جوارديولا و بايرن ميونيخ .. هل هو فشل ولا هل هو قسمة و نصيب؟

لينك التسجيل الصوتي للمقالة علي ساوند كلاود:
https://on.soundcloud.com/jUhmZ

فيه مصطلح بيسموه Paradox و ده بالعربي معناه المفارقة بس فعلياً يعني هو له معني تاني اللي هو لو مثلاً يعني إنت رجل معاك فلوس و جه فرح بنتك و قررت في فرحها إنك تعمل أوبين بوفيه عشان تتفشخر بيه قدام الناس فتقرر تجيب الشيف (شربيني) عشان يعملك الأكل .. فعلياً إنت عملت كل حاجة مطلوب منك إنها تعملها .. صرفت و كلفت في الأكل .. جبت شيف فاهم هو بيعمل إيه .. و شوف يا أخي رغم كل الحاجات الصح اللي إنت عملتها دي الناس تطلع متضايقة إن الأكل وحش و ميتاكلش .. هي دي اللي بيتقال عليها المفارقة .. الParadox إنك تعمل كل حاجة زي الكتاب ما بيقول و في الأخر برده تلبس في الحيط .. اللي عملته إدارة بايرن ميونيخ لما قررت تجيب (بيب جوارديولا Pep Guardiola) كمدير فني للفرقة هو مثال صارخ للحكاية دي.

في يناير 2013 الناس صحيت علي خبر إن (جوارديولا) حيمسك البايرن و من اليوم الأول و إحنا كناس بتتفرج علي كرة قدم كنا فاهمين ده معناه إيه .. البايرن عايز يكسب بطولة دوري أبطال أوروبا أو Champions League بس عشان مشجعي الكرة و أنا منهم عندنا داء إبن ستين كلب إن إحنا عندنا ذاكرة السمكة و مش بنفتكر تفاصيل صغيرة بتبقي مهمة جداً في إننا نفهم اللي بيحصل .. ده غالباً سببه إن ماتشات الكرة بتيجي ورا بعضها بشكل بقي صعب علينا إننا نبقي فاكرين هو مين لاعب مين إمتي و الماتش خلص كام كام .. المهم خليني أفكرك بشوية نقط .. صحيح إن (جوارديولا) إتعين في 2013 بس قبل ما يجي البايرن النادي كان فعلياً و حقاً و صدقاً و من غير تريقة كان عامل زي المرجيحة يوم تحت و فوق:

• البايرن خسر الدوري قصاد بروسيا دورتموند موسمين ورا بعض اللي هم 2011-2012 و كمان 2012-2013 ده معناه إن في أخر 4 سنين قبل ما (جوارديولا) يتعين النادي كسب الدوري سنة واحدة بس منهم .. حفكرك معلش .. موسم 2009-2010 اللي خد الدوري كان وولفسبورج لو تفتكر في واحدة من المفاجأت اللي بتحصل في العمر مرة .. موسم 2010-2011 البايرن خد الدوري .. الموسمين اللي بعد كده كانوا من نصيب بروسيا .. ياااه علي الزمن أيام ما كان البونديزليجا فيه تنافس.
• البايرن خد Champions League في 2001 بعد كده تاهت منهم متفهمش إيه اللي حصل لحد ما في 2012 وصلوا النهائي علي أرضهم و علي ملعبهم أليانز أرينا و خسروا النهائي قصاد تشيلسي اللي هو حاجة في منتهي النكد يعني.
• أهو شفت كل الفشل ده .. شفت كل المصايب دي .. متفهمش إزاي كل ده إختفي في موسم 2013-2014 اللي هو الموسم اللي قبل ما (جوارديولا) يمسك علي طول لما المدير الفني المؤقت العجوز (يوب هينكيس Jupp Heynckes) خد بيهم الثلاثية و مش بس الثلاثية .. الدوري خده بفرق 25 نقطة .. البايرن في الموسم ده كانوا بيدوسوا علي وش أي حد .. فرقة زي دي جبتلها مدير فني المفروض يعني إنه الفيلسوف .. البروفيسور .. أبوالعريف اللي مجابتوش ولادة .. أكيد النتيجة حتكون بوووووووووم في وشنا كلنا .. صح؟ .. صح؟

خدامك أنا و العربية إن بايرن (جوارديولا) كانوا جامدين زحليقة في الدوري:

