صعب تلاقي سلاح زي صواريخ توماهوك Tomahawk .. سبب إني بدأت كلامي بالجملة دي هو إنك لو جيت تفكر فيها كده ممكن تقولي إيه اللي يخليك تقول علي سلاح أيا كان هو إيه إنه سلاح جاحد؟ .. خلينا نفكر سوا وأقولك إنك محتاج تلاقي سلاح عامل زي التليفون المحمول كده اللي هو أول ما نزل كل الناس قالت أنا عايزة من ده يا حزمبل مع إنهم كانوا عايشين حياتهم بشكل طبيعي قبل ما ينزل السوق .. محتاج برده سلاح تكون فكرته بره الصندوق زي مثلاً البندقية اللي بالبارود اللي طلعت في عصر الناس كلها كانت بتحارب بالسيف والسهم .. الأهم إنك محتاج سلاح تقدر تجدد فيه وتطور فيه بسهولة ومش بتصرف عليه دم قلبك عشان تصنعه .. كل ده بيخليني أقول علي صواريخ توماهوك زي الست (روبي) بتقول ده في حتة تانية عندي.
خلينا نبدأ من الأول وهي فكرة إن يبقي عندك سلاح بمجرد ما ينزل السوق الناس كلها تجري عليه يا تشتريه يا تعمل زيه .. لو بصيت علي أي قوات مسلحة لبلد محترمة علي مستوي العالم لازم تلاقي عندهم صواريخ شبه توماهوك .. الصين .. روسيا .. فرنسا .. كوريا الجنوبية .. وغيرها وغيرها .. فيه منها اللي بيشتري الصواريخ الأمريكاني وفيه منها اللي بيصنع صواريخه بنفسه.
النقطة الثانية وهي إن يبقي عندك سلاح فكرته بره الصندوق .. في السبعينات لما شركة جينيرال دايناميكس General Dynamics صممت صواريخ توماهوك كان لو مشيت في الشارع جبت سيرة صاروخ فدماغ أي حد حتروح إنك بتتكلم عن حاجة بتطير بمحرك صاروخي Rocket Motor زي صواريخ الفضاء كده اللي هو حنجيب تانك أكسجين وتانك بنزين نحرقهم سوا عشان عادم الإنفجار اللي بيحصل جوه الصاروخ شبه اللي بيحصل جوه موتور عربيتك كده ناخده نمشيه علي حاجة إسمها Nozzle اللي هو نخنقه يعني عشان نزود سرعته ويحرك الصاروح لقدام .. ده معناه إنك بتتكلم عن حاجة بتطير علي إرتفاعات عالية و بسرعات عالية بتعدي ضعفين سرعة الصوت Mach 2 .. اللي هو بإختصار فعلاً صاروخ الفضاء.
اللي عمله المهندسين بتوع General Dynamics هو إنهم رموا الفكرة دي في الزبالة وشغلوا الصاروخ بمحرك طيارات عادي Turbojet Engine .. ده معناه إن لو أنا جيت قدامك جبت سيرة صواريخ توماهوك فإنت أول حاجة تفكر فيها هي الموتوسيكل .. الموتوسيكل بيتركب عليه موتور شبه مواتير العربيات بس الموتوسيكل بسم الله ما شاء الله بيجري .. ليه؟ .. عشان وزن الموتوسيكل أخف بكتير من وزن العربية .. فلما إنت تركب علي صاروخ توماهوك موتور طيارة فإنت كده خليته موتوسيكل طاير في الهواء .. زيه زي الطيارة بيقدر يطير علي إرتفاعات واطية جداً .. زيه زي الطيارة هو صحيح مش بيكسر حاجز سرعة الصوت بس سريع لإنه خفيف.
مهم تفهم إن صواريخ توماهوك لما نزلت كانت عكس كل حاجة إتكتبت في كتب هندسة الصواريخ وده اللي بيخليه سلاح في حتة تانية .. خد عندك الصواريخ المضادة للطيارات مثلاً .. دي صواريخ بتتصمم عشان تطير بسرعة عالية أوي عشان توقع الطيارة قبل ما الطيار يلحق يقول أحيه .. علي الناحية الثانية صواريخ توماهوك نسبياً بتطير علي مهلها بس بتقدر تفضل الجو مسافات طويلة فشخ عشان بيتركبلها موتور طيارة بيمشي علي الوقود السايل بس في نفس الوقت هو إقتصادي شوية مش حوت بنزين .. زود علي كده إن صواريخ توماهوك بتقدر تطير علي إرتفاعات واطية جداً فده بيخليها صعب تتلقط بالرادارات.
