حقاً و صدقاً العشر سنين الجايين هم أهم عشر سنين يعدوا علي البشر من اليوم اللي ربنا خلق فيها سيدنا (أدم) عليه السلام و السبب في إني بقول كده هو إن البشر خلال السنين الجايه دي حيواجههوا أهم عدو في تاريخهم .. عدو أخطر من الإرهاب .. عدو أخطر من العنصرية .. عدو أخطر حتي من الصراعات الدينية .. العدو ده هو التقلبات المناخية أو Climate Change و مشكلة العدو ده إن مواجهته بتكلف فلوس كتير .. كتير فشخ .. و عشان كده الدول اللي مش عايزه تصرف مليم واحد عشان تحارب العدو ده بتقرر تلجأ للإستراتيجية اللي أي رجل متجوز بيروحلها لما حاجة في البيت بتبوظ .. بيتجاهل إنها باظت.
مشكلة التغييرات المناخية أو Climate Change عامل زي التراكمات بتاعة الحياة الزوجية كده .. إنت ممكن إنت و مراتك تلاقوا إن كان عندكوا مشاكل و تروحوا لأخصائي علاقات زوجية و تبدأ تشتغل علي نفسك بس مع أول خناقة جديدة التراكمات القديمة بتظهر تاني .. إنت ممكن كبلد تقرر إنك تدوس جامد في سكة Green Buildings و العربيات اللي بالكهرباء و تحط عقوبات قاسية جداً علي المصانع اللي مش بتحترم كم الإنبعاثات المسموح بيها من غاز ثاني أكسيد الكربون بس حتفضل كمية ثاني أكسيد الكربون اللي إحنا كبشر طلقناها في الهواء هي التراكمات اللي حتخرب بيتنا .. إحنا كبشر كل سنة بنرمي في الهواء الجوي 37 مليار متر مكعب ثاني أكسيد كربون .. التراكمات دي هي السبب في الإرتفاع اللي مش عايز يقف في درجات حرارة سطح الأرض و اللي هي برده السبب في معدلات ذوبان الثلوج بتاعة القطبين الشمالي و الجنوبي و اللي بناء عليه المدن الساحلية و من ضمنها ساحل مصر علي البحر المتوسط معرض إنه يغرق .. التراكمات دي هي اللي خلت الأمم المتحدة تقول في خطتها لمواجهة التقلبات المناخية اللي إتسمت Intergovernmental Panel on Climate Change أو IPCC إن البشر محتاجين يصرفوا فلوس علي تكنولوجيا جديدة إسمها Carbon Capture ودي بمنتهي البساطة إنك تشفط غاز ثاني أكسيد الكربون من الهواء.
كنا إتكلمنا قبل كده عن شركة Climeworks ودي واحدة من الشركات اللي شغالة في البيزنس ده بس هي الفكرة إن شفط ثاني أكسيد الكربون سهل .. المشكلة إنت حتعمل بيه إيه بعد ما تشفطه؟ .. فيه ناس قالت إحنا بعد ما نشفطه نحقنه تاني في باطن الأرض بس مشكلة الطريقة دي إن إحتمال يحصل تسريب في شبكة المواسير بتاعتك و ساعتها زي ما إحنا بنقول جيت تكحلها عميتها .. ناس تانية قالت إحنا بعد ما نشفطه نحوله لوقود بس في الحالة دي إنت كأنك بتنفخ في قربة مخرومة لإن ثاني أكسيد الكربون اللي بتشفطه حتروح تحرقه تاني .. ناس تالته ودي بتقول فكرة حلوة أوي هي إنها غاز ثاني أكسيد الكربون اللي بيشفطوه ده يحولوه لحجر جيري أو Limestone و الحجر ده إنت ممكن تاخده تستخدمه في كذا حاجة.
عندك ممكن تبني بيه بيوت .. الناس بتوع صيدلة بيستخدموه في الصناعات الدوائية .. ممكن كمان مع إرتفاع مستوي سطح البحر الأرض اللي بتتدفن تحت المياه تعوضها بإنها تكب مكانها حجر جيري .. بس خلي بالك إنت فيه عندك مشكلتين في تكنولوجيا Carbon Capture:
- المشكلة الأولانية إن إنت كمية الحجر الجيري اللي إنت حتنتجها خزعبلية وعشان بس تتحط في الصورة تخيل إنك قدرت تشفط كل كمية غاز ثاني أكسيد الكربون اللي إحنا كبشر بنطلقها في الجو خلال سنة كاملة فالكمية دي حتعملك 100 مليار طن حجر جيري .. إنت متخيل الكمية؟
- ثاني مشكلة هي التكلفة .. أقل التوقعات بتقول إن قصاد كل طن غاز ثاني أكسيد كربون إنت حتشفطه فإنت حتدفع قصاده 250 دولار و ده ثمن الكهرباء اللي حتشغل الشفاطات بس أيا كان بقي الكهرباء دي إنت جايبها منين سواء من مصدر طاقة متجددة زي محطة طاقة شمسية أو واخدها من الشبكة القومية للبلد.
المصادر:
- مقالة بعنوان The plan to cuck CO2 out of the atmosphere and use it to rebuild Earth’s coasts نشرت في موقع Digital Trends وده لينك المقالة الأصلية:
https://www.digitaltrends.com/features/carbon-capture-limestone/ - مقالة بعنوان Climeworks wants to clean the atmosphere with a fleet of building-sized vacuums نشرت في موقع Digital Trends وده لينك المقالة الأصلية:
https://www.digitaltrends.com/cool-tech/climeworks-carbon-capture-technology/
