مشكلة (أندرو جارفيلد Andrew Garfield) في رأيي الشخصي إن حظه وحش و عشان أثبتلك ده تعالي ناخد الدور اللي خلاه معروف في الدنيا كلها لما جسد شخصية (بيتر باركر Peter Parker) أو سبايدر مان .. الناس كلها عارفه إن أفلام سبايدر مان بتطلع في ثلاثات .. (توبي ماجواير Tobey Maguire) جسد الشخصية في 3 أجزاء أخرجهم كلهم نفس المخرج اللي هو (سام رايمي Sam Raimi) .. (توم هولاند Tom Holland) هو كمان جسد الشخصية في 3 أجزاء أخرهم كان No Way Home .. حتي النسخة الكرتون اللي بتحكي قصة (مايلز موراليس Miles Morales) أو سبايدر مان الأسمراني بعد نجاح الجزء الأول اللي كان إسمه Into the Spider-Verse حيتم إنتاج جزئين كمان عشان الثلاثية تكمل .. مفيش إلا إبن البطة السودا (أندرو جارفيلد) اللي جسد الشخصية في فيلمين بس ضمن سلسلة The Amazing Spider-Man و ده اللي إحنا حنحاول نفهمه سوا دلوقتي .. هو الجزء الثالث من The Amazing Spider-Man متعملش ليه؟
الأول خليني بسرعة أقولك هو ليه السؤال ده إتسأل من الأساس؟ و ليه الناس فجأة بقت عايزه تشوف (أندرو جارفيلد) يرجع يبقي سبايدر مان لمرة ثالثة؟ .. الخبر اللي مفيش غير إتنين علي حدود موريتانيا مع مالي ميعرفهوش إن في الجزء الجديد من السلسة بتاعة (توم هولاند) اللي هو No Way Home سبايدر مان بيكون السبب إنه فتح علي نفسه فتوحة Multi-Verse أو الأزمنة الموازية و ده كان السبب إن طلعله النسختين بتوعه اللي هم (توبي ماجواير) و (أندرو جارفيلد) و خليني أقولك إن (أندرو) سحب السجادة من تحتهم كلهم .. أداء (اندرو جارفيلد) في الفيلم كان عالي أوي لدرجة إن ناس كتير بقت بتسأل نفسها هو ليه الواد ده معملش سبايدر مان تاني؟ .. فجأة (أندرو جارفيلد) بقي حلو و سخن و بالسمسم .. فتاني خليني أسأل السؤال اللي قلته في المقدمة .. ليه مشفناش فيلم The Amazing Spider-Man 3؟
خليني أحكيلك القصة بتسلسل الأحداث بتاعها عشان ده مهم تفهم منه هو إيه اللي حصل .. شوف يا سيد الناس .. سنة 2012 نزل فيلم The Amazing Spider-Man من إخراج (مارك ويب Marc Webb) و عجب الناس أوي خصوصاً الإنسجام بين بطلي الفيلم (أندرو جارفيلد) و (إيما ستون Emma Stone) .. في يونيو 2013 و في الوقت اللي الناس كلها مستنيه عرض الجزء الثاني The Amazing Spider-Man 3 السنة اللي وراها تقوم الشركة المنتجة للسلسلة Sony تطلع تقول للناس صحيح إحنا السنة الجاية حننزل الجزء الثاني بس إحنا بنقولكوا إن الجزء الثالث حينزل في 10 يونيو 2016 و مش بس كده .. الجزء الرابع حينزل يوم 4 مايو 2018 .. الناس كانت بتقطع هدومها من الفرحة.