النقطة الثالثة وهي إن يبقي عندك سلاح تقدر تطوره بسهولة من غير ما يتخرب بيتك .. النسخة الأولي خالص من الصاروخ ده كان إسمها Block I وإتركبلها رأسين متفجرين واحد نووي والثاني إتصمم عشان يصطاد السفن .. النسخة الثانية Block II إتزود ليهم رأس متفجر ثالث ينفع تستخدمه ضد الأهداف البرية وده اللي حصل في حرب الخليج الثانية سنة 1991 اللي إنت ممكن تكون عارفها بإسم حرب تحرير الكويت .. النسخة الثالثة Block III إتركب للصاروخ تكنولوجيا GPS عشان كان زمان لما كنت بتضرب الصاروخ علي هدف ما لازم يبقي عندك فريق يشتغل أكتر من 80 ساعة عشان يكتب برنامج كومبيوتر فيه معادلات خطوط الطول ودواير العرض والإحداثيات وتضاريس الهدف اللي إنت حتضربه بس دلوقتي حاجة شبه Google Maps تقدر تستخدمه عشان توجه الصاروخ بمنتهي السهولة .. النقلة الكبيرة حصلت في النسخة الرابعة Block IV واللي لما نزل بقي ينفع بعد ما ضربت الصاروخ علي هدف وهو في نص السكة تقوم مخليه يغير إتجاهه عشان يضرب هدف تاني خالص وده عن طريق إن إتحطله Datalink اللي هو تقدر مجازاً يعني تسميه راوتر عشان يخليك تقدر تتحكم فيه عن بعد وكمان وجود Datalink خلاهم يركبوا عليه كاميرا بتقدر تنقل بث مباشر للهدف قبل تدميره.
النسخة الجديدة من صواريخ توماهوك Block V إتركبلها أنظمة تشويش علي الرادارات .. الفكرة إن صواريخ توماهوك عشان بتطير بسرعات أقل من سرعة الصوت فلو الصاروخ إتلقط برادار فبسهولة أوي صاروخ مضاد للصواريخ يوقعه .. إلا إذا إنت حميت صاروخ توماهوك إنه أساساً يتلقط .. النسخة الجديدة Block V حتنزل بإصدارين اللي هم Block Va و Block Vb:
- صاروخ Tomahawk Block Va ده بمنتهي البساطة صاروخ مضاد للسفن .. إيه المختلف فيه؟ .. السفينة جسم متحرك بس لو حتضرب مثلاً مقر وزارة الدفاع لدولة معادية فده هدف ثابت في مكانه .. الصواريخ المضادة للسفن بيتركبلها Seeker Kit ودي عبارة عن حساس Sensor بيجري ورا السفن اللي هي جسم متحرك .. الإضافة دي إنت مش محتاجها في الصواريخ اللي بتضرب أهداف برية ثابتة في مكانها.
- صاروخ Tomahawk Block Vb وده صاروخ بيتسخدم ضد الأهداف البرية.
نقطة أخيرة وهي نقطة إن التطوير نفسه ميكلفكش حاجة .. النسخ الأولانية من صواريخ توماهوك لحد Block IV كانت بتحتاج منصات إطلاق مخصوصة .. دلوقتي نسخ Block V تقدر تضربها من أي منصة إطلاق في أي سفينة .. ده معناه إن لو عندك مدمرة بتقدر تشيل ما بين 90-96 منصة إطلاق فانت زمان كنت محتاج تقسمهم شوية لصواريخ توماهوك و الباقي لصواريخ تانية بس دلوقتي لا .. التوفير ده بفلوس .. ده زي ما قلت في الأول بيحط صواريخ توماهوك في حتة تانية خالص.
المصدر:
- مقالة بعنوان This is Not Your Father’s Tomahawk Cruise Missile نشرت في مجلة Popular Mechanics وده لينك المقالة الأصلية:
https://www.popularmechanics.com/military/weapons/a34979788/new-block-v-tomahawk-cruise-missile/
