن أهم واحدة فيهم هي برنامج بيجاسوس Pegasus Software.
فيه شركة إسرائيلي اسمها NSO Group ودي شركة بتعمل برامج اختراق للكومبيوترات والشبكات .. هاكرز يعني .. أكتر برنامج عملوه وبيتباع هو بيجاسوس Pegasus وكلمة بيجاسوس دي علي فكرة يعني الحصان المجنح في الأساطير الإغريقية وأخص بالذكر هنا الإصدار الثالث من البرنامج Pegasus 3 .. البتاع ده بالذات الإماراتيين كانوا حيموتوا عليه لإنه يقدر يخترق أي موبايل وياخد نسخة من محتوياته من غير ما تحتاج الطريقة التقليدية للهاكرز إني ابعتلك ميل أو رسالة فيها لينك وبمجرد ما تتك علي اللينك ده موبايلك بيعمل Download للفيروس بتاعي وأقدر أخترقك .. ده بيخليه سلاح مهم أوي للترسانة بتاعة برنامج التجسس الإماراتي.
المفروض إن عشان شركة NSO Group تبيع أي برنامج هي بتعمله سواء بقي Pegasus أو غيره لأي دولة تانية فهي لازم تاخد موافقة الحكومة الإسرائيلية .. في حالة تعاون الشركة مع دول الخليج فالحكومة الإسرائيلية كانت هي السمسار بتاع الصفقة .. هي اللي جابت مسئولي الشركة والناس اللي ماسكة أجهزة المخابرات الخليجية قعدوهم مع بعض في اجتماعات فيه منها اتعمل في العاصمة الإسرائيلية تل أبيب عشان يتفقوا علي تفاصيل الصفقة .. في الاجتماعات دي بيتعمل Presentation لطيفة كده إن مسئولي NSO بيقولوا عشوائي كده لأي حد من اللي حاضرين من الجانب العربي اللي جاي يشتري هات تليفونك .. وقدام الناس كلها ممثلي NSO بيخترقوا الموبايل عشان بس يوروا الزبون هو Pegasus ده بيعمل إيه .. يُقال إن فيه عقد اتمضي بين NSO وبين دولة عربية قيمته وصلت 250 مليون دولار.
فيه صحفيين كتير لما جم ينخربوا أكتر ورا الصفقات دي لقوا إن قسم العقود بتاع شركة NSO Group لما بيجي يعمل عقد بيع برنامج Pegasus لأي دولة مش بيحط اسم الدولة في العقد .. كل دولة ليها اسم كودي بحيث الحرف الأول من اسم الدولة هو هو الحرف الأول من الاسم الكودي اللي لسبب ما يعني بيكونوا أسامي عربيات .. يعني مثلاً .. المملكة العربية السعودية عشان اسمها بالإنجليزي Saudi Arabia فاسمها الكودي عند شركة NSO Group هو سوبارو Subaru اللي هي شركة العربيات اليابانية .. البحرين اللي هي Bahrain بالإنجليزي اسمها الكودي BMW اللي شركة العربيات الألمانية .. الأردن اللي هي Jordan بالإنجليزي اسمها الكودي جاجوار Jaguar اللي هي شركة العربيات البريطانية .. بشوية نخربة كمان من الصحفيين عرفنا إن NSO Group باعت برامج تجسس لحكومات البحرين والسعودية وإماراتي أبوظبي ورأس الخيمة بس الشركة ممنوع تبيع أي حاجة لقطر عشان الحكومة الإسرائيلية مش راضية.
من ضمن الأوبشنز اللطيفة في برنامج Pegasus إن لنفترض إن أنا ناشط سياسي إماراتي والمخابرات الإماراتية شايفاني لسبب ما لا يعلمه إلا الله تهديد للأمن القومي فقالوا يخترقوا موبايلي ببرنامج Pegasus عشان يعرفوا أنا بهبب إيه في عيشتي .. لو حصل إني سافرت 5 دول اللي هم إسرائيل وإيران وروسيا والصين وأميركا فالبرنامج بشكل أوتوماتيكي بيعرف إني ركبت طيارة ونزلت في واحدة من الدول دي وبيعمل حاجة اسمها Suicide Mode إن البرنامج يمسح نفسه من علي موبايلي .. الحقيقة إن كل دولة من الخمسة وضعها مختلف .. يعني رغم إن NSO Group شركة إسرائيلي وباعت برنامج Pegasus للإمارات بموافقة الحكومة الإسرائيلية إلا أن قانوناً يعني دي جريمة وممكن لو النيابة مسكت الموبايل وفيه البرنامج ترفع قضية علي الشركة وعلي الحكومة .. سواء بقي أميركا أو الصين أو روسيا فالدول الثلاثة مش بتهزر في حكاية التجسس علي المواطنين علي أرضها وعشان كده إسرائيل مش عايزه مشاكل معاهم .. تبقي إيران اللي بيخافوا إن لو المخابرات الإيرانية حطت ايدها علي موبايلي وفيه البرنامج يفهموا منه سر الصنعة وتبقي مصيبة.
المصدر:
- مقالة بعنوان With Israel’s Encouragement, NSO Sold Spyware to the UAE and Other Gulf States نشرت في جريدة هاارتز Haaretz الإسرائيلية وده لينك المقالة الأصلية:
https://www.haaretz.com/middle-east-news/.premium-with-israel-s-encouragement-nso-sold-spyware-to-uae-and-other-gulf-states-1.9093465
