في الوقت اللي صوتنا فيه إتنبح إن المستقبل بتاع الصناعات العسكرية هو الطيارات بدون طيار Drones و إن لازم نستثمر فلوس و وقت و علم عشان نطور صناعة محلية منها علي أساس إن كل كلامنا كان عن الطيارات الكبيرة اللي بتطير في الجو عشان يا إما تصور أو تضرب أهداف أرضية .. كان كلامنا عن طيارات حجمها مش صغير اللي هي نفس الطيارات اللي إنت كل شوية تسمع في الأخبار إن أميركا إستخدمتها في غارة جوية من الدول الإسلامية الكتير اللي هي مستبيحة شعوبها تقتل فيهم زي ما هي عايزه .. دلوقتي الوضع إختلف خالص يا (لينا) .. دلوقتي إحنا دخلنا في مرحلة الطيارات بدون طيار اللي بيستخدمها العساكر و تبقي جزء من تسليحهم مع البندقية و الذخيرة و السكينة .. إحنا دخلنا في عصر Drone40.
اللي حصل إن زي ما حكينا قبل كده فرنسا طالع عينها و عين اللي خلفوها في مالي .. حالياً مالي بيتعمل فيها عمليتين عسكريتين منفصلين عن بعض و إن كان فيه تنسيق بينهم .. العملية الأولانية إسمها عملية برخان Operation Barkhane و دي بتشارك فيها عناصر من القوات المسلحة الفرنساوية .. العملية الثانية هي عملية عسكرية مشتركة من الدول الأفريقية اللي حولين مالي و العملية دي إسمها MINUSMA و دي الحروف الأولانية من الكلمات الفرنساوي اللي معناها مهمة إعادة التوازن المشتركة متعددة الأبعاد اللي هي تحس إنها إسم رسالة ماجستير في كلية هندسة بس ما علينا دلوقتي .. المهم إن فرنسا عشان مش عارفه تسيطر علي الوضع في مالي .. قصدي تسرق ثروات مالي من غير مشاكل فهم طلبوا مساعدة دول أوروبية عشان تيجي تلحقهم و من ضمن الدول دي كانت بريطانيا .. من ضمن القوات البريطانية اللي راحت عناصر قوات خاصة من فرقة الفرسان الخفيفة Light Dragoons و كتيبة المشاة لواء أنجيليان الملكي Royal Anglian Regiment.
في نفس الوقت كان فيه إتجاه بقاله سنين جوه المؤسسة العسكرية البريطانية إنهم يمشوا في سكتين .. السكة الأولانية هي خفض عدد قواتهم المسلحة لإنهم مش عايزين يصرفوا كتير علي أكل و شرب و علاج و رعاية عدد كبير من الأفراد .. السكة الثانية هي إن القوات المسلحة الصغيرة دي حيتم تسليحها بتكنولوجيا أولاً غالية و عشان كده كان لازم حجم القوات المسلحة يقل عشان يعرفوا يوفروا التكنولوجيا دي ليهم كلهم و ثانياً و ده المهم تكنولوجيا مش متاحة لكتير من الدول علي مستوي العالم .. من ضمن التكنولوجيات العسكرية اللي كانوا شغالين إنها تبقي في إيد كل عسكري بريطاني هي طيارة بدون طيار صغيرة إسمها Drone40 من تصنيع شركة سلاح أسترالية إسمها DefendTex شغالة بأربع مراوح صغيرين عشان كده بيسموها Quad-Copter يعني أم أربع مراوح ..الناس اللي لعبت Call of Duty أو Medal of Honor عارفين إن فيه حاجة إسمها Grenade Launcher يعني قاذفة القنابل و دي بتاعة بتتركب تحت ماسورة البندقية الألية عشان تحط جواها قنبلة يدوية و تتك علي الزناد بتاعها عشان ترميهالك علي المكان اللي إنت عايز تفجره .. تعالي إنت بدل ما تحط قنبلة حط الDrone الصغيرة دي و بمجرد ما تتك علي الزناد و حتلاقيها طارت في الجو.
الدرون Drone40 دي ممكن تركبلها كذا حاجة .. ممكن تركبها كاميرات HD تصورلك ميدان المعركة كله و إنت كعسكري يبقي معاك تابليت تتفرج علي هو إيه اللي بيحصل حوليك .. ممكن يتركب عليها عبوة ناسفة صغيرة .. ممكن يتركب عليها متفجرات خارقة للدروع .. ممكن تركب عليها جهاز تشويش علي الرادار .. ممكن تركب عليها شعاع ليزر عشان ينشن علي هدف ما لمجرد إن طيارة في الجو تضربه .. الدرون الواحدة قطرها 40 مليمتر بس طولها حوالي 12.5 سنتيمتر .. ده معناه إن مش كل Grenade Launchers اللي في السوق تقدر تستخدمها .. يعني مثلاً الGrenade Launcher اللي إسمها AG36 من تصنيع شركة هيكلر أند كوخ Heckler & Koch الألمانية اللي حتلاقيها مستخدمة في القوات المسلحة البريطانية و الأميريكية تقدر بسهولة تستخدمها .. قصاد إن Grenade Launcher تانية زي M203 الأمريكاني مش حينفع تستخدمها عشان طول الدرون كبير عليها .. علي فكرة متقلقش شركة DefenseTex عاملة أوبشن في الدرون إنها ممكن يتم إطلاقها بالإيد يعني تحدفها في الجو أكنك بتحدف طوبة .. درونز زي دي في إيد عناصر قوات خاصة واقفة في كمين في منطقة صحراوية زي مالي ممكن تدي لعناصر الكمين الفرصة إنهم يبقوا كاشفين الميدان كلها بمدي رؤية 360 درجة.
المصدر:
- مقالة بعنوان British troops get small swarming drones they can fire from 40mm grenade launchers نشرت في مجلة The Drive و ده لينك المقالة الأصلية:
https://www.thedrive.com/the-war-zone/38909/british-troops-get-small-swarming-drones-they-can-fire-from-40mm-grenade-launchers
