فيه إيفينتات في الدنيا دي إحنا بصفتنا مواطنين غلابة كحيانين ممكن منعرفش عنها حاجة .. من ضمن الإيفينتات دي إن فيه دورة ألعاب أوليمبية شتوية اللي هي أساساً لو مشيت في الشارع سألت الناس عنها حيفتكروك بتقلش عليهم .. من ضمن الإيفينتات دي برده حاجة إسمها المنتدي الإقتصاي العالمي اللي المفروض إنه بيتعمل كل سنة في منتجع دافوس السويسري .. ده إيفينت بيتنظم كل سنة من يوم 17 لحد 21 يناير بيتعمل في منتجع في جبال الألب السويسرية و بيحضره أغني أغنياء الكون فطبيعي إن إحنا كفقراء ميشغلش بالنا الكلام ده .. إنت أصلاً ولا يفرق معاك إن المؤتمر ده إتلغي السنة دي و بكده بقاله سنتين مبيتعملش و السبب هو طبعاً جائحة كورونا Covid-19 .. النهاردة أنا عايز أديلك بس لمحة عن حياة الناس اللي معاها فلوس و أنا هنا بتكلم عن الناس اللي معاها فلوس بجد مش اللي إشتراله فيلا في مراسي و معاه BMW X-6 .. ده علي الله حكايته مقارنة باللي حنتكلم عنهم دلوقتي.
أخر سنة المنتدي يتعمل فيها سنة 2020 حضره بسم الله ما شاء الله 100 ملياردير و 53 رئيس دولة .. لنفترض إنك بتتكلم عن شركة أوروبية أو أميريكية زي مثلاً بما إننا جبنا سيرتها في المقدمة BMW الألمانية و حبيت تقعد تتكلم مع رئيس دولة ما إنت بتخطط تبني مصنع عندهم و بالمرة تتكلم مع كام ملياردير عشان يضخوا إستثمارات في شركتك .. جميل الرزق يحب الخفية .. بيجي الناس اللي منظمين المنتدي يقولولك إن إنتي يا BMW تقدري تبعتي 5 أفراد يقدروا يبقي معاهم الكارت الأربيض White Badge و الكارت الأبيض ده بيدي للي معاه الحق إنه يحجز معاد مع أي حد من المليارديرات و من رؤساء الدول اللي حيحضروا الإيفينت .. حلو جداً .. بتيجي BMW تسأل هو بكام الكارت الأبيض ده يتقالهم الكارت الواحد بيتدفعله 50,000 دولار .. يعني الشركة الواحدة بتدفع 250,000 دولار .. قول 10 شركات بس يا سيدي حتحضر الإيفينت فتلاقي المنتدي الإقتصادي العالمي دخله فلوس كاش علي الطرابيزة من بيع الكروت البيضاء بس 25 مليون دولار .. في النسخة الأخيرة اللي إتعملت للمنتدي سنة 2020 دخلهم من بيع الكروت البيضاء بس 45 مليون دولار ربح صافي كاش متشفي.
لك أن تتخيل إن حنفية فلوس زي دي إتقفلت بقالها سنتين .. و مش بس المنتدي الإقتصادي العالمي اللي إتعور جامد من إلغاء الإيفينت سنتين ورا بعض لإن الناس اللي عايشة في دافوس بتسترزق هي كمان .. نرجع تاني للمثال بتاع شركة BMW لإن صحيح فيه 5 غالباً بيكونوا من مجلس الإدارة هم اللي معاهم الكروت البيضاء بس الناس دي بتروح دافوس بطقم من الموظفين و المحاسبين و السواقين و الطباخين .. في المتوسط خالص الشركة الواحدة بتروح بوفد بيتكون من 100 بني أدم .. الناس دي محتاجة تاكل و تشرب و تنام و تتفسح و تتبسط و تتكيف .. في وقت المؤتمر ثمن أحقرها أوضة في أزبلها فندق فيكي يا دافوس بياخد 1000 دولار للسرير .. حاول بس برده تستوعب كم الفلوس اللي كانت رزق الناس اللي عايشة هناك.
أنا بس حابب أختم بإني برده أوريك لمحة من حياة الناس اللي بتروح إيفينتات زي دي .. لما متحور أوميكرون Omicron بقي عامل زي الطور الهايج في العالم كله فجه المنتدي الإقتصادي العالمي إتكلم مع الحكومة السويسرية إن إحنا لغينا المؤتمر السنة اللي فاتت و حيبقي خراب بيوت لو لغيناه تاني السنة دي .. جت الحكومة السويسرية قالتلهم طب أنا حعمل معاكوا دور واجب و أي حد عايز يحضر المؤتمر يجي قبلها ب10 أيام بس يعزل نفسه و خلاص .. جم إكتشفوا خازوق إن المؤتمر مثلاً لو بيحضره 100 ملياردير فكلهم بيجيوا بطياراتهم الخاصة قبل المؤتمر بيوم أو يوم المؤتمر و محدش فيهم حيرضي يعزل نفسه طواعية كده 10 أيام بعيد عن شغله و عيلته عشان خاطر عيون المؤتمر .. يتحرق المؤتمر أكتر ما هو محروق.
المصدر:
مقالة بعنوان Davos is dead نشرت في مجلة Politico و ده لينك المقالة الأصلية:
https://www.politico.com/news/2021/12/20/davos-is-dead-525732
