عدد سكان الأرض .. تفتكر كام بني أدم عاشوا من وقت سيدنا (أدم) عليه السلام؟

السنة دي اللي هي 2022 متوقع إن عدد البني أدمين اللي عايشين علي كوكب الأرض يوصل 8 مليار و ده الحقيقة معلومة مهم أوي بالنسبة لي تبقي مستوعب كويس أوي قيمتها .. نقيلك مثلاً سنة 1274 قبل الميلاد و دي السنة اللي (رمسيس الثاني) إنتضر فيها في معركة قادش أو سنة 1187 اللي (صلاح الدين الأيوبي) فتح فيها القدس الشريف .. في أي سنة من سنين تاريخ البني أدمين لحد العصور الوسطي لو جيت تشوف فيه كام بني أدم كان عايش علي الأرض حتلاقي عدد السكان في العالم كله أقل من عدد سكان القاهرة الكبري دلوقتي  .. أيوه عارف إن مخك بدأ يسخن و هو بيحاول يستوعب اللي أنا لسه قايله ده و عشان كده خليني أسالك .. تفتكر فيه كان بني أدم عاش علي وجه الأرض من وقت خلق سيدنا (أدم) عليه السلام لحد دلوقتي؟

السؤال ده فيه إتنين حاولوا يجاوبوا عليه اللي هم (توشيكو كانيدا Toshiko Kaneda) و (كارل هاوب Karl Haub) و دول إتنين شغلتهم هي الإحصاء السكاني و اللي الحقيقة أول حاجة كانوا عايزين يعرفوها هو إحنا بالصلاة علي النبي حنبدأ نعد من أول سنة كام .. أنا عارف إن نظرية النشوء و التطور دي من التابوهات اللي إحنا مش بنحب نتكلم عنها بس صدقني لو قلتلك إن كل الأدلة العلمية بتقول إن البشر متخلقوش بالصورة اللي إنت عليها دلوقتي .. خلال حياتنا علي الأرض و تعرضنا للتغيرات المناخية و الأوبئة و البكتريا و الأمراض و حروب تشيلنا و مصايب تحطنا و إنتقالنا كبشر من فكرة إننا نصطاد و نعيش في كهوف لحد المرحلة اللي إحنا فيها دلوقتي خدت وقت طويل و تطور رهيب .. ده خلي (توشيكو كانيدا) و (كارل هاوب) يحددوا سنة 190,000 قبل الميلاد كالسنة اللي عندها العداد حيبدأ يعد بس خلي بالك من نقطتين إلهي يسترك:

• أول نقطة إن المرحلة دي من تاريخنا كبشر اللي إنت ممكن تسميها مرحلة إنسان الغاب أو إنسان الكهف أو Prehistoric Mankind أو أيا كان الإسم اللي إنت حتديهولها كان عدد سكان البشر علي الأرض لسنين طويلة فعلياً قليل .. إنت بتتكلم عن بالكتير أوي 30,000 بني أدم .. يعني تخيل اللي عايشين في العالم كله قد عدد المتفرجين اللي بيحضروا ماتش كرة يد بين الأهلي و الزمالك في صالة مغطاة.
• تاني حاجة إن لسنين طويلة معدل عمر البني أدم المتوقع كان قصير .. البشر مكانوش بيعيشوا كتير لأسباب كتير الحقيقة بس يمكن أهمها إن التطور الطبي مكنش بالشكل اللي إنت عايشه دلوقتي.

حط الحاجتين دول جنب و بعض و حتلاقي إن النتيجة اللي (توشيكو كانيدا) و (كارل هاوب) وصلوا ليها إن عدد البشر اللي عاشوا علي الأرض من بدء الخليقة لحد دلوقتي 109 مليار بني أدم خلال ال194,000 سنة اللي فاتوا .. زود عليهم ال8 مليار اللي عايشين حالياً يبقي بتتكلم عن 117 مليار بني أدم .. عارف ده معناه إيه .. معناه إن قصاد كل بني أدم فينا عايش علي الأرض دلوقتي فيه قصاده 14 ماتوا قبل كده .. بس الأهم من كده إن عمر ما حصل في تاريخ البني أدمين إن 7% من إجمالي البشر اللي ربنا خلقهم من أول سيدنا (أدم) عليه السلام يبقوا عايشين في وقت واحد زينا دلوقتي .. مش فاهم إنت الحتة دي أنا عارف.

سنة 8000 قبل الميلاد عدد سكان الأرض كلهم كانوا 5 مليون بني أدم اللي هم ميجوش نص سكان الإسكندرية دلوقتي .. في السنة الأولي ميلادي عدد سكان الأرض كلهم كانوا 300 مليون بني أدم أغلبهم عايشين في قارة أسيا .. أول مرة عدد سكان الأرض يكسر حاجز المليار نسمة كان سنة 1800 .. بدأت تجمع الفكرة؟ .. دي أكتر فترة في تاريخنا كبني أدمين نبقي كتير أوي كده عايشين مع بعض في نفس الوقت .. و إنت بتقرأ الكلام اللي أنا كاتبه ده حاول تستوعب إن فيه 109 مليار بني أدم ماتوا قبلك .. إنت مستوعب؟ .. ده إن إحصائياً علي الأقل إحنا كبشر لسه بنكتب الصفحات الأولي من تاريخنا و دي حاجة في حد ذاتها غريبة جداً بالنسبة لي علي الأقل إني أستوعبها.

المصدر:

مقالة بعنوان This is how many humans have ever existed, according to researchers نشرت في موقع المنتدي الإقتصادي العالمي و ده لينك المقالة الأصلية:
https://www.weforum.org/agenda/2022/04/quantifying-human-existence/