تخيل فرقة زي الإتحاد السكندري مثلاً عشان أنا إسكندراني فبحب الفرقة دي جت قالتلك إحنا عندنا خطة حنمشي عليها عشان هدفنا نلعب في بطولة الChampions League اللي هي دوري أبطال أفريقيا .. عارفينها البطولة اللي الأهلي زي ما يكون مهكرها دي؟ .. تفتكروا فيه كام واحد حيضحك علي إدارة الإتحاد؟ .. فيه ناس حتقولهم الجملة الشهيرة بتاعة الفنان (محمود عبدالعزيز) الله يرحمه الجرأة حلوة مفيش كلام .. بس فعلياً علي الأرض وفي الواقع بتاعنا فيه إحتمال كام فيه المية إن الإتحاد السكندري يحقق الحلم ده؟ والله لو ينفع النسبة المئوية تبقي بالسالب كنت قلت .. أهو ده بالضبط اللي عملته فرقة في إنجلترا إسمها وولفرهامبتون وونديررز Wolverhampton Wonderers اللي هم إختصاراً بيتسموا وولفز Wolves .. دي فرقة صعدت سنة 2019 للدوري الممتاز الإنجليزي اللي بنسميه بريمييرلييج Premier League ودي فرقة محدش عارف عنها حاجة ومحدش بيجيب سيرتها إلا لما يلعبوا ضد ليفربول ولازم (محمد صلاح) يجيب جون فيهم عشان لما تقعد مع صحابك في القهوة تقولهم الفرقة اللي (صلاح) جاب فيهم جون إمبارح .. بالنسبة لينا كمتابعين مصريين وعرب لPremier League ففرقة زي وولفز Wolves دي تعتبر فرقة من فرق تحت بير السلم .. فرق بتلعب عشان يدوبك تفضل في الدوري ومتهبطش درجة ثانية … تقوم تيجي تقولي إن إنت عندك خطة مدتها سبع سنين عشان تكسبوا الPremier League .. إنت عبيط يلا؟
طب أزيدك من الشعر بيت .. الإخوة بتوع وولفز بيقولوا إن خطتهم إن موسم 2019 اللي هم لسه صاعدين فيه إن شاء الله يخلصوا الموسم ضمن العشر فرق الأوائل مع العلم إن الفرقة دي ملعبتش في الدوري الممتاز من موسم 2011-2012 .. عشان بس أحطك في الصورة .. تاريخ فرقة وولفز في الدوري بيقول إنهم لعبوا في الدوري الممتاز الإنجليزي بصورته الحالية 4 مواسم نتايجهم كانت الأخير وال17 وال15 والأخير .. فإنت كأنك جاي تقولي إن طالب في الكلية طول عمره بيطلع حصالة دفعته عايز في سنة رابعة يطلع الأول .. تاني الطموح حلو بس تاريخك ميقولش إنك تقدر .. علي فكرة أنا مخلصتش أو هم مخلصوش .. هم بيقولوا إن خلال 5 سنين هم عايزين النادي يبقي من الأندية الإنجليزية اللي بتلعب في Champions League .. برده عشان أحطك في الصورة .. أخر مرة نادي وولفز شم اللعب في بطولة أوروبية كان في موسم 1980-1981 يعني قبل ما أنا أتولد ب8 سنين وطلعوا من الدور الأول من بطولة كأس الكؤوس الأوروبية من فرقة بي إس في إيندهوفين الهولندية .. المرة اللي قبلها اللي فرقة وولفز تلعب في أوروبا كان في موسم 1959-1960 لما كسبوا فرقة فورفارتز برلين Vorwarts Berlin اللي معرفش دي لسه عايشة ولا ماتت ولا إيه ظروفها وكسبوا فرقة ريد ستار بلجراد الصربية وبعد كده لعبوا قصاد برشلونة في ربع النهائي خسروا منهم 9-2 .. اه بالمناسبة في الموسم ده اللي هو 1959-1960 كان أخر موسم ليهم يكسبوا فيه الدوري الإنجليزي ويشاء القدر يعني إنهم إن شاء الله بعد 7 سنين من دلوقتي عايزين يكسبوه تاني.