هوبا الجزء الثاني نزل و الناس بلمت .. متفهمنيش غلط الفيلم كان حلو بس ميجيش حاجة قصاد الجزء الأولاني .. هنا شركة Sony جاتلها حالة رعب زي ما تكون بنت شافت صرصار في الحمام و قررت تبوظ الخطة اللي كانت ماشية عليها .. بدل ما الجزئين الثالث و الرابع حينزلوا في 2016 و 2018 ورا بعض فإحنا حنحشر في وسطهم فيلم The Sinister Six بحيث يتعرض في السينمات يوم 11 نوفمبر 2016 .. ده معناه إن الخطة الأصلية إترحلت سنتين .. بدل ما كان الجزء الثالث حينزل في 2016 بقي دلوقتي حينزل في 2018 و الجزء الرابع حينزل في 2020 .. لحد هنا كان الموضوع حيمشي لولا الحاجة اللي بتتملك قلب البني أدم بتخليه يعمل حاجات بيندم عليها بعدين .. الغيرة .. في الوقت اللي The Amazing Spider-Man 2 باظ كانت Marvel بقيادة بني أدم جاحد إسمه (كيفين فايجي Kevin Feige) بيكسروا الدنيا .. تقريباً مارفل مكنتش بتعمل فيلم وحش .. فكرة إنك تعمل عالم سينمائي فيه أبطال مختلفين و بتربطهم قصص مختلفة كانت أساساً فكرة Sony و عشان كده الناس اللي شافت فيلم The Amazing Spider-Man 2 حسوا الدنيا وسعت منهم شوية من كتر الشخصيات الشريرة اللي كانت جوه الفيلم و اللي إتقال إسمها في الفيلم و خليني أبقي واضح إن ده كان السبب في فشل الفيلم و هو إن طبخة العالم السينمائي بتاعة Sony إتسلقت بسرعة في الوقت اللي كانت لازم تستوي علي نار هادية زي ما مارفل بتعمل.
فجأة حصلت مصيبة الهاك Hack لسيرفرات شركة Sony من هاكرز من كوريا الشمالية في أواخر 2014 بسبب عرض فيلم The Interview .. حاول تستوعب حجم المصيبة من وجهة نظر شركة Sony و هي إن كل أفلامنا و خططنا و سيناريوهاتنا بتاعة أفلامنا الجاية إتسربت .. فيه ناس إتطردت من الشركة و مشاريع أفلام إتلغت و حاجة في منتهي النكد الحقيقة بس يمكن أهم كارثة في رأيي إن الناس اللي ماسكة شركة Sony بقي عندهم إحساس إن (أندرو جارفيلد) مش هو الشخص المناسب اللي ممكن ينقذ شركة Sony من الكارثة اللي هي فيها .. الإحساس ده بقي واقع لما (إيمي باسكال) المنتجة بتاعة سلسلة The Amazing Spider-Man رفعت سماعة التليفون و كلمت (كيفين فايجي) تطلب مساعدته عشان يحيي الشخصية تاني و دي كانت فرصة (كيفن فايجي) إنه ياخد من Sony أعز ما تملك .. شرط (كيفن فايجي) إن مارفل تساعد Sony هو إن مارفل تسيطر هي علي الشخصية و لإنه كان مستني منها إنها ترفض قام راميلها في المكالمة الفكرة دي .. إيه رأيك إن (توني ستارك Tony Stark) هو اللي يصمم البدلة بتاعة سبايدرمان؟ بذمتك مش حتبقي فكرة حلوة؟
تقدر تقول إن مشروع The Amazing Spider-Man 3 إترمي في الزبالة بمجرد ما مارفل أعلنت إن (توم هولاند) حيبقي سبايدر مان الجديد في فيلم Captain America: Civil War و وراها يوم 23 يونيو 2015 شركة Sony بتعلن إن (توم هولاند) حيجسد شخصية سبايدر مان في أول فيلم من الثلاثية بتاعته و اللي حيخرج الفيلم (جون واتس John Watts) .. هل (أندرو جارفيلد) حيرجع تاني عشان يبقي سبايدر مان؟ الحقيقة معرفش بس في الزمن بتاعنا ده متقدرش تقلل من قوة السوشيال ميديا إنها تقنع Sony إنها تجرب .. يمكن كانوا غلطانين لما قالوا إن (أندرو جارفيلد) ميقدرش ينقذ السلسلة .. أصله لما إتحط في فيلم واحد مع (دكتور سترينج) و (توبي ماجواير) و (توم هولاند) علم عليهم كلهم .. فيله لا؟
المصدر:
مقالة بعنوان The History of Andrew Garfield’s The Amazing Spider-Man 3 نشرت في موقع Gizmodo و ده لينك المقالة الأصلية:
https://gizmodo.com/the-history-of-andrew-garfields-the-amazing-spider-man-1848252674
