الديون الصينية لأفريقيا .. خراب بيوت مستعجل.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/m4a-4

أفريقيا عندها مصيبة سودا هي إنها مديونة لشوشتها .. قبل ما أبدأ أشاورلك علي حد تلومه وتسبله مية ملة فخليني الأول أفهمك حجم المصيبة اللي دول أفريقيا فيها وبعد كده نبقي نشوف نلوم مين وإيه الحلول .. خليني أرصلك شوية نقط ورا بعضها تفهم منها هي المشكلة إيه بالضبط:

• حوالي 40% من الدول الأفريقية اللي موجودة جنوب الصحراء الكبري اللي هي الدول الأفريقية غير دول شمال أفريقيا يعني غير الدول العربية اللي إحنا عارفينها اللي هم مصر وليبيا وتونس والجزائر والمغرب وموريتانيا .. 40 % من الدول دي معرضة في أي لحظة إنك تصحي الصبح تسمع في الأخبار إنها فلست لإنها بقت مديونة ومش عارفه تسدد الفلوس اللي عليها والكلام ده بناء علي تقرير طلع من معهد تطوير ما وراء البحار Overseas Development institute.
• صندوق النقد الدولي International Monetary Fund أو IMF إختصاراً رأيه إن كتير من الدول الأفريقية ماشية في سكة اللي يروح ميرجعش وإنها في الأخر حتلاقي نفسها في New Debt Crises يعني أزمة ديون جديدة لإن خلال ال5 سنين اللي فاتوا عدد الدول اللي زي ما الOverseas Development institute بيسميها دول مُعرضه إنها بكره الصبح تفلس زاد بنسبة 100%.
• لو جيت تحسب الديون الخارجية المستحقة علي الدول الأفريقية كلها علي بعضها شاكب راكب حتلاقي نفسك بتتكلم عن 417 مليار دولار .. أهو 20% من الفلوس دي كلها المفروض تروح للصين لإن علي حسب رأي منظمة خيرية زي Jubilee Debt Campaign اللي بتشجع لفكرة إلغاء الديون الخارجية علي الدول الأفريقية إن الصين هي أكتر دولة في العالم مسلفة الدول الأفريقية فلوس .. مع العلم إن إجمالي الفلوس اللي سلفتها الصين لدول العالم خلال الفترة من 2016  لحد 2017 كان 132 مليار دولار .. يعني بحسبة بسيطة أوي 63% من إجمالي الفلوس اللي الصين سلفتها لدول العالم راح لدول أفريقيا.
• فاكر لما قلتلك إن إجمالي الديون الخارجية المستحقة علي الدول الأفريقية هو 417 مليار دولار وإن 20% من الفلوس دي جايه من الصين؟ .. أهو 35% من باقي الفلوس جاي من هيئات دولية زي صندوق النقد الدولي والبنك الدولي .. أما ال32%  الباقيين فجايين من رجال أعمال أو شركات.
• سنة 2015 فيه هيئة إسمها مبادرة الأبحاث الأفريقية الصينية China-Africa Research Initiative وإختصاراً بتتسمي CARI .. المهم إن الناس دول قالوا إن فيه 17 دولة أفريقية مديونة للصين ومش عارفين يسددوا لدرجة إن الصين لو حبت ممكن تشتري ال17 دولة دي .. إنت متخيل يعني إيه دولة تبقي مديونة لدولة ومش عارفه تسدد لدرجة إن الحل يبقي إن الدولة المديونة تتباع؟ .. من ال17 دولة دول فيه منهم 3 دول حالتهم تصعب علي الكافر اللي هم جيبوتي (ودي دولة عربية بالمناسبة) وجمهورية الكونجو الديموقراطية وزامبيا .. عشان بس أحطك في الصورة .. سنة 2017 جم حسبوا إجمالي الديون الخارجية المستحقة علي زامبيا لقوها 8.7 مليار دولار منهم 6.4 مليار دولار المفروض يتدفعوا للصين .. جيبوتي أكتر من 77% من ديونها الخارجية المفروض تتدفع للصين  .. وأما جمهورية الكونغو الديموقراطية فهي المفروض إنها تسدد للصين ديون ب7 مليار دولار.