بس رغم كده بيتقال البق الحمضان اللي كلنا عارفينه .. ما ده الطبيعي .. أرقام البايرن لوحدها مرعبة .. من سنة 1969لحد ما (جوارديولا) مسك البايرين يعني بتتكلم عن فترة 44 سنة هم خدوا الدوري في 30 منهم  .. بالنسبة للبايرن فالبونديزليجا أو الدوري الألماني هي زي العلاقة الغريبة بين الأهلي و الدوري المصري اللي هو كله في الأول يعيش الحلم و في الأخر الأهلي بياخد الدوري برده .. ده معناه إن طبيعي و منطقي و لازم إن (جوارديولا) ياخد الدوري في أول سنة ليه .. إنك تكسب الدوري مع البايرن مش إنجاز ده زي إنك تكون بتشتغل في شركة و في أول سنة ليك تيجي في معادك و تمشي في معادك .. صحيح إنه في أول موسم ليه خد الدوري بعد الماتش 27 بس علماً بإن الدوري الألماني فيه 18 فرقة يعني بيتلعب في السيزون الواحد 34 ماتش .. يعني كان لسه فيه 7 ماتشات حيتلعبوا يعني 21 نقطة و كان البايرن حسم الدوري.

الفكرة مش بس النتايج قد ما كانت الطريقة كمان .. طول عمر البايرن بيلعب بطريقة 4-2-3-1 فجه الفيلسوف قالك زي الفنان (محمد صبحي) في مسرحية كارمن لما كان له تصور تاني خااااالص عن اللي المفروض يحصل .. الفرقة بقت بتلعب بطريقة 4-3-3 و اللي عشان يلعب بيها جاب (ماريو جوتزه Mario Gotze) الله يمسيه بالخير من بروسيا دورتموند و (ثياجو ألكانتارا Thiago Alcantara) من برشلونة .. شوية و الفيلسوف بدأت صوابعه تلعب في الفرقة و لقينا (فيليب لام Philip Lahm) بيلعب إرتكاز و حاجة في منتهي السحر و الشعوذة بس في أخر السيزون الأول ليه خد الدوري و الكاس.

في الموسم الثاني كذا حاجة إتغيرت .. صحيح البايرن خد الدوري لكن كان هو الدوري بس و مخادوش الكاس و حتي خدوا الدوري بفرق 10 نقط بس عن وولفسبورج اللي كان في المركز الثاني .. تاني حاجة إتغيرت إن (روبيرت لوفندوفسكي Robert Lewandowski) حصّل (ماريو جوتزه) في إنه يهرب من مركز شباب بروسيا دورتموند و جه بايرن ميونيخ عشان يشم ريحة البطولات .. تالت حاجة إن إكسلانس الكرة الألمانية (توني كروس Toni Kroos) راح ريال مدريد و جه مكانه إبن الناس (تشافي ألونسو Xavi Alonso).

في الموسم الثالث رجعت ريما لعادتها القديمة و البايرن خد الدوري و الكاس بفرق 10 نقط برده عن بروسيا دورتموند المرة دي .. ده الموسم اللي (باستيان شفاينشتايجر Bastian Schwinsteiger) قرر ينتحر كروياً لما راح مانشستر يونايتد و كان لسه عنده 30 سنة .. ده الموسم اللي الألمان بصوا لبعض و ضربوا كف علي كف و هم شايفين (أروترو فيدال Arturo Vidal) و (دوجلاس كوستا Douglas Costa) بيجوا النادي و بيسألوا نفسهم مين البلطجية دول إحنا مش متعودين علي كده .. و ده برده الموسم اللي إتولدت فيه أسطورة (جوشوا كيميتش Joshua Kimmich).