طيب تعالوا نتكلم جد شوية .. لو إفترضنا إن فعلاً علي سنة 2025 فرقة وولفز بقت قوية بما يكفي إنها تنافس علي لقب الدوري الإنجليزي فهل إنت متخيل السباق حيبقي عامل إزاي؟ .. مانشستر سيتي ومانشستر يونايتد وليفربول وتوتنهام وأرسنال وإحتمال إيفرتون ودلوقتي وولفز .. أرجع وأسأل إنت متخيل السباق حيبقي عامل إزاي؟ .. فيه ناس بتقول إنت إيه الهري اللي بتقوله ده؟ .. الدوري الإنجليزي لسنين قدام حيفضل في إيد مانشستر سيتي وإحتمال كبير يكسروا حاجز ال100 نقطة في الدوري الموسم ده كمان زي ما عملوها الموسم اللي قبله .. بس تعالي نفترض إن الوضع حيبقي زي ما أنا متخيله .. مجرد إفتراض .. كده الدوري الإنجليزي رايح في سكة إن أي حد يقدر ياخده .. خلال ال26 سنة اللي فاتوا من ساعة ما الPremier League بشكله اللي إنت بتتفرج عليه دلوقتي إتعمل سنة 1992 أول 3 مراكز في الدوري راحوا ل13 نادي مختلف من ضمنهم أندية شبهتها بأندية بير السلم زي نورويتش ونوتنينجهام فوريست ولييسترسيتي .. علي الناحيه الثانية في أخر 26 سنة من النسخة القديمة من الدوري الإنجليزي حتلاقي إن أول 3 مراكز خدهم 19 نادي .. طب إيه الفرق بين النسختين؟
الفرق يا سيدي إن في النسخة القديمة من الدوري الإنجليزي إنت ممكن تبقي قاعد في أمان الله هوبا تسمع عن نادي محدش عارف هو جه منين يقولك ده خد الدوري السنة دي وبعد كده الفرقة دي متشوفش وشها تاني ومتفهمش بتروح فين .. في الفترة من 1983 لحد 1991 مثلاً فيه أندية زي ساوثهامبتون وواتفورد وكريستال بالاس اللي هم أسامي إلي حد ما ماسكه نفسها دلوقتي بس زمان في الفترة اللي بكلمك عنها لما واحد فيهم يوصل لواحد من المراكز الثلاثة الأولي بيبقي فرح وبيبقي حدث تاريخي زي كسوف الشمس كده مبيحصلش إلا كل 50 سنة مرة .. في موسم 1991-1992 اللي هو أخر موسم في الدوري الإنجليزي بنسخته القديمة اللي خد الدوري كان فرقة شيفيلد وينيسداي Sheffield Wednesday اللي عمرهم ما وصلوا لأول الدوري من 30 سنة ويدوبك الموسم خلص مشوفتش وشهم تاني إلا في ماتشات الكاس .. سنة 1981 فرقة أستون فيلا كسبت الدوري وكانت أول مرة من ساعة إنشاء النادي سنة 1910 وبرده خدوا البطولة مرة ومشفناش وشهم تاني.
النسخة الحالية من الدوري الإنجليزي إلي حد ما مفيهاش السيرك القومي بتاع زمان .. فيه شوية أسامي محافظة علي مكانتها بس بيبدلوا مراكزهم مع بعض .. صحيح فيه أسامي راحت في داهية زي لييدز يونايتد اللي كسبوا الدوري موسم 1999-2000 ودلوقتي في دوري الدرجة الثانية مش عارفين يصعدوا .. يمكن موسم 2011-2012 لما مانشستر سيتي خد الدوري الإنجليزي كانت صدمة للناس اللي بتتابع البطولة لإن قبل كده محدش كان حاطط اسم مانشستر سيتي ضمن الأسامي اللي ممكن تنافس .. بعد كده جت معجزة ليستر سيتي واللي في رأيي إنها مش حتحقق تاني .. حالياً إنت بقي عندك 6 أندية في إنجلترا أي حد فيهم قادر ياخد الدوري .. اللي وولفز عايز يحققه إنهم يبقوا العضو السابع .. إحتمال إيفرتون يبصلهم ويقولهم طب خدوني معاكوا والنبي ويبقوا الTop 8 أو الثمانية الكبار.
دلوقتي إنت عشان تبقي نادي ليك مكانتك في الدوري الإنجليزي فيه تعب ومجهود بيتعمل .. عندك فرقة زي أرسنال يمكن لو كانت بتلعب في الدوري الإسباني أو الألماني أو الإيطالي كانوا كل موسم إتأهلوا لChampions League بس إتفرج عليهم رغم إنهم بيلعبوا كورة حلوة أوي إلا إنهم بقالهم موسمين بره البطولة .. خد عندك مثال تاني زي مانشستر يونايتد اللي بيبعزقوا فلوسهم علي اللاعيبة ورغم كده مخدوش بطولة الدوري من ساعة ما السير (أليكس فيرجسون Alex Ferguson) إعتزل .. اللي عايزه إدارة وولفز تعمله لازم يخوف أي نادي في إنجلترا .. ده نادي السنة اللي فاتت كان بيلعب في دوري الدرجة الثانية ولو صرفوا فلوسهم بشوية تفتيح مخ إحتمال كبير يكرروا نفس معجزة ليسترسيتي .. الفلوس لما جريت في إيد الأندية الإنجليزية من أرباح بث الماتشات خلت أندية زمان كان همها إنها يدوبك تفضل تلعب في الدوري الممتاز بقت دلوقتي تحط فلوس عشان تحقق نتايج أكتر من مجرد البقاء .. ده مش معناه إن النجاح مضمون بس بيفتحلك سكة إن إحتمال في أي موسم يطلعك نادي زي الخازوق متفهمش جه منين وينافس علي البطولة لحد الأخر زي ما ليسترسيتي عمل .. دلوقتي خلاص عدت أيام إن أول ما لاعب عليه القيمة يطلع في نادي يقوم الأندية الكبار في إنجلترا يخطفوه.
زمان لما لاعب زي (روبين نيفيز Ruben Neves) ولا (ريتشاليسون Richalison) بتاع إيفرتون يظهر ويسمع في الدوري هوبا تلاقي العروض نازلة عليهم من مانشستر يونايتد ولا تشيلسي واللاعيب يتباع وياعيني إدارة ناديه بتبقي مش عارفه تعمل إيه .. دلوقتي زي ما قلتلك الأندية الإنجليزية بقي معاها فلوس تشتري أي لاعب هي عايزاه .. فكر فيها كده .. شوف اللاعيبة اللي (يوناي إيمري Unai Emri ) بتاع أرسنال إشتراهم الموسم ده وقارنهم إسم إسم باللاعيبة اللي مدير فني زي (نونو إسبريتو سانتوس Nuno Espirito Santos) إشتراهم لفرقته أو حد زي (ماركو سيلفا Marco Silva) بتاع إيفرتون حتكتشف إنهم ميفرقوش عن بعض حاجة .. مجرد افتح مخك لإحتمالية إن (يوناي إيمري) ميعرفش يحقق مع أرسنال أكتر من اللي (أرسين فينجر Arsene Wenger) حققه و إن أفكار (ماوريسيو ساري Mauricio Sarri) تفرقع في وشه في تشيلسي و إن تطور و نمو فرقه توتنهام يقف .. ساعتها حيبقي فيه كرسي فاضي لفرقة زي وولفز .. أي حد بره الستة الكبار في إنجلترا من حقه يبقي عنده طموح.
المصدر:
- مقالة بعنوان Seven-year plan at Wolves is no pipe dream, it’s a game changer .. خطة السبع سنين بتاع وولفز مش احلام محششين دي حاجة ممكن تقلب الموازين .. نشرت في جريدة The Daily Mail البريطانية و ده لينك المقالة الأصلية:
https://www.dailymail.co.uk/sport/article-6056901/SAMUEL-Seven-year-plan-Wolves-no-pipe-dream-game-changer.html