نيجي بقي للسؤال المهم .. مين اللي أكل الجبنة؟ .. مين السبب ورا كل المصايب دي كلها؟ .. أظن باين من النقط اللي رصتها قدامك إنها الصين .. الفكرة إن الصين بتعمل مشاريع بنية تحتية Infrastructure كتير جداً ومكلفة جداً في أفريقيا وعمالة تزود في الديون المستحقة علي الدول الأفريقية دي .. بس أظن عشان أبقي إلي حد ما محايد لازم أسأل هو هل فعلاً الصين وحشة ولا الصين حلوة؟ علي رأي (جابر الشرقاوي) في فيلم سور الصين العظيم .. الحقيقة إن الإجابة علي السؤال ده تعتمد علي هو إنت بتسأل مين؟ .. حط نفسك مكان الدول الأفريقية .. أنا إيه اللي يخليني عشان أخد قرض من صندوق النقد الدولي أو البنك الدولي أو حتي نادي باريس اللي هم 20 دولة غنية مش معاهم الصين بيسلفوا الدول الفقيرة فلوس ويفضلوا يتشرطوا عليا بإني لازم أعوم العملة بتاعتي وأرفع الدعم الحكومي وأخفض عدد الموظفين زي ما الشروط بتاعة القرض أبو 20 مليار دولار اللي أخدناه من صندوق النقد الدولي ومكفر عيشتنا وعيشة عيالنا؟ .. طب ما أروح أخد قرض من الصين والصينيين لا بيشترطوا ولا بيجبروك تدفع في معاد معين ولو إتزنقت يقولك سدد حين ميسرة .. لو رحت سألت أميركا مثلاً تقولك اللي بتعمله الصين ده غلط .. أول السنة دي كان وزير الخارجية الأميريكي السابق (ريكس تيليرسون Rex Tillerson) في زيارة للصين وقال إن نظام القروض الصيني ده بيعلم الدول الأفريقية الإستهبال والإستعباط وبيشجع علي الفساد وبيجيب إسهال وقيء و حاجات كتير كده.

طبعاً الصينيين لما تيجي تسألهم يقولوا والمصحف ما أنا ده أنا جاي أساعد الدول الأفريقية وإن المشاريع اللي بتتعمل دي بتنهض بقدرات الإقتصاد بتاع الدول الأفريقية .. اللي يغيظك إن أكتر حد دافع عن الصين ضد إتهامات (ريكس تيليرسون) كانت الدول الأفريقية نفسها اللي وصفت الصين بإنها زيها زي أي دولة غنية بتسلف الدول الفقيرة فلوس في مقابل نشر نفوذها .. المشكلة اللي محدش بيتكلم عنها وسط الخناقة دي إن الدول الأفريقية مش بس فقيرة دي معندهاش القدرة إنها تعتمد علي نفسها وطول ما هي محتاجة مساعدة من بره حيجي الصين وغير الصين يستغلوا ده .. عارف لو مشاريع البنية التحتية اللي بتتعمل في أفريقيا دي بتمويل صيني بتقوم بيها شركات مقاولات وإستشارات هندسية أفريقية كنت قلت ماشي .. بس المشروع من أوله لأخره بتعمله شركات صينية وعشان كده أنا رأيي إن الصين مش حلوة زي ما أميركا مش حلوة وأي حد بيسلف حد فلوس بفايدة أو بإشتراطات معينة مش حلو.

المصدر:

• مقالة بعنوان Reality check: Is China burdening Africa with debt? .. صحصح للواقع: هل الصين بتحمل علي كتاف أفريقيا بديون؟ .. نشرت في موقع هيئة الإذاعة البريطانية BBC وده لينك المقالة الأصلية:
  https://www.bbc.com/news/world-africa-45916060