علي الناحية الثانية البايرن شال زلط في أوروبا:

روح لأي نادي في أوروبا دلوقتي سواء كان ريال مدريد أو ليفربول أو باريس سانجيرمان أو أي فرقة تعجبك و روح لرئيس النادي إسأله لو إنت عينت مدير فني قدر يوصل بالفرقة لنص نهائي Champions League ل3 سنين ورا بعض فهل حتعتبر ده فشل ولا حتعتبره نجاح و كتير منهم حيقولوا طب هاته إنت بس المدير الفني اللي يعمل كده و ملكش دعوة .. هي الفكرة كلها إن (جوارديولا) ورث فرقة لسه كاسبة Champions League فطبيعي إن التارجيت اللي هو يتعين عشانه إنه يكسب البطولة تاني و تالت و رابع .. اللي حصل العكس تماماً:

• في أول موسم ليه شال من ريال مدريد 5-0 في مجموع ماتشين الذهاب و العودة و كانت فضيحة الصراحة.
• في الموسم الثاني وقع في سكة برشلونة أيام الثلاثي MSN و اللي لو إنت جديد في التشجيع فكان خط هجوم برشلونة وقتها بيتكون من (ليونيل ميسي Lionel Messi) و (نايمار Neymar) و (لويس سواريز Luis Suarez) .. يقوم الجهبز العلامة يعمل إيه؟ يلعب ب3 قلوب دفاع مش 4 زي الناس العاقلين و برشلونة داس علي وش بايرن ميونيخ 3-0 .. في ماتش العودة صحيح البايرن كسب 3-2 بس كانت نتيجة ملهاش معني.
• في الموسم الثالث كان ماتش قصاد مخترعي الكلاحة و الأجلي فوتبول الحديثة اللي هم أتليتيكو مدريد بقيادة كبير الكلحين (دييجو سيميوني Diego Simeone) .. ماتش الذهاب في مدريد خلص 1-0 لأتليتيكو و العودة في أليانز أرينا خلص 2-1 لبايرن ميونيخ بس قاعدة الجون بجونين هي اللي خلت أتليتكو مدريد يوصل للنهائي.

ال3 سنين اللي قضاهم (جوارديولا) في بايرن ميونيخ هم مثال صارخ لفكرة الParadox اللي أنا شخصياً بحب أسميها إن كل شيء قسمة و نصيب .. إنت ممكن تعمل اللي عليك بس في الأخر برده الدنيا متمشيش زي ما إنت عايز بس هو فيه نقطة .. مش يمكن تعيين (جوارديولا) كان أصلاً غلط؟ .. إنت جايب رجل بيحب يلعب بطريقة معينة عشان يمسك فرقة بتلعب بطريقة تانية خالص و ناجحة جداً فيها و بتجيب بيها بطولات .. فليه تقرر تزاول نفسك؟ .. ده قصاد إن (جوارديولا) جاب 3 بطولات دوري و بطولتين كاس في 3 سنين و من ساعتها علي فكرة و البايرن عمال يكسب الدوري بقاله 8 سنين أهو لحد دلوقتي .. مع العلم برده إن قبل ما (جوارديولا) يجي البايرن كان بقاله 4 سنين مش عارف ينيم ألمانيا من المغرب زي زمان .. هل ده معناه إنك تقول علي الفترة اللي هو قضاها مع البايرن إنها ناجحة؟

اللي أنا شايفه إن (جوارديولا) بيعرف يبني فرق شاطرة أوي إنها تكسب دوري .. هو عمل ده مع برشلونة و عمله ما البايرن و بيعمله مع السيتي .. مانشسيتر سيتي تحت إيده فعلاً بقت فرقة سعرانة .. بس ده في الدوري .. في Champions League بقي الموضوع مختلف حبتين .. بسبب فزلكته في الوقت اللي مينفعش يتفزلك فيه هو طلع من 3 نص نهائي Champions League ورا بعض مع البايرن .. بسبب إن صوابعه بتلعب في اللي مينفعش يتلعب فيه هو خسر النهائي قصاد تشيلسي لما قرر ميلعبش لا ب(رودري Rodri) ولا (فيرناندينيو Fernandinho) كلاعيبه إرتكاز قصاد (إنجولو كانتي N’Golo Kante) .. يبقي السؤال اللي أنا الحقيقة مش عارف أجاوب عليه .. هو يا تري زين الهابدين بن (جوارديولا) حيبطل فزلكة مع السيتي السيزون ده و ياخد بيهم Champions League مع العلم إني شايف إن السيتي السنة دي هم فعلاً أحسن فرقة في العالم؟ .. الله أعلم.

المصدر:

مقالة بعنوان The Guardiola Paradox: Analyzing Pep’s Glorious Bayern Munich Failure نشرت في موقع Planet Football و ده لينك المقالة الأصلية:
https://www.planetfootball.com/in-depth/the-guardiola-paradox-analysing-peps-glorious-bayern-munich-failure